Ezayíi
28 Heelú ahannumúnɔ Eflayímu tɔn lɛ́ sín axɔ́súgbákún* ɖɛkpɛ ɖɛkpɛ* lɛ́
kpó susu tɔn ɖɛkpɛ ɖɛkpɛ ɔ sín sɛ́ e ɖo fyɔ́fyɔ́ wɛ é kpó;
é ɖo ta nú mɛ ɖěɖěe jí vɛ̌ɛn ɖu ɖe lɛ́ é, sín tɔdo e mɛ ji nɔ jɛ ɖe é!
2 Éɖíe! Jexóva ɖó mɛ e ɖó hlɔ̌nhlɔ́n, bo lɛ́ ɖó agbɔ̌n é ɖé.
É ná nyi i dó do ɖo ayǐkúngban ɔ jí kpó hlɔ̌nhlɔ́n kpó,
jɔhɔn syɛ́nsyɛ́n nǔhɛngblétɔ́ e ɖo nyinyi wɛ kpó kɛ́njí kpó, bɔ xɛbyoso ɖo nǔ ɖɔ ɖ’é mɛ wɛ é ɖɔhun,
tɔgbamɛ ɖaxó e hwenu jɔhɔn syɛ́nsyɛ́n ɖo nyinyi wɛ, bɔ xɛbyoso lɛ́vɔ́ ɖo nǔ ɖɔ ɖ’é mɛ wɛ é ɖɔhun.
3 È ná sɔ́ afɔ dó gbídí
ahannumúnɔ Eflayímu tɔn lɛ́ sín axɔ́súgbákún ɖɛkpɛ ɖɛkpɛ* lɛ́ ná.
4 Susu tɔn ɖɛkpɛ ɖɛkpɛ ɔ sín folówa e ɖo fyɔ́fyɔ́ wɛ,
bo ɖo tɔdo e mɛ ji nɔ jɛ ɖe é ta é,
ná cí fígi nukɔn nukɔntɔn e nɔ tɔ́n jɛ nukɔn nú yǒzohwenu é ɖɔhun.
Ényí mɛɖé mɔ bónú é jɛ mɛ ɔ sín alɔ mɛ lě tlóló ɔ, é nɔ sɔ́ mì.
5 Azǎn énɛ́ gbe ɔ, Jexóva ahwankpá lɛ́ tɔn ná húzú axɔ́súgbákún susunɔ ɖé kpó folówa linlɔn ɖɛkpɛ ɖɛkpɛ ɖé kpó nú mɛ ɖěɖěe kpo ɖo togun tɔn mɛ lɛ́ é. 6 É ná ná gbigbɔ hwɛjijɔ tɔn mɛ e nɔ jínjɔ́n ayǐ bá ɖɔ hwɛ é, bo ná ná hlɔ̌nhlɔ́n mɛ ɖěɖěe nɔ nya ahwantɔ́nmɛtɔ́ lɛ́ dó zɔ ɖo hɔntogbó ɔ ta lɛ́ é.
7 Vɔ̌sánúxwlémawutɔ́ lɛ́ kpó gbeyíɖɔ lɛ́ kpó nɔ zɛ gbě ɖó vɛ̌ɛn wú;
ahan syɛ́nsyɛ́n lɛ́ nɔ zɔ́n bɔ yě nɔ fún sa;
yě nɔ zɛ gbě ɖó ahan syɛ́nsyɛ́n wú;
vɛ̌ɛn nɔ wlú taká mɛ nú yě,
bɔ yě nɔ fún sa ɖó ahan syɛ́nsyɛ́n wú,
nǔmimɔ yětɔn nɔ zɔ́n bɔ yě nɔ zɛ gbě,
bɔ yě nɔ klɛ́n afɔ ɖo hwɛɖiɖɔ linu.
8 Ðó nǔ e yě vi lɛ́ é gbɔn fí bǐ ɖo távo yětɔn lɛ́ jí,
fí ɖě yi ɖ’é mɛ ǎ.
9 Mɛ̌ è ná ná nǔtuuntuun?
Mɛ̌ è ná tínmɛ wɛn ɔ ná?
Mɛ ɖěɖěe è ɖe anɔ̌ ná tlóló lɛ́ é wɛ a?
Mɛ ɖěɖěe è ɖe sín akɔ́nnu tlóló lɛ́ é wɛ a?
10 Ðó hwebǐnu ɔ, é nɔ ɖɔ: “Gbeɖiɖe ɖějɛɖěgúdo, gbeɖiɖe ɖějɛɖěgúdo,
kan ɖějɛɖěgúdo, kan ɖějɛɖěgúdo,*
kpɛɖé ɖo fí, kpɛɖé ɖo dɔ̌n.”
11 Énɛ́ wú ɔ, é ná ɖɔ xó nú togun élɔ́ gbɔn mɛ ɖěɖěe nɔ kúkú ɖɛ̌ lɛ́ é gblamɛ, bo ná lɛ́ ɖɔ xó nú yě dó to ɖěvo gbe mɛ. 12 É ko ɖɔ nú yě kpɔ́n ɖɔ: “Gbɔjɛtɛn ɔ ɖíe. Mi nú mɛ e nǔ ci kɔ ná tawun é ní gbɔjɛ; fí e è nɔ fá kɔ ɖe é ɖíe,” amɔ̌, yě ɖótó ǎ. 13 Énɛ́ wú ɔ, xó Jexóva tɔn ná nyí:
“Gbeɖiɖe ɖějɛɖěgúdo, gbeɖiɖe ɖějɛɖěgúdo,
kan ɖějɛɖěgúdo, kan ɖějɛɖěgúdo,*
kpɛɖé ɖo fí, kpɛɖé ɖo dɔ̌n” nú yě.
Mɔ̌ mɛ ɔ, nú yě ɖo zɔnlin ɖi wɛ ɔ,
yě ná klɛ́n afɔ bo ná j’ayǐ jɛ wɛn,
è ná ɖu ɖo yě jí, bɔ yě ná jɛ mɔ mɛ lobɔ è ná wlí yě.
14 Énɛ́ wú ɔ, mi ɖótó xó Jexóva tɔn, mi mɛ goyítɔ́ lɛ́,
mi mɛ acɛkpatɔ́ togun élɔ́ tɔn e nɔ nɔ Jeluzalɛ́mu lɛ́ é,
15 ɖó mi nɔ ɖɔ:
Hwenu e tɔgbamɛ e ɖo adǎn jí é ná dín kpó wezun kpó é ɔ,
é ná mɔ mǐ ǎ,
ɖó mǐ sɔ́ adingban dó ɖó bibɛtɛn mǐtɔn,
bo hwlá mǐɖée dó nǔgbómaɖɔ mɛ.”
16 Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Éɖíe! Un ɖo awǐnnya e è tɛ́n kpɔ́n é ɖé dó do nyi Sinyɔ́ɔ wɛ, b’ɛ ná nyí dodónu ɖé,
dodónu ɖejidéwú ɖé sín awǐnnya xɔ akwɛ́ zwe jí tɔn ɔ wɛ.
Mɛ e ná ɖe xlɛ́ ɖɔ émí ɖi nǔ n’i é ɖě ná ɖi xɛsi ǎ.
Kɛ́njí ná za adingban sín bibɛtɛn ɔ síin,
bɔ tɔ ná gba nɔtɛn e ɖo hwlǎhwlá é.
18 È ná gba akɔ e mi jɛ xá kú é,
bɔ gbeta e kɔn mi wá xá Yɔdo* é ná nɔ te ǎ.
Hwenu e tɔgbamɛ e ɖo adǎn jí é ná dín kpó wezun kpó é ɔ,
é ná nyínyɛ́ mi.
19 É dín hweɖébǔnu ɔ,
é ná nɔ za mi síin,
ɖó é ná nɔ dín zǎnzǎn lɛ́ bǐ,
é ná nɔ dín ɖo kéze kpó zǎnmɛ kpó.
Xɛsi ɖaxó jɛ́n ná zɔ́n bɔ yě ná mɔ nukúnnú jɛ nǔ e yě se é mɛ.”*
20 Ðó zan ɔ hwe tawun bónú è ná dlɛ́n mɛɖée d’é jí,
bɔ wǔcyɔ́n linlɔn ɔ hwe tawun bónú è ná bú mɛɖée d’é mɛ.
21 Jexóva ná wa nǔ lěe é wa gbɔn ɖo só Pelasímu jí é ɖɔhun;
é ná wa nǔ lěe é wa gbɔn ɖo tɔdo* e sɛkpɔ́ Gabawɔ́ɔn é mɛ é ɖɔhun,
bónú é ná dó wa azɔ̌ e nyí étɔn é, nǔ e d’abaɖa é,
lobonú é ná wa azɔ̌ e nyí étɔn é yi fó, azɔ̌ tɔn bǔnɔ ɔ.
22 Din ɔ, mi ma ɖɔ nyɔmɛ ó,
é ma nyí mɔ̌ ǎ ɔ, gɛdɛ e ɖo mi wú é ná ɖo syɛ́nsyɛ́n d’é jí wɛ,
ɖó un se sín Aklúnɔ Nǔbǐwúkpétɔ́ Jexóva ahwankpá lɛ́ tɔn ɔ gɔ́n ɖɔ,
è wá gbeta ɔ kɔn bo ná sú kún dó nú to ɔ bǐ.*
23 Mi ɖótó gbe ce kpó sɔxwixwe kpó;
mi tɛ́ tó, bo ɖótó nǔ e ɖɔ wɛ un ɖe é.
24 Mɛ e nɔ jíjé ayǐkúngban é nɔ jíjé ayǐkúngban ɔ ɖo azǎn ɔ bǐ jí cóbó nɔ dó nǔ wɛ a?
É ná kun ayǐkúngban ɔ, bo ná ɖo kɔ́gó gba wɛ gbɛmɛ wɛ a?
25 Ényí é jíjé ayǐkúngban ɔ nukúnmɛ gúdo ɔ,
é nɔ fúnfún kumɛ́ɛ wiwi, bo nɔ dó kumɛ́ɛ,
nɔ dó blěe, milɛ́ɛ kpó ɔ́ji kpó dó tɛn yětɔn yětɔn mɛ,
lobo nɔ dó epótlu lɛ́ lɛ̌ dó dogbó tɔn lɛ́ ǎ cé?
26 Mawu tɔn nɔ kplɔ́n ɛ* lěe é jɛxá gbɔn é;
é nɔ kplɔ́n nǔ i.
27 Ðó è nɔ só kumɛ́ɛ wiwi kpó nǔkúnsónú kpó ǎ,
è nɔ kun kɛkɛ́ví sín afɔ gbɔn kumɛ́ɛ jí ǎ,
é nyɔ́ wa ɔ, kpo wɛ è nɔ sɔ́ dó só kumɛ́ɛ wiwi ná,
bo nɔ só kumɛ́ɛ kpó lɛ̌ngbɔ́nyitɔ́kpo kpó.
28 È nɔ só nǔkún bo nɔ dó bló wɔ̌xúxú wɛ a?
Éǒ, è nɔ ɖo sísó wɛ gbɛmɛ ǎ;
bɔ ényí é kun kɛkɛ́ví tɔn e dɔn wɛ sɔ́ tɔn lɛ́ ɖe é sín afɔ gbɔn jí ɔ,
é ná li i ǎ.