Ezayíi
31 Heelú mɛ ɖěɖěe nɔ jɛ te yi Ejípu, bo ná dó ba alɔdó,
bo nɔ gán jɛ sɔ́ lɛ́ wú,
bo nɔ ɖeji dó ahwankɛkɛ́ví lɛ́ wú ɖó yě sukpɔ́ wútu,
lobo nɔ ɖeji dó ahwansɔ́* lɛ́ wú ɖó yě ɖó agbɔ̌n wútu lɛ́ é.
Yě kpɔ́n Mɛ mímɛ́ Izlayɛ́li tɔn ɔ sín jɛ jí ǎ,
yě ba Jexóva ǎ.
2 Loɔ, nǔnywɛ́tɔ́ wɛ ka n’i, bɔ é ná dɔn awěxomɛ wá,
é ná dɔn nǔ gbɔn xó tɔn lɛ́ jí ǎ.
É ná sí te dó nǔnyanyawatɔ́ lɛ́ sín xwé jí,
bo ná sí te dó mɛ ɖěɖěe nɔ d’alɔ nǔnyanyawatɔ́ lɛ́ é jí.
3 Ejípunu lɛ́ ɔ, gbɛtɔ́ kpowun wɛ yě nyí, yě nyí Mawu ǎ;
sɔ́ yětɔn lɛ́ ɔ, kanlin kpowun wɛ yě nyí, yě nyí gbigbɔ ǎ.
Ényí Jexóva dlɛ́n alɔ tɔn ɔ,
mɛ ɖěbǔ e ɖo alɔ dó mɛ wɛ é ná klɛ́n afɔ,
bɔ mɛ ɖěbǔ e è d’alɔ é ná j’ayǐ;
yě mɛ bǐ ná dɔn hwe ɖokpó ɔ nu.
4 Ðó nǔ e Jexóva ɖɔ nú mì é ɖíe:
“Lěe kinnikínní, ɛɛn, kinnikínní wínnyáwínnyá e ɖó hlɔ̌nhlɔ́n é,* nɔ dó adǎn gbe dó nǔ e é wlí é jí,
hwenu e lɛ̌ngbɔ́nyitɔ́ gěgé xo yěɖée kplé, bo zun dó jǐ tɔn,
bɔ xɛsi ma nɔ ɖi i, ɖó gbe yětɔn wú ǎ,
lobɔ zǐngídi e jí yě ɖe é ma nɔ hu ado n’i ǎ gbɔn é ɔ,
mɔ̌ ɖokpó ɔ, Jexóva ahwankpá lɛ́ tɔn ná jɛ te, bo ná fun ahwan
dó Sinyɔ́ɔ só ɔ kpó só tɔn kpó tamɛ.
5 Lěe xɛ lɛ́ nɔ zɔn wá do ajijimɛ gbɔn é ɔ, mɔ̌ ɖokpó ɔ, Jexóva ahwankpá lɛ́ tɔn ná jɛ hun dó Jeluzalɛ́mu jí.
É ná jɛ hun dó jǐ tɔn bo ná hwlɛ́n ɛ.
É ná nya xɛ ɖo jǐ tɔn bo ná hwlɛ́n ɛ gán.”
6 “Togun Izlayɛ́li tɔn è, mi lɛ́ kɔ wá Mɛ e jí mi fɔ́n gǔ dó syɛ́nsyɛ́n é gɔ́n. 7 Ðó ɖo azǎn énɛ́ gbe ɔ, mɛ ɖokpó ɖokpó ná jó nǔmɛsɛn tɔn maɖótaɖé e è sɔ́ kpatágan dó bló ná lɛ́ é kpó nǔmɛsɛn tɔn e ma xɔ akwɛ́ ǎ bɔ è sɔ́ siká dó bló ná lɛ́ é kpó dó; mi sɔ́ alɔ miɖésúnɔ tɔn lɛ́ dó bló nǔ énɛ́ lɛ́ dó hu hwɛ.
8 Asilíinu ɔ ná kú hwǐ kú, é ka ná nyí gbɛtɔ́ sín hwǐ ǎ;
hwǐ ná vúnvún i, é ka ná nyí gbɛtɔ́ sín hwǐ ǎ.
É ná hɔn ɖó hwǐ wú,
bɔ è ná ɖó azɔ̌ syɛ́nsyɛ́n kɔ jí nú dɔ̌nkpɛvú tɔn lɛ́.
9 Só tɔn ná bú ɖó xɛsi ɖaxó wútu,
bɔ ado ná hu axɔ́ví tɔn lɛ́ ɖó asyákpo ɔ wútu,” wɛ Jexóva,
éé sín wěziza* ɖo Sinyɔ́ɔ bɔ myɔkpó tɔn ɖo Jeluzalɛ́mu é ɖɔ.