Sɛ́ngbigba ɖo jijɛjí wɛ gbɔn gbɛ ɔ bǐ mɛ: Étɛ́ Biblu ka ɖɔ?

Dǎkaxixo jagudagbɛ́ta lɛ́ tɔn ɖo nǔ gba wɛ tawun ɖo Haïti. Alǎnnúwiwa ɖo nǔ gba wɛ ɖo Afrique du Sud kpó Mexique kpó, lěe é ɖe gbɔn ɖo Amérique Latine sín to ɖěvo lɛ́ mɛ é ɖɔhun. É ná bo tlɛ nyí fí ɖěɖěe dǎkaxixo ma sukpɔ́ ɖe ǎ lɛ́ é ɔ, mɛ lɛ́ nɔ mɔ ɖɔ émí kún ɖo ayijayǐ mɛ ó, bo nɔ ɖo adohu adohu jí, ɖó alǎnnúwiwa sín gbeɖíɖó e yě nɔ se lɛ́ é wútu.

Étɛ́ Biblu ka ɖɔ dó sɛ́ngbigba e ɖo jijɛjí wɛ gbɔn gbɛ ɔ bǐ mɛ é wú?

Nǔ e Biblu ɖɔ ɖ’ayǐ dó sɛ́ngbigba wú é

Biblu ɖɔ ɖ’ayǐ ɖɔ “azǎn gǔdo gúdo tɔn gbɛ élɔ́ tɔn lɛ́” sín wuntun sín akpáxwé ɖokpó wɛ ná nyí sɛ́ngbigba. (Matíe 24:3) Ée Jezu Klísu ɖo akpáxwé wuntun ɔ tɔn lɛ́ xó ɖɔ wɛ é ɔ, é ɖɔ:

• “Ðó sɛ́ngbigba ná ɖo jijɛjí wɛ wútu ɔ, wǎnyíyí mɛ gěgé tɔn ná fá.”—Matíe 24:12.

Biblu lɛ́ ɖɔ ɖ’ayǐ ɖɔ “ɖo azǎn gǔdo gúdo tɔn lɛ́ mɛ ɔ,” gbɛtɔ́ lɛ́ ná “nɔ ɖu ɖo yěɖée jí ǎ, yě ná nɔ nylá hun, yě ná nɔ yí wǎn nú ɖagbewiwa ǎ.” (2 Timɔtée 3:1-5) Cejɛ́nnábí núwiwa énɛ́ lɛ́ wú wɛ sɛ́ngbigba sín walɔ e mǐ nɔ mɔ ɖo égbé lɛ́ é nɔ sín.

Amɔ̌, mǐ ɖó hwɛjijɔ ɖagbe ɖěɖěe wú mǐ ná ɖó nukúnɖíɖó lɛ́ é. Biblu d’akpá ɖɔ zaanɖé din ɔ, sɛ́ngbigba sín xó ná fó.

• “Zaanɖé din ɔ, mɛdídá sɔ́ ná ɖe ǎ; a nyi kɔ kpɔ́n fí e é nɔ ɔ, a sɔ́ ná mɔ ɛ ǎ. To ɔ ka ná nyí mɛ e nɔ sɔ́ yěɖée hwe lɛ́ tɔn, bɔ fífá ma ɖó dogbó e yě ná mɔ ɔ wɛ ná nyí nǔ e ná nɔ víví nú yě é.”—Ðɛhan 37:10, 11.

Kplɔ́n nǔ dó wɛn Biblu tɔn e ná nukúnɖíɖó mɛ é wú d’é jí, bo lɛ́ kplɔ́n nǔ e wú a sixú kú d’é jí ɖɔ nǔ ɖěɖěe ɖo jijɛ wɛ ɖo égbé lɛ́ é ɖo blǒbló wɛ bɔ nǔɖɔɖayǐ Biblu tɔn ɖo jijɛnu wɛ é. Gbějé xóta ɖěɖěe bɔ d’é wú lɛ́ é kpɔ́n.

“Todido Tin Dọ Osọ Na Yọ́n”

“Etɛ ka Nyí Wuntun “Azǎn Gudogudo Tɔn lɛ,” Alǒ “Hwenu E Gbɛ̀ Elɔ Na Vɔ Dó ɔ” Tɔn Lɛ?”

“La Bible a-t-elle prédit la mentalité et la conduite des gens de notre époque ?”