Nǔnywɛ́tɔ́xó
1 Xó e nǔkplɔ́nmɛtɔ́,* éé nyí Davídi ví, bo nyí axɔ́sú ɖo Jeluzalɛ́mu é ɖɔ lɛ́ é ɖíe:
2 “Nǔ yǎyá* tɛ́ ɖíe!” wɛ nǔkplɔ́nmɛtɔ́ ɔ ɖɔ.
“Nǔ yǎyá tɛ́ ɖíe! Nǔ bǐ wɛ nyí nǔ yǎyá!”
3 Étɛ́ mɛɖé ka nɔ mɔ ɖo azɔ̌ syɛ́nsyɛ́n,
ée é jɛ tagba bo wa ɖo hwe glɔ́ lɛ́ é bǐ mɛ?
4 Jijimɛ ɖé nɔ ɖo yiyi wɛ, bɔ ɖěvo nɔ ɖo wǐwá wɛ,
amɔ̌, ayǐkúngban ɔ ná nɔ te káká sɔ́yi.
6 Jɔhɔn nɔ nyi dó tofɔligbé bo nɔ lílɛ́ wá yi totaligbé;
é nɔ ɖo lǐlɛ́ lílɛ́ wɛ gbɛmɛ; jɔhɔn nɔ ɖo yiyi wɛ, bo nɔ ɖo wǐwá wɛ.
7 Tɔsisa lɛ́* bǐ wɛ nɔ sa kɔn nyi xu mɛ, é ɖo mɔ̌ có, xu ɔ gɔ́ gbeɖé ǎ.
Tɔsisa lɛ́ nɔ lɛ́ kɔ yi fí e yě sa sín é, bo ná dó sixú lɛ́ sa ɖěvo.
8 Nǔ lɛ́ bǐ wɛ nɔ ci kɔ nú mɛ;
mɛ ɖěbǔ sixú kpé wú bo ɖɔ xó dó yě wú ǎ.
Nǔkpínkpɔ́n nɔ jɛmɛ nú nukún ǎ;
mɔ̌ jɛ́n nǔsise ma nɔ jɛmɛ nú tó ǎ é nɛ́.
9 Nǔ e jɛ wá yi é wɛ ná lɛ́ jɛ,
nǔ e è wa wá yi é wɛ è ná lɛ́ wa;
nǔ ɖěbǔ nyí nǔ yɔ̌yɔ́ ɖo hwe glɔ́ ǎ.
10 Nǔɖé ka ɖe bɔ mɛɖé sixú ɖɔ d’é wú ɖɔ: “Kpɔ́n nǔ élɔ́, nǔ yɔ̌yɔ́ wɛ” a?
É ko tíin sín hwenu línlín ɖíe;
é ko tíin jɛ nukɔn nú hwenu mǐtɔn.
11 Mɛɖé sɔ́ nɔ flín mɛ hwexónu tɔn lɛ́ ǎ;
mɔ̌ jɛ́n mɛɖé ma sɔ́ ná flín mɛ e ná wá ɖo nukɔnmɛ lɛ́ é ǎ é nɛ́;
mɛ e ná wá bɔ dó yě lɔ wú lɛ́ é ná flín yě ǎ.
12 Nyɛ nǔkplɔ́nmɛtɔ́ ɔ nyí axɔ́sú Izlayɛ́li tɔn kpɔ́n ɖo Jeluzalɛ́mu. 13 Un dó gǎn kpó ayi ce bǐ kpó, bo ná kplɔ́n nǔ e è wa ɖo hwe glɔ́ fí lɛ́ é bǐ, bo gbéjé yě kpɔ́n kpó nǔnywɛ́ kpó; un ba do nú azɔ̌ e nɔ ɖ’akpɔ nú mɛ, bɔ Mawu sɔ́ d’así nú gbɛtɔ́ lɛ́ dó hɛn alɔnu yětɔn ján lɛ́ é.
14 Un mɔ azɔ̌ e è wa ɖo hwe glɔ́ lɛ́ é bǐ,
bo mɔ ɖɔ nǔ bǐ wɛ nyí nǔ yǎyá, bo nyí wezun kán ɖo jɔhɔn gúdo.
15 È sixú jlɔ́ nǔ e gɔ́ndɔ́n é ǎ,
è sixú xa nǔ e ma tíin ǎ é ǎ.
16 Énɛ́ gúdo ɔ, un ɖɔ dó ayi mɛ ɖɔ: “Un tɛ́n kpɔ́n bo ɖó nǔnywɛ́ hú mɛ e jɛ nukɔn nú mì ɖo Jeluzalɛ́mu lɛ́ é bǐ, bɔ nǔnywɛ́ kpó nǔtuuntuun kpó túnflá ɖo ayi ce mɛ.” 17 Un dó gǎn kpó ayi ce bǐ kpó bo ná mɔ nukúnnú jɛ nǔnywɛ́, taɖu* kpó xlojijɔ kpó mɛ; énɛ́ lɔ ɔ, wezun kán ɖo jɔhɔn gúdo wɛ.
18 Ðó nǔnywɛ́ e túnflá é nɔ dɔn akpɔ gěgé wá,
énɛ́ wú ɔ, mɛ ɖěbǔ e bló bɔ nǔtuuntuun tɔn jɛjí é ɔ, wǔvɛ́ tɔn ná jɛjí.