Lěe agun ɔ sixú nɔ ɖó linlin e Jexóva nɔ ɖó dó hwɛhutɔ́ lɛ́ wú é gbɔn é

1. Étɛ́ ba nú mɛ lɛ́ bǐ wɛ Jexóva ka ɖe?

JEXÓVA dá gbɛtɔ́ lɛ́ bo ná yě mɛɖésúsíninɔ. A nɔ zán nǔníná énɛ́ hwɛhwɛ, hwenu e a ɖo gbeta lɛ́ kɔn wá wɛ é. Gbeta tají hú gǎn e kɔn mɛɖé sixú wá é wɛ nyí ɖɔ é ná sɔ́ éɖée jó nú Jexóva, bo ná byɔ́ xwédo Tɔn e mɛ mɛsɛntɔ́ tɔn lɛ́ ɖe é mɛ. Jexóva ba ɖɔ mɛ lɛ́ bǐ ní wa mɔ̌. Étɛ́wú? Ðó é yí wǎn nú gbɛtɔ́ lɛ́ bo nɔ ba nǔ e nyɔ́ hú gǎn é nú yě. É ba ɖɔ yě ní ɖu xɔ́ntɔn zunzun xá émí sín vǐví, bo lɛ́ nɔ gbɛ káká sɔ́yi.—Sɛ́n. 30:19, 20; Ga. 6:7, 8.

2. Nɛ̌ nǔ ka nɔ cí nú Jexóva dó nǔwanyidotɔ́ e hwɛ yětɔn lɛ́ ma vɛ́ nú yě ǎ lɛ́ é wú? (1 Jaan 2:1)

² É ɖo mɔ̌ có, Jexóva nɔ hɛn mɛɖé gǎnnugǎnnu bónú é ná sɛn ɛ ǎ. É hun ali nú mɛ ɖokpó ɖokpó, bɔ yě ná wá gbeta nǔ e yě ná wa é tɔn kɔn. Amɔ̌, ényí klisánwun e bló batɛ́mu é ɖé hu hwɛ syɛ́nsyɛ́n ɖé ɔ ka lo? Ényí hwɛ tɔn lɛ́ ma vɛ́ n’i ǎ ɔ, è ɖó ná sɔ́ ɛ ɖó kɛ́n nú agun ɔ. (1 Kɔ. 5:13) Amɔ̌, nú é ná bo tlɛ nyí mɔ̌ ɔ, Jexóva nɔ kpo ɖo nukún ɖó wɛ vɛ́návɛ́ná ɖɔ nǔwanyidotɔ́ ɔ ná lɛ́ lɛ́ kɔ wá gɔ̌n émítɔn. Nǔgbó ɔ, hwɛjijɔ tají e wú é sɔ́ nǔ nú gbɛxixɔ ɔ é ɖokpó nɛ́, énɛ́ wɛ nyí, bo ná dó sɔ́ hwɛ kɛ hwɛhutɔ́ e hwɛ yětɔn lɛ́ vɛ́ ná é. (Xa 1 Jaan 2:1.) Mawu wǎnyíyínɔ mǐtɔn ɖo byɔ̌byɔ́ hwɛhutɔ́ lɛ́ wɛ kpó akpakpa sɔ́ mɛ kpó ɖɔ hwɛ yětɔn lɛ́ ní vɛ́ nú yě.—Zak. 1:3; Hlɔ̌. 2:4; Ja. 4:8.

3. Étɛ́ jí mǐ ka ná ɖɔ xó dó ɖo xóta élɔ́ mɛ?

³ Jexóva ba ɖɔ mǐ ní nɔ ɖó linlin e émí nɔ ɖó dó nǔwanyido kpó nǔwanyidotɔ́ lɛ́ kpó wú é. Xóta élɔ́ ná ɖɔ lěe mǐ sixú wa mɔ̌ gbɔn é. Ée a ná ɖo xóta élɔ́ xa wɛ é ɔ, ɖ’ayi (1) lěe è ɖe ɖɛ nǔwanyido syɛ́nsyɛ́n ɖé gbɔn ɖo agun Kɔlɛ́nti xwe kanweko nukɔntɔn ɔ tɔn mɛ é, (2) wě e mɛsɛ́dó Pɔ́lu ɖe xá mɛ hwenu e nǔwanyidotɔ́ ɖé sín hwɛ lɛ́ vɛ́ n’i é, kpó (3) nǔ e tan Biblu tɔn énɛ́ ɖe xlɛ́ dó linlin e Jexóva nɔ ɖó dó klisánwun e hu hwɛ syɛ́nsyɛ́n lɛ́ é wú é wú.

LĚE È ÐE ÐƐ NǓWANYIDO SYƐ́NSYƐ́N ÐÉ GBƆN ÐO XWE KANWEKO NUKƆNTƆN Ɔ MƐ É

4. Étɛ́ ka jɛ ɖo agun Kɔlɛ́nti tɔn mɛ? (1 Kɔlɛ́ntinu lɛ́ 5:1, 2)

⁴ Xa 1 Kɔlɛ́ntinu lɛ́ 5:1, 2. Ðo tomɛyiyi mɛsɛ́dó tɔn Pɔ́lu tɔn atɔngɔ́ ɔ hwenu ɔ, é se wɛn e gba ayi dó nú mɛ é ɖé dó agun yɔ̌yɔ́ e è ɖ’ayǐ ɖo Kɔlɛ́nti é wú. Nɔví súnnu ɖé ɖo agun énɛ́ mɛ, bo nɔ ɖó xó xá tɔ́ tɔn sín asi. Nǔwalɔ mɔ̌hun nylá tawun bɔ “è tlɛ nɔ mɔ . . . ɖo mɛ e ɖo akɔta ɖě lɛ́ mɛ lɛ́ é gɔ́n ǎ.” É nyí gbe kɛ́ɖɛ́ wɛ agun ɔ yí nú nǔwalɔ tɔn ǎ, loɔ, é cí ɖɔ yě lɛ́ gó ɖó nǔwalɔ ɔ wú ɖɔhun. Mɛɖé lɛ́ sixú ko lin ɖɔ lě do Mawu nɔ nyɔ́ xomɛ bo nɔ lɛ́ mɔ nukúnnú jɛ ninɔmɛ gbɛtɔ́ hwɛhutɔ́ lɛ́ tɔn mɛ sɔ é ɖe xlɛ́ wɛ émí ɖe gbɔn mɔ̌. Amɔ̌, Jexóva nɔ yí gbe nú nǔnyanyawiwa ɖo togun tɔn tɛ́ntin ǎ. É ɖo wɛn ɖɔ, wunhínhɔ́nnúwiwa nya énɛ́ tɔn ɖo cí kɔn dó nyǐkɔ ɖagbe agun ɔ tɔn wú wɛ. É sixú ko lɛ́ ɖo nǔ wa dó klisánwun e nɔ dó gbɛ̌ xá ɛ lɛ́ é wú wɛ. Énɛ́ wú ɔ, étɛ́ Pɔ́lu ka ɖe wě xá agun ɔ ɖɔ é ní wa?

5. Étɛ́ Pɔ́lu ka ɖɔ nú agun ɔ ɖɔ é ní wa? Étɛ́ ka nyí tínmɛ nǔ e é ɖɔ é tɔn? (1 Kɔlɛ́ntinu lɛ́ 5:13) (Kpɔ́n ɖiɖe ɔ lɔmɔ̌.)

⁵ Xa 1 Kɔlɛ́ntinu lɛ́ 5:13. Mawu sɔ́ dó ayi mɛ nú Pɔ́lu bɔ é wlán wěma e ɖe xlɛ́ ɖɔ è ɖó ná sɔ́ hwɛhutɔ́ e hwɛ tɔn lɛ́ ma vɛ́ ná ǎ é ɖé ɖó kɛ́n nú agun ɔ é ɖé sɛ́dó nɔví lɛ́. Nɛ̌ klisánwun gbejínɔtɔ́ lɛ́ ka ɖó ná wa nǔ xá ɛ gbɔn? Pɔ́lu ɖɔ nú yě ɖɔ, yě ní “ma sɔ́ nɔ dó gbɛ̌” xá ɛ ɖě ó. Étɛ́ ɖɔ wɛ é ka ɖe? Pɔ́lu tínmɛ ɖɔ gbeɖiɖe énɛ́ lɛ́vɔ́ ɖo tíntínmɛ wɛ ɖɔ, yě kún tlɛ ná “nɔ ɖu nǔ xá mɛ mɔ̌hun lɔ vɔ́vɔ́ ó.” (1 Kɔ. 5:11) Ayǐ jínjɔ́n bo ɖu nǔ xá mɛɖé sixú hun hwenu gěgé zínzán ɖó kpɔ́ xá mɛ ɔ sín ali. Hǔn, é ɖo wɛn ɖɔ, ɖiɖɔ wɛ Pɔ́lu ɖe ɖɔ agun ɔ kún ɖó ná dó gbɛ̌ xá nya énɛ́ ó. Énɛ́ ná nya xɛ ɖo agun ɔ jí, bɔ jijɔ tɔn nyanya ɔ ná wa nǔ dó yě wú ǎ. (1 Kɔ. 5:5-7) Gɔ́ ná ɔ, zɔ ninɔ nú nya ɔ sixú zɔ́n bɔ é ná mɔ nǔ jɛ lě do é ko jɛ zɔ nú Jexóva sɔ é wú, bɔ winnyá sixú hu i, lobɔ hwɛ tɔn lɛ́ ná vɛ́ n’i.

6. Ðagbe tɛ́ wěmasɛ́dómɛ Pɔ́lu tɔn ka wa nú agun ɔ kpó nǔwanyidotɔ́ ɔ kpó?

⁶ Ée Pɔ́lu sɛ́ wěmasɛ́dómɛ tɔn dó klisánwun e ɖo Kɔlɛ́nti lɛ́ é gúdo é ɔ, é jɛ lěe agun ɔ ná wa nǔ gbɔn é kanbyɔ́ éɖée jí. Nukɔnmɛ ɔ, Titu hɛn wɛn ɖagbe ɖé wá n’i. Agun ɔ wa nǔ ganjí hwenu e yě mɔ wěmasɛ́dómɛ Pɔ́lu tɔn é. (2 Kɔ. 7:6, 7) Yě xwedó wěɖexámɛ tɔn lɛ́. Gɔ́ ná ɔ, ée Pɔ́lu sɛ́ wěma ɔ dó bɔ sun ɖé lɛ́ wá yi é ɔ, nǔwanyidotɔ́ ɔ sín hwɛ lɛ́ vɛ́ n’i b’ɛ lɛ́ kɔ sín yě gǔdo! É húzú nǔwalɔ tɔn kpó jijɔ tɔn kpó, bo jɛ nǔgbódodó jlɔ́jlɔ́ Jexóva tɔn lɛ́ xwedó jí. (2 Kɔ. 7:8-11) Étɛ́ Pɔ́lu ka ɖɔ nú agun ɔ ɖɔ é ní wa lo?

LĚE AGUN Ɔ ÐÓ NÁ WA NǓ XÁ HWƐHUTƆ́ E HWƐ TƆN LƐ́ VƐ́ NÁ É GBƆN É

7. Ðagbe tɛ́ sɔ́ e è sɔ́ nǔwanyidotɔ́ ɔ ɖó kɛ́n nú agun ɔ é ka wa? (2 Kɔlɛ́ntinu lɛ́ 2:5-8)

⁷ Xa 2 Kɔlɛ́ntinu lɛ́ 2:5-8. Pɔ́lu ɖɔ ɖɔ “tó e mɛ gěgé dɔn nú nya énɛ́ é ko kpé.” Ðo xógbe ɖěvo mɛ ɔ, nǔgbɛ́númɛ ɔ ko wa nǔ e é ɖó ná wa ɖo nya ɔ wú é. Étɛ́ é ka ɖó ná wa? É ná bló bɔ hwɛ tɔn lɛ́ ná vɛ́ n’i.—Ebl. 12:11.

8. Étɛ́ Pɔ́lu ka wá ɖɔ nú agun ɔ ɖɔ é ní wa?

⁸ Énɛ́ wú ɔ, Pɔ́lu ɖe wě xá agun ɔ ɖɔ é “ɖó ná sɔ́ hwɛ kɛ ɛ kpó xomɛnyínyɔ́ kpó bo dó gbɔ n’i,” lobo “ɖe xlɛ́ ɛ ɖɔ émí yí wǎn n’i.” Ð’ayi wú ɖɔ, Pɔ́lu ba ɖɔ agun ɔ ní wa nǔ hú gbe yíyí nú nya ɔ bónú é ní lɛ́ kɔ wá togun Jexóva tɔn mɛ kpowun. Pɔ́lu ba ɖɔ nɔví lɛ́ ní ná gǎnjɛwú nya e hwɛ tɔn lɛ́ vɛ́ ná é gbɔn xó yětɔn lɛ́ kpó lěe yě nɔ wa nǔ gbɔn é kpó gblamɛ ɖɔ yě sɔ́ hwɛ kɛ ɛ nǔgbó, bo lɛ́ yí wǎn n’i nǔgbó. Mɔ̌ mɛ ɔ, yě ná xlɛ́ nyi wɛn ɖɔ é víví nú yě ɖɔ é lɛ́ kɔ wá agun ɔ mɛ.

9. Étɛ́wú mɛɖé lɛ́ ka sixú ko dán lɛjɛlɛjɛ dó hwɛ sísɔ́ kɛ hwɛhutɔ́ e hwɛ tɔn lɛ́ vɛ́ ná é wú?

⁹ É ka vɛ́ wǔ nú mɛɖé lɛ́ bónú yě ná nyɔ́ xomɛ dó nya ɔ wú hwenu e é lɛ́ kɔ wá agun ɔ mɛ gúdo é wɛ a? Tan ɔ ɖɔ mɔ̌ nú mǐ ǎ, amɔ̌, nǔ sixú ko nyí mɔ̌. È ná ɖɔ ɔ, nǔwalɔ tɔn lɛ́ ko dɔn hunnyahunnya byɔ́ agun ɔ blěbú mɛ, bo tlɛ sixú ko dó winnyá mɛɖé lɛ́. Mɛɖé lɛ́ sixú ko mɔ ɖɔ é kún sɔgbe bónú è ná dó doo nú nya ɔ kpó akpakpa sɔ́ mɛ kpó ó, ɖó yědɛɛ lɛ́ ko dó gǎn syɛ́nsyɛ́n bo kpo ɖo mǐmɛ́ jí ɖo walɔ lixo. (Sɔ́ jlɛ́ dó Luki 15:28-30 wú.) Amɔ̌, étɛ́wú é ka ɖo tají ɖɔ agun ɔ ní ɖe wǎnyíyí adodwé xlɛ́ nɔví súnnu yětɔn e lɛ́ kɔ wá é?

10-11. Ényí mɛxó agun tɔn lɛ́ gbɛ́ ɖɔ émí kún ná sɔ́ hwɛ kɛ hwɛhutɔ́ e hwɛ tɔn lɛ́ vɛ́ ná é ó ɔ, étɛ́ ka sixú jɛ?

¹⁰ Ényí mɛxó agun tɔn lɛ́ gbɛ́ ɖɔ émí kún ná yí nya e hwɛ tɔn lɛ́ vɛ́ ná nǔgbó nǔgbó é dó agun mɛ ó, alǒ, ényí agun ɔ gbɛ́ ɖɔ émí kún ná ɖe wǎnyíyí xlɛ́ ɛ ó ɔ, dǒ nukún nǔ e sixú ko jɛ é mɛ kpɔ́n. Wǔ sixú ko “kú i zɛ xwé wú.” É sixú mɔ ɖɔ nukúnɖíɖó ɖě kún sɔ́ ɖe nú émí ó. É tlɛ sixú jó gbe dó gǎn e dó wɛ é ɖe bá lɛ́ zun xɔ́ntɔn vívɛ́ xá Mawu é wú.

¹¹ Éé tlɛ ná nylá hú bǐ é wɛ nyí ɖɔ, ényí nɔví e ɖo agun ɔ mɛ lɛ́ é gbɛ́ ɖɔ émí kún ná sɔ́ hwɛ kɛ hwɛhutɔ́ e hwɛ tɔn lɛ́ vɛ́ ná é ó ɔ, yě ná sɔ́ xɔ́ntɔn e yěɖésúnɔ zun xá Jexóva é ɖ’axɔ́ nu. Étɛ́wú? Ðó yě ná ɖo kpɔ́ndéwú Jexóva, éé nɔ sɔ́ hwɛ kɛ hwɛhutɔ́ e hwɛ yětɔn lɛ́ vɛ́ ná lɛ́ é tɔn xwedó wɛ gbɔn mɔ̌ ǎ, é nyɔ́ wa ɔ, Satáan e dá, bo ma nɔ kú nǔbláwǔ nú mɛ ǎ é sín kpɔ́ndéwú xwedó wɛ yě ná ɖe gbɔn mɔ̌. Nǔgbó ɔ, azɔ̌wanú e Awǒvi sixú zán dó bló bɔ nya ɔ ma sɔ́ ná sɛn Jexóva ǎ é wɛ yě ná húzú.—2 Kɔ. 2:10, 11; Efɛ́. 4:27.

12. Nɛ̌ agun ɔ ka sixú wa nǔ Jexóva ɖɔhun gbɔn?

¹² Amɔ̌, nɛ̌ agun e ɖo Kɔlɛ́nti é ka sixú wa nǔ Jexóva ɖɔhun b’ɛ ma ná nyí Satáan ɖɔhun ǎ gbɔn? Gbɔn nǔ wiwa xá hwɛhutɔ́ e hwɛ yětɔn vɛ́ ná lɛ́ é lěe Jexóva nɔ wa gbɔn é ɖɔhun gblamɛ. Ð’ayi nǔ e bibluwlántɔ́ ɖé lɛ́ wlán dó Jexóva wú é wú. Davídi ɖɔ: “A nyɔ́, a ɖo gbesisɔmɛ bo ná sɔ́ hwɛ kɛ mɛ.” (Ðɛh. 86:5) Micée wlán ɖɔ: ‘Jexóva, è sixú jlɛ́ vodún ɖěbǔ dó wǔ towe ǎ. A nɔ sɔ́ hwɛ kɛ mɛ, bo nɔ wɔn hwɛ e è hu lɛ́ é.’ (Micée 7:18) Bɔ Ezayíi ɖɔ: ‘Mɛdídá lɛ́ ní jó walɔ nyanya dó, mɛ nyanya lɛ́ ní jó linlin baɖabaɖa dó. Yě bǐ ní lɛ́ kɔ wá Jexóva gɔ́n, ɖó é ná kú nǔbláwǔ nú yě. Yě bǐ ní wá Mawu mǐtɔn gɔ́n, ɖó Mawu mǐtɔn ɔ, hwɛsɔ́kɛmɛ nɔ ci kɔ n’i ǎ.’—Eza. 55:7.

13. Étɛ́wú é ka jɛxá ɖɔ è ní ma dán lɛjɛlɛjɛ dó nya ɔ yíyí dó agun mɛ wú ó? (Kpɔ́n gbǎví “Hwetɛ́nu è ka lɛ́vɔ́ yí nya e ɖo Kɔlɛ́nti é d’agun mɛ?”)

¹³ Bo ná dó xwedó kpɔ́ndéwú Jexóva tɔn ɔ, agun Kɔlɛ́nti tɔn ɔ ɖó ná dó doo nú nya e hwɛ tɔn lɛ́ vɛ́ ná é, bo lɛ́ ná ɛ gǎnjɛwú ɖɔ émí yí wǎn n’i. Wěɖexámɛ Pɔ́lu tɔn e agun ɔ xwedó bo dó doo nú hwɛhutɔ́ e hwɛ tɔn lɛ́ vɛ́ ná é xlɛ́ ɖɔ é “nɔ se tónú ɖo nǔ bǐ mɛ.” (2 Kɔ. 2:9) Nǔgbó wɛ ɖɔ è sɔ́ ɛ ɖó kɛ́n nú agun ɔ é ɔ, sunzán yɔywɛ ɖé jɛ́n é bló, amɔ̌, nǔgbɛ́númɛ ɔ zɔ́n bɔ hwɛ tɔn lɛ́ vɛ́ n’i. Énɛ́ wú ɔ, é sɔ́ byɔ́ ɖɔ mɛxó lɛ́ ní dán lɛjɛlɛjɛ cóbó lɛ́ yí i dó agun mɛ ǎ.

LĚE MǏ SIXÚ XWEDÓ KPƆ́NDÉWÚ NǓJLƆ́JLƆ́WIWA KPÓ NǓBLÁWǓKÚNÚMƐ KPÓ JEXÓVA TƆN GBƆN É

14-15. Étɛ́ lɛ́ nǔ e jɛ ɖo Kɔlɛ́nti é ka sixú kplɔ́n mǐ? (2 Piyɛ́ɛ 3:9) (Kpɔ́n ɖiɖe ɔ lɔmɔ̌.)

¹⁴ Ninɔmɛ e xwetɔ́n ɖo Kɔlɛ́nti hwexónu tɔn ɔ é ɔ, è wlán lěe è ɖe ɖɛ gbɔn é ɖ’ayǐ “bo ná dó kplɔ́n nǔ mǐ.” (Hlɔ̌. 15:4) Tan énɛ́ kplɔ́n mǐ ɖɔ, Jexóva kún nɔ sɔ́ nukún kpɛví dó kpɔ́n hwɛ syɛ́nsyɛ́n huhu ɖo togun tɔn mɛ ó. Mɛɖé lɛ́ sixú lin ɖɔ ɖó Jexóva ɔ nǔbláwǔkúnúmɛtɔ́ wɛ é nyí wútu ɔ, é ná yí gbe bɔ mɛ e hwɛ tɔn lɛ́ ma vɛ́ ná ǎ é ɖé ná kpo ɖo agun ɔ mɛ, amɔ̌, mɔ̌ wɛ Jexóva nɔ kú nǔbláwǔ nú mɛ gbɔn ǎ. Nǔbláwǔkúnúmɛtɔ́ wɛ Jexóva nyí, amɔ̌, é nɔ jó jɛ nyi ko mɛ nú nǔ ǎ, mɔ̌ jɛ́n é ma ka nɔ lɛ́ túntún da kpo nú nǔgbódodó tɔn lɛ́ ǎ é nɛ́. (Ju. 4) Ényí Jexóva yí gbe bɔ hwɛhutɔ́ e hwɛ yětɔn lɛ́ ma vɛ́ ná ǎ lɛ́ é kpo ɖo agun ɔ mɛ ɔ, é ná nyí nǔbláwǔkúnúmɛ sín nǔ ɖé ǎ, ɖó é sixú wa nǔ dó agun ɔ wú.—Nǔx. 13:20; 1 Kɔ. 15:33.

¹⁵ Amɔ̌, mǐ kplɔ́n ɖɔ Jexóva kún ba ɖɔ è ní sú mɛ ɖěbǔ sín kún dó ó. É nɔ ba ná hwlɛ́n mɛ lɛ́ hweɖébǔnu e é nyɔ́ bló dó é. É nɔ kú nǔbláwǔ nú mɛ ɖěɖěe nɔ húzú lěe yě nɔ lin nǔ gbɔn bo nɔ wa nǔ gbɔn, lobo ba ná lɛ́ húzú xɔ́ntɔn tɔn lɛ́ é. (Ezek. 33:11; xa 2 Piyɛ́ɛ 3:9.) Énɛ́ wú ɔ, hwenu e nya e ɖo Kɔlɛ́nti é sín hwɛ lɛ́ vɛ́ n’i bɔ é lɛ́ kɔ sín gbɛ e zán wɛ é ɖe é gúdo é ɔ, Jexóva zán Pɔ́lu dó tínmɛ nú agun ɔ ɖɔ è ɖó ná sɔ́ hwɛ kɛ nya ɔ, bo lɛ́ dó doo n’i.

16. Nɛ̌ nǔ ka cí nú we dó lěe è ɖe ɖɛ ninɔmɛ e xwetɔ́n ɖo Kɔlɛ́nti é gbɔn é wú?

¹⁶ Tan e ɖɔ xó dó lěe è ɖe ɖɛ ninɔmɛ e xwetɔ́n ɖo Kɔlɛ́nti é gbɔn é wú é d’alɔ mǐ bɔ mǐ mɔ nukúnnú jɛ lě do Jexóva yí wǎn nú mɛ, nɔ wa nǔ jlɔ́jlɔ́, bo nɔ lɛ́ wa nǔ kpó hwɛjijɔ kpó sɔ é mɛ. (Ðɛh. 33:5) Énɛ́ sísɛ́ we bɔ a ná lɛ́ kpa susu nú Mawu mǐtɔn d’é jí ǎ cé? È ná ɖɔ ɔ, mǐ mɛ bǐ wɛ nyí hwɛhutɔ́, bo ɖó hwɛsɔ́kɛmɛ tɔn sín hudó. É lɛ́ su nukún mǐtɔn mɛ ɖɔ Jexóva sɔ́ nǔ nú gbɛxixɔ ɔ bónú è ná dó sixú sɔ́ hwɛ mǐtɔn lɛ́ kɛ mǐ. Tuuntuun ɖɔ Jexóva yí wǎn nú togun tɔn tawun bo nɔ lɛ́ ba nǔ ɖagbe hú gǎn ɔ n’i dó gbɔ nú mɛ, bo lɛ́ vɔ́ gǎnjɛwú ná mɛ kpɔ́n!

17. Étɛ́ lɛ́ jí è ka ná ɖɔ xó dó ɖo xóta e bɔ d’é wú lɛ́ é mɛ?

¹⁷ Nɛ̌ è ka nɔ ɖe ɖɛ hwɛhuhu sín xó lɛ́ gbɔn ɖo égbé? Nɛ̌ mɛxó agun tɔn lɛ́ ka sixú ɖe xlɛ́ ɖɔ Jexóva ɖɔhun ɔ, émí ba ná d’alɔ hwɛhutɔ́ ɖé bɔ hwɛ tɔn lɛ́ ná vɛ́ n’i gbɔn? Ényí mɛxó agun tɔn lɛ́ wá gbeta ɔ kɔn bá sɔ́ mɛɖé ɖó kɛ́n nú agun ɔ alǒ vɔ́ mɛɖé yí dó agun mɛ ɔ, nɛ̌ agun ɔ ka ɖó ná wa nǔ gbɔn? È ná ɖɔ xó dó nǔkanbyɔ́ énɛ́ lɛ́ jí ɖo xóta e bɔ d’é wú lɛ́ é mɛ.