Ezayíi
47 Ðyɔ̌vǐ ɖo alɔjí Babilɔ́nu tɔn è,
jɛ te, bo wá jínjɔ́n kɔ́gúdu mɛ.
Ðyɔ̌vǐ Kaludéenu lɛ́ tɔn è,
jǐnjɔ́n kɔ́mɛ fí e axɔ́súzinkpo ɖě ma ɖe ǎ é,
ɖó gbɛtɔ́ lɛ́ sɔ́ ná ylɔ́ we ɖɔ mɛjɔmɛ alǒ mɛ e è bóɖó é kpɔ́n gbeɖé ǎ.
2 Sɔ́ sé ɖokpó, bo li linfín.
Ðe nukúnmɛcyɔ́nnú towe síin.
Ðe awu gaga towe, bo ɖe asá towe lɛ́ jɛ wěxo.
D’asá tɔsisa lɛ́.
3 È ná ɖe mɛ̌ towe xlɛ́.
È ná ɖe winnyánú towe jɛ agbawungba.
Un ná ba hlɔn, bɔ mɛ ɖěbǔ ná hɛn mì ɖó te ǎ.*
4 “Mɛ e ɖo mǐ vɔ́ xɔ wɛ é ɔ,
Jexóva ahwankpá lɛ́ tɔn wɛ nyǐkɔ tɔn nɔ nyí.
É wɛ nyí Mɛ mímɛ́ Izlayɛ́li tɔn.”
5 Ðyɔ̌vǐ Kaludéenu lɛ́ tɔn è,
jǐnjɔ́n fínɛ́ xwíí, bo byɔ́ ablu mɛ;
è sɔ́ ná ylɔ́ we ɖɔ axɔ́súɖuto lɛ́ sín Gǎn nyɔ̌nu* ɖě ǎ.
6 Un sin xomɛ dó togun ce.
Un hɛn gǔ ce blí,
bo bɛ́ yě dó alɔ towe mɛ.
Amɔ̌, a kú nǔbláwǔ ɖěbǔ nú yě ǎ.
A tlɛ sɔ́ agbanhɛnkpo kpinkpɛn ɖó kɔ jí nú mɛxómɔ lɛ́.
7 A ɖɔ: “Un ná ɖo Gǎn nyɔ̌nu* ɔ nyí wɛ káká sɔ́yi.”
A hɛn nǔ énɛ́ lɛ́ dó ayi mɛ ǎ;
a lin tamɛ dó lěe xó ɔ ná fó gbɔn é jí ǎ.
8 Din ɔ, ɖǒtó xó élɔ́, hwi mɛ e yí wǎn nú gbɛɖuɖu é,
a jínjɔ́n ayǐ ɖo ayijayǐ mɛ, bo nɔ ɖɔ dó ayi mɛ ɖɔ:
“Nyi wɛ ɖo mɔ̌ nyí wɛ, mɛ ɖěvo ɖěbǔ sɔ́ ɖe ǎ.
Un ná húzú asúkúsi ǎ.
Un ná tuun nǔ e vǐ kú dó mɛ nyí é gbeɖé ǎ.”
9 Amɔ̌, nǔ we énɛ́ lɛ́ ná wá jǐ towe ajijimɛ, ɖo azǎn ɖokpó ɔ jí:
vǐ kú dó mɛ kpó asú kú dó mɛ kpó.
Nǔ énɛ́ lɛ́ bǐ ná gbo we,
ɖó azě towe tobutóbú lɛ́ kpó majíki towe hlɔ̌nhlɔ́nnɔ lɛ́ kpó wútu.
10 A gán jɛ dǎkaxixo towe wú.
A ɖɔ: “Mɛ ɖě ɖo mimɔ mì wɛ ǎ.”
Nǔnywɛ́ towe kpó nǔtuuntuun towe kpó wɛ zɔ́n bɔ a zɛ gbě,
bɔ a nɔ ɖɔ dó ayi mɛ ɖɔ: “Nyi wɛ ɖo mɔ̌ nyí wɛ, mɛ ɖěvo ɖěbǔ sɔ́ ɖe ǎ.”
11 Amɔ̌, awě ná xo we,
bɔ tílá towe lɛ́ ɖě ná ɖó te ǎ.*
Adǎn ɖaxó ná gbo we; a ná kpé wú, bo gbo kpo nyi ali jí ná ǎ.
È ná sú kún dó nú we ajijimɛ, bɔ a ná ko mɔ nǔ mɔ̌hun ɖě kpɔ́n ǎ.
12 Énɛ́ wú ɔ, kpo ɖo majíki towe lɛ́ kpó azě towe tobutóbú lɛ́ kpó wú,
lěe a ko ɖó kan d’é wú gbɔn sín wǐnnyáwínnyá mɛ towe é.
Bóyá a sixú ɖu le tɔn;
bóyá a sixú bló bɔ xɛsi jɛ gbɛtɔ́ lɛ́ jí.
13 Nǔ ci kɔ nú we ɖó wěɖexámɛtɔ́ tobutóbú towe lɛ́ wú.
Mɛ ɖěɖěe nɔ sɛn jǐnukúnsin,* bo nɔ kpɔ́n sunví lɛ́ tlítlí lɛ́ é,
yě mɛ ɖěɖěe sun yɔ̌yɔ́ tɔ́n ɔ,
yě nɔ ɖɔ nǔ e ná wá jɛ dó jǐ we lɛ́ é
ní bo sí te din lobo hwlɛ́n we gán.
14 Éɖíe! Yě cí nǔywɛ́ ɖɔhun.
Myɔ ná fyɔ́ yě.
Yě sixú hwlɛ́n yěɖée* sín hlɔ̌nhlɔ́n myɔ ɔ tɔn sí ǎ.
Myɔ énɛ́ lɛ́ cí myɔkán e è nɔ zán dó glɔ́n yǒzo ná é ɖɔhun ǎ,
yě cí myɔ e nukɔn è nɔ jínjɔ́n é ɖɔhun ǎ.
15 Nǔ e nǔnyíylɔ́númɛtɔ́ towe lɛ́ ná húzú nú we é nɛ́,
yě mɛ e kpó hwi kpó wa azɔ̌ syɛ́nsyɛ́n sín wǐnnyáwínnyá mɛ towe lɛ́ é.
Yě ná ɖo flúflú kpé wɛ, mɛ ɖokpó ɖokpó ná ɖo flúflú wɛ ɖo ali éɖésúnɔ tɔn jí.*
Mɛ ɖě ná ɖe bo ná hwlɛ́n we ǎ.