Nɔ ɖó sísí nú mɛ ɖěvo lɛ́

1. Étɛ́wú é ka nɔ su gbɛtɔ́ lɛ́ nukún mɛ hwenu e è ɖó sísí nú yě é? (Nǔnywɛ́xó 22:1)

É KA nɔ su nukún towe mɛ hwenu e mɛ ɖěvo lɛ́ ɖó sísí nú we é a? É ɖo wɛn ɖɔ nǔ nɔ nyí mɔ̌. Sísí ɖo nǔ bǐbɛ́mɛ tɔn e sín hudó gbɛtɔ́ lɛ́ ɖó é mɛ. È ɖó sísí nú mǐ ɔ, mǐ nɔ vo. Yǎyá wú wɛ ǎ bɔ Biblu ɖɔ “mɛ ɖěvo lɛ́ ɖó sísí nú mɛ ɔ, é nyɔ́ hú kpatágan kpó siká kpó”!—Xa Nǔnywɛ́xó 22:1.

2-3. Ninɔmɛ tɛ́ lɛ́ mɛ mɔ̌ mǐ ka ɖó ná ɖó sísí nú mɛ ɖěvo lɛ́ ɖe?

² É sixú nɔ ma bɔ wǔ nú mǐ hwebǐnu bónú mǐ ná ɖó sísí nú mɛ ɖěvo lɛ́. Nǔ e wú wɛ é ɖokpó wɛ nyí ɖɔ mǐ nɔ sixú gɔn nǔwanyido mɛ e lɛ́ dó mǐ lɛ́ é tɔn mɔ ǎ. Gɔ́ ná ɔ, mǐ ɖo gbɛ nɔ wɛ ɖo hwenu e gěgé mɛ lɛ́ tɔn ma nɔ ɖó sísí nú mɛ ǎ é ɖé. Amɔ̌, mǐdɛɛ lɛ́ ɖó ná gbɔn vo. Aniwú? Ðó Jexóva ba ɖɔ mǐ ní nɔ wlí yɛ̌yi, alǒ nɔ ɖó sísí nú “gbɛtɔ́ alɔkpa lɛ́ bǐ.”—1 Pi. 2:17.

³ Mǐ sixú ɖu le xó ɖiɖɔ dó nǔ e sísí ɖíɖó nú mɛ ɖěvo lɛ́ nyí é kpó lěe mǐ sixú ɖó sísí nú (1) mɛ e ɖo xwédo mǐtɔn mɛ lɛ́ é, (2) mawusɛntɔ́ hǎtɔ́ mǐtɔn lɛ́ kpó (3) mɛ e ma ɖo agun ɔ mɛ ǎ lɛ́ é kpó gbɔn é tɔn. Mǐ ná sɔ́ ayi ɖó lěe mǐ sixú ɖó sísí nú mɛ ɖo ninɔmɛ vɛ́ wǔ lɛ́ mɛ gbɔn é jí.

ÉTƐ́ KA NYÍ TÍNMƐ SÍSÍ ÐÍÐÓ NÚ MƐ ÐĚVO LƐ́ TƆN?

4. Étɛ́ ka nyí tínmɛ è ní ɖó sísí nú mɛ ɖěvo lɛ́ tɔn?

⁴ Nɛ̌ a ka ná tínmɛ sísí gbɔn? Ðo gbe ɖé lɛ́ mɛ ɔ, xókwín “sísí” kpó “yɛ̌yi” kpó cá kan. Gbɔn nɛ̌ é? Nǔ nukɔn nukɔntɔn e “sísí” nɔ dó gesí é wɛ nyí linlin e mǐ nɔ ɖó dó mɛɖé wú é. Ényí mǐ nɔ ɖó sísí nú mɛ ɖěvo lɛ́ ɔ, mǐ nɔ xlɛ́ ɖɔ é jɛxá ɖɔ mǐ ní ɖó sísí nú yě, bo lɛ́ ké ya nú yě, bóyá ɖó jijɔ yětɔn lɛ́, nǔ e wú yě kpé bo wa lɛ́ é, alǒ tɛn e mɛ yě ɖe é wú. Amɔ̌, “yɛ̌yi” nɔ dó gesí lěe mǐ nɔ wa nǔ xá mɛɖé gbɔn é. Ényí mǐ nɔ wlí yɛ̌yi nú mɛ ɖěvo lɛ́ ɔ, mǐ nɔ wa nǔ xá yě ɖo ali ɖé nu bɔ yě nɔ mɔ ɖɔ émí xɔ akwɛ́, è ké ya nú émí, bo lɛ́ wlí yɛ̌yi nú émí. É ɖo wɛn ɖɔ, cóbónú yɛ̌yi ná nyí yɛ̌yi jɔ yɛ̌yi ɔ, ayi mɛ wɛ é ɖó ná gosín.—Mat. 15:8.

5. Étɛ́ ka sixú d’alɔ mǐ bɔ mǐ ná ɖó sísí nú mɛ ɖěvo lɛ́?

⁵ Jexóva ba ɖɔ mǐ ní nɔ ɖó sísí nú mɛ ɖěvo lɛ́; nǔgbó ɔ, é byɔ́ mǐ ɖɔ mǐ ní nɔ ɖó sísí nú “acɛkpatɔ́ lɛ́.” (Hlɔ̌. 13:1, 7) Amɔ̌, mɛ ɖé lɛ́ sixú ɖɔ: “É nɔ víví nú mì ɖɔ má ɖó sísí nú mɛ ɖěvo lɛ́ ényí yě jɛxá ɔ nɛ́.” Énɛ́ ka sɔgbe a? Mǐ mɛ mɛsɛntɔ́ Jexóva tɔn lɛ́ tuun ɖɔ sísí ɖěbǔ e mǐ nɔ ɖó nú gbɛtɔ́ lɛ́ é kún nɔ júnjɔ́n nǔ e yě nɔ wa lɛ́ é jí kpowun ó. Nǔ ɖěvo e gɔ́ngɔ́n hú gǎn é jí wɛ é nɔ jínjɔ́n, é wɛ nyí wǎnyíyí e mǐ ɖó nú Jexóva é kpó jlǒ e mǐ ɖó bá nyɔ́ nukún tɔn mɛ é kpó.—Joz. 4:14; 1 Pi. 3:15.

6. A ka hɛn ɔ, a ná ɖó sísí nú mɛ e ma nɔ ɖó sísí nú we ǎ é a? Tínmɛ. (Kpɔ́n ɖiɖe ɔ lɔmɔ̌.)

⁶ Mɛ ɖé lɛ́ sixú kanbyɔ́ yěɖée ɖɔ: ‘È ka hɛn ɔ, è ná ɖó sísí nú mɛ e ma nɔ wa nǔ xá mɛ kpó sísí kpó ǎ é ɖé dóó a?’ Ganjí. Mǐ ní kpɔ́n kpɔ́ndéwú ɖé lɛ́. Axɔ́sú Sawúlu ɖe vǐ tɔn Jonatáan kpo ɖo mɛ ɖěvo lɛ́ nukɔn. (1 Sam. 20:30-34) É ɖo mɔ̌ có, Jonatáan nɔ gǔdo nú tɔ́ tɔn Sawúlu kpó sísí kpó ɖo ahwanfunfun mɛ káká jɛ gbe e gbe é kú é. (Tín. 20:12; 2 Sam. 1:23) Vɔ̌sánúxwlémawutɔ́ ɖaxó Eli vɛ ahan dó Ana. (1 Sam. 1:12-14) Izlayɛ́li to ɔ bǐ tuun ɖɔ Eli hwedó tɔ́zɔ́ tɔn kpó vɔ̌sánúxwlémawutɔ́ ɖaxó zɔ́ tɔn kpó wú có, Ana ka ɖɔ xó n’i kpó sísí kpó. (1 Sam. 1:15-18; 2:22-24) Gɔ́ ná ɔ, mɛ e ɖo Atɛ́ni lɛ́ é zun Pɔ́lu, bo ylɔ́ ɛ ɖɔ “nǔwláɖɔtɔ́.” (Mɛ. 17:18) É ɖo mɔ̌ có, Pɔ́lu ɖɔ xó nú yě kpó sísí kpó. (Mɛ. 17:22) Kpɔ́ndéwú énɛ́ lɛ́ xlɛ́ ɖɔ wǎnyíyí e gɔ́ngɔ́n é ɖíɖó nú Jexóva kpó jlǒ e mǐ ɖó bo ma ná gblé ɖo así tɔn ǎ é kpó sixú sísɛ́ mǐ bɔ mǐ ná nɔ ɖó sísí nú mɛ ɖěvo lɛ́, é ná nyí hwenu e mɔ̌ wiwa bɔ wǔ é kɛ́ɖɛ́ ǎ, loɔ, mǐ ná nɔ lɛ́ wa mɔ̌ hwenu e mɔ̌ wiwa vɛ́ wǔ é. Mi nú mǐ ní ɖɔ xó dó mɛ ɖěɖěe é jɛxá ɖɔ mǐ ní ɖó sísí ná lɛ́ é kpó nǔ e wú mǐ ɖó ná wa mɔ̌ é kpó jí.

NƆ ÐÓ SÍSÍ NÚ HǍGBƐ́ XWÉDO TOWE TƆN LƐ́

7. Étɛ́ ka sixú zɔ́n b’ɛ ná vɛ́ wǔ nú mǐ bɔ mǐ ná wa nǔ xá hǎgbɛ́ xwédo mǐtɔn tɔn lɛ́ kpó sísí kpó?

⁷ Wǔvɛ́ ɔ. Mǐ nɔ zán hwenu gěgé ɖó kpɔ́ xá xwédo mǐtɔn. Wǎgbɔ tɔn ɔ, mǐ nɔ tuun nǔwúkpíkpé yětɔn lɛ́ kpó gǎnmaɖó yětɔn lɛ́ kpó. Yě mɛ ɖé lɛ́ sixú ko ɖo azɔn jɛ wɛ, bɔ énɛ́ zɔ́n bɔ nukún kpíkpé dó yě wú vɛ́ wǔ nú mǐ, alǒ yě sixú ɖo linkpɔ́nzɔn jɛ wɛ. Yě mɛ ɖé lɛ́ tlɛ sixú nɔ ɖɔ xó alǒ wa nǔ ɖo ali ɖé nu b’ɛ nɔ dó xomɛsin nú mǐ. Ényí mǐ ɖo kpɔ́ xá xwédo mǐtɔn ɔ, mǐ ɖó ná vo. Amɔ̌, ényí hǎgbɛ́ xwédo ɔ tɔn lɛ́ ma nɔ sí yěɖée lɛ́ ǎ ɔ, énɛ́ sixú zɔ́n bɔ yě ná ɖo xomɛsin jí dó yěɖée lɛ́ wú. Énɛ́ nɔ zɔ́n bɔ yě sɔ́ nɔ wa nǔ ɖó kpɔ́ ǎ. Lěe xúmɛzɔn nɔ zɔ́n bɔ wǔjɔnú agbaza ɔ tɔn lɛ́ ma nɔ wa nǔ ɖó kpɔ́ ǎ é ɖɔhun ɔ, mɛmasí nɔ zɔ́n bɔ hǎgbɛ́ xwédo ɖé tɔn lɛ́ sɔ́ nɔ wa nǔ ɖó kpɔ́ ǎ. Amɔ̌, mɛmasí ɖiɖexlɛ́ ɖo xwédo mɛ cí xúmɛzɔn e mɛɖésúnɔ ma sixú gbɔ bǐ mlɛ́mlɛ́ ǎ é ɖɔhun ǎ; mǐ hɛn ɔ mǐ ná ɖó mɛmasí te bɔ é ná gɔn nǔ wa dó xwédo mǐtɔn wú.

8. Étɛ́wú é ka ɖo tají ɖɔ mǐ ní ɖó sísí nú hǎgbɛ́ xwédo mǐtɔn tɔn lɛ́? (1 Timɔtée 5:4, 8)

⁸ Étɛ́wú è ka ɖó ná sí mɛ? (Xa 1 Timɔtée 5:4, 8.) Ðo wěma nukɔntɔn e Pɔ́lu sɛ́ dó Timɔtée é mɛ ɔ, é ɖɔ xó dó lěe hǎgbɛ́ xwédo tɔn lɛ́ ɖó ná kpé nukún dó hudó yěɖée lɛ́ tɔn lɛ́ wú gbɔn é wú. É tínmɛ ɖɔ nǔ nukɔntɔn e ɖó ná sísɛ́ mǐ bɔ mǐ ná wlí yɛ̌yi nú hǎgbɛ́ xwédo mǐtɔn tɔn lɛ́ é wɛ ɖó ná nyí “gbejí nɔ nú Mawu,” é nyí mǐ ɖó ná wa mɔ̌ kpowun wútu ǎ. Tínmɛ énɛ́ tɔn wɛ nyí ɖɔ mǐ nɔ wa mɔ̌, ɖó mǐ yí wǎn nú Jexóva, bo nɔ kpɔ́n mɔ̌ wiwa dó mɔ mawusinsɛn mǐtɔn sín akpáxwé ɖé. Jexóva sɔ́ tuto xwédo tɔn ɖ’ayǐ. (Efɛ́. 3:14, 15) Énɛ́ wú ɔ, ényí mǐ wlí yɛ̌yi nú hǎgbɛ́ xwédo mǐtɔn tɔn ɖé hǔn, Jexóva e nyí Dǒwátɔ́ xwédo tɔn é wlí yɛ̌yi ná wɛ mǐ ɖe gbɔn mɔ̌ nɛ́. Hwɛjijɔ agbɔ̌nnɔ e wú mǐ ná ɖó sísí nú hǎgbɛ́ xwédo mǐtɔn tɔn lɛ́ é ɖé nɛ́!

9. Nɛ̌ asú kpó asi kpó ɖé ka sixú ɖó sísí nú yěɖée gbɔn? (Kpɔ́n ɖiɖe lɛ́ lɔmɔ̌.)

⁹ Lěe è ná ɖó sísí nú mɛ gbɔn é. Asú e nɔ wlí yɛ̌yi nú asi tɔn é nɔ xlɛ́ ɖo nǔglɔ́ bo nɔ lɛ́ xlɛ́ ɖo agbawungba ɖɔ é xɔ akwɛ́ nú émí. (Nǔx. 31:28; 1 Pi. 3:7) É nɔ xo è, ɖe è kpo alǒ bló bɔ é nɔ mɔ ɖɔ émí kún hwɛ́n nǔɖé ó gbeɖé ǎ. Ariel,a éé nɔ nɔ Argentine é ɖɔ: “Asi ce sín azɔn zɔ́n bɔ é nɔ ɖɔ nǔɖé lɛ́ hweɖélɛ́nu bɔ é nɔ mɛ mì. Ényí nǔ mɔ̌hun jɛ ɔ, un nɔ flín nyiɖée ɖɔ, é kún nyí lěe nǔ cí n’i nǔgbó nǔgbó é wɛ xó tɔn lɛ́ ɖe xlɛ́ ó. Gɔ́ ná ɔ, un nɔ tɛ́n kpɔ́n bo nɔ flín 1 Kɔlɛ́ntinu lɛ́ 13:5; é nɔ d’alɔ mì bɔ un nɔ ɖɔ xó xá ɛ kpó sísí kpó, bɔ é nɔ nyí kpó xomɛsin kpó ǎ.” (Nǔx. 19:11) Asi ɖé nɔ wlí yɛ̌yi nú asú tɔn gbɔn xó tɔn ɖagbe ɖiɖɔ nú mɛ ɖěvo lɛ́ gblamɛ. (Efɛ́. 5:33) É nɔ nyi alɔ nú alǎnnú ɖiɖɔ, mɛcáko kpó nyǐ sa ylɔ́ mɛ kpó; é tuun ɖɔ walɔ mɔ̌hun nɔ wa nǔ dó alɔwlíwlí wú. (Nǔx. 14:1) Nɔví nyɔ̌nu e nɔ nɔ Italie bɔ asú tɔn ɖo xwi ɖí xá adohu adohu wɛ é ɖé ɖɔ: “Hweɖélɛ́nu ɔ, é nɔ cí nú mì ɖɔ asú ce nɔ ɖó linkpɔ́n dó nǔ lɛ́ wú zɛ xwé wú. Ð’ayǐ ɔ, xógbe ce lɛ́ kpó nukúnmɛ ce sín xlɛ̌ lɛ́ kpó nɔ xlɛ́ ɖɔ un kún nɔ ɖó sísí n’i ó. Amɔ̌, un wá mɔ ɖɔ lě do un nɔ zán hwenu ɖó kpɔ́ xá mɛ ɖěɖěe nɔ ɖɔ xó nú mɛ ɖěvo lɛ́ kpó sísí kpó sɔ é ɔ, mɔ̌ do wɛ é nɔ sísɛ́ mì bɔ un nɔ ɖó sísí nú asú ce sɔ.”

10. Nɛ̌ mɛ wínnyáwínnyá lɛ́ ka sixú ɖe xlɛ́ ɖɔ émí nɔ ɖó sísí nú mɛjitɔ́ émítɔn lɛ́ gbɔn?

¹⁰ Mɛ wínnyáwínnyá lɛ́ mi, mi nɔ se tónú nú sɛ́n ɖěɖěe mɛjitɔ́ mitɔn lɛ́ dó nú mi lɛ́ é. (Efɛ́. 6:1-3) Mi nɔ ɖɔ xó nú mɛjitɔ́ mitɔn lɛ́ kpó sísí kpó. (Tín. 21:17) Ée mɛjitɔ́ mitɔn lɛ́ ná ɖo kpikpo wɛ é ɔ, yě sixú ɖó hudó alɔdó mitɔn tɔn hú gǎn. Mi wa nǔ e wú mi kpé é bǐ dó kpé nukún dó yě wú. Kpɔ́n kpɔ́ndéwú María e tɔ́ tɔn ma nyí Kúnnuɖetɔ́ Jexóva tɔn ǎ é tɔn. Ée María sín tɔ́ jɛ azɔn é ɔ, é vɛ́ wǔ nú María bɔ é ná kpé nukún dó wǔ tɔn. É flín ɖɔ: “Un nɔ xo ɖɛ, ényí bo ná dó ɖó sísí nú tɔ́ ce kɛ́ɖɛ́ wú wɛ ǎ, loɔ, bónú tɔ́ ce ná lɛ́ mɔ ɖɔ nyi ɖó sísí nú émí. Un ɖɔ nú nyiɖée ɖɔ ényí Jexóva byɔ́ mì ɖɔ má wlí yɛ̌yi nú mɛjitɔ́ ce lɛ́ ɔ, é ɖo wɛn ɖɔ é ná ná mì hlɔ̌nhlɔ́n bɔ un ná wa mɔ̌. Nukɔnmɛ ɔ, un wá mɔ nǔ jɛ wú ɖɔ é kún byɔ́ ɖɔ tɔ́ ce ní ɖyɔ́ walɔ cóbónú un ná ɖó sísí n’i ó.” Ényí hǎgbɛ́ xwédo mǐtɔn tɔn lɛ́ sín gǎnmaɖó lɛ́ ɖo fínɛ́ có mǐ ka nɔ wlí yɛ̌yi nú yě ɔ, mǐ nɔ ɖe xlɛ́ ɖɔ mǐ ɖó sísí nú tuto Jexóva tɔn.

NƆ ÐÓ SÍSÍ NÚ NǓÐITƆ́ HǍTƆ́ TOWE LƐ́

11. Étɛ́wú é ka sixú vɛ́ wǔ bɔ mǐ ná wa nǔ xá nǔɖitɔ́ hǎtɔ́ mǐtɔn lɛ́ kpó sísí kpó?

¹¹ Wǔvɛ́ ɔ. Nǔɖitɔ́ hǎtɔ́ lɛ́ nɔ zán gbɛ sɔgbe xá nǔgbódodó Biblu tɔn lɛ́, amɔ̌ hweɖélɛ́nu ɔ, yě mɛ ɖé lɛ́ sixú nɔ ma wa nǔ xá mǐ kpó xomɛnyínyɔ́ kpó, dó hwɛ mǐ dó acɛ jí, alǒ dó xomɛsin nú mǐ. Ényí nǔɖitɔ́ hǎtɔ́ ɖé wa nǔɖé b’ɛ zɔ́n bɔ mǐ “ɖó hwɛjijɔ e wú [mǐ] ná dó hwɛ” ɛ é ɔ, é sixú vɛ́ wǔ nú mǐ bɔ mǐ ná kpo ɖo nǔ wa xá ɛ wɛ kpó sísí kpó. (Koló. 3:13) Étɛ́ ka sixú d’alɔ mǐ bɔ mǐ ná kpé wú?

12. Étɛ́wú é ka ɖo tají ɖɔ mǐ ní nɔ ɖó sísí nú nǔɖitɔ́ hǎtɔ́ mǐtɔn lɛ́? (2 Piyɛ́ɛ 2:9-12)

¹² Étɛ́wú è ka ɖó ná ɖó sísí nú mɛ? (Xa 2 Piyɛ́ɛ 2:9-12.) Ðo wěma wegɔ́ e Mawu sɔ́ dó ayi mɛ nú Piyɛ́ɛ bɔ é wlán é mɛ ɔ, Piyɛ́ɛ tínmɛ ɖɔ mɛ ɖé lɛ́ ɖo agun klisánwun xwe kanweko nukɔntɔn ɔ tɔn mɛ bo nɔ ɖɔ xó nú “mɛ ɖěɖěe Mawu sɔ́ su lɛ́ é,” énɛ́ wɛ nyí mɛxó agun tɔn lɛ́ kpó mɛmasí kpó. Nɛ̌ wɛnsagun gbejínɔtɔ́ ɖěɖěe mɔ nǔ e ɖo jijɛ wɛ lɛ́ é ka wa nǔ gbɔn? “Ðó sísí e yě ɖó nú Jexóva é wútu” ɔ, yě ɖɔ nǔ nyanya ɖěbǔ dó mɛ énɛ́ lɛ́ wú ǎ. Dǒ nukún mɛ kpɔ́n! Wɛnsagun énɛ́ lɛ́, éé nyí mɛ maɖóblɔ̌ lɛ́ é gbɛ́ ɖɔ émí kún ná kán gbe nú súnnu goyítɔ́ énɛ́ lɛ́ ó. É nyɔ́ wa ɔ, yě jó xó ɔ dó nyi alɔ mɛ nú Jexóva bónú é ná ɖɔ hwɛ yětɔn, bo lɛ́ gbɛ́ nǔ nú yě. (Hlɔ̌. 14:10-12; sɔ́ jlɛ́ dó Judi 9 wú.) Kpɔ́ndéwú wɛnsagun lɛ́ tɔn sixú kplɔ́n nǔ mǐ. Ényí mǐ ma ɖó ná wa nǔ xá gbeklánxámɛtɔ́ lɛ́ kpó mɛmasí kpó ǎ ɔ, mǐ ɖó ná nyi alɔ nú nǔ wa xá nǔɖitɔ́ hǎtɔ́ lɛ́ kpó mɛmasí kpó. É nyɔ́ wa ɔ, mǐ wɛ ɖó ná “nɔ jɛ nukɔn” ɖo yɛ̌yi wlíwlí nú nǔɖitɔ́ hǎtɔ́ mǐtɔn lɛ́ kpáxwé. (Hlɔ̌. 12:10) Mɔ̌ wiwa nɔ xlɛ́ ɖɔ mǐ nɔ ɖó sísí nú Jexóva.

13-14. Nɛ̌ mǐ ka sixú ɖó sísí nú mɛ e ɖo agun ɔ mɛ lɛ́ é gbɔn? Nǎ kpɔ́ndéwú ɖé lɛ́. (Kpɔ́n ɖiɖe lɛ́ lɔmɔ̌.)

¹³ Lěe è nɔ ɖó sísí nú mɛ gbɔn é. Mɛxó agun tɔn lɛ́ è mi, mi nɔ kplɔ́n nǔ mɛ ɖěvo lɛ́ kpó wǎnyíyí kpó. (File. 8, 9) Ényí mi ɖó ná ɖe wě xá mɛɖé hǔn, mi nɔ wa mɔ̌ kpó xomɛnyínyɔ́ kpó, é ní ma nyí hwenu e mi ɖo xomɛsin jí é ó. Nɔví nyɔ̌nu lɛ́ è mi, mi sixú wa nǔ gěgé dó bló bɔ sísí ná jínjɔ́n ayǐ ɖo agun ɔ mɛ, bo lɛ́ nya xɛ ɖ’é jí gbɔn alɔ nyinyi nú mɛnúɖiɖɔ mɛ hɛn gblé tɔn, alǒ mǎsin kɔn nyi mɛ wú gblamɛ. (Ti. 2:3-5) Mǐ bǐ sixú ɖe xlɛ́ ɖɔ mǐ nɔ ɖó sísí nú mɛxó agun tɔn lɛ́ gbɔn nǔ wa ɖó kpɔ́ xá yě kpó nǔsumɛnukúnmɛ ɖiɖexlɛ́ ɖó azɔ̌ syɛ́nsyɛ́n e yě nɔ wa bo nɔ kpé nukún dó kplé lɛ́ wú, nɔ nukɔn nú wɛnjíjlázɔ́ ɔ, bo nɔ lɛ́ d’alɔ mɛ ɖěɖěe “ɖe afɔ nyi do” lɛ́ é kpó é gblamɛ.—Ga. 6:1; 1 Tim. 5:17.

¹⁴ É vɛ́ wǔ nú nɔví nyɔ̌nu e nɔ nyí Rocío é bɔ é ná ɖó sísí nú mɛxó agun tɔn e ɖe wě xá ɛ é ɖé. É ɖɔ: “Un mɔ ɖɔ é kún ɖɔ xó nú mì kpó xomɛnyínyɔ́ kpó ó. Ée un jɛ xwégbe é ɔ, un ɖɔ xó nyanya dó wǔ tɔn. Nǔgbó wɛ ɖɔ ɖo tɛn tɔn mɛ ɔ, un dó gǎn bo ɖe xlɛ́ ɖɔ lěe ɖe wě xá mì gbɔn wɛ é ɖe é kún vɛ́ nú mì ó, amɔ̌ ɖo xo ce mɛ ɔ, un xo nǔ kpɔ́n dó nǔ e sísɛ́ ɛ bɔ é ɖe wě ɔ xá mì lɛ́ é wú, bo gbɛ́ wěɖexámɛ tɔn.” Étɛ́ ka d’alɔ Rocío? É tínmɛ ɖɔ: “Ðo Biblu xixa ce hwenu ɔ, un wá xo go 1 Tɛsaloníkinu lɛ́ 5:12, 13. Ée un wá mɔ ɖɔ un kún ɖo sísí ɖó nú nɔví súnnu énɛ́ wɛ ó é ɔ, ayixa ce jɛ hun xo xá mì jí. Un xo ɖɛ sɛ́dó Jexóva, bo ba do nú nǔ ɖo wěma mǐtɔn lɛ́ mɛ dó nǔ e sixú d’alɔ mì tawun bɔ un ná jlá linlin ce ɖó é wú. Un wá mɔ ɖɔ é kún nyí nɔví súnnu ɔ wú wɛ xó ɔ ɖe ó, amɔ̌, goyíyí ce wú wɛ é sín. Un wá mɔ din ɖɔ kancícá ɖé ɖo mɛɖéesɔ́hwe ce kpó nǔwúkpíkpé e un ɖó bo ná ɖó sísí nú mɛ ɖěvo lɛ́ é kpó tɛ́ntin. É byɔ́ ɖɔ un ná kpo ɖo gǎn dó wɛ, amɔ̌, ée un ɖo tíntɛ́nkpɔ́n wɛ bo ná ɖó sísí nú mɛ ɖěvo lɛ́ é ɔ, un ɖo fífá mɛ xá Jexóva.”

NƆ XLƐ́ ÐƆ ÉMÍ NƆ ÐÓ SÍSÍ NÚ MƐ ÐĚÐĚE MA ÐO AGUN Ɔ MƐ Ǎ LƐ́ É

15. Étɛ́wú é ka sixú vɛ́ wǔ nú mǐ bɔ mǐ ná ɖó sísí nú mɛ ɖěɖěe ma ɖo agun ɔ mɛ ǎ lɛ́ é?

¹⁵ Wǔvɛ́ ɔ. Hwɛhwɛ wɛ mǐ nɔ xo go mɛɖé lɛ́ ɖo sinsɛnzɔ́ ɔ mɛ bɔ é nɔ cí ɖɔ yě kún yí wǎn nú nǔgbó Biblu tɔn lɛ́ ó ɖɔhun. (Efɛ́. 4:18) Mɛ ɖé lɛ́ nɔ gbɛ́ ɖɔ émí kún ná ɖótó wɛn mǐtɔn ó, ɖó nǔ e è kplɔ́n yě ɖɔ yě ní ɖi nǔ ná hwenu e yě ɖo vǔ é wútu. Azɔ̌gbɛ́ mǐtɔn ɖé lɛ́, alǒ wěmaxɔmɛvígbɛ́ mǐtɔn ɖé lɛ́ tíin bɔ nǔ wa xá yě sixú vɛ́ wǔ, gɔ́ ná ɔ, mǐ sixú ɖó gǎn ɖé, alǒ mɛ̌si ɖé bɔ xomɛ nɔ hun i dó mǐ wú gbeɖé ǎ, alǒ xomɛ nɔ hun i dó azɔ̌ mǐtɔn wú gbeɖé ǎ. Hwenu ɖo yiyi wɛ ɔ, sísí e mǐ ɖó nú mɛ mɔ̌hun lɛ́ é sixú jɛ ɖiɖekpo jí, bɔ mǐ sixú wa nǔ xá yě lěe mǐ ma ba ɖɔ è ní wa nǔ xá mǐ gbɔn ǎ é.

16. Étɛ́wú é ka ɖo tají ɖɔ mǐ ní nɔ ɖó sísí nú mɛ ɖěɖěe ma ko ɖo Jexóva sɛn wɛ ǎ lɛ́ é? (1 Piyɛ́ɛ 2:12; 3:15)

¹⁶ Étɛ́wú è ka ɖó ná ɖó sísí nú mɛ? Flín ɖɔ Jexóva nɔ ɖ’ayi lěe mǐ nɔ wa nǔ xá nǔmaɖitɔ́ lɛ́ gbɔn é wú. Mɛsɛ́dó Piyɛ́ɛ flín klisánwun lɛ́ ɖɔ walɔ ɖagbe yětɔn sixú sísɛ́ mɛ ɖé lɛ́ bɔ yě ná “kpa susu nú Mawu.” Hwɛjijɔ énɛ́ wú wɛ é dó wǔsyɛ́n lanmɛ nú yě ɖɔ yě ní nɔ jɛ hun dó nǔɖiɖi yětɔn jí “kpó xomɛfífá kpó, kpódó sísí ɖaxó kpán.” (Xa 1 Piyɛ́ɛ 2:12; 3:15.) Ényí klisánwun lɛ́ ɖo hun jɛ dó nǔɖiɖi yětɔn jí wɛ ɖo hwɛ nukɔn alǒ ɖo hun jɛ dó nǔɖiɖi yětɔn jí wɛ hwenu e yě ɖo xó ɖɔ ɖó kpɔ́ xá nɔzo yětɔn ɖé wɛ é ɔ, yě ɖó ná nɔ wa nǔ xá nǔmaɖitɔ́ lɛ́ cí nǔ ɖɔ Mawu ɖésú ɖo tɛn ɔ mɛ wɛ ɖɔhun. Ðěbǔ wɛ é ná bo nyí gbɔn ɔ, Jexóva nɔ ɖo nǔ e mǐ nɔ ɖɔ lɛ́ é kpó lěe mǐ nɔ ɖɔ gbɔn é kpó kpɔ́n wɛ, bo nɔ lɛ́ ɖo sise wɛ. Hwɛjijɔ e wú mǐ ná nɔ wa nǔ xá mɛ ɖěɖěe ma ɖo agun ɔ mɛ ǎ lɛ́ é kpó sísí kpó é agbɔ̌nnɔ ɖokpó nɛ́!

17. Nɛ̌ mǐ ka sixú nɔ ɖó sísí nú mɛ e ma ɖo agun ɔ mɛ ǎ lɛ́ é gbɔn?

¹⁷ Lěe è nɔ ɖó sísí nú mɛ gbɔn é. Ényí mǐ ɖo sinsɛnzɔ́ ɔ mɛ ɔ, mǐ ná ba gbeɖé ná wa nǔ cí nǔ ɖɔ mǐ hú gǎn mɛ ɖěɖěe ma tuun nǔ káká ɖé, alǒ tuun nǔ ɖěbǔ dó Biblu jí ǎ lɛ́ é ǎ. É nyɔ́ wa ɔ, mǐ ná ba ná xlɛ́ ɖɔ mɛ ɖěvo lɛ́ xɔ akwɛ́ nú Mawu bo lɛ́ hú gǎn mǐ. (Ajée 2:7; Filí. 2:3) Ényí mɛɖé zun we ɖó nǔ e a ɖi nǔ ná lɛ́ é wú hǔn, tɛ́n kpɔ́n bo ma sú zunxɔ́ ɛ gbɔn Mawuxó ɔ zínzán dó dó xomɛsin n’i gblamɛ ó. (1 Pi. 2:23) Ényí a ɖɔ nǔɖé b’ɛ vɛ́ nú we hǔn, yá wǔ dó kɛnklɛ́n. Nɛ̌ a ka sixú nɔ sí mɛ e a nɔ w’azɔ̌ xá lɛ́ é gbɔn? Nyǐ azɔ̌watɔ́ kanɖódónǔwútɔ́, bo tɛ́n kpɔ́n bo zán walɔ ɖagbe xá mɛ e w’azɔ̌ xá wɛ a ɖe lɛ́ é kpó mɛ e a nɔ w’azɔ̌ ná lɛ́ é kpó. (Ti. 2:9, 10) Ényí a nɔ ɖɔ nǔgbó, nɔ ɖó kan d’azɔ̌ wú, bo nɔ lɛ́ w’azɔ̌ kpó ayi towe bǐ kpó ɔ, a sixú nɔ ma nyɔ́ ɖo gbɛtɔ́ lɛ́ sí hwebǐnu, amɔ̌, a ná nyɔ́ ɖo Mawu sí jɛ́n wɛ.—Koló. 3:22, 23.

18. Étɛ́wú é ka jɛxá ɖɔ è ní nɔ tɛ́n kpɔ́n bo nɔ ɖó sísí nú mɛ ɖěvo lɛ́, bo nɔ lɛ́ bló bónú yě ní tuun?

¹⁸ Hwɛjijɔ ɖagbe tɛ́ lɛ́ ɖíe mǐ ɖó bo ná nɔ tɛ́n kpɔ́n bo ná nɔ ɖó sísí nú mɛ ɖěvo lɛ́, lobo bló bɔ yě ná tuun è! Mǐ mɔ ɖɔ ényí mǐ nɔ ɖó sísí nú mɛ e ɖo xwédo mǐtɔn mɛ lɛ́ é ɔ, mǐ nɔ wlí yɛ̌yi nú Tatɔ́ xwédo tɔn mǐtɔn Jexóva. Ðo ali ɖokpó ɔ nu ɔ, ényí mǐ nɔ ɖó sísí nú nɔví súnnu kpó nɔví nyɔ̌nu kpó gbigbɔ tɔn mǐtɔn lɛ́ ɔ, mǐ nɔ wlí yɛ̌yi nú Tɔ́ mǐtɔn jǐxwé tɔn ɔ. Gɔ́ ná ɔ, ényí mǐ nɔ ɖó sísí nú mɛ e ma ɖo agun ɔ mɛ ǎ lɛ́ é ɔ, mǐ nɔ hun ali ɖagbe hú gǎn lɛ́ nú yě, bónú yě ná sɔ́ Mawu ɖaxó mǐtɔn su, alǒ wlí yɛ̌yi n’i. Ényí mǐ ɖó sísí nú mɛ ɖé lɛ́ bɔ yě ná bo ma tlɛ ɖó nú mǐ ǎ ɔ, é jɛxá ɖɔ mǐ ní tɛ́n kpɔ́n bo ɖó sísí nú yě, bo lɛ́ bló bónú yě ní tuun. Aniwú? Ðó Jexóva ná kɔn nyɔ̌ná dó mǐ jí. É dó akpá ɖɔ: “Mɛɖé sɔ́ mì su ɔ, un ná sɔ́ ɛ su.”—1 Sam. 2:30.