Nǔ e nǔxatɔ́ lɛ́ kanbyɔ́ lɛ́ é

Étɛ́wú mɛɖé lɛ́ ka sixú ɖɔ ɖɔ xó e ɖo Ðɛhan 12:8 mɛ lɛ́ é ɔ, ‘xó e Jexóva ɖɔ lɛ́ é’ (wěmafɔ 7) dó gesí wɛ é ɖe, bɔ Biblu gbɛ yɔ̌yɔ́ ɔ tɔn ka ɖɔ ɖɔ “mɛ ma ɖó mɛɖé lɛ́” (wěmafɔ 6) dó gesí wɛ é ɖe?

Nǔ e lɛ́ lɛ̌ dó wěmafɔ ɔ lɛ́ é xlɛ́ ɖɔ gbɛtɔ́ lɛ́ dó gesí wɛ wěmafɔ énɛ́ ɖe.

Ðo Ðɛhan 12:2-5 mɛ ɔ, mǐ xa ɖɔ “mɛ e ɖo gbejí nú we lɛ́ bǐ ɖo vivɔ wɛ ɖo gbɛtɔ́ lɛ́ tɛ́ntin.” Gɔ́ ná ɔ, ɖo Ðɛhan 12:6-8 mɛ ɔ, é ɖɔ:

Wěmafɔ 6​gɔ́ ɔ ɖɔ xó dó nǔ e Mawu ná wa nú “mɛ ma ɖó mɛɖé” lɛ́ é jí. É ná hwlɛ́n yě.

Wěmafɔ 7​gɔ́ ɔ ɖɔ gɔ́ ná ɖɔ ‘xó e Jexova ɖɔ lɛ́ é ɔ, xó mímɛ́ ɖésú wɛ, xó tɔn lɛ́ cí kpatágan e è sínsín é ɖɔhun.’ Lěe nǔ nɔ cí nú mǐ dó xó Jexóva tɔn wú é nɛ́.—Ðɛh. 18:31; 119:140.

Din ɔ, ɖ’ayi nǔ e wěmafɔ e bɔ d’é wú é ɖɔ é wú, Ðɛhan 12:8 ɖɔ: ‘Jexóva, hwi wɛ ná cyɔ́n alɔ mǐ jí, hwi wɛ ná hwlɛ́n mǐ ɖo gbɛtɔ́ alɔkpa énɛ́ lɛ́ sí káká sɔ́yi.’ Nɛ̌ mǐ ka wa gbɔn bo tuun ɖɔ è ɖó ná ko tínmɛ Ebléegbe dodó ɔ bɔ é ná dó gesí “mɛ ma ɖó mɛɖé lɛ́”, bɔ é kún nyí ‘xó e Jexóva ɖɔ lɛ́ é’ ó?

Ðó wěmafɔ 8​gɔ́ ɔ wɛ bɔ dó wěmafɔ 7​gɔ́ ɔ éé ɖɔ ‘xó e Jexóva ɖɔ lɛ́ é’ wú wútu ɔ, mɛɖé lɛ́ sixú wá gbeta ɔ kɔn ɖɔ xó Mawu tɔn lɛ́ dó gesí wɛ é ɖe. Mǐ tuun ɖɔ gbeklánxámɛtɔ́ gěgé tɛ́n kpɔ́n bá sú ali dó Biblu ɔ alǒ sú kún tɔn dó có, Mawu nya xɛ ɖo jǐ tɔn.—Eza. 40:8; 1 Pi. 1:25.

Amɔ̌, é lɛ́ sɔgbe ɖɔ Jexóva nɔ nya xɛ ɖo mɛ ɖěɖěe xó è ɖɔ ɖo wěmafɔ 6​gɔ́ ɔ mɛ lɛ́ é jí. Jexóva ko d’alɔ “mɛ ma ɖó mɛɖé lɛ́” kpó “gbɛ̌dónánɔ” lɛ́ kpó, bo lɛ́ hwlɛ́n yě, bo ka ná lɛ́ kpo ɖo mɔ̌ wa wɛ.—Jɔb. 36:15; Ðɛh. 6:5; 31:2, 3; 54:9; 145:20.

Énɛ́ wú ɔ, étɛ́wú mǐ ka sixú wá gbeta ɔ kɔn ɖɔ wěmafɔ 8​gɔ́ ɔ ɖo gesí dó gbɛtɔ́ lɛ́ wɛ?

Nǔ e Ðɛhan énɛ́ ɖɔ lɛ́ é wɛ ɖe mɔ̌ xlɛ́.

Ðo bǐbɛ́mɛ Ðɛhan 12​gɔ́ ɔ tɔn ɔ, Davídi ɖɔ xó dó “mɛ e ɖo gbejí” nú Jexóva, bɔ mɛ nyanya lɛ́ ɖó adingban nú yě lɛ́ é wú. Énɛ́ gúdo ɔ, mǐ xa ɖɔ Jexóva ná sí te dó mɛ ɖěɖěe nɔ zán ɖɛ̌ yětɔn nyi do lɛ́ é jí. Ðɛhan ɔ ná mǐ gǎnjɛwú ɖɔ mǐ sixú ɖeji ɖɔ Mawu ná wa nǔ dó mɛ tɔn lɛ́ takúnmɛ, ɖó xó tɔn lɛ́ mɛ́.

Énɛ́ wú ɔ, wěmafɔ 8​gɔ́ ɔ ɖo ɖiɖɔ wɛ ɖɔ Jexóva ná cyɔ́n alɔ mɛ ma ɖó mɛɖé e wú mɛ nyanya lɛ́ wa nǔ dó lɛ́ é jí, bo ná lɛ́ nya xɛ ɖo yě jí.

Nǔ e Nǔwlánwlán mímɛ́ Ebléegbe tɔn lɛ́ sín wěxwɛ lɛ́ ɖɔ é wɛ Biblu mǐ lɔ tɔn ɖɔ. Biblu Septante Glɛ̌kigbe tɔn zán “mǐ” azɔn we ɖo wěmafɔ 8​gɔ́ ɔ mɛ, dó dó gesí gbejínɔtɔ́ ɖěɖěe è táfú, bɔ nǔ lɛ́ gbɛ́ dó yě lɛ́ é. Gǔdo mɛ ɔ, wěmafɔ 8​gɔ́ ɔ ɖɔ ɖɔ è ná cyɔ́n alɔ gbejínɔtɔ́ lɛ́ jí sín “gbɛtɔ́ alɔkpa énɛ́ lɛ́,” yě wɛ nyí mɛ e nɔ sɔ́ nǔ nyanya ɖó ajo lɛ́ é sí. (Ðɛh. 12:8, 9) Ðo Nǔwlánwlán mímɛ́ Ebléegbe tɔn e è tínmɛ dó Alámugbe mɛ é ɖé mɛ ɔ, wěmafɔ 8​gɔ́ ɔ ɖɔ: “Hwi, AKLÚNƆ ɔ, a ná cyɔ́n alɔ nǔjlɔ́jlɔ́watɔ́ lɛ́ jí, a ná nya xɛ ɖo yě jí sín jijimɛ nyanya élɔ́ sí káká sɔ́yi. Mɛ nyanya lɛ́ gbɔn fí ɖěbǔ ɔ, é nɔ cí asán e gbɔ́n gbɛtɔ́ví lɛ́ sín hun é ɖɔhun.” Énɛ́ lɛ́ gɔ́ so nú kúnnuɖenú e xlɛ́ ɖɔ Ðɛhan 12:8 kún ɖo gesí dó xó Mawu tɔn lɛ́ wɛ ó é.

Ðó hwɛjijɔ énɛ́ wú ɔ, wěmafɔ énɛ́ ɖo xlɛ́xlɛ́ wɛ ɖɔ nukúnɖíɖó ɖe nú “mɛ e ɖo gbejí”, bɔ Mawu ná hwlɛ́n yě lɛ́ é.