Yǐ gbe kpó mɛɖéesɔ́hwe kpó ɖɔ émí kún tuun nǔɖé lɛ́ ó

1. Nǔwúkpíkpé tɛ́ lɛ́ Jexóva ka ná mǐ? Étɛ́wú?

JEXÓVA dá mǐ kpó nǔwúkpíkpé ɔ kpó bɔ mǐ hɛn ɔ mǐ nɔ lin tamɛ, kplɔ́n nǔ yɔ̌yɔ́ lɛ́, bo nɔ lɛ́ tuun lěe mǐ ná zán nǔ e mǐ kplɔ́n lɛ́ é gbɔn é. Étɛ́wú é ka bló mǐ gbɔn mɔ̌? É ba ɖɔ mǐ ní “mɔ nǔ jɛ lěe è nɔ tuun Mawu gbɔn é wú,” bo sɛn ɛ kpó nǔwúkpíkpé tamɛ linlin tɔn mǐtɔn kpó.—Nǔx. 2:1-5; Hlɔ̌. 12:1.

2. (a) Dogbó tɛ́ lɛ́ mǐ ka ɖó? (Jɔbu 37:23, 24) (Kpɔ́n ɖiɖe ɔ lɔmɔ̌.) (b) Ényí mǐ sɔ́ mǐɖée hwe bo yí gbe nú dogbó mǐtɔn lɛ́ ɔ, nɛ̌ mǐ ka nɔ ɖu le tɔn gbɔn?

² Nǔgbó wɛ ɖɔ mǐ ɖó nǔwúkpíkpé ɔ bo nɔ kplɔ́n nǔ, loɔ, nǔ e mǐ tuun lɛ́ é ɖó dogbó. (Xa Jɔbu 37:23, 24.) Lin tamɛ dó kpɔ́ndéwú Jɔbu tɔn wú. Jexóva kan nǔ gěgé byɔ́ Jɔbu, b’ɛ d’alɔ ɛ bɔ é tuun ɖɔ é kpo nǔ gěgé bɔ émí kún tuun ó. Nǔ énɛ́ e é mɔ kpɔ́n é zɔ́n bɔ é sɔ́ éɖée hwe, bo lɛ́ d’alɔ ɛ bɔ é jlá linlin tɔn ɖó. (Jɔb. 42:3-6) Ényí mǐ sɔ́ mǐɖée hwe bo yí gbe ɖɔ mǐ kún tuun nǔ bǐ ó ɔ, mǐ lɔ nɔ ɖu le tɔn. Mɛɖéesɔ́hwe mɔ̌hun nɔ sísɛ́ mǐ bɔ mǐ nɔ ɖeji ɖɔ Jexóva ná ɖe nǔ e mǐ ɖó ná tuun nǔgbó nǔgbó bá dó wá gbeta e nǔnywɛ́ kpé lɛ́ é kɔn é xlɛ́ mǐ.—Nǔx. 2:6.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná ɖɔ xó dó nǔ e mǐ ma tuun ǎ é ɖé lɛ́ kpó nǔ e énɛ́ sixú ji é kpó jí. Mǐ ná lɛ́ kplɔ́n nǔ e wú é nyɔ́ ɖɔ mǐ ma tuun nǔɖé lɛ́ ǎ é. Nǔ e mǐ ná kplɔ́n é ná d’alɔ mǐ bɔ mǐ ná gán jɛ wú ɖɔ Jexóva, Mɛ e ɖó “nǔnywɛ́ kpíkpé” é nɔ ɖɔ nǔ e mǐ ɖó ná tuun nǔgbó nǔgbó é nú mǐ.—Jɔb. 37:16.

MǏ TUUN HWENU E VIVƆNU Ɔ NÁ WÁ É Ǎ

4. Sɔgbe xá Matíe 24:36 ɔ, nǔgbó tɛ́ mǐ ma ka tuun ǎ?

⁴ Xa Matíe 24:36. Mǐ tuun hwenu e vivɔnu gbɛ élɔ́ tɔn ná wá é ǎ. Jezu ɖésú tlɛ tuun “azǎn ɔ kpó gan ɔ mɛ kpó” hwenu e é ɖo ayǐkúngban jí é ǎ.a É ɖɔ nú mɛsɛ́dó tɔn lɛ́ ɖo nukɔnmɛ ɖɔ Jexóva, mɛ e nyí Ganmɛjínɔtɔ́ ɖaxó ɔ é ɖó ganmɛ nú nǔɖé lɛ́ “ɖo acɛ éɖésúnɔ tɔn glɔ́.” (Mɛ. 1:6, 7) Jexóva ko ɖó ganmɛ nú hwenu e vivɔnu gbɛ élɔ́ tɔn ná wá é, amɔ̌, mǐdɛɛ lɛ́ sixú tuun hwenu e é ná wá é pɛ́pɛ́pɛ́ ǎ.

5. Ðó mǐ ma tuun hwenu e vivɔnu ɔ ná wá é ǎ wútu ɔ, nɛ̌ énɛ́ ka sixú wa nǔ dó mǐ wú gbɔn?

⁵ Kpó nǔ e Jezu ɖɔ é kpó ɔ, mǐ tuun táan nabí e mǐ ɖó ná nɔ te ná cóbɔ vivɔnu ɔ ná wá é ǎ. Énɛ́ wú ɔ, te ninɔ sixú wá ci akpɔ nú mǐ, alǒ awakanmɛ sixú kú mǐ, tají ɔ, ényí mǐ ko nɔ te kpɔ́n azǎn Jexóva tɔn nú hwenu ɖé ɔ nɛ́. Alǒ mǐ sixú mɔ ɖɔ é vɛ́ wǔ nú mǐ bɔ mǐ ná dɛ ɖo mɛcáko hǎgbɛ́ xwédo mǐtɔn tɔn lɛ́ alǒ mɛ ɖěvo lɛ́ tɔn nu. (2 Pi. 3:3, 4) Mǐ sixú lin ɖɔ ényí mǐ tuun azǎn e gbe vivɔnu ɔ ná wá é pɛ́pɛ́pɛ́ ɔ, é ná bɔ wǔ bɔ mǐ ná ɖó suúlu hú gǎn lobo kpé wú bo dɛ ɖo mɛcáko lɛ́ nu hú gǎn.

6. Étɛ́wú é ka nyɔ́ ɖɔ mǐ kún tuun hwenu e vivɔnu ɔ ná wá é ó?

⁶ Nǔgbó ɔ, ɖe e Jexóva ma ɖe azǎn e gbe vivɔnu ɔ ná wá é xlɛ́ mǐ ǎ é ɔ, ali wɛ é hun nú mǐ bónú mǐ ná ɖe xlɛ́ ɛ ɖɔ wǎn e mǐ yí n’i é kpó jiɖe e mǐ ɖó dó wǔ tɔn é kpó wú wɛ mǐ ɖo sinsɛn ɛ wɛ. Mǐ ɖo Jexóva sɛn wɛ ɖó mǐ hɛn azǎn ɖé ayi mɛ cí nǔ ɖɔ nǔɖiɖi mǐtɔn ɖó gbe e gbe é ná fɔ azɔ̌ kɔn nyi ayǐ é ɖɔhun wútu ǎ. Nǔ tají e jí mǐ ná lin tamɛ dó é ní ma nyí hwenu e “azǎn Jexóva tɔn” ná wá é ó, loɔ, é ná nyɔ́ ɖɔ è ní sɔ́ ayi ɖó nǔ e azǎn énɛ́ ná wa é jí. Mɔ̌ wiwa ná d’alɔ mǐ bɔ mǐ ná vɛ́ xá Jexóva, ɖeji dó wǔ tɔn lobo wa nǔ e wú mǐ kpé é bǐ bá nyɔ́ nukún tɔn mɛ.—2 Pi. 3:11, 12.

7. Étɛ́ mǐ ka tuun?

⁷ É ná nyɔ́ ɖɔ mǐ ní sɔ́ ayi ɖó nǔ e mǐ tuun é jí, énɛ́ wɛ nyí ɖɔ azǎn gǔdo gúdo tɔn lɛ́ bɛ́ ɖo 1914. Jexóva ɖɔ nǔɖé lɛ́ ɖ’ayǐ ɖo Biblu mɛ, bɔ yě ɖe xlɛ́ ɖɔ xwe énɛ́ xwe wɛ azǎn gǔdo gúdo tɔn lɛ́ ná bɛ́, bo lɛ́ tínmɛ ninɔmɛ e mɛ gbɛ ɔ ná nɔ sín hwenɛ́nu é dǒyidǒslɔ́ tɔn. Wǎgbɔ tɔn ɔ, mǐ kú d’é jí ɖɔ ‘xomɛsinzán Jexóva tɔn sɛkpɔ́!’ (Sof. 1:14) Mǐ lɛ́ tuun azɔ̌ e Jexóva ba ɖɔ mǐ ní wa é, énɛ́ wɛ nyí ɖɔ mǐ ná jlá “wɛn ɖagbe Axɔ́súɖuto ɔ tɔn” mɛ gěgé lěe mǐ kpé wú gbɔn é. (Mat. 24:14) È ɖo wɛn énɛ́ jlá wɛ gbɔn to 240 mɔ̌ mɛ, bo lɛ́ ɖo jǐjlá dó gbe 1000 jɛjí mɛ wɛ. É byɔ́ ɖɔ mǐ ní tuun “azǎn ɔ kpó gan ɔ mɛ kpó” cóbá jlá wɛn ɔ kpó kanɖódónǔwú kpó ǎ.

MǏ TUUN LĚE JEXÓVA SIXÚ WA NǓ GBƆN É Ǎ

8. Étɛ́ dó gesí wɛ nukɛgbe “lěe Mawu nɔ wa azɔ̌ tɔn gbɔn é” ɔ ka ɖe? (Nǔnywɛ́tɔ́xó 11:5)

⁸ Mǐ nɔ tuun “lěe Mawu nɔ wa azɔ̌ tɔn gbɔn é” hwebǐnu ǎ. (Xa Nǔnywɛ́tɔ́xó 11:5.) Xógbe énɛ́ nɔ dó gesí nǔ e Jexóva bló bɔ é jɛ alǒ nǔ e é tin bɔ é jɛ, bá dó bló bónú jlǒ tɔn ná jɛnu é. Mǐ sixú nɔ ma tuun nǔ e wú Jexóva tin bɔ nǔɖé jɛ é alǒ lěe é ná wa nǔ dó ta mǐtɔn mɛ gbɔn é pɛ́pɛ́pɛ́. (Ðɛh. 37:5) Nǔ mɔ̌hun gɛ́dɛ́ cí lěe vǐ ɖé nɔ su ɖo nyɔ̌nu xoxónɔ ɖé xomɛ gbɔn é ɖɔhun; nǔɖé wɛ bɔ nǔnywɛ́ xwítíxwítízɔ́watɔ́ lɛ́ ko mɔ nukúnnú jɛ mɛ hlɛ́nhlɛ́n kpɔ́n ǎ.

9. Ðó mǐ ma tuun lěe Jexóva ná wa nǔ gbɔn é ǎ wútu ɔ, wǔvɛ́ tɛ́ lɛ́ mǐ ka sixú ɖí xwi xá?

⁹ Tuun e mǐ ma tuun lěe Jexóva ná wa nǔ dó ta mǐtɔn mɛ gbɔn é ǎ é sixú zɔ́n bɔ mǐ ná xo nǔ kpɔ́n dó gbeta ɖé lɛ́ kɔn wíwá wú. Mǐ sixú xo nǔ kpɔ́n dó vɔ̌ ɖěɖěe mǐ ná sá dó vlɔ́n kan nú sinsɛnzɔ́ mǐtɔn lɛ́ é wú, ɖi gbɛ e bɔkun é zínzán, alǒ tɛn sisɛ yi fí e è ɖó wɛnjlátɔ́ Axɔ́súɖuto ɔ tɔn lɛ́ sín hudó ɖe hú gǎn é. Alǒ, mǐ sixú kanbyɔ́ ɖɔ nǔ mǐtɔn ka nyɔ́ Jexóva nukúnmɛ a jí, ényí mǐ ma kpé nǔ e gbé nya wɛ mǐ ɖe ɖo gbigbɔ lixo é wú ǎ, ényí mǐ ɖo gǎn dó wɛ syɛ́nsyɛ́n ɖo sinsɛnzɔ́ ɔ mɛ bɔ é ma ka ɖo nǔ káká ɖé ná wɛ ǎ, alǒ ényí mǐ ɖo wǔvɛ́ lɛ́ mɔ wɛ ɖo azɔ̌ tutoblónúnǔ ɔ tɔn ɖé kɔn ɔ nɛ́.

10. Jijɔ tají tɛ́ lɛ́ tuun e mǐ ma tuun lěe Jexóva ná wa nǔ gbɔn é ǎ é ka sixú d’alɔ mǐ bɔ mǐ ná ɖó?

¹⁰ Tuun e mǐ ma tuun lěe Jexóva ná wa nǔ gbɔn é pɛ́pɛ́pɛ́ ǎ é nɔ d’alɔ mǐ bɔ mǐ nɔ tɛ́n kpɔ́n bo nɔ ɖó jijɔ tají ɖé lɛ́, ɖi mɛɖéesɔ́hwe kpó jlɛ̌jíninɔ kpó. Mǐ nɔ wá tuun ɖɔ linlin Jexóva tɔn lɛ́ kpó lěe é nɔ wa nǔ gbɔn é kpó hú gǎn mǐdɛɛ lɛ́ tɔn flaflá tɔn. (Eza. 55:8, 9) Mǐ nɔ lɛ́ kplɔ́n bo nɔ ɖeji dó Jexóva wú bǐ mlɛ́mlɛ́, gán jɛ wǔ tɔn bá dó ɖu ɖ’é jí. Ényí sinsɛnzɔ́ mǐtɔn, alǒ azɔ̌ tutoblónúnǔ ɔ tɔn ɖé ná sínsɛ́n ɔ, mǐ nɔ sɔ́ susu ɔ bǐ jó nú Jexóva, b’ɛ ka sɔgbe. (Ðɛh. 127:1; 1 Kɔ. 3:7) Ényí nǔ lɛ́ ma yi lěe mǐ lin gbɔn é ǎ ɔ, mǐ ɖó ná nɔ flín ɖɔ Jexóva lɔ mɛ jɛ́n nǔ lɛ́ bǐ kpo ɖe. (Eza. 26:12) Mǐ nɔ wa éé nyí mǐtɔn é, bo nɔ lɛ́ kpo ɖo jiɖe ɖó wɛ ɖɔ Jexóva ná wa éé nyí étɔn é. Mǐ kú d’é jí ɖɔ é ná xlɛ́ ali e sín hudó mǐ ɖó é mǐ, é ná bo ma tlɛ nyí ɖo ali jí wǔ e nu é wa mɔ̌ ɖe hweɖélɛ́nu ɖo hwexónu é ǎ ɔ nɛ́.—Mɛ. 16:6-10.

11. Étɛ́ mǐ ka tuun b’ɛ sixú d’alɔ mǐ?

¹¹ Lin tamɛ dó nǔ e wú mǐ tuun ɖɔ Jexóva yí wǎn nú mǐ hwebǐnu, nyí nǔjlɔ́jlɔ́watɔ́ bo lɛ́ nyí nǔnywɛ́tɔ́ é jí. Mǐ tuun ɖɔ nǔ e mǐ nɔ wa n’i é kpó nǔ e mǐ nɔ wa nú mawusɛntɔ́ hǎtɔ́ mǐtɔn lɛ́ é kpó nɔ xɔ akwɛ́ n’i tawun. Gɔ́ ná ɔ, mǐ tuun ɖɔ Jexóva nɔ kɔn nyɔ̌ná dó mɛ ɖěɖěe ɖo gbejí n’i lɛ́ é jí hwebǐnu.—Ebl. 11:6.

MǏ TUUN NǓ E NÁ WÁ JƐ SƆ É Ǎ

12. Sɔgbe xá Jaki 4:13, 14 ɔ, étɛ́ mǐ ma ka tuun ǎ?

¹² Xa Jaki 4:13, 14. Mǐ tuun nǔ e ná wá jɛ dó mǐ wú sɔ é ǎ. Ðo gbɛ élɔ́ mɛ ɔ, “hwenu kpó nǔmaɖónukún lɛ́ kpó” nɔ wá ba jǒnɔ mǐ. (Nǔt. 9:11, nwt.) Énɛ́ wú ɔ, mǐ sixú tuun nú nǔ e mǐ to bo ná wa lɛ́ é ná jɛnu, alǒ gbɔ, kabǐ tlɛ ná ɖo gbɛ bo ná wá wa yě, alǒ gbɔ ǎ.

13. Ðó mǐ ma tuun nǔ e ná jɛ ɖo sɔgúdo lɛ́ é bǐ ǎ wútu ɔ, nɛ̌ nǔ ka nɔ cí nú mǐ hweɖélɛ́nu?

¹³ Ðó mǐ ma tuun nǔ e ná wá jɛ ɖo sɔgúdo é pɛ́pɛ́pɛ́ ǎ wútu ɔ, é sixú vɛ́ wǔ nú mǐ bɔ mǐ ná dɛ. Gbɔn nɛ̌ é? Ado sixú hu mǐ dó nǔ e sixú wá jɛ é wú, bɔ énɛ́ sixú xo awǎjijɛ mǐtɔn yí. Awě e nɔ wá xo mɛ ajijimɛ lɛ́ é kpó nǔmaɖónukún e nɔ jɛ lɛ́ é kpó sixú dɔn mǐ dó aluwɛ kpó wǔvɛ́ kpó mɛ. Gɔ́ ná ɔ, ényí nǔ e ɖó nukún wɛ mǐ ɖe lɛ́ é ma sɔ́ wá jɛnu ǎ ɔ, awakanmɛ sixú kú mǐ.—Nǔx. 13:12.

14. Étɛ́ wú awǎjijɛ adodwé ɔ ka nɔ sín? (Kpɔ́n ɖiɖe lɛ́ lɔmɔ̌.)

¹⁴ Ényí mǐ ɖo didɛ ɖo tagba lɛ́ nu wɛ ɔ, mǐ nɔ kpé wú bo nɔ ɖe xlɛ́ ɖɔ nǔ ɖěbǔ ná bo tlɛ ɖo jijɛ wɛ ɔ, wǎn e mǐ yí nú Tɔ́ mǐtɔn jǐxwé tɔn ɔ é wú wɛ mǐ ɖo sinsɛn ɛ wɛ, é nyí cejɛ́nnábí wútu ǎ. Tan Biblu tɔn lɛ́ xlɛ́ mǐ ɖɔ mǐ kún ɖó ná nɔ ɖó nukún ɖɔ Jexóva ní cyɔ́n alɔ mǐ jí sín wǔvɛ́ lɛ́ bǐ sí ó; é ka lɛ́ dó nǔ e nɔ jɛ ɖo gbɛzán mǐtɔn mɛ lɛ́ é ɖě mǐ jí ǎ. É tuun ɖɔ ényí mǐ ma tlɛ tuun nǔ e ná jɛ ɖo gbɛzán mǐtɔn mɛ lɛ́ é bǐ ǎ ɔ, mǐ hɛn ɔ, mǐ ná ɖó awǎjijɛ. Nǔgbó ɔ, wěɖexámɛ tɔn lɛ́ biba kpó yě xwixwedó kpó wú wɛ é nɔ sín. (Jel. 10:23) Ényí mǐ nɔ ba ɛ hwenu e mǐ nɔ ɖo gbeta lɛ́ kɔn wá wɛ é ɔ, ɖiɖɔ wɛ mǐ ɖe mɔ̌ ɖɔ: “Nú é jló Jexóva ɔ, mǐ ná ɖo gbɛ bo ná wa nǔ lě alǒ nǔ lě” nɛ́.—Ja. 4:15.

15. Étɛ́ mǐ ka tuun dó sɔgúdo wú?

¹⁵ Mǐ tuun nǔ e azǎn ɖokpó ɖokpó hɛn nu é ǎ, amɔ̌, mǐ tuun ɖɔ Jexóva dó gbɛ mavɔmavɔ sín akpá nú mǐ, é sixú nyí ɖo jǐxwé alǒ ɖo ayǐkúngban jí. Mǐ tuun ɖɔ é kún sixú ɖó adingban ó, bɔ nǔ ɖěbǔ kún ka sixú lɛ́ ɖó è te bónú é gɔn akpá e é dó lɛ́ é ɖe ó. (Ti. 1:2) Éɖokpónɔ wɛ sixú ‘ɖɔ nǔ e ná wa wɛ é ɖe é. Nǔ e ma ko jɛ ǎ, bo ka ná wá jɛ ɔ, é ko ɖɔ ɖ’ayǐ sín tɛgbɛ.’ Nǔ e ko jɛ wá yi lɛ́ é xlɛ́ ɖɔ nǔgbó wɛ xó énɛ́ nyí, bo ka ná lɛ́ nyí nǔgbó ɖo nǔ e ná wá jɛ ɖo sɔgúdo lɛ́ é mɛ. (Eza. 46:10) Mǐ tuun ɖɔ nǔ ɖěbǔ kún sixú ɖe mǐ ɖó vo nú wǎnyíyí Jexóva tɔn ɖo ali ɖěbǔ nu ó. (Hlɔ̌. 8:35-39) É ná ná mǐ nǔnywɛ́, dó gbɔ nú mǐ, lobo lɛ́ ná hlɔ̌nhlɔ́n e sín hudó mǐ ɖó é mǐ, bɔ mǐ ná dɛ ɖo nǔ ɖěbǔ e ná wá xwetɔ́n é nu. Mǐ sixú kú d’é jí ɖɔ Jexóva ná d’alɔ mǐ bo lɛ́ kɔn nyɔ̌ná dó mǐ jí.—Jel. 17:7, 8.

MǏ SIXÚ TUUN LĚ DO JEXÓVA TUUN MǏ SƆ É BǏ MLƐ́MLƐ́ Ǎ

16. Étɛ́ Jexóva ka tuun dó mǐ wú? Nɛ̌ nǔ ka nɔ cí nú we dó énɛ́ wú? (Ðɛhan 139:1-6)?

¹⁶ Xa Ðɛhan 139:1-6. Gbɛɖótɔ́ mǐtɔn tuun nǔ bǐ dó mǐ wú. Lěe mǐ nɔ lin nǔ gbɔn é kpó lěe nǔ nɔ cí nú mǐ é kpó ɔ, é tuun nǔ e wú wɛ é. É tuun nǔ e mǐ nɔ ɖɔ lɛ́ é kpó nǔ e ɖo ayi mǐtɔn mɛ lɛ́ é kpó. É lɛ́ tuun nǔ e mǐ nɔ wa lɛ́ é bǐ kpó nǔ e wú mǐ nɔ wa yě lɛ́ é bǐ kpó. Axɔ́sú Davídi ɖɔ ɖɔ Jexóva kpé wú, bo lɛ́ ɖo gbesisɔmɛ bá d’alɔ mǐ hwebǐnu. É jí wǔ tawun ɖɔ Aklúnɔ Nǔbǐwúkpétɔ́ wɛ̌kɛ́ ɔ tɔn, Gbɛɖótɔ́ jǐnukúnsin kpó ayǐkúngban kpó tɔn nɔ ɖó ayi mǐ wú sɔmɔ̌! Davídi ɖɔ: “Káká bǎ e mɛ a tuun mì yi jɛ ɔ kpácá mì, un tuun lěe un ná jlɛ́ gbɔn ɔ lɔ ǎ.”—Ðɛh. 139:6.

17. Étɛ́wú é ka sixú vɛ́ wǔ bɔ mǐ ná yí gbe ɖɔ Jexóva tuun mǐ ganjí?

¹⁷ Vlafo é sixú vɛ́ wǔ nú mǐ bɔ mǐ ná mɔ Jexóva dó mɔ Tɔ́ wǎnyíyínɔ e nǔ mǐtɔn nɔ ɖu ayi mɛ ná é, ɖó hɛ̌n e nu mǐ jɔ ɖe é, akɔ mǐtɔn, alǒ nǔ e mǐ ɖi nǔ ná ɖ’ayǐ lɛ́ é wútu. Alǒ mǐ sixú mɔ ɖɔ nǔ e mǐ wa nyi do wá yi lɛ́ é nylá sɔmɔ̌ bɔ Jexóva kún ná ba ná tuun mǐ gbeɖé ó, lé é lín dó mǐ. Nǔ tlɛ cí mɔ̌ nú Davídi hweɖélɛ́nu. (Ðɛh. 38:19, 22) Alǒ mɛ e ɖo tíntɛ́nkpɔ́n wɛ vɛ́návɛ́ná bá húzú gbɛzán tɔn bo ná zán gbɛ sɔgbe xá nǔgbódodó jlɔ́jlɔ́ Mawu tɔn lɛ́ é ɖé sixú kan nǔ élɔ́ byɔ́ éɖée: ‘Ényí Mawu tuun mì nǔgbó nǔgbó ɔ, étɛ́wú é ka ná ɖó nukún ɖɔ má húzú lěe un nɔ zán gbɛ gbɔn bɔ é ko má mì é?’

18. Nɛ̌ mǐ ka nɔ ɖu le gbe e mǐ yí ɖɔ Jexóva tuun mǐ hú mǐɖésúnɔ mɛtún ɔ é tɔn gbɔn? (Kpɔ́n ɖiɖe lɛ́ lɔmɔ̌.)

¹⁸ Mǐ sixú kplɔ́n bo yí gbe ɖɔ Jexóva tuun mǐ hú mǐɖésúnɔ mɛtún ɔ, bo sixú mɔ nǔ ɖagbe e ɖo mǐ mɛ bɔ mǐ ma sixú mɔ ǎ é. É nɔ mɔ nǔwanyido mǐtɔn lɛ́, amɔ̌, é tuun mɛ alɔkpa e mǐ ba ná nyí é bo lɛ́ yí wǎn nú mǐ. (Hlɔ̌. 7:15) Ényí mǐ wá tuun ɖɔ Jexóva nɔ mɔ gbɛtɔ́ alɔkpa e mǐ sixú wá nyí é ɔ, énɛ́ ná ná hlɔ̌nhlɔ́n e sín hudó mǐ ɖó bá sɛn ɛ kpó gbejíninɔ kpó, bo lɛ́ wa mɔ̌ kpó awǎjijɛ kpó é mǐ.

19. Étɛ́ mǐ ka tuun dó Jexóva wú bo tɛ afɔ jí?

¹⁹ Mǐ tuun ɖɔ Jexóva ɔ, wǎnyíyí wɛ é nyí. Nǔxokpɔ́n ɖěbǔ ɖo fínɛ́ ǎ. (1 Jaan 4:8) Mǐ tuun ɖɔ nǔgbódodó jlɔ́jlɔ́ tɔn lɛ́ nɔ ɖe wǎn e é yí nú mǐ é xlɛ́, bɔ ɖagbemɛninɔ mǐtɔn nɔ ɖu ayi mɛ n’i hú gǎn. Mǐ tuun ɖɔ Jexóva ba ɖɔ mǐ ní nɔ gbɛ káká sɔ́yi. É sɔ́ nǔ nú gbɛxixɔ ɔ bónú nǔ ná dó nyí mɔ̌. Gbɛxixɔ ɔ ná gǎnjɛwú mǐ ɖɔ, mǐ ná bo nyí gbɛtɔ́ hwɛhutɔ́ ɔ, é sixú kpa mǐ. (Hlɔ̌. 7:24, 25) Gɔ́ ná ɔ, mǐ tuun ɖɔ “Mawu kló hú ayi mǐtɔn bo tuun nǔ bǐ.” (1 Jaan 3:19, 20) Jexóva tuun nǔ bǐ dó mǐ wú, bo gán jɛ wú ɖɔ mǐ sixú wa jlǒ émítɔn bɔ é ná kpa mǐ.

20. Étɛ́ ka ná d’alɔ mǐ bɔ mǐ ná nyi alɔ nú adohu adohu syɛ́nsyɛ́n jí ninɔ dó nǔ e mǐ ma tuun ǎ lɛ́ é wú?

²⁰ Jexóva hwlá nǔ e mǐ ɖó ná tuun nǔgbó nǔgbó lɛ́ é ɖě dó mǐ ǎ. Ényí mǐ sɔ́ mǐɖée hwe bo yí gbe nú énɛ́ ɔ, mǐ nɔ nyi alɔ nú adohu adohu syɛ́nsyɛ́n ɖíɖó dó nǔ e jí mǐ ma sixú ɖó acɛ dó ǎ é wú, bo nɔ sɔ́ ayi ɖó nǔ e ɖo tají é jí. Ényí mǐ wa mɔ̌ ɔ, mǐ nɔ ɖe xlɛ́ ɖɔ mǐ ɖeji bǐ mlɛ́mlɛ́ dó Jexóva, “Mɛ e ɖó nǔnywɛ́ bɔ nǔ bǐ vɔ ɖ’é wú é” wú. (Jɔb. 36:4, nwt.) Nǔgbó wɛ ɖɔ mǐ tuun nǔɖé lɛ́ din ǎ, amɔ̌, mǐ ɖo nukún ɖó hwenu e mǐ ná kplɔ́n nǔ yɔ̌yɔ́ lɛ́ ɖo Mawu Ðaxó mǐtɔn gɔ́n, bo lɛ́ kplɔ́n nǔ dó wǔ tɔn káká sɔ́yi é wɛ.—Nǔt. 3:11.