Nǔ e Axɔ́súɖuto Mawu tɔn ná wa ɖo lanmɛ ná nɔ ganjí linu é

“Ðó jɛmɛjí Covid-19 ma sɔ́ ɖo wezun dó afɔ nu nú mɛ lɛ́ wɛ gbɔn gbɛ ɔ bǐ mɛ din, lěe é nyí gbɔn ɖ’ayǐ é ɖɔhun ǎ wútu ɔ, énɛ́ ɖo xlɛ́xlɛ́ wɛ ɖɔ Covid-19 kún sɔ́ sixú wa nǔ dó mɛ wú ó ǎ. . . . Mǐ sixú kú d’é jí ɖɔ jɛmɛjí alɔkpa ɖěvo ná wá xwetɔ́n, bɔ é byɔ́ ɖɔ mǐ ní ɖo gbesisɔmɛ ná.”—Tedros Adhanom Ghebreyesus, directeur général de l’Organisation mondiale de la santé, 22 mai 2023.

Jɛmɛjí Covid-19 ɔ zɔ́n bɔ mɛ gěgé kpo ɖo wǔvɛ́ se wɛ ɖo agbaza kpó taglomɛ kpó linu. Acɛkpikpa lɛ́ kpó tutomɛ ɖěɖěe nɔ ɖɔ nǔ dó lanmɛ ná nɔ ganjí nu lɛ́ é kpó ka ná ɖo gbesisɔmɛ hwenu e jɛmɛjí ɖěvo ná jɛ nǔ gba jí é a? Yě ka sixú sú hudó e mǐ ɖó alɔnu din ɖo lanmɛ ná nɔ ganjí linu lɛ́ é sín do nú mǐ, b’ɛ ná kpa yě a?

Biblu ɖɔ acɛkpikpa ɖé xó nú mǐ b’ɛ ná sú nǔ e hudó mǐ ɖo lanmɛ ná nɔ ganjí linu lɛ́ é bǐ sín do nú mǐ. É ɖɔ ‘Mawu jǐxwé tɔn ná ɖe axɔ́súɖuto alǒ acɛkpikpa ɖokpó tɔ́n.’ (Daniyɛ́li 2:44) Ðo acɛkpikpa énɛ́ glɔ́ ɔ, “toví ɖé sɔ́ ná ɖɔ: ‘Un ɖo azɔn jɛ wɛ’ ǎ.” (Ezayíi 33:24) Mɛ bǐ ná ɖo ganjí, bo ná ɖó hlɔ̌nhlɔ́n hwenu e yě ɖo wǐnnyáwínnyá mɛ é ɖɔhun.—Jɔbu 33:25.