XÓTA NǓKPLƆ́NKPLƆ́N TƆN 9
HAN 51 Mawu wɛ mǐ zé mǐɖée jó ná!
Ma dán lɛjɛlɛjɛ dó batɛ́mu blóbló wú ó
“Étɛ́ nɔ te kpɔ́n wɛ a ka ɖe. . . ? Sí te bónú è ná bló batɛ́mu nú we.”—MƐ. 22:16.
XÓNUSƆ́ÐÓTE
Gbɔn kpɔ́ndéwú Samalíinu lɛ́, Sólu Táasinu ɔ, Kɔnɛ́yi kpó Kɔlɛ́ntinu lɛ́ kpó tɔn gbígbéjé kpɔ́n gblamɛ ɔ, a ná mɔ hlɔ̌nhlɔ́n e sín hudó a ɖó bá yi nukɔn bá bló batɛ́mu é.
1. Ðɔ hwɛjijɔ ɖagbe e wú è nɔ bló batɛ́mu é ɖé lɛ́.
A KA yí wǎn nú Jexóva Mawu, éé ná we nǔníná ɖagbe ɖagbe lɛ́ bǐ káká jɛ gbɛ ɖésú jí é a? A ka ba ná xlɛ́ ɛ ɖɔ émí yí wǎn n’i a? Ali ɖagbe hú gǎn e nu a sixú wa mɔ̌ ɖe é wɛ nyí ɖɔ a ná sɔ́ hwiɖée jó n’i bo ná wá ɖe xlɛ́ gbɔn batɛ́mu bíbló gblamɛ. Afɔ énɛ́ lɛ́ ɖiɖe ná zɔ́n bɔ a ná byɔ́ xwédo Jexóva tɔn mɛ. Énɛ́ ná zɔ́n bɔ Tɔ́ towe, éé lɛ́ nyí Xɔ́ntɔn towe é ná xlɛ́ ali we bo ná lɛ́ kpé nukún dó wǔ we, ɖó étɔn wɛ a nyí wútu. (Ðɛh. 73:24; Eza. 43:1, 2) Hwiɖée zízé jó nú Mawu kpó batɛ́mu bíbló kpó ná lɛ́ ná nukúnɖíɖó gbɛ ninɔ káká sɔ́yi tɔn we.—1 Pi. 3:21.
2. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?
2 Nǔɖé ka ɖo dindɔn we dó gǔdo wɛ nú batɛ́mu bíbló wɛ a? Ényí mɔ̌ wɛ ɔ, é nyí hwiɖokpó wɛ ɖo ninɔmɛ énɛ́ mɛ ǎ. É ko byɔ́ ɖo mɛ e jɛ nukɔn nú we lɛ́ é lǐvi mɔ̌kpán sí ɖɔ yě ní bló hǔzúhúzú lɛ́ ɖo walɔ kpó lěe yě nɔ lin nǔ gbɔn é kpó kpáxwé bá dó jɛxá bá bló batɛ́mu. Bɔ din ɔ, yě ɖo Jexóva sɛn wɛ kpó awǎjijɛ kpó, kpódó kanɖódónǔwú kpán. Étɛ́ lɛ́ mɛ e bló batɛ́mu ɖo xwe kanweko nukɔntɔn ɔ mɛ é ɖé lɛ́ sín kpɔ́ndéwú ka sixú kplɔ́n we? Mi nú mǐ ní gbéjé nǔ e dó afɔgblɛ́gblɛ̌ afɔ mɛ nú yě lɛ́ é kpó nǔ e kpɔ́ndéwú yětɔn sixú kplɔ́n mǐ lɛ́ é kpó kpɔ́n.
SAMALÍINU LƐ́ BLÓ BATƐ́MU
3. Hǔzúhúzú tɛ́ lɛ́ é ka sixú ko byɔ́ ɖɔ Samalíinu ɖé lɛ́ ní bló bá dó bló batɛ́mu?
3 Samalíinu e nɔ gbɛ ɖo Jezu hwenu lɛ́ é nɔ sinsɛngbɛ́ta ɖé mɛ ɖo Sikɛ́mu kpó Samalíi kpó hwexónu tɔn sín xá mɛ ɖo totaligbé Judée tɔn. Cóbónú Samalíinu lɛ́ ná kpé wú bo bló batɛ́mu ɔ, yě ɖó ná ɖó nukúnnúmɔjɛnǔmɛ kpíkpé ɔ dó Xó Mawu tɔn wú. Wěma atɔ́ɔ́n nukɔntɔn Biblu tɔn lɛ́ kɛ́ɖɛ́ wɛ Samalíinu lɛ́ yí gbe ná ɖɔ Mawu sɔ́ dó ayi mɛ nú mɛ, bɛ́ sín wěma Bǐbɛ́mɛ tɔn jí jɛ wěma Sɛ́nflínmɛ tɔn jí, bɔ é cí ɖɔ yě lɛ́ yí gbe nú wěma Jozuwée tɔn lɔ ɖɔhun. É ɖo mɔ̌ có, Samalíinu lɛ́ nɔ zɔn dó akpá Mawu tɔn e ɖo Sɛ́nflínmɛ 18:18, 19 mɛ é jí bo nɔ ɖó nukún ɖɔ Mɛsíya ɔ ná wá. (Jaan 4:25) Bo ná dó bló batɛ́mu ɔ, yě ɖó ná yí gbe ɖɔ Jezu wɛ nyí Mɛsíya e sín akpá è dó é. “Samalíinu gěgé” ka wa mɔ̌. (Jaan 4:39). É sixú ko byɔ́ ɖo mɛ ɖěvo lɛ́ sí ɖɔ yě ní ɖu ɖo linlin agɔ ɖíɖó dó mɛ wú e kpa zinkpo ɖo Samalíinu lɛ́ kpó Jwifu lɛ́ kpó tɛ́ntin é jí.—Luk. 9:52-54.
4. Sɔgbe xá Mɛsɛ́dó 8:5, 6, 14 ɔ, nɛ̌ Samalíinu ɖé lɛ́ ka yí wɛn e Filípu jlá é gbɔn?
4 Étɛ́ ka d’alɔ Samalíinu lɛ́ bɔ yě bló batɛ́mu? Hwenu e Filípu wɛnɖagbejlátɔ́ ɔ jlá “Klísu sín xó” Samalíinu lɛ́ é ɔ, yě mɛ ɖé lɛ́ “yí xó Mawu tɔn.” (Xa Mɛsɛ́dó 8:5, 6, 14.) Jwifu wɛ Filípu nyí có, yě ka gbɛ́ ɛ ǎ. Bóyá, yě flín wěmafɔ ɖěɖěe xlɛ́ ɖɔ Mawu kún nɔ ɖe mɛɖé ɖó vo ɖo mɛɖé mɛ ó lɛ́ é. (Sɛ́n. 10:17-19) Yě “nɔ hɛn ayi dó nǔ e ɖɔ wɛ Filípu ɖe” dó Klísu wú lɛ́ é wú ɖo ninɔmɛ lɛ́ bǐ mɛ, bo yí gbe nú kúnnuɖenú e xlɛ́ nyi wɛn ɖɔ Mawu ɖo gǔdo n’i é. É lɛ́ bló nǔjíwǔ gěgé; é gbɔ azɔn, bo lɛ́ nya awǒvi lɛ́.—Mɛ. 8:7.
5. Étɛ́ kpɔ́ndéwú Samalíinu lɛ́ tɔn ka sixú kplɔ́n we?
5 Samalíinu énɛ́ lɛ́ hɛn ɔ, yě ná ko lɔn bɔ linlin agɔ alǒ nǔtuuntuun hwedó mɛ ná sú nukɔnyiyi sín ali dó yě. Amɔ̌, yě lɔn nú nǔ mɔ̌hun jɛ ǎ. Ée Samalíinu lɛ́ kú d’é jí ɖɔ nǔgbó ɔ wɛ Filípu kplɔ́n émí é ɔ, yě sɔ́ dán lɛjɛlɛjɛ dó batɛ́mu blóbló wú ǎ. Tan Biblu tɔn ɔ tínmɛ ɖɔ: “Ée yě ɖi nǔ nú Filípu e ɖo Axɔ́súɖuto Mawu tɔn kpó nyǐkɔ Jezu Klísu tɔn kpó sín wɛn ɖagbe jlá wɛ é ɔ, súnnu kpó nyɔ̌nu kpó bǐ bló batɛ́mu.” (Mɛ. 8:12) A ka kú d’é jí ɖɔ Xó Mawu tɔn nyí nǔgbó, bɔ Kúnnuɖetɔ́ Jexóva tɔn lɛ́ nɔ ɖu ɖo linlin agɔ ɖíɖó dó mɛ wú jí bo nɔ ɖe wǎnyíyí adodwé ɔ, éé nyí wuntun e nɔ dó gesí klisánwun nǔgbó lɛ́ é xlɛ́ yěɖée lɛ́ a? (Jaan 8:12) Ényí mɔ̌ hǔn, yǎ wǔ wa nǔ bo ɖeji ɖɔ Jexóva ná kɔn nyɔ̌ná dó jǐ we.
6. Nɛ̌ a ka sixú ɖu kpɔ́ndéwú Ruben tɔn sín le gbɔn?
6 Xwédo Kúnnuɖetɔ́ lɛ́ tɔn ɖé mɛ wɛ Ruben e gosín Allemagne é su ɖe. É ɖo mɔ̌ có, hwenu e é ɖo wínnyáwínnyá mɛ é ɔ, é xo nǔ kpɔ́n ɖɔ Jexóva ka tíin nǔgbó a jí. Nɛ̌ é ka ɖu ɖo nǔxokpɔ́n tɔn lɛ́ jí gbɔn? Ée é ɖ’ayi wú ɖɔ nukúnnúmɔjɛnǔmɛ hwedó émí é ɔ, é wá gbeta ɔ kɔn bá wa nǔɖé. É ɖɔ: “Un mɔ ɖɔ un ɖó ná húzú kpan nukɔn nǔxokpɔ́n ce lɛ́ ɖo nǔkplɔ́nkplɔ́n mɛɖésúnɔ tɔn ce hwenu. É byɔ́ ɖɔ má kplɔ́n nǔ dó nǔ lɛ́ jɔ nú yěɖée xó ɔ wú azɔn gěgé.” É xa wěma Y a-t-il un Créateur qui se soucie de vous ? Wěma énɛ́ wa ɖagbe nú Ruben tawun. É ɖɔ nú éɖée ɖɔ: “Étɛ́! Jexóva tíin nǔgbó.” Gɔ́ ná ɔ, hwenu e Ruben yi ba hɔ̌nkan gbɛ ɔ tɔn mǐtɔn kpɔ́n é ɔ, bǔninɔ jí wǔ e ɖo kplékplé nɔví lɛ́ tɔn mǐtɔn e gbɔn gbɛ ɔ bǐ mɛ é tɛ́ntin é lɛ́ su nukún tɔn mɛ d’é jí. Hwenu e Ruben lɛ́ kɔ wá yi Allemagne é ɔ, é bló batɛ́mu hwenu e é ɖo xwe 17 ɖó wɛ é. Ényí a ɖo nǔ xo kpɔ́n dó nǔ e a ko kplɔ́n lɛ́ é wú wɛ hǔn, hǔzú kpan nukɔn yě gbɔn do biba nú nǔ ɖo wěma mǐtɔn lɛ́ mɛ gblamɛ. “Nukúnnúmɔjɛnǔmɛ e sɔgbe é” ɖíɖó sixú zɔ́n bɔ è ná ɖu ɖo nǔxokpɔ́n lɛ́ jí. (Efɛ́. 4:13, 14) Bɔ ényí a se wǎnyíyí kpó bǔninɔ kpó e ɖo mɛ Jexóva tɔn lɛ́ tɛ́ntin ɖo awa gbɛ ɔ tɔn ɖěvo lɛ́ xwé é sín xó, bɔ hwiɖésúnɔ lɛ́ mɔ kpó nukún towe lɛ́ kpó ɖo agun towe ɖésú mɛ ɔ, lěe kplékplé nɔví lɛ́ tɔn mǐtɔn e gbɔn gbɛ ɔ bǐ mɛ é su nukún towe mɛ gbɔn é ná lɛ́ jɛjí.
SÓLU TÁASINU Ɔ BLÓ BATƐ́MU
7. Ali tɛ́ nu Sólu ka ɖó ná húzú linlin tɔn ɖe?
7 Mǐ ní gbéjé kpɔ́ndéwú Sólu Táasinu ɔ tɔn kpɔ́n. É ɖo nukɔn yi wɛ tawun ɖo sinsɛn Jwifu lɛ́ tɔn mɛ, bo lɛ́ nyí Jwifu nukúnɖéjí ɖé. (Ga. 1:13, 14; Filí. 3:5) Táan e mɛ Jwifu gěgé nɔ mɔ klisánwun lɛ́ dó mɔ gǔfɔ́ndómawujítɔ́ lɛ́ é ɔ, Sólu dó ya nú yě kpó hunnylánylá kpó. É vɛdó ɖɔ jlǒ Mawu tɔn wa wɛ émí ɖe sín. (Mɛ. 8:3; 9:1, 2; 26:9-11) Bónú Sólu ná ɖi nǔ nú Jezu bo bló batɛ́mu lobo húzú klisánwun ɖé ɔ, é ɖó ná ɖo gbesisɔmɛ bɔ è ná dó ya nú élɔ́.
8. (a) Étɛ́ ka d’alɔ Sólu b’ɛ bló batɛ́mu? (b) Sɔgbe xá Mɛsɛ́dó 22:12-16 ɔ, nɛ̌ Ananiyási ka d’alɔ Sólu gbɔn? (Kpɔ́n ɖiɖe ɔ lɔmɔ̌.)
8 Étɛ́ ka d’alɔ Sólu bɔ é bló batɛ́mu? Hwenu e Aklúnɔ Jezu susunɔ ɔ tɔ́n dó Sólu jí é ɔ, é ba nukúnnú kpo. (Mɛ. 9:3-9) É blá nu nú azǎn atɔn, b’ɛ ɖo wɛn ɖɔ é lin tamɛ dó nǔ e jɛ dó jǐ tɔn é jí. Nǔgbó ɔ, Sólu kú d’é jí ɖɔ Jezu wɛ nyí Mɛsíya ɔ, bɔ ahwanvú tɔn lɛ́ nyí mawusɛntɔ́ nǔgbó lɛ́. Sólu ɖó ná ko dó hwɛ éɖée ɖó kú Etyɛ́ni tɔn mɛ e é ɖó alɔ ɖe é wútu! (Mɛ. 22:20) Ðo vivɔnu azǎn atɔn lɛ́ tɔn ɔ, ahwanvú e è nɔ ylɔ́ ɖɔ Ananiyási é sɛkpɔ́ Sólu kpó xomɛnyínyɔ́ kpó, hun nukún tɔn lɛ́ n’i bo dó wǔsyɛ́n lanmɛ n’i ɖɔ é ní bló batɛ́mu ma dán lɛjɛlɛjɛ. (Xa Mɛsɛ́dó 22:12-16.) Sólu yí gbe nú alɔdó ɔ kpó mɛɖéesɔ́hwe kpó bo bɛ́ gbɛzínzán yɔ̌yɔ́ ɖé.—Mɛ. 9:17, 18.
Sólu ɖɔhun ɔ, nú è dó wǔsyɛ́n lanmɛ nú we ɖɔ hwi ní bló batɛ́mu ɔ, a ka ná yí gbe a? (Kpɔ́n akpáxwé 8)
9. Étɛ́ lɛ́ kpɔ́ndéwú Sólu tɔn ka sixú kplɔ́n we?
9 Sólu sín kpɔ́ndéwú sixú kplɔ́n nǔɖé lɛ́ mǐ. É hɛn ɔ, é ná jó éɖée dó bɔ goyíyí alǒ xɛsi ɖi nú gbɛtɔ́ ná glɔ́n ali n’i bɔ é ná gɔn batɛ́mu bló. Amɔ̌, é lɔn nú nǔ mɔ̌hun jɛ ǎ. Sólu húzú gbɛzán tɔn kpó mɛɖéesɔ́hwe kpó hwenu e é yí nǔgbó e kunkplá Klísu é. (Mɛ. 26:14, 19) Sólu tuun fɛɛ ɖɔ è ná dó ya nú émí cóbó ka ɖo gbesisɔmɛ bo húzú klisánwun. (Mɛ. 9:15, 16; 20:22, 23) Ée é bló batɛ́mu gúdo é ɔ, é kpo ɖo Jexóva wú gán jɛ wɛ nú é ná d’alɔ ɛ nú é ná dɛ ɖo mɛtɛ́nkpɔ́n vovo lɛ́ nu. (2 Kɔ. 4:7-10) Sɔ́ e a sɔ́ hwiɖée jó bo bló batɛ́mu bo húzú Kúnnuɖetɔ́ Jexóva tɔn é sixú zɔ́n bɔ a ná mɔ mɛtɛ́nkpɔ́n nǔɖiɖi tɔn lɛ́ alǒ tagba lɛ́, amɔ̌, a ná mɔ alɔdó. A sixú ɖeji ɖɔ Mawu kpó Klísu kpó ná nɔ gǔdo nú we hwebǐnu.—Filí. 4:13.
10. Nɛ̌ a ka sixú ɖu kpɔ́ndéwú Anna tɔn sín le gbɔn?
10 Xwédo Kurde ɖé mɛ wɛ Anna su ɖe ɖo zǎnzǎnhwe jí Elɔ́pu tɔn. Ée Anna sín nɔ bló batɛ́mu gúdo é ɔ, Anna jɛ Biblu kplɔ́n jí hwenu e é ɖó xwe 9 é. Tɔ́ tɔn wɛ ka ná ɛ gbe cóbɔ é bɛ́. É ɖo mɔ̌ có, énɛ́ dɔn tagba wá é kpó hɛ̌nnumɔ tɔn e ɖo xwé ɖokpó ɔ gbe xá yě lɛ́ é kpó tɛ́ntin. Hɛ̌nnumɔ tɔn lɛ́ mɔ ɖɔ winnyánú wɛ é nyí ɖɔ mɛɖé ní jó sinsɛn tɔ́gbó tɔn lɛ́ tɔn dó. Ée Anna ɖó xwe 12 é ɔ, é byɔ́ gbe tɔ́ tɔn bá bló batɛ́mu. Tɔ́ tɔn ba ná tuun nú gbeta éɖésúnɔ tɔn wɛ, alǒ mɛɖé wɛ ɖo cɔcɔ dó n’i wɛ a jí. Anna ɖɔ: “Un yí wǎn nú Jexóva.” Tɔ́ tɔn yí gbe bɔ é ná bló batɛ́mu. Énɛ́ gúdo ɔ, Anna ɖí xwi xá mɛcáko kpó nǔagɔwaxámɛ kpó alɔkpa gěgé. Hɛ̌nnumɔ tɔn lɛ́ ɖokpó ɖɔ n’i ɖɔ: “Ényí gbɛ blíblí wɛ a nɔ zán bo nɔ lɛ́ nu azɔ ɔ, é ná nyɔ́ nú we hú Kúnnuɖetɔ́ Jexóva tɔn e a nyí é.” Nɛ̌ Anna ka ɖí xwi xá gbɔn? É ɖɔ: “Jexóva d’alɔ mì bɔ un gbí dɔn, bɔ mamáa ce kpó papá ce kpó lɔ nɔ gǔdo nú mì tawun.” Anna sɔ́ kɛ́n ninɔmɛ tawun tawun ɖěɖěe mɛ é mɔ alɔ Jexóva tɔn ɖo gbɛzán tɔn mɛ ɖe lɛ́ é tɔn. É nɔ nyi nukún kpɔ́n sín hweɖénu jɛ hweɖénu bo ma wá wɔn lěe Jexóva ko d’alɔ ɛ gbɔn é ó. Ényí a nɔ ɖi xɛsi nú gbeklánxámɛ hǔn, flín ɖɔ Jexóva ná d’alɔ hwi lɔ.—Ebl. 13:6.
KƆNƐ́YI BLÓ BATƐ́MU
11. Étɛ́wú Kɔnɛ́yi ka hɛn ɔ, é ná ko xo nǔ kpɔ́n dó batɛ́mu blóbló wú?
11 Biblu lɛ́ ɖɔ xó dó kpɔ́ndéwú Kɔnɛ́yi tɔn wú. “Sɔ́jakanwekogán” ahwankpá Hlɔ̌ma tɔn tɔn ɖé wɛ. (Mɛ. 10:1) Énɛ́ wú ɔ, tɛn nukúnɖéjí ɖé mɛ wɛ é ná ko ɖe, bo sixú ko lɛ́ nyí ahwangán nukúnɖéjí ɖé. É “nɔ ná nǔ wamamɔnɔ lɛ́ tawun.” (Mɛ. 10:2) Jexóva sɛ́ mɛsɛ́dó Piyɛ́ɛ dó è bónú é ná dó wɛn ɖagbe ɔ ɛ. Tɛn e mɛ Kɔnɛ́yi ɖe é zɔ́n bɔ é dán lɛjɛlɛjɛ dó batɛ́mu bíbló wú wɛ a?
12. Étɛ́ ka d’alɔ Kɔnɛ́yi bɔ é bló batɛ́mu?
12 Étɛ́ ka d’alɔ Kɔnɛ́yi bɔ é bló batɛ́mu? Mǐ xa ɖɔ: “É kpó mɛ e ɖo xwé tɔn gbe lɛ́ é bǐ kpó nɔ ɖó sísí e gɔ́ngɔ́n é nú Mawu.” Gɔ́ ná ɔ, Kɔnɛ́yi nɔ ɖo vo sa nú Mawu wɛ hwebǐnu. (Mɛ. 10:2) Ée Piyɛ́ɛ dó wɛn ɖagbe ɔ Kɔnɛ́yi é ɔ, é kpó xwédo tɔn kpó ɖi nǔ nú Klísu bo bló batɛ́mu azɔn ɖokpó. (Mɛ. 10:47, 48) É ɖo wɛn ɖɔ, Kɔnɛ́yi ɖo gbesisɔmɛ bá bló hǔzúhúzú ɖěbǔ e é ná byɔ́ bónú é kpó xwédo tɔn kpó ná sixú sɛn Jexóva ɖó kpɔ́ é.—Joz. 24:15; Mɛ. 10:24, 33.
13. Étɛ́ lɛ́ kpɔ́ndéwú Kɔnɛ́yi tɔn ka sixú kplɔ́n we?
13 Kɔnɛ́yi wa nǔ Sólu ɖɔhun. É hɛn ɔ, é ná ko lɔn bɔ tɛn e mɛ é ɖe é ná ko glɔ́n ali n’i bɔ é ná gɔn klisánwun húzú. Amɔ̌, é lɔn nú nǔ mɔ̌hun jɛ ǎ. Gbeyíyí nú nǔgbó ɔ ná byɔ́ ɖɔ a ní bló hǔzúhúzú tají lɛ́ ɖo gbɛzán towe mɛ wɛ a? Ényí mɔ̌ wɛ ɔ, Jexóva ná d’alɔ we. É ná kɔn nyɔ̌ná dó kán e a kán ɖ’é jí bá sɛn ɛ sɔgbe xá nǔgbódodó Biblu tɔn lɛ́ é jí.
14. Nɛ̌ a ka sixú ɖu kpɔ́ndéwú Tsuyoshi tɔn sín le gbɔn?
14 Bo ná dó jɛxá bo ná bló batɛ́mu ɔ, é byɔ́ ɖɔ Tsuyoshi e nɔ nɔ Japon é ní bló hǔzúhúzú ɖé ɖo azɔ̌ tɔn mɛ. Gǎn bɔ dó gǎn wú wɛ é nyí ɖo azɔ̌mɛxwé Ikenobo tɔn, fí e è nɔ kplɔ́n lěe è nɔ to folówa lɛ́ gbɔn é ɖe é. Gǎn azɔ̌mɛxwé ɔ tɔn ma kpé wú bo yi cyɔnúwiwa ɖé domɛ ǎ ɔ, Tsuyoshi wɛ nɔ w’azɔ̌ ɖó tɛn tɔn mɛ hwɛhwɛ ɖo cyɔnúwiwa bouddhiste lɛ́ tɔn domɛ. Amɔ̌, hwenu e Tsuyoshi kplɔ́n nǔgbó ɔ dó kú wú é ɔ, nǔwiwa énɛ́ gbo kpo nyi ali jí nú batɛ́mu blóbló tɔn. Énɛ́ wú ɔ, é wá gbeta ɔ kɔn éɖésú bo sɔ́ ná nɔ ɖó alɔ ɖo yɛsu fifɔ bouddhiste lɛ́ tɔn mɛ ɖě ǎ. (2 Kɔ. 6:15, 16) Tsuyoshi ɖɔ xó nú gǎn ɔ dó xó ɔ wú. Étɛ́ é ka ná? Ali hun nú Tsuyoshi b’ɛ ná kpo ɖo azɔ̌ tɔn wa wɛ bo ka sɔ́ ná nɔ ɖó alɔ ɖo yɛsu fifɔ lɛ́ mɛ ɖě ǎ. É bɛ́ Biblu kplɔ́nkplɔ́n b’ɛ ná bló xwe ɖokpó mɔ̌ gúdo é ɔ, é bló batɛ́mu.a Ényí é byɔ́ ɖɔ a ní bló hǔzúhúzú ɖé lɛ́ ɖo azɔ̌ towe mɛ bá dó nyɔ́ Mawu nukúnmɛ hǔn, ɖeji ɖɔ é ná ná nǔ e sín hudó hwi kpó xwédo towe kpó ɖó é we.—Ðɛh. 127:2; Mat. 6:33.
KƆLƐ́NTINU LƐ́ BLÓ BATƐ́MU
15. Étɛ́ lɛ́ ka sixú ko dó afɔgblɛ́gblɛ̌ afɔ mɛ nú Kɔlɛ́ntinu lɛ́?
15 È tuun Kɔlɛ́ntinu hwexónu tɔn lɛ́ dó tuun mɛ e yí wǎn nú nǔ agbaza tɔn lɛ́, bo ma lɛ́ ɖó zǐnzán ɖagbe ǎ é. Mɛ e nɔ fínɛ́ lɛ́ é gěgé zán gbɛ alɔkpa e ma nyɔ́ Mawu nukúnmɛ ǎ é. É ɖo wɛn ɖɔ, ninɔmɛ mɔ̌hun ná nyí wǔvɛ́ ɖaxó nú mɛ ɖěbǔ e ná yí wɛn ɖagbe ɔ é. Amɔ̌, hwenu e mɛsɛ́dó Pɔ́lu wá toxo énɛ́ mɛ bo jlá wɛn ɖagbe e kunkplá Klísu é ɔ, “Kɔlɛ́ntinu e se wɛn ɖagbe ɔ lɛ́ é gěgé ɖi nǔ, bɔ è bló batɛ́mu nú yě.” (Mɛ. 18:7-11) Énɛ́ gúdo ɔ, Aklúnɔ Jezu Klísu tɔ́n dó Pɔ́lu jí ɖo nǔmimɔ ɖé mɛ bo ɖɔ: “Mɛ gěgé nyí ce ɖo toxo élɔ́ mɛ.” Énɛ́ wú ɔ, Pɔ́lu gbɛ kan dó wɛn ɔ jíjlá nu ɖo fínɛ́ káká nú xwe ɖokpó adaɖé.
16. Étɛ́ ka d’alɔ mɛ e ɖo Kɔlɛ́nti é ɖé lɛ́ bɔ yě ɖu ɖo nǔ e dó afɔgblɛ́gblɛ̌ afɔ mɛ nú yě bónú yě ma bló batɛ́mu ó lɛ́ é jí? (2 Kɔlɛ́ntinu lɛ́ 10:4, 5)
16 Étɛ́ ka d’alɔ Kɔlɛ́ntinu lɛ́ bɔ yě bló batɛ́mu? (Xa 2 Kɔlɛ́ntinu lɛ́ 10:4, 5.) Xó Mawu tɔn kpó gbigbɔ mímɛ́ tɔn hlɔ̌nhlɔ́nnɔ ɔ kpó d’alɔ yě bɔ yě bló hǔzúhúzú nukúnɖéjí lɛ́ ɖo gbɛzán yětɔn mɛ. (Ebl. 4:12) Mɛ ɖěɖěe ɖo Kɔlɛ́nti bo yí wɛn ɖagbe e kunkplá Klísu lɛ́ é kpé wú bo jó walɔ kpó zǐnzán kpó lěhun lɛ́ dó: ahannumú, ajojija kpó xó ɖíɖó xá mɛ e kpó mɛ kpó ɖó mɛ̌ ɖokpó ɔ é kpó.—1 Kɔ. 6:9-11.b
17. Étɛ́ kpɔ́ndéwú Kɔlɛ́ntinu lɛ́ tɔn ka sixú kplɔ́n we?
17 Ð’ayi wú ɖɔ Kɔlɛ́ntinu ɖé lɛ́ ɖó ná ɖu ɖo walɔ e ko dó ɖɔ do tawun ɖo fɛn yětɔn nu lɛ́ é jí có, yě kún ka wá gbeta ɔ kɔn ɖɔ klisánwun nyínyí ná vɛ́ wǔ nú émí dín ó. Yě dó gǎn syɛ́nsyɛ́n bá gbɔn ali sóbwé sóbwé e nɔ kplá mɛ yi gbɛ mavɔmavɔ mɛ é jí. (Mat. 7:13, 14) A ka ɖo gǎn dó wɛ bá ɖu ɖo walɔ nyanya ɖé alǒ zǐnzán e ma sɔgbe ǎ é ɖé jí bá dó bló batɛ́mu wɛ a? Kpo ɖo gǎn dó wɛ. Sa vo nú Jexóva ɖɔ é ní ná émí gbigbɔ mímɛ́ tɔn nú é ná d’alɔ we nú a ná gbí dɔn ɖo nǔnyanyawiwa sín zɛn e nɔ sɔ́ we é nu.
18. Nɛ̌ a ka sixú ɖu kpɔ́ndéwú Monika tɔn sín le gbɔn?
18 Monika e gosín Georgie é dó gǎn syɛ́nsyɛ́n bá jó xó gblégblé ɖiɖɔ kpó ayiɖeɖayǐ e ma sɔgbe ǎ é kpó dó bá dó yi nukɔn bá bló batɛ́mu. É ɖɔ: “Hwenu e un ɖo wínnyáwínnyá mɛ é ɔ, ɖɛ wɛ nyí hlɔ̌nhlɔ́n ce. Jexóva tuun ɖɔ un ba ná wa nǔ e sɔgbe é bo nɔ ɖo alɔ dó mì wɛ hwebǐnu lobo nɔ lɛ́ ɖo ali xlɛ́ mì wɛ.” Monika bló batɛ́mu hwenu e é ɖó xwe 16 é. Nǔwalɔ ɖé lɛ́ ka ɖe bɔ a ɖó ná jó dó bá dó sɛn Jexóva lěe é ba gbɔn é wɛ a? Kpo ɖo hlɔ̌nhlɔ́n byɔ́ ɛ wɛ bá dó bló hǔzúhúzú lɛ́. Jexóva nɔ hun alɔ bo nɔ ná gbigbɔ mímɛ́ tɔn mɛ.—Jaan 3:34.
NǓÐIÐI TOWE SIXÚ SƐ TƐN NÚ SÓ LƐ́
19. Étɛ́ ka sixú d’alɔ we bɔ a ná ɖu ɖo tagba e cí só ɖɔhun lɛ́ é jí? (Kpɔ́n ɖiɖe ɔ lɔmɔ̌.)
19 Ðeji ɖɔ Jexóva yí wǎn nú we bo ba ɖɔ a ní nɔ xwédo tɔn mɛ. Nǔgbó wɛ xó énɛ́ nyí, ényí nǔ ɖěbǔ ná bo ɖo ali glɔ́n nú we wɛ bónú a ná bló batɛ́mu ɔ nɛ́. Jezu ɖɔ nú ahwanvú tɔn xwe kanweko nukɔntɔn ɔ tɔn lɛ́ sín gbɛ̌ta ɖé ɖɔ: “Ényí mi ɖó nǔɖiɖi bɔ é sɔ mutádi sín kwín ɔ, mi ná ɖɔ nú só élɔ́ ɖɔ: ‘Sɛ tɛn sín fí bo jɛ dɔ̌n,’ bɔ é ná sɛ tɛn, lobɔ nǔ ɖěbǔ ná gló mi ǎ.” (Mat. 17:20) Mɛ ɖěɖěe ɖo fínɛ́ bo se xó énɛ́ e Jezu ɖɔ lɛ́ é ɖo kpɔ́ xá Jezu din é ɔ, xwe yɔywɛ ɖé lɛ́ bló wɛ jɛ́n é ɖe, énɛ́ wú ɔ, é byɔ́ ɖɔ nǔɖiɖi yětɔn ní kpo ɖo syɛ́nsyɛ́n wɛ. Amɔ̌, Jezu ná jiɖe yě ɖɔ ényí yě tɛ́n kpɔ́n bo ɖó nǔɖiɖi e syɛ́n só é ɔ, Jexóva ná d’alɔ yě bɔ yě ná sɛ tɛn nú wǔvɛ́ e cí só ɖɔhun lɛ́ é. Jexóva ná d’alɔ hwi lɔ bɔ a ná wa nǔ ɖokpó ɔ!
Ðeji ɖɔ Jexóva yí wǎn nú we bo ba ɖɔ a ní nɔ xwédo tɔn mɛ (Kpɔ́n akpáxwé 19)c
20. Étɛ́ kpɔ́ndéwú klisánwun xwe kanweko nukɔntɔn ɔ tɔn kpó hwe mǐtɔn nu tɔn kpó ɖěɖěe xó è ɖɔ ɖo xóta élɔ́ mɛ lɛ́ é tɔn ka sísɛ́ we bɔ a ná wa?
20 Nú a ɖó ayi nǔ e ɖo dindɔn we dó gǔdo wɛ nú a ma ná bló batɛ́mu ǎ lɛ́ é wú hǔn, yǎ wǔ ɖe afɔ e ná zɔ́n bɔ a ná ɖe ɖɛ yě lɛ́ é. Nǔ kpɔ́ndéwú klisánwun xwe kanweko nukɔntɔn ɔ tɔn lɛ́ kpó hwe mǐtɔn nu tɔn lɛ́ kpó tɔn ní dó gbɔ nú we bo lɛ́ ná hlɔ̌nhlɔ́n we. Nǔ kpɔ́ndéwú yětɔn ní dó wǔsyɛ́n lanmɛ nú we, bo lɛ́ sísɛ́ we nú a ní zé hwiɖée jó nú Jexóva bo bló batɛ́mu. Gbeta ɖagbe hú gǎn e kɔn a ná wá ɖo gbɛzán towe mɛ é nɛ́!
HAN 38 É ná ná we hlɔ̌nhlɔ́n
a Tan gbɛzán tɔn nɔví Tsuyoshi Fujii tɔn tɔ́n ɖo Réveillez-vous 8 août 2005 mɛ, wěx. 20-23.
b Kpɔ́n video ‘Étɛ́wú a ka ɖo batɛ́mu blóbló sɔ́ dó gbɛ asá jí kan ná wɛ?’ ɖo jw.org jí.
c ÐIÐE Ɔ SÍN TÍNMƐ: Nɔví súnnu kpó nɔví nyɔ̌nu kpó lɛ́ sín gbɛ̌ta ɖé ɖo doo dó nú mɛ ɖěɖěe bló batɛ́mu tlóló lɛ́ é wɛ kpó akpakpa sɔ́ mɛ kpó.