Nǔ tají ɖěɖěe kpɔ́ndéwú axɔ́sú Izlayɛ́li tɔn lɛ́ tɔn kplɔ́n mǐ lɛ́ é

1-2. Étɛ́ Biblu ka ɖɔ nú mǐ dó axɔ́sú Izlayɛ́li tɔn ɖé lɛ́ wú?

BIBLU ɖɔ xó dó súnnu e kpa acɛ ɖo Izlayɛ́li lɛ́ é 40 jɛjí wú.a É lɛ́ ɖɔ xó nú mǐ dó nǔ e yě mɛ ɖé lɛ́ wa lɛ́ é wú nyi wɛn. Ði kpɔ́ndéwú ɔ, axɔ́sú ɖagbe lɛ́ tlɛ wa nǔ nyanya ɖé lɛ́. Ðǒ ayi kpɔ́ndéwú axɔ́sú ɖagbe Davídi tɔn wú. Jexóva ɖɔ xó élɔ́ dó wǔ tɔn: “Mɛsɛntɔ́ ce Davídi . . . xwedó mì kpó ayi tɔn bǐ kpó. Nǔ e sɔgbe ɖo nukún ce mɛ lɛ́ kɛ́ɖɛ́ jɛ́n é nɔ bló.” (1 Axɔ́. 14:8) Amɔ̌, nya énɛ́ ba mɛsi bo lɛ́ blá gbě bɔ è hu nyɔ̌nu ɔ sín asú ɖo ahwangbénu.—2 Sam. 11:4, 14, 15.

² Ðo alɔ ɖěvo mɛ ɔ, axɔ́sú gbejímanɔtɔ́ gěgé wa nǔ ɖagbe ɖé lɛ́. Ðǒ ayi kpɔ́ndéwú Hlobowámu tɔn wú. Ðo Jexóva nukúnmɛ ɔ, é “wa nǔ e nylá . . . é.” (2 Tan 12:14) Amɔ̌, Hlobowámu wa nǔ ɖagbe ɖé lɛ́. Ði kpɔ́ndéwú ɔ, hwenu e Jexóva ɖɔ n’i ɖɔ é ní ma fun ahwan xá akɔta wǒ Izlayɛ́li tɔn lɛ́ ó, lé é ní jó yě dó bónú yě ní sɔ́ axɔ́sú ɖěvo é ɔ, é se tónú. É lɛ́ mɛ ahohó lɛ́ lɛ̌ dó toxo lɛ́, bɔ akɔta tɔn ɖu le tɔn.—1 Axɔ́. 12:21-24; 2 Tan 11:5-12.

3. Nǔkanbyɔ́ tají tɛ́ ka fɔ́n nyi te? Étɛ́ jí mǐ ka ná ɖɔ xó dó ɖo xóta élɔ́ mɛ?

³ Nǔkanbyɔ́ tají ɖé wá xwetɔ́n. Axɔ́sú Izlayɛ́li tɔn lɛ́ nɛ́ wa nǔ ɖagbe kpó nǔ nyanya kpó nɛ́, bɔ étɛ́ jí Jexóva ka nɔ zɔn dó dó wá gbeta ɔ kɔn ɖɔ axɔ́sú ɖé nyí gbejínɔtɔ́ alǒ gbɔ? Xósin nǔkanbyɔ́ énɛ́ tɔn ná d’alɔ mǐ bɔ mǐ ná mɔ nukúnnú jɛ nǔ e Jexóva nɔ ɖó nukún ɖo mǐ sí é wú. Mǐ ná ɖɔ xó dó nǔ ɖěɖěe é ɖo wɛn ɖɔ Jexóva nɔ da kpɔ́n hwenu e é ɖo axɔ́sú Izlayɛ́li tɔn lɛ́ kpɔ́n wɛ é atɔn jí: ninɔmɛ ayi mɛ tɔn yětɔn, hwɛvɛ́númɛ yětɔn, kpó lěe yě tɛ́ dó mawusinsɛn nǔgbó ɔ wú gbɔn é kpó.

YĚ YÍ WǍN NÚ JEXÓVA KPÓ AYI YĚTƆN BǏ KPÓ

4. Ðɔ vogbingbɔn e ɖo axɔ́sú gbejínɔtɔ́ lɛ́ kpó axɔ́sú gbejímanɔtɔ́ lɛ́ kpó tɛ́ntin é ɖokpó.

⁴ Axɔ́sú e yí wǎn nú Jexóva lɛ́ é nɔ sɛn ɛ kpó ayib e ɖo blěbú é ɖé kpó. Axɔ́sú ɖagbe Jozafáti ‘sɛn Jexóva kpó ayixa tɔn bǐ kpó.’ (2 Tan 22:9) Biblu ɖɔ xó élɔ́ dó Joziyási wú: ‘Axɔ́sú e ko kpa acɛ có Joziyási wá ɖu axɔ́sú lɛ́ é ɖě lɛ́ kɔ wá Jexóva gɔ́n kpó ayi tɔn bǐ kpó Joziyási ɖɔhun ǎ.’ (2 Axɔ́. 23:25) Bɔ Salomɔ́ɔ e ka wá wa nǔ nyanya ɖo kpikpoxɔmɛ é ka lo? ‘Ayixa tɔn bǐ sɔ́ ɖo Jexóva wú ǎ.’ (1 Axɔ́. 11:4) Gɔ́ ná ɔ, Biblu ɖɔ xó élɔ́ dó Abíya e nyí axɔ́sú gbejímanɔtɔ́ ɖěvo é wú: ‘É sɔ́ ayixa tɔn bǐ jó nú Jexóva ǎ.’—1 Axɔ́. 15:3.

5. Tínmɛ nǔ e è ní sɛn Jexóva kpó ayi bǐ kpó nyí é.

⁵ Étɛ́ ka nyí tínmɛ Jexóva sinsɛn kpó ayi mɛtɔn bǐ kpó tɔn lo? Mɛ e ayi tɔn ma má ǎ é nɔ sɛn Mawu ɖó é ɖó ná wa mɔ̌ kpowun wú ǎ. É nyɔ́ wa ɔ, é nɔ sɛn Jexóva ɖó é yí wǎn n’i tawun bo lɛ́ ɖó sísí e gɔ́ngɔ́n é n’i wútu. Gɔ́ ná ɔ, é nɔ kpo ɖo wǎnyíyí ɖaxó énɛ́ e é ɖó nú Jexóva é kpó sísí ɖaxó e é ɖó n’i é kpó ɖe xlɛ́ wɛ ɖo gbɛzán tɔn bǐ mɛ.

6. Nɛ̌ mǐ ka sixú kpo ɖo ayi e ma má ǎ é ɖé ɖó wɛ gbɔn? (Nǔnywɛ́xó 4:23; Matíe 5:29, 30)

⁶ Nɛ̌ mǐ ka sixú xwedó kpɔ́ndéwú axɔ́sú gbejínɔtɔ́ lɛ́ tɔn bo ma ná lɔn bónú ayi mǐtɔn ná má ǎ gbɔn? Gbɔn alɔ nyinyi nú nǔ e sixú wa nǔ dó mǐ wú lɛ́ é wiwa gblamɛ. Ði kpɔ́ndéwú ɔ, ayiɖeɖayǐ blíblí lɛ́ sixú zɔ́n bɔ ayi mǐtɔn ná má. Nǔ ɖokpó ɔ wɛ gbɛ̌ nyanya lɛ́ dídó kpó linlin nǔɖókan lɛ́ xixokplé tɔn ɖíɖó kpó lɔ nɔ wa. Ényí mǐ ɖ’ayi wú ɖɔ nǔɖé jɛ da vɔ́ nú wǎn e mǐ yí nú Jexóva é jí hǔn, mǐ ní yá wǔ wa nǔɖé bo nya nǔ mɔ̌hun dó gbě.—Xa Nǔnywɛ́xó 4:23; Matíe 5:29, 30.

7. Étɛ́wú é ka ɖo tají ɖɔ mǐ ní nyi alɔ nú nǔ ɖěbǔ e sixú vɔ́ da nú wǎn e mǐ yí nú Jexóva é?

⁷ Mǐ ɖó ná lɔn bónú ayi mǐtɔn ná má ǎ. Ényí mǐ ma ɖo acéjí ǎ ɔ, mǐ sixú lin ɖɔ ényí mǐ hɛn alɔnu mǐtɔn ján ɖo nǔ gbigbɔ tɔn lɛ́ kɔn ɔ, é kún sɔ́ byɔ́ ɖɔ mǐ ní nya nǔ ɖěɖěe sixú wa nǔ dó mǐ wú lɛ́ é dó gbě ó. Mǐ ní ɖɔ ɖɔ gbɛ mɛ fá tawun gbe ɖokpó bɔ jɔhɔn syɛ́nsyɛ́n lɛ́vɔ́ ɖo nyinyi wɛ. Ée a lɛ́ kɔ wá xɔ mɛ é ɔ, a flɔ́ myɔ bo jɛ myɔ ɔ xú jí. Amɔ̌, ényí a jó hɔn ɔ dó nyi nuvo ɔ, étɛ́ ka ná jɛ? Bléwún jɛ́n jɔhɔn fífá ná gɔ́ xɔ towe mɛ. Étɛ́ ka nyí nǔkplɔ́nmɛ ɔ? Mǐ ɖó ná wa nǔ hú nǔɖuɖu gbigbɔ tɔn e ná flɔ́ zo dó glɔ̌ nú xɔ́ntɔn e mǐ zun xá Jexóva é ɖuɖu kpowun. Mǐ ɖó ná lɛ́ sú hɔn mǐtɔn ɖo nǔjlɛ́dónǔwú linu, bónú nǔ ɖěɖěe sixú wa nǔ dó mǐ wú lɛ́ é ní ma byɔ́ ayi mǐtɔn mɛ lobo má ɛ ó, énɛ́ wɛ nyí “jɔhɔn” fífá gbɛ élɔ́ tɔn, alǒ nǔwalɔ ɖěɖěe Mawu ma yí wǎn ná ǎ lɛ́ é.—Efɛ́. 2:2.

HWƐ YĚTƆN LƐ́ VƐ́ NÚ YĚ

8-9. Hwenu e è gbɛ́ nǔ nú axɔ́sú Davídi kpó axɔ́sú Ezekiyási kpó é ɔ, nɛ̌ yě ka wa nǔ gbɔn? (Kpɔ́n ɖiɖe e ɖo akpa ɔ jí é.)

⁸ Lěe mǐ mɔ gbɔn wá yi é ɔ, axɔ́sú Davídi hu hwɛ syɛ́nsyɛ́n. Amɔ̌, hwenu e gbeyíɖɔ Natáan ɖɔ xó nú Davídi dó lěe nǔ cí nú Jexóva dó hwɛ e é hu é wú é ɔ, é sɔ́ éɖée hwe bɔ hwɛ tɔn vɛ́ n’i. (2 Sam. 12:13) Nǔ ɖěɖěe é wlán dó Ðɛhan 51​gɔ́ ɔ mɛ lɛ́ é xlɛ́ ɖɔ hwɛ tɔn lɛ́ vɛ́ n’i nǔgbó nǔgbó. Davídi bló nǔ cí nǔ ɖɔ hwɛ tɔn lɛ́ vɛ́ n’i ɖɔhun dó blɛ́ Natáan, alǒ dó nya ta ɖo tódɔnnúmɛ nu ǎ.—Ðɛh. 51:1, 2, 5, 6, 19.

⁹ Axɔ́sú Ezekiyási lɔ hu hwɛ dó Jexóva. Biblu ɖɔ xó élɔ́ dó wǔ tɔn: ‘Afɔ tɛ ayǐ jí wɛ é lɛ́ jɛ, bɔ Jexóva sin xomɛ dó è, bo sin xomɛ dó Judáa to ɔ kpó Jeluzalɛ́mu toxo ɔ kpó.’ (2 Tan 32:25) Étɛ́wú Ezekiyási ka jɛ go yí jí? Bóyá, é mɔ ɖɔ émí nyí nǔsúɖaxó ɖó dɔkun tɔn lɛ́, ɖu e é ɖu ɖo Asilíinu lɛ́ jí é, alǒ azɔn e è gbɔ n’i ɖo nǔjíwǔ linu é wútu. É sixú nyí ɖɔ goyíyí ɔ wɛ sísɛ́ ɛ bɔ é xlɛ́ dɔkun tɔn lɛ́ Babilɔ́nunu lɛ́, b’ɛ zɔ́n bɔ gbeyíɖɔ Ezayíi wá gbɛ́ nǔ n’i. (2 Axɔ́. 20:12-18) Amɔ̌ Davídi ɖɔhun ɔ, Ezekiyási sɔ́ éɖée hwe bɔ hwɛ tɔn vɛ́ n’i. (2 Tan 32:26) Wǎgbɔ tɔn ɔ, Jexóva mɔ ɖɔ axɔ́sú gbejínɔtɔ́ e “nɔ wa nǔ e nyɔ́” é wɛ n’i.—2 Axɔ́. 18:3.

10. Ée è gbɛ́ nǔ nú axɔ́sú Amasiyási é ɔ, nɛ̌ é ka wa nǔ gbɔn?

¹⁰ Judáa xɔ́sú Amasiyási gbɔn vo nú Davídi kpó Ezekiyási kpó; é wa nǔ ɖagbe “amɔ̌, ayixa tɔn bǐ ɖo Mawu jí ǎ.” (2 Tan 25:2) Nǔ nyanya tɛ́ é ka wa? Ée Jexóva d’alɔ Amasiyási b’ɛ ɖu ɖo Edɔ́munu lɛ́ jí gúdo é ɔ, é jɛ nǔmɛsɛn yětɔn lɛ́ sɛn jí.c Ée gbeyíɖɔ Jexóva tɔn ɖɔ xó nú axɔ́sú ɔ dó nǔ e é wa é wú é ɔ, é ɖótó è ɖěbǔ kpálíkpálí ǎ, bo lɛ́ nya ɛ.—2 Tan 25:14-16.

11. Sɔgbe xá 2 Kɔlɛ́ntinu lɛ́ 7:9, 11 ɔ, étɛ́ mǐ ka ɖó ná wa bɔ Jexóva ná sɔ́ hwɛ kɛ mǐ? (Kpɔ́n ɖiɖe lɛ́ lɔmɔ̌.)

¹¹ Étɛ́ kpɔ́ndéwú énɛ́ lɛ́ ka kplɔ́n mǐ? É byɔ́ ɖɔ hwɛ mǐtɔn lɛ́ ní vɛ́ nú mǐ, bónú mǐ ní wa nǔ e wú mǐ kpé é bǐ bo ma sɔ́ wá wa nǔ ɖokpó ɔ lɛ́ hweɖévonu ó. Ényí mɛxó agun tɔn lɛ́ ɖe wě xá mǐ, é ná bo tlɛ nyí dó nǔ e cí nǔ e ma hwɛ́n nǔɖé sɔmɔ̌ ǎ é ɖé wú ɔ ka lo? Mǐ ɖó ná lin ɖɔ Jexóva kún yí wǎn nú mǐ ó, alǒ nǔ mǐtɔn kún jɛ mɛxó agun tɔn lɛ́ tɔn jí ó ǎ. É tlɛ byɔ́ ɖɔ è ní ɖe wě xá axɔ́sú ɖagbe Izlayɛ́li tɔn lɛ́ lɔ bo lɛ́ gbɛ́ nǔ nú yě. (Ebl. 12:6) Ényí è gbɛ́ nǔ nú mǐ ɔ, mǐ ɖó ná (1) wa nǔ kpó mɛɖéesɔ́hwe kpó, (2) bló hǔzúhúzú e ɖo dandan lɛ́ é, (3) kpo ɖo Jexóva sɛn wɛ kpó ayi mǐtɔn bǐ kpó. Ényí hwɛ mǐtɔn lɛ́ vɛ́ nú mǐ ɔ, Jexóva ná sɔ́ hwɛ kɛ mǐ.—Xa 2 Kɔlɛ́ntinu lɛ́ 7:9, 11.

YĚ TƐ́ DÓ MAWUSINSƐN NǓGBÓ Ɔ WÚ

12. Vogbingbɔn tají tɛ́ ka ɖo axɔ́sú gbejínɔtɔ́ lɛ́ kpó axɔ́sú gbejímanɔtɔ́ lɛ́ kpó tɛ́ntin?

¹² Axɔ́sú ɖěɖěe Jexóva mɔ ɖɔ yě nyí gbejínɔtɔ́ lɛ́ é tɛ́ dó mawusinsɛn nǔgbó ɔ wú. Gɔ́ ná ɔ, yě dó wǔsyɛ́n lanmɛ nú mɛ e jí kpa acɛ dó wɛ yě ɖe lɛ́ é ɖɔ yě lɔ ní wa nǔ ɖokpó ɔ. Nǔgbó wɛ ɖɔ yě wa nǔ nyi do lěe mǐ ko mɔ gbɔn é. Amɔ̌, yě tɛ́ dó Jexóva wú bǐ mlɛ́mlɛ́ bo tlɛ dó gǎn syɛ́nsyɛ́n, bo sú kún dó nú vodúnsinsɛn sín to ɔ mɛ.d

13. Étɛ́wú Jexóva ka ɖɔ ɖɔ axɔ́sú Akábu nyí gbejímanɔtɔ́?

¹³ Axɔ́sú ɖěɖěe Jexóva mɔ ɖɔ gbejímanɔtɔ́ wɛ yě nyí lɛ́ é ka lo? É ɖo wɛn ɖɔ, é kún nyí nǔ e yě wa lɛ́ é bǐ wɛ nylá ó. Axɔ́sú nyanya Akábu tlɛ sɔ́ éɖée hwe ɖó bǎ ɖé mɛ, bɔ alɔ e é ɖó ɖo kú Nabɔ́ti tɔn mɛ é tlɛ vɛ́ n’i. (1 Axɔ́. 21:27-29) É lɛ́ mɛ ahohó lɛ́, bo lɛ́ fun ahwan dó Izlayɛ́li tamɛ bo ɖu ɖ’é jí. (1 Axɔ́. 20:21, 29; 22:39) Amɔ̌, Akábu wa nǔɖé b’ɛ nylá tawun. Asi tɔn sísɛ́ ɛ bɔ é sɔ́ vodúnsinsɛn ɖ’ajo. Nǔ énɛ́ e é wa é vɛ́ n’i kpɔ́n ǎ.—1 Axɔ́. 21:25, 26.

14. (a) Étɛ́wú Jexóva ka kpɔ́n axɔ́sú Hlobowámu dó mɔ gbejímanɔtɔ́? (b) Étɛ́ gěgé axɔ́sú gbejímanɔtɔ́ lɛ́ tɔn ka ɖó ɖo bǔ?

¹⁴ Ð’ayi kpɔ́ndéwú axɔ́sú gbejímanɔtɔ́ ɖěvo tɔn wú, Hlobowámu wɛ. Lěe mǐ mɔ gbɔn ɖo akpáxwé 2​gɔ́ ɔ mɛ é ɔ, é wa nǔ ɖagbe gěgé ɖo axɔ́súɖuɖu tɔn hwenu. Amɔ̌, hwenu e acɛkpikpa tɔn jínjɔ́n ayǐ bo lí dǒ ganjí gúdo é ɔ, é sɔ́ nɔ nyi sɛn Jexóva tɔn ǎ, bo jɛ nǔmɛsɛn lɛ́ sɛn jí. (2 Tan 12:1) Énɛ́ gúdo ɔ, é jɛ flúflú jí ɖo mawusinsɛn nǔgbó ɔ kpó vodúnsinsɛn kpó tɛ́ntin. (1 Axɔ́. 14:21-24) Hlobowámu kpó Akábu kpó kɛ́ɖɛ́ wɛ nyí axɔ́sú ɖěɖěe zɛ sín mawusinsɛn nǔgbó ɔ li jí lɛ́ é ǎ. Nǔgbó ɔ, gěgé axɔ́sú gbejímanɔtɔ́ lɛ́ tɔn wɛ nɔ gǔdo nú vodúnsinsɛn ɖo ali ɖé nu. É ɖo wɛn ɖɔ, ɖo Jexóva nukúnmɛ ɔ, cóbónú è ná tuun nú axɔ́sú ɖé nyí axɔ́sú ɖagbe alǒ gbɔ ɔ, nǔ tají e nɔ xlɛ́ é ɖokpó wɛ nyí lěe é nɔ tɛ́ dó mawusinsɛn nǔgbó ɔ wú gbɔn é.

15. Étɛ́wú mawusinsɛn nǔgbó ɔ ka ɖo tají nú Jexóva?

¹⁵ Étɛ́wú mawusinsɛn xó ɔ ka ɖo tají nú Jexóva sɔmɔ̌? Nǔ e wú wɛ é ɖokpó wɛ nyí ɖɔ axɔ́sú lɛ́ wɛ nɔ xlɛ́ ali togun Mawu tɔn ɖo mawusinsɛn nǔgbó ɔ kpáxwé. Gɔ́ ná ɔ, vodúnsinsɛn nɔ dɔn mɛ dó hwɛ syɛ́nsyɛ́n ɖěvo lɛ́ huhu kpó nǔagɔwiwa kpó mɛ jɛ́n wɛ. (Oz. 4:1, 2) Nǔ ɖěvo wɛ nyí ɖɔ axɔ́sú lɛ́ kpó toví yětɔn lɛ́ kpó ɔ, mɛɖeɖóvo Jexóva tɔn lɛ́ wɛ yě nyí. Mɔ̌ mɛ ɔ, Biblu nɔ sɔ́ vodúnsinsɛn e mɛ yě nɔ yi dó ta é jlɛ́ dó afɔdógbě wú. (Jel. 3:8, 9) Ényí mɛɖé dó afɔ gbě, alǒ ba nyɔ̌nu ɖěvo ɔ, mɛ e é da é wú wɛ é nɔ wa nǔ dó tlɔlɔ hú gǎn. Mɔ̌ ɖokpó ɔ, ényí mɛ e sɔ́ éɖée jó nú Jexóva é ɖé ɖ’alɔ ɖo vodúnsinsɛn mɛ ɔ, hwɛ wɛ é hu dó Jexóva ɖo ali e ɖo tlɔlɔ é nu.e—Sɛ́n. 4:23, 24.

16. Ðo Jexóva nukúnmɛ ɔ, vogbingbɔn tají tɛ́ ka ɖo nǔjlɔ́jlɔ́watɔ́ lɛ́ kpó mɛ nyanya lɛ́ kpó tɛ́ntin?

¹⁶ Étɛ́ ka nyí nǔkplɔ́nmɛ lɛ́? É ɖo wɛn ɖɔ, mǐ ɖó ná kán ɖ’é jí bo nyi alɔ nú vodúnsinsɛn. Amɔ̌, mǐ ɖó ná lɛ́ sɛn Jexóva lěe é ba gbɔn é hwebǐnu, bo ná lɛ́ kpo ɖo alɔnu mǐtɔn hɛn ján wɛ ɖo sinsɛnzɔ́ tɔn mɛ. Gbeyíɖɔ Malacíi tínmɛ vogbingbɔn e ɖo gbɛtɔ́ ɖagbe kpó gbɛtɔ́ nyanya kpó tɛ́ntin é nyi wɛn. É wlán ɖɔ: “Mi ná lɛ́vɔ́ mɔ vogbingbɔn e ɖo hwɛjijɔnɔ lɛ́ kpódó mɛdídá lɛ́ kpó tɛ́ntin é, vogbingbɔn e ɖo mɛ e nɔ sɛn mì kpó mɛ e ma nɔ sɛn mì ǎ lɛ́ kpó tɛ́ntin é.” (Mal. 3:18) Énɛ́ wú ɔ, mǐ ɖó ná lɔn bónú nǔ ɖěbǔ, káká jɛ gǎnmaɖó mǐtɔn lɛ́ kpó nǔwanyido mǐtɔn lɛ́ kpó jí ná dó awakanmɛ kú nú mǐ káká bɔ mǐ ná wá ɖó Mawu sinsɛn te ǎ. Hwɛ syɛ́nsyɛ́n huhu wɛ Jexóva sinsɛn ɖíɖó te ɖésú nyí.

17. Étɛ́wú mǐ ka ɖó ná ɖó ayi te dó mɛ e mǐ ná wá gbeta ɔ kɔn bá da é wú?

¹⁷ Ényí tlɛnnɔ wɛ nú we bɔ a ɖo linlin wɛ bo ná wlí alɔ ɔ, xó Malacíi tɔn lɛ́ sixú d’alɔ we bɔ a ná ba mɛ ɖagbe e a ná wlí alɔ xá é. Lin tamɛ dó nǔ élɔ́ wú: Mɛ ɔ sixú ɖó jijɔ ɖagbe ɖé lɛ́, amɔ̌, ényí é ma ɖo Mawu nǔgbó ɔ sɛn wɛ ǎ ɔ, Jexóva ka ná kpɔ́n ɛ dó mɔ nǔjlɔ́jlɔ́watɔ́ a? (2 Kɔ. 6:14) Ényí a da mɛ énɛ́ ɔ, é ka ná d’alɔ we bɔ a ná kpo ɖo gbejí nú Jexóva a? Lin tamɛ dó nǔ élɔ́ wú: Asi pagáwun axɔ́sú Salomɔ́ɔ tɔn lɛ́ sixú ko ɖó jijɔ ɖagbe ɖé lɛ́. Amɔ̌, yě nyí Jexóva sɛntɔ́ ǎ, bɔ kpɛɖé kpɛɖé ɔ, yě lílɛ́ jɔ nú Salomɔ́ɔ sín ayi dó vodúnsinsɛn mɛ.—1 Axɔ́. 11:1, 4.

18. Étɛ́ mɛjitɔ́ lɛ́ ka ɖó ná kplɔ́n vǐ yětɔn lɛ́?

¹⁸ Mɛjitɔ́ lɛ́ è mi, mi sixú zán kpɔ́ndéwú axɔ́sú lɛ́ tɔn e ɖo Biblu mɛ é dó bló bɔ akpakpa ná nɔ sɔ́ vǐ mitɔn lɛ́ dó Jexóva sinsɛn wú. Mi d’alɔ yě bónú yě ní mɔ nukúnnú jɛ wú ɖɔ cóbónú axɔ́sú ɖé ná nyí axɔ́sú ɖagbe, alǒ nyanya ɖo Jexóva nukúnmɛ ɔ, nǔ e wú é nɔ sín hú gǎn é wɛ nyí lěe axɔ́sú énɛ́ flɔ́ zo dó glɔ̌ nú mawusinsɛn nǔgbó ɔ gbɔn é. Mi nú xó mitɔn lɛ́ kpó kpɔ́ndéwú mitɔn kpó ní nɔ kplɔ́n vǐ mitɔn lɛ́ ɖɔ nǔ gbigbɔ tɔn lɛ́, ɖi Biblu kplɔ́nkplɔ́n, kplé lɛ́ yiyi kpó alɔ ɖíɖó ɖo sinsɛnzɔ́ ɔ mɛ kpó ɖo tají hú nǔ ɖěvo lɛ́ bǐ. (Mat. 6:33) É ma nyí mɔ̌ ǎ ɔ, vǐ mitɔn lɛ́ sixú lin ɖɔ Kúnnuɖetɔ́ Jexóva tɔn nyínyí kún sɔ́ nyí nǔ vo ɖé zɛ “sinsɛn e xwédo yětɔn nɔ yi é” mɛ ninɔ kpowun wú ó. Wǎgbɔ tɔn ɔ, yě sixú mɔ ɖɔ Jexóva sinsɛn kún ɖo tají sɔmɔ̌ ó, bo tlɛ sixú wá ɖó mawusinsɛn te bǐ mlɛ́mlɛ́.

19. Nukúnɖíɖó tɛ́ ka ɖe nú mɛ ɖěbǔ e ko ɖó Jexóva sinsɛn te é? (Kpɔ́n gbǎví “A sixú lɛ́ kɔ wá Jexóva gɔ́n!” ɔ lɔmɔ̌)

¹⁹ Ényí mɛɖé ɖó Jexóva sinsɛn te ɔ, xlɛ́xlɛ́ wɛ énɛ́ ka ɖe ɖɔ é kún sɔ́ sixú lɛ́ wá nyí xɔ́ntɔn Jexóva tɔn gbeɖé ó a? Éǒ, ɖó hwɛ tɔn sixú vɛ́ n’i bɔ é ná lɛ́ jɛ Jexóva sɛn jí. Cóbónú é ná kpa ɛ ɔ, é ná byɔ́ ɖɔ é ní sɔ́ éɖée hwe bo yí gbe nú alɔdó mɛxó agun tɔn lɛ́ tɔn. (Ja. 5:14) É jɛxá ɖɔ é ní dó gǎn ɖěbǔ e é byɔ́ é bo ná lɛ́ húzú xɔ́ntɔn Jexóva tɔn!

20. Ényí mǐ wa nǔ axɔ́sú gbejínɔtɔ́ lɛ́ ɖɔhun ɔ, linlin tɛ́ Jexóva ka ná ɖó dó mǐ wú?

²⁰ Étɛ́ lɛ́ kpɔ́ndéwú axɔ́sú Izlayɛ́li tɔn lɛ́ tɔn ka kplɔ́n mǐ lo? Ényí mǐ kpo ɖo Jexóva sɛn wɛ kpó ayi bǐ kpó ɔ, mǐ sixú ɖi axɔ́sú gbejínɔtɔ́ lɛ́. Mi nú nǔwanyido mǐtɔn lɛ́ ní nɔ kplɔ́n nǔ mǐ, bónú hwɛ mǐtɔn lɛ́ ní nɔ vɛ́ nú mǐ, lobonú mǐ ní nɔ jlá nǔ e é byɔ́ ɖɔ mǐ ní jlá ɖó lɛ́ é ɖó. Gɔ́ ná ɔ, mǐ ní nɔ lɛ́ flín lěe Mawu nǔgbó ɖokpó ɔ sinsɛn ɖo tají tawun sɔ é. Ényí a kpo ɖo gbejí nú Jexóva ɔ, é ná kpɔ́n we dó mɔ nǔjlɔ́jlɔ́watɔ́.