Ðu le vɔ̌sísá Jezu tɔn tɔn
Azɔn ɖokpó ɖo xwe ɖokpó ɖokpó mɛ ɔ, Kúnnuɖetɔ́ Jexóva tɔn lɛ́ kpó mɛ e yě ylɔ́ lɛ́ é lǐvi mɔ̌kpán kpó nɔ kplé ɖó kpɔ́ gbɔn gbɛ ɔ bǐ mɛ, bo nɔ bló kú Jezu tɔn flínflín sín nǔwiwa, lěe é ɖe gbe tɔn gbɔn é. (Luki 22:19) Nǔwiwa énɛ́ nɔ d’alɔ mǐ bɔ mǐ nɔ mɔ nukúnnú jɛ lě do nǔ e Jezu wa bo zé gbɛ tɔn jó dó gbɛtɔ́ lɛ́ tamɛ é xɔ akwɛ́ sɔ é wú. É nɔ lɛ́ xlɛ́ nǔ e ɖo vɔ̌sísá tɔn mɛ nú mǐ din kpó sɔgúdo kpó lɛ́ é.—Jaan 3:16.
Ényí a wá kú Jezu tɔn flínflín sín nǔwiwa ɔ domɛ xwe élɔ́ mɛ alǒ gbɔ ɔ, nɛ̌ a ka sixú ɖu kú vɔ̌sísá tɔn Jezu tɔn sín le gbɔn? Jezu kplɔ́n mǐ ɖɔ mǐ ɖó ná wa nǔ tají we:
1. Kplɔ́n nǔ dó Mawu kpó Jezu kpó wú. Jezu xo ɖɛ sɛ́dó Tɔ́ tɔn jǐxwé tɔn ɔ bo ɖɔ: “Gbɛ mavɔmavɔ ɔ wɛ nyí ɖɔ yě ní kplɔ́n bo tuun hwi Mawu nǔgbó ɖokpó ɔ, kpó Jezu Klísu e a sɛ́ dó é kpó.”—Jaan 17:3.
2. Wa nǔ sɔgbe xá nǔ e a kplɔ́n lɛ́ é. Jezu tɛ ɖɛ̌ jí ɖɔ mǐ ɖó ná zán nǔkplɔ́nmɛ émítɔn lɛ́ ɖo gbɛzán mǐtɔn mɛ. Ði kpɔ́ndéwú ɔ, bo ná dó sú ta nú mawuxóɖiɖɔ tɔn só jí tɔn nukúnɖéjí ɔ ɔ, é kpa mɛ ɖěbǔ e “se xó [tɔn] lɛ́ lobo bló ɖ’é jí é.” (Luki 6:46-48) Mɔ̌ ɖokpó ɔ, ɖo ninɔmɛ ɖěvo mɛ ɔ, é ɖɔ: “Ðó mi tuun nǔ énɛ́ lɛ́ wútu ɔ, awǎjijɛnɔ wɛ nú mi, ényí mi bló ɖ’é jí ɔ nɛ́.”—Jaan 13:17.
A ka jló ná kplɔ́n nǔ d’é jí dó Mawu kpó Jezu kpó wú a? A ka jló ná mɔ wěɖexámɛ ɖagbe ɖagbe lɛ́ dó lěe a ná zán nǔ e a kplɔ́n lɛ́ é gbɔn é wú a? Wlɛnwín ɖé lɛ́ ɖíe bo sixú d’alɔ we.
Biblu kplɔ́nkplɔ́n
Tuto Biblu kplɔ́nkplɔ́n xá mɛ vɔ̌nu tɔn mǐtɔn ko d’alɔ mɛ gěgé bɔ yě gbéjé Biblu ɔ kpɔ́n, lobo nɔ zán nǔ e é ɖɔ lɛ́ é ɖo gbɛzán yětɔn mɛ.
Yi akpáxwé Biblu kplɔ́nkplɔ́n xá nǔkplɔ́nmɛtɔ́ ɖé, bá ɖó mɔjɛmɛ ɖěvo lɛ́ dó tuto énɛ́ jí.
Kpɔ́n video Doo nú we nú Biblu kplɔ́nkplɔ́n towe, bá mɔ lěe Kúnnuɖetɔ́ Jexóva tɔn lɛ́ nɔ kplɔ́n Biblu xá mɛ gbɔn é.
Kplé Kúnnuɖetɔ́ Jexóva tɔn lɛ́ tɔn lɛ́
Kúnnuɖetɔ́ Jexóva tɔn lɛ́ nɔ kplé azɔn we ɖo aklúnɔzángbla ɖokpó ɖokpó mɛ ɖo fí e yě nɔ sɛn Mawu ɖe, bɔ è nɔ ylɔ́ ɖɔ kpléxɔ Axɔ́súɖuto ɔ tɔn é mɛ. Ðo kplé énɛ́ lɛ́ jí ɔ, mǐ nɔ ɖɔ xó ɖó kpɔ́ dó Biblu kpó lěe mǐ sixú zán nǔkplɔ́nmɛ e ɖ’é mɛ lɛ́ é ɖo gbɛzán mǐtɔn mɛ gbɔn é kpó jí.
Kplé énɛ́ lɛ́ vɛ́ mɛ ɖěbǔ ǎ; é byɔ́ ɖɔ a ní nyí Kúnnuɖetɔ́ Jexóva tɔn hwɛ̌ cóbó wá ǎ. Sɔgbe kpó ninɔmɛ xá e mɛ a ɖe é tɔn lɛ́ kpó ɔ, a sixú wá kplé énɛ́ lɛ́ tlɔlɔ alǒ gbɔn visioconférence jí.
Kpɔ́n video Nɛ̌ nǔ lɛ́ ka nɔ yi gbɔn ɖo kpléxɔ Axɔ́súɖuto ɔ tɔn ɖé mɛ? bá ɖó mɔjɛmɛ kléwún ɖé dó nǔ e a sixú ɖó nukún ɖo kplé énɛ́ lɛ́ jí lɛ́ é wú.
Mɔ fí e sɛkpɔ́ we bɔ mǐ nɔ bló kplé ɖe é ɖé ɖo akpáxwé Kplé agun tɔn Kúnnuɖetɔ́ Jexóva tɔn lɛ́ tɔn lɛ́.
Xóta kpó video kpó e ɖo Ɛntɛnɛ́ti jí lɛ́ é
Xóta kpó video kpó gěgé ɖo tɛn Ɛntɛnɛ́ti tɔn élɔ́ jí bo sixú d’alɔ we bɔ a ná kplɔ́n nǔ gěgé dó nǔkplɔ́nmɛ Jezu tɔn lɛ́ kpó lě do vɔ̌sísá tɔn xɔ akwɛ́ sɔ é kpó wú.
Ði kpɔ́ndéwú ɔ, bónú a ná tuun lěe kú mɛ ɖokpó tɔn sixú hɛn le wá nú gbɛtɔ́ lǐvi mɔ̌kpán gbɔn é hǔn, xa xóta “Nɛ̌ Jezu ka hwlɛ́n mǐ gbɔn?” kpó “Étɛ́wú Jezu ka ji ya bo kú?” kpó alǒ kpɔ́n video Étɛ́wú Jezu ka kú?