Wɛ̌kɛ́hwan ɖěvo ná gblá ǎ ka wɛ a?: Étɛ́ Biblu ka ɖɔ?

Ðo xwe 30 e wá yi lɛ́ é mɛ ɔ, mɛ gěgé mɔ ɖɔ nyanɛ́nyanɛ́ ɖo tíntíin wɛ ɖo to vovo lɛ́ tɛ́ntin, bɔ kancícá e ɖo tɛ́ntin yětɔn lɛ́ é ɖo te kpɔ́n d’é jí wɛ. Amɔ̌, nǔ e jɛ agaɖanu lɛ́ é xlɛ́ ɖɔ nǔ kún nyí mɔ̌ dóó ó.

• “Ðó Israël kpó Hezbollah kpó jɛ ahwan fun jí ɖo dogbó Liban tɔn jí wútu ɔ, ado ɖo mɛ lɛ́ hu wɛ ɖɔ ahwan e fun wɛ è ɖe ɖo Gaza é ná byɔ́ to ɖěvo e ɖo xá ɔ mɛ lɛ́ é mɛ.”—Reuters, 6 janvier 2024.

• “Gbɛ̌ta e ɖo Iran sín acɛ glɔ́ lɛ́ é ɖo ahwan tɔ́n mɛ wɛ ɖo fí vovo lɛ́, bɔ Iran lɛ́ jɛ ahwanfunnú e nɔ hɛn nǔ gblé tawun lɛ́ é bló jí ajijimɛ, lobɔ gayɛnu tɔn ɔ, Russie kpó Chine kpó ɖo Iran jí. Nǔ énɛ́ lɛ́ bǐ zɔ́n bɔ Iran húzú xú ɖo vɛ̌go mɛ nú to e ɖo Gbadahwe jí lɛ́.”—The New York Times, 7 janvier 2024.

• “Bɔ̌nbu e da wɛ Russie ɖe lɛ́ é kpo ɖo nǔ gba wɛ tawun ɖo Ukraine.”—UN News, 11 janvier 2024.

• “Akwɛ́zinkan Chine tɔn e fɔ́n bo ɖo te kpɔ́n wɛ é, hun jijɛ dó to mɛtɔn jí sín linlin e fɔ́n bo ɖo syɛ́nsyɛ́n wɛ ɖo Taïwan é, gɔ́ nú kwinkwin e ɖo Chine kpó États-Unis kpó tɛ́ntin é zɔ́n bɔ ahwan sixú bɛ́ hweɖébǔnu.”—The Japan Times, 9 janvier 2024.

Biblu ka ɖɔ xó ɖé dó hunnyahunnya e tíin gbɔn gbɛ ɔ mɛ bɔ mǐ ɖo mimɔ wɛ lɛ́ é wú a? Énɛ́ ná dɔn wɛ̌kɛ́hwan ɖěvo wá wɛ a?

Biblu ko ɖɔ nǔ e ɖo jijɛ wɛ din lɛ́ é ɖ’ayǐ

Biblu ylɔ́ ahwan ɖé tawun nyíkɔ ɖo ahwan e fun wɛ è ɖe bɔ mǐ ɖo mimɔ wɛ égbé lɛ́ é mɛ ǎ. É ɖo mɔ̌ có, Biblu ɖɔ ahwan e gba kpé tawun ɖo hwe mǐtɔn nu bo “ɖe fífá sín ayǐkúngban ɔ jí” é sín xó ɖ’ayǐ.—Nǔɖexlɛ́mɛ 6:4, nwt.

Wěma Daniyɛ́li tɔn ɖɔ ɖ’ayǐ ɖɔ ɖo “hwenu e nǔ lɛ́ bǐ ná ɖo nǎ fó wɛ ɔ,” acɛkpikpa gbɛ ɔ tɔn e ɖo agba hwlɛ́n wɛ lɛ́ é ná ɖe “kɛnfɔ” xá yěɖée lɛ́. Agbahwlɛ́nhwlɛ́n énɛ́ ná byɔ́ ɖɔ yě ní xlɛ́ lě do yě ɖó agbɔ̌n sɔ ɖo ahwan linu é, bo lɛ́ zán “dɔkun” alǒ akwɛ́ wósúwósú.—Daniyɛ́li 11:40, 42, 43.

Ahwan ɖokpó ɖo nukɔn ja

Biblu xlɛ́ ɖɔ ninɔmɛ gbɛ ɔ tɔn ná nylá tawun hwɛ̌ cóbó ná wá nyɔ́. Jezu ɖɔ ɖ’ayǐ ɖɔ “wǔvɛ́ ɖaxó ɖé ná tíin, bɔ mɔ̌hunkɔtɔn ko tíin kpɔ́n sín hwenu e gbɛ ɔ jɔ dó . . . é ǎ.” (Matíe 24:21) “Wǔvɛ́ ɖaxó” énɛ́ ná dɔn ahwan e è nɔ ylɔ́ ɖɔ Aamagedɔ́ni é wá, énɛ́ wɛ nyí “ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é.”—Nǔɖexlɛ́mɛ 16:14, 16.

É ɖo mɔ̌ có, Aamagedɔ́ni ná hwlɛ́n gbɛtɔ́ lɛ́ wɛ, é ná sú kún yětɔn dó ǎ. Gbɔn ahwan énɛ́ gblamɛ ɔ, Mawu ná sú kún dó nú acɛkpikpa gbɛtɔ́ tɔn lɛ́, ɖěɖěe zɔ́n bɔ ahwan dó hɛn nǔ gblé sɔmɔ̌ lɛ́ é. Nú a ná mɔ do nú lěe Aamagedɔ́ni ná bló bɔ fífá ná tíin káká sɔ́yi gbɔn é hǔn, xa xóta élɔ́ lɛ́:

• “Étɛ́ ka nyí ahwan Aamagedɔ́ni tɔn?”

• “Aamagedɔ́ni ɔ, wɛn ɖagbe wɛ!”