Ezayíi
1 Nǔmimɔ e Ezayíi,* vǐ súnnu Amɔ́zi tɔn mɔ, bɔ é kunkplá Judáa kpó Jeluzalɛ́mu kpó, ɖo axɔ́sú Judáa tɔn Oziyási, Jotámu, Akázi kpó Ezekiyási kpó hwenu é:
2 Jǐxwé è, ɖǒtó! Ayǐkúngban è, tɛ́ tó!
Ðó Jexóva ɖɔ xó:
“Un kpé nukún dó vǐ súnnu lɛ́ wú bɔ yě su, bɔ un lɛ́ kplɔ́n yě,
amɔ̌, yě fɔ́n gǔ dó jǐ ce.
3 Nyibúsú nɔ tuun mɛ e xɔ ɛ é ganjí,
bɔ tócí nɔ tuun nǔ e mɛ mɛ e ɖó è é nɔ ná ɛ nǔɖuɖu dó é;
amɔ̌, Izlayɛ́li tuun mì* ǎ,
togun nyiɖésúnɔ tɔn nɔ wa nǔ kpó nukúnnúmɔjɛnǔmɛ kpó ǎ.”
4 Heelú akɔta hwɛhutɔ́ ɔ,
togun e nǔwanyido kpɛn é,
mɛdídá kúnkan, vǐ gblégblé lɛ́!
Yě jó Jexóva dó;
yě wa nǔ xá Mɛ mímɛ́ Izlayɛ́li tɔn ɔ kpó mɛmasí kpó;
yě dó gǔdo è.
5 Ðó mi fɔ́n bo ɖo gǔ fɔ́n wɛ wútu ɔ, fí ɖěvo tɛ́ un ka ná dó nǔ mi dó?
Ta mitɔn blěbú ɖo azɔn jɛ wɛ,
bɔ ayi mitɔn blěbú ɖo azɔn jɛ wɛ.
6 Sín afɔkpákpámɛ káká yi ta ɔ, nǔ ɖěbǔ ɖo ganjí ǎ.
Akpa, fí e só hun lɛ́ é kpó agadá kpó wɛ;
è kpé nukún d’é wú,* blá, alǒ ɖó ami mɛ ǎ.
7 To mitɔn jɛ vɔ̌.
È dó toxo mitɔn lɛ́ zo.
Toɖévomɛnu lɛ́ ɖo to mitɔn vún ɖu wɛ ɖo nukún mitɔn mɛ.
É cí to e toɖévomɛnu lɛ́ gba hánnyá é ɖɔhun.
8 È jó vǐ nyɔ̌nu Sinyɔ́ɔ tɔn dó xɔ* e ɖo vǐwungbo mɛ é ɖɔhun,
è jó è dó goxɔ e ɖo kɔnkɔ́nbugle mɛ é ɖɔhun,
è jó è dó toxo e è ján go dó é ɖɔhun.
9 Ényí Jexóva ahwankpá lɛ́ tɔn ma ko jó ahwanɖukpo kwínwe ɖé dó nú mǐ wɛ ǎ ɔ,
mǐ ná ko cí Sodɔ́mu ɖɔhun,
bo ná ko cí Gomɔ́ɔ ɖɔhun.
10 Acɛgannagannakpanúmɛtɔ́* Sodɔ́mu tɔn lɛ́ mi, mi ɖótó xó Jexóva tɔn.
Togun Gomɔ́ɔ tɔn è, wlǐ tó sɛ́n* Mawu mǐtɔn tɔn wú.
11 “Vɔ̌ tobutóbú e sá wɛ mi ɖe lɛ́ é ɔ, le tɛ́ ka ɖ’é mɛ nú mì?” wɛ Jexóva ɖɔ.
“Nǔníná agbo tɔn e mi nɔ dó zo lɛ́ é kpó jǒ kanlin e è ná nǔɖuɖu ganjí lɛ́ é tɔn kpó ci mì,
nyibúsú wínnyáwínnyá, lɛ̌ngbɔ́ví kpó gbɔ̌ kpó sín hun nɔ dó xomɛhunhun ɖě nú mì ǎ.
12 Hwenu e mi nɔ xwetɔ́n ɖo nukɔn ce é ɔ,
mɛ̌ ka byɔ́ mi ɖɔ
mi ní nɔ gbídí kɔ́xota ce lɛ́?
13 Mi ma sɔ́ nɔ hɛn nǔníná jinukún tɔn e ma xɔ akwɛ́ ǎ lɛ́ é ɖě wá ó.
Zǎlínkpɔ́n mitɔn nyí nǔvɛ́mɔ nú mì.
Sunwájǐxwe, gbɔjɛzánxwe, kplé e mi nɔ ylɔ́ lɛ́ é . . . ,
un sixú dɛ ɖo hlɔ̌nhlɔ́n majíki tɔn e mi nɔ zán ɖo kplé bǔnɔ mitɔn domɛ é nu ǎ.
14 Un* gbɛ́ wǎn nú sunwájǐxwe mitɔn kpó xwe mitɔn lɛ́ kpó.
Agban wɛ yě húzú nú mì;
hinhɛn tɔn ci kɔ nú mì.
15 Nú mi dlɛ́n alɔ mitɔn lɛ́ ɔ,
un nɔ kpɔ́n mi ǎ.
mi nɔ xo ɖɛ gěgé có,
un nɔ ɖótó ǎ;
alɔ mitɔn lɛ́ kɔn hun gěgé kɔn nyi ayǐ.
16 Mi lɛ miɖée wé, mi slá wǔ nú miɖée;
mi ma sɔ́ nɔ wa nǔ nyanya ɖě ɖo nukún ce mɛ ó;
mi ɖó nǔnyanyawiwa te.
17 Mi ní nɔ kplɔ́n bo nɔ wa ɖagbe, mi ní nɔ ba hwɛjijɔ,
mi ní nɔ gbɛ́ nǔ nú yadónúmɛtɔ́,
mi ní nɔ jɛ hun dó acɛ e tɔ́cyɔvǐ ɖó lɛ́ é jí,
mi ní nɔ jɛ ahwan asúkúsi jí.”
18 “Din ɔ, mi wá, bónú mǐ ná ɖe ɖɛ nǔ lɛ́ ɖo mǐɖée lɛ́ tɛ́ntin,” wɛ Jexóva ɖɔ.
“Hwɛ mitɔn lɛ́ ná bo myá cɛ́cɛ́ ɔ,
è ná bló bɔ yě ná wé laglási linfín ɖɔhun;
yě ná bo myá avɔ e myá tawun é ɖɔhun ɔ,
yě ná wá cí lɛ̌ngbɔ́fún ɖɔhun.
19 Ényí mi ɖe xlɛ́ ɖɔ émí ɖó jlǒ ɖagbe, bo lɛ́ se tónú ɔ,
mi ná ɖu nǔ ɖagbe e ɖo to ɔ mɛ lɛ́ é.
20 Amɔ̌, ényí mi gbɛ́ bo fɔ́n gǔ ɔ,
hwǐ ná vɔ mi,
ɖó xó e tɔ́n sín Jexóva nu mɛ é nɛ́.”
21 Toxo gbejínɔtɔ́ ɔ húzú tonyatɔ́ mɛ nya!
Hwɛjijɔ wɛ gɔ́ mɛ ɖ’ayǐ;
nǔjlɔ́jlɔ́wiwa wɛ nɔ nɔ mɛ ɖ’ayǐ,
amɔ̌ din ɔ, mɛhutɔ́ lɛ́ wɛ ɖ’é mɛ.
22 Kpatágan towe húzú nǔ kwíji,
bɔ bǐya towe* ɔ, è dó sin jí.
23 Axɔ́ví towe lɛ́ nɔ syɛ́n ta, bo nɔ wa azɔ̌ ɖó kpɔ́ xá ajotɔ́ lɛ́.
Yě mɛ ɖokpó ɖokpó yí wǎn nú nǔɖuɖonǔmɛ, bo nɔ ɖo wezun nu ɖo nǔníná lɛ́ gúdo.
Yě nɔ ɖɔ hwɛ jlɔ́jlɔ́ nú tɔ́cyɔvǐ ǎ,
yě nɔ ké ya nú hwɛɖiɖɔxó asúkúsi tɔn gbeɖé ǎ.
24 Énɛ́ wɛ zɔ́n bɔ Aklúnɔ nǔgbó ɔ, Jexóva ahwankpá lɛ́ tɔn,
Mɛ hlɔ̌nhlɔ́nnɔ Izlayɛ́li tɔn ɔ ɖɔ:
“Éénɛ́! Un ná sú kún dó nú mɛ e ma ɖo jǐ ce ǎ lɛ́ é,
un ná ba hlɔn kɛntɔ́ ce lɛ́ wú.
25 Alɔ ce ná jɛ wǔ we,
un ná ɖe nǔ kwíji sín wǔ we bǐ mlɛ́mlɛ́,
bo ná ɖe nǔ blíblí towe lɛ́ bǐ síin.
26 Un ná lɛ́ sɔ́ hwɛɖɔtɔ́ towe lɛ́ ɖó nu towe, lěe é nyí gbɔn ɖo bǐbɛ́mɛ é.
Bo ná lɛ́ sɔ́ wěɖexámɛtɔ́ towe lɛ́ ɖó nu towe, lěe é nyí gbɔn ɖo bǐbɛ́mɛ é.
Énɛ́ gúdo ɔ, è ná nɔ ylɔ́ we ɖɔ Toxo nǔjlɔ́jlɔ́wiwa tɔn, Toxo gbejínɔtɔ́.
27 È ná vɔ́ Sinyɔ́ɔ xɔ gbɔn hwɛjijɔ gblamɛ,
bo ná vɔ́ mɛ tɔn e lɛ́ kɔ lɛ́ é xɔ gbɔn nǔjlɔ́jlɔ́wiwa gblamɛ.
28 È ná sú gǔfɔ́ntɔ́ lɛ́ kpó hwɛhutɔ́ lɛ́ kpó sín kún dó ɖó kpɔ́,
bɔ mɛ ɖěɖěe jó Jexóva dó lɛ́ é sín xó ná fó.
29 Ðó winnyá ná hu yě dó atín ɖaxó ɖaxó e mi jló lɛ́ é wú,
bɔ wi mitɔn ná kɔ́n ɖó jikpá e mi sɔ́ lɛ́ é wútu.*
30 Ðó mi ná cí atín ɖaxó e mlú ɖa é ɖɔhun,
bo ná cí jikpá e ba sin kpo é ɖɔhun.
31 Súnnu hlɔ̌nhlɔ́nnɔ ná húzú nǔywɛ́,
bɔ azɔ̌ tɔn ná húzú myɔkán;
yě mɛ we lɛ́ bǐ ná ji ɖó kpɔ́,
bɔ mɛ ɖěbǔ ná cí myɔ ɔ ǎ.”