Lěe è sixú ɖí xwi xá azɔn e è ma ɖó nukún tɔn ǎ é gbɔn é

Lanmɛ towe wa aɖawun hazawun wɛ a? Ényí mɔ̌ wɛ hǔn, a tuun lě do azɔn nɔ ɖu akwɛ́ sɔ é kpó lě do é nɔ bló bɔ agbɔ̌n nɔ kpé mɛ ɖo taglomɛ kpó lěe nǔ nɔ cí nú mɛ é linu kpó gbɔn é. Étɛ́ ka sixú d’alɔ we bɔ a ná ɖí xwi xá? Nɛ̌ a ka sixú d’alɔ hǎgbɛ́ xwédo towe tɔn ɖé alǒ xɔ́ntɔn e ɖo xwi ɖí xá azɔnwúvɛ́ wɛ é ɖé gbɔn? Biblu nyí dotóoxwé sín wěma ɖé ǎ có, wěɖexámɛ e xɔ akwɛ́ bo sixú d’alɔ mɛ bɔ è ná ɖí xwi xá ninɔmɛ mɛtɔn ɖo ali ɖagbe hú gǎn ɔ nu lɛ́ é ɖ’é mɛ.

Wěɖexámɛ e ná d’alɔ we bɔ a ná ɖí xwi xá azɔnwúvɛ́ é ɖé lɛ́

Ba alɔdó dotóo tɔn

Nǔ e Biblu ɖɔ é: “Mɛ e sín lanmɛ ɖo ganjí lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn.”—Matíe 9:12.

Lěe è sixú zán gbɔn é: Ba alɔdó dotóo e tuun azɔ̌ ganjí lɛ́ é tɔn hwenu e é byɔ́ ɖó mɔ̌ é.

Tɛ́n nǔ élɔ́ kpɔ́n: Yǐ gbe nú nukúnkpédómɛwú dotóoxwé tɔn e nyɔ́ hú gǎn nú we bo tíin é. Hweɖélɛ́nu ɔ, é sixú nyí nǔnywɛ́nú ɖɔ è ní ma nɔ te ɖó wěɖexámɛ dotóo ɖokpó géé tɔn jí kpowun ó. (Nǔnywɛ́xó 14:15) Ðɔ xó ɖó kpɔ́ xá dotóozɔ́watɔ́ lɛ́ nyi wɛn, énɛ́ wɛ nyí ɖɔ, é ní za wě nú we ɖɔ a mɔ nǔ jɛ nǔ e yě ɖɔ lɛ́ é mɛ, bɔ yě lɔ mɔ nǔ jɛ nǔ e ɖo wiwa we wɛ é wú dégbédégbé. (Nǔnywɛ́xó 15:22) Tɛ́n kpɔ́n bo tuun nǔ dó azɔn e jɛ wɛ a ɖe é wú káká jɛ nǔ vovo e a sixú zán ná lɛ́ é bǐ jí. Ényí a mɔ nǔ jɛ nǔ e ɖo te kpɔ́n we é wú ɔ, a ná ko sɔ́ nǔ ɖó bǎ ɖé mɛ bá ɖí xwi xá ninɔmɛ towe ɖo lěe nǔ nɔ cí nú mɛ é linu, bo wá gbeta ɖagbe lɛ́ kɔn dó lěe è ná kpé nukún dó wǔ we gbɔn é wú.
Nɔ wa nǔ ɖěɖěe sixú zɔ́n bɔ a ná ɖo ganjí ɖo agbaza mɛ lɛ́ é

Nǔ e Biblu ɖɔ é: “Lanmɛ bibakpɔ́n nɔ wa ɖagbe nú agbaza mɛtɔn.”—1 Timɔtée 4:8, Contemporary English Version.

Lěe è sixú zán gbɔn é: Nǔ ɖěɖěe sixú zɔ́n bɔ a ná ɖo ganjí ɖo agbaza mɛ lɛ́ é wiwa, ɖi lanmɛ bibakpɔ́n hwɛhwɛ sixú wa ɖagbe nu we.

Tɛ́n nǔ élɔ́ kpɔ́n: Nɔ ba lanmɛ kpɔ́n hwɛhwɛ, nɔ ɖu nǔɖuɖu hunsin ɖagbe tɔn, bo nɔ lɛ́ d’amlɔ ganjí. A sixú ɖo hǔzúhúzú sɔgbe xá azɔn yɔ̌yɔ́ e ɖo tagba dó nú we wɛ é có, dotóogán lɛ́ ɖɔ ɖɔ ényí a nɔ zán hwenu kpó hlɔ̌nhlɔ́n kpó dó wa nǔ e ná zɔ́n bɔ a ná ɖo ganjí ɖo agbaza mɛ lɛ́ é ɔ, a ná ɖu le tɔn. Mɔ nǔ jɛ wú ɖɔ nǔ ɖěbǔ e a wá gbeta ɔ kɔn bo ná wa é kún ná wa nǔ dó lanmɛ towe wú ó.
Ba alɔdó mɛ ɖěvo lɛ́ tɔn

Nǔ e Biblu ɖɔ é: “Xɔ́ntɔn nǔgbó nɔ ɖe wǎnyíyí xlɛ́ hwebǐnu, bo nyí nɔví súnnu e wú è sixú ɖeji dó ɖo wǔvɛ́ lɛ́ hwenu é.”—Nǔnywɛ́xó 17:17, nwt.

Lěe è sixú zán gbɔn é: Xɔ́ntɔn towe lɛ́ sixú d’alɔ we ɖo hwenu vɛ́ wǔ lɛ́ mɛ.

Tɛ́n nǔ élɔ́ kpɔ́n: Ðɔ xó xá xɔ́ntɔn e wú a ɖeji dó bo sixú vo, lobo ɖɔ lěe nǔ cí nú we é ná nyi wɛn é ɖé. Mɔ̌ wiwa sixú d’alɔ we bɔ a ná ɖe linkpɔ́n towe lɛ́ sín agban kpɛɖé kpo bo ná ɖó awǎjijɛ hú gǎn. Xɔ́ntɔn towe lɛ́ kpó xwédo towe kpó sixú ba ná d’alɔ we ɖo ali ɖěvo lɛ́ nu, amɔ̌, yě sixú nɔ ma tuun nǔ e yě ná wa é. Énɛ́ wú ɔ, ɖɔ nǔ e yě sixú wa dó d’alɔ we lɛ́ é nú yě nyi wɛn. Nɔ nɔ jlɛ̌ jí ɖo nǔ e a nɔ ɖó nukún lɛ́ kpáxwé, bónú alɔ e è nɔ dó we lɛ́ é ní nɔ su nukún towe mɛ hwebǐnu. Amɔ̌, flín ɖɔ xɔ́ntɔn towe lɛ́ ba ná d’alɔ we có, hweɖélɛ́nu ɔ yě sixú wa nǔ zɛ xwé wú. Énɛ́ wú ɔ, é sixú byɔ́ ɖɔ a ní sɔ́ dogbó ɖé lɛ́ ɖ’ayǐ, ɖi hwenu e yě ná nɔ wá kpɔ́n we dó lɛ́ é kpó hwenu nabí e mɛbakpɔ́n lɛ́ ná nɔ ɖu é kpó.
Kpo ɖo linlin e sɔgbe é ɖó wɛ

Nǔ e Biblu ɖɔ é: “Ayi jɛ ayǐ nú mɛ ɔ, azɔn nɔ yá wǔ gbɔ; wǔ ka kú mɛ ɔ, gǎn wɛ nɔ hwedó mɛ.”—Nǔnywɛ́xó 17:22.

Lěe è sixú zán gbɔn é: Linlin e sɔgbe é ɖíɖó kpó nukún ɖíɖó nǔ kpó sixú d’alɔ we bɔ a nɔ jlɛ̌ jí ɖo lěe nǔ nɔ cí nú mɛ é linu bo lɛ́ ɖí xwi xá ado e nɔ hu we dó azɔn e jɛ wɛ a ɖe é wú é.

Tɛ́n nǔ élɔ́ kpɔ́n: Ée a ná ɖo hǔzúhúzú sɔgbe xá ninɔmɛ towe yɔ̌yɔ́ ɔ wɛ é ɔ, sɔ ayi ɖó nǔ e a sixú wa lɛ́ é jí, ní ma nyí ɖó nǔ e zɛ nǔwúkpíkpé towe wú lɛ́ é jí ó. Nyi alɔ nú hwiɖée sísɔ́ jlɛ́ dó mɛ ɖěvo lɛ́ wú, alǒ, lěe a ɖe din é sísɔ́ jlɛ́ dó lěe a ɖe ɖ’ayǐ cóbó bɛ́ azɔn é wú. (Galátinu lɛ́ 6:4) Nɔ sɔ́ nǔ e ɖo jlɛ̌ jí bɔ a hɛn ɔ a ná kpé wú lɛ́ é ɖó nukɔn nú hwiɖée bo nɔ nya gbě yětɔn. Mɔ̌ wiwa sixú d’alɔ we bɔ a ná ɖó linlin e sɔgbe é dó sɔgúdo wú. (Nǔnywɛ́xó 24:10) Ényí ali tɔn hun nú we hǔn, nɔ wa nǔ dó d’alɔ mɛ ɖěvo lɛ́. Awǎjijɛ e è nɔ mɔ ɖo nǔnámɛ mɛ é sixú d’alɔ we bɔ a ná ɖe ayi sín tagba towe lɛ́ jí.—Mɛsɛ́dó lɛ́ 20:35.

Mawu ka ná d’alɔ we bɔ a ná ɖí xwi xá azɔn e jɛ wɛ a ɖe é a?

Biblu xlɛ́ ɖɔ Jexóva Mawua sixú d’alɔ mɛɖé bɔ é ná ɖí xwi xá azɔnwúvɛ́ tɔn lɛ́. Mǐ sixú ɖó nukún ɖɔ azɔn mǐtɔn ná gbɔ ɖo nǔjíwǔ linu ǎ có, mɛ ɖěɖěe nɔ sɛn Mawu lɛ́ é sixú ɖu le alɔ e é nɔ dó mɛ lɛ́ é tɔn ɖo ali élɔ́ lɛ́ nu:

Fífá. Jexóva sixú ná mǐ “fífá . . . tɔn e zɛ nukúnnúmɔjɛnǔmɛ bǐ wú é.” (Filípunu lɛ́ 4:6, 7) Fífá, alǒ vivo ayi mɛ tɔn énɛ́ sixú d’alɔ mɛɖé b’ɛ ná zɔ́n bɔ ado sɔ́ ná nɔ hu i zɛ xwé wú ǎ. Mawu nɔ ná fífá énɛ́ mɛ ɖěɖěe nɔ xo ɖɛ sɛ́dó è bo nɔ ɖɔ nǔ e ɖo ayimɛya dó nú yě wɛ lɛ́ é n’i é.—1 Piyɛ́ɛ 5:7.

Nǔnywɛ́. Jexóva sixú ná mǐ nǔnywɛ́ e sín hudó mǐ ɖó bá wá gbeta e xwe ali lɛ́ é kɔn é. (Jaki 1:5) Ényí è nɔ kplɔ́n Biblu bo nɔ zán gbɛ sɔgbe xá nǔgbódodó Biblu tɔn e ma nɔ cá gbeɖé ǎ lɛ́ é ɔ jɛ́n è sixú ɖó nǔnywɛ́ mɔ̌hun.

Nukúnɖíɖó ɖejidéwú ɖé nú sɔgúdo. Jexóva d’akpá ɖɔ ɖo sɔgúdo ɔ, “toví ɖé sɔ́ ná ɖɔ: ‘Un ɖo azɔn jɛ wɛ’ ǎ.” (Ezayíi 33:24) Nukúnɖíɖó énɛ́ nɔ d’alɔ mɛ gěgé, bɔ ényí yě ná bo tlɛ ɖo lanmɛzɔn e syɛ́n hú gǎn é ɖí xwi xá wɛ ɔ, yě nɔ ɖó linlin e sɔgbe é.—Jelemíi 29:11, 12.

a Jexóva wɛ Mawu nɔ nyí bɔ Biblu ɖe xlɛ́.—Ðɛhan 83:18, nwt.

Lěe è sixú d’alɔ xɔ́ntɔn e ɖo xwi ɖí xá azɔnwúvɛ́ wɛ é ɖé gbɔn é

Nyǐ tóɖómɛtɔ́ ɖagbe. Ali ɖagbe hú gǎn e nu a sixú d’alɔ xɔ́ntɔn towe ɖe lɛ́ é ɖokpó wɛ nyí ɖɔ a ní nɔ ɖótó è hwenu e é ba ná ɖɔ xó é. Ma lin ɖɔ é byɔ́ ɖɔ a ní ná xósin nú nǔ e é ɖɔ é bǐ ó. Hwɛhwɛ ɔ, tó ɖíɖó mɛ kpowun ko kpé. Tɛ́n kpɔ́n bo mɔ nǔ jɛ nǔ e é ɖɔ é mɛ, bo ma ka dó hwɛ ɛ ó. Ma lin ɖɔ émí tuun lěe nǔ cí nú xɔ́ntɔn émítɔn é ó, tají ɔ, ényí azɔn e jɛ wɛ é ɖe é ma ɖo wěxo ǎ ɔ nɛ́.—Nǔnywɛ́xó 11:2.

Nɔ ɖɔ xó e ná nɔ dó wǔsyɛ́n lanmɛ nú mɛ lɛ́ é. A sixú gɔn nǔ e a ná ɖɔ é tuun, amɔ̌, ényí a na bo tlɛ ɖɔ xó kléwún ɖé dó ɖe xlɛ́ ɖɔ émí mɔ nǔ jɛ ninɔmɛ e mɛ gbɔn wɛ xɔ́ntɔn émítɔn ɖe é ɔ, é ná ɖibla dó gbɔ n’i hú gǎn ɖɔ a bɔ nu d’aɖǔ. Ényí a ma tuun nǔ e a ná ɖɔ é ǎ hǔn, tɛ́n kpɔ́n bo ɖɔ nǔ kléwún ɖé bónú é ka gosín ayi towe mɛ, ɖi “Un tuun nǔ e un ná ɖɔ é ǎ, amɔ̌, un ba ɖɔ a ní tuun ɖɔ nǔ towe nɔ ɖu ayi mɛ nú mì.” Nyi alɔ nú xó lěhun lɛ́ ɖiɖɔ: “É sixú lɛ́ syɛ́n tawun hú lěe é ɖe din é mɛ,” alǒ “A ɖó azɔn énɛ́ ɖě ǎ . . . .”

A sixú ɖe lěe nǔ xɔ́ntɔn towe tɔn ɖu ayi mɛ nú we gbɔn é xlɛ́ gbɔn do biba nú nǔ dó azɔn e jɛ wɛ é ɖe é jí gblamɛ. Gǎn e dó wɛ a ɖe bá mɔ nǔ jɛ nǔ e ɖo gbigbo è wɛ é wú é ná ɖibla su nukún tɔn mɛ, bɔ xó e a ná ɖɔ lɛ́ é ná ɖibla sɔgbe hú gǎn ɖo nukún tɔn mɛ. (Nǔnywɛ́xó 18:13) Amɔ̌, ényí é má byɔ́ we wěɖexámɛ ǎ hǔn, ɖǒ ayi te bo ma ɖe wě xá ɛ ó.

Dǒ alɔ ɛ ɖo ali tawun tawun lɛ́ nu. Ma lin ɖɔ émí tuun lěe émí ná d’alɔ ɛ gbɔn é ó, é nyɔ́ wa ɔ, kan nǔ e a sixú wa é byɔ́. Amɔ̌, flín ɖɔ xɔ́ntɔn towe sixú nɔ ma yí gbe ɖɔ émí ɖó hudó alɔdó tɔn, ɖó é ba ná nyí agban ɖo kɔ jí nú mɛ ǎ. Ényí mɔ̌ wɛ hǔn, ɖɔ nǔ tawun tawun e a sixú wa dó d’alɔ ɛ é ɖé lɛ́ ɖi axi xwléxwlé, ayǐ jíjláɖó alǒ azɔ̌ ɖěvo lɛ́.—Galátinu lɛ́ 6:2.

Ma jó gbe ó. Ée xɔ́ntɔn towe ná ɖo xwi ɖí xá azɔn e jɛ wɛ é ɖe é wɛ é ɔ, hweɖélɛ́nu ɔ é sixú ɖɔ nú we ɖɔ tuto e mi bló lɛ́ é kún sɔ́ ɖ’é jí ó, alǒ nɔ ba ná ɖɔ xó ɖó kpɔ́ xá we ǎ. Nɔ ɖó suúlu bo nɔ lɛ́ mɔ nǔ jɛ ninɔmɛ e mɛ é ɖe é wú. Kpo ɖo alɔ e sín hudó e é ɖó é dó è wɛ.—Nǔnywɛ́xó 18:24.