Ezayíi
49 Tɔtɛ́ntinto lɛ́ mi, mi ɖótó mì,
akɔta e ɖo zɔga lɛ́ é mi, mi tɛ́ tó.
Jexóva ko ylɔ́ mì cóbɔ è ji mì.*
Sín hwenu e un ɖo nɔ ce xomɛ é wɛ é ko ké nyǐkɔ ce.
2 É bló bɔ nu ce cí hwǐ ɖíɖá ɖɔhun;
é hwlá mì dó alɔ tɔn sín yɛtɛn.
É sɔ́ mì dó bló gǎ nu xwíɖíxwíɖí;
é sɔ́ mì hwlá dó gǎgo* tɔn mɛ.
3 É ɖɔ nú mì ɖɔ: “Mɛsɛntɔ́ ce wɛ a nyí, Izlayɛ́li è,
hwi mɛ e gblamɛ un ná ɖe susu ce xlɛ́ gbɔn é.”
4 Amɔ̌, un ɖɔ: “Un jɛ tagba dó wǔvɔ́.
Un zán hlɔ̌nhlɔ́n ce yǎyá, un zán dó jɔhɔn mɛ.
Amɔ̌, é ɖo wɛn ɖɔ Jexóva wɛ ná ɖɔ hwɛ ce,*
bɔ ajɔ ce ɖo Mawu ce gɔ́n.”
5 Din ɔ, Jexóva, Mɛ e bló mì sín adɔgo mɛ, bɔ un nyí mɛsɛntɔ́ tɔn é
ɖɔ nyi ɖó ná kplá Jakɔ́bu lɛ́ kɔ wá nú émí,
bónú è ní dó sixú xo Izlayɛ́li kplé nú émí.
È ná sɔ́ mì su ɖo nukún Jexóva tɔn mɛ,
bɔ Mawu ce ná húzú hlɔ̌nhlɔ́n ce.
6 Bɔ é ɖɔ: “É ko kpé ɖɔ a nyí mɛsɛntɔ́ ce,
bo sɔ́ akɔta Jakɔ́bu tɔn lɛ́ sí te,
lobo kplá Izlayɛ́li sín mɛ ɖěɖěe jí è nya xɛ ɖe lɛ́ é lɛ́ kɔ ǎ.
Un lɛ́ bló bɔ a nyí wěziza nú akɔta lɛ́,
bónú hwlɛngán ce ní dó sixú hun káká yi fí e ayǐkúngban ɔ kponu ɖó lɛ́ é.”
7 Nǔ e Jexóva, Mɛ e vɔ́ Izlayɛ́li xɔ é, Mɛ mímɛ́ Izlayɛ́li tɔn ɔ ɖɔ nú acɛkpatɔ́ lɛ́ sín mɛsɛntɔ́ ɔ, ɛɛn, mɛ e è hu tɛ́ ná,* bɔ akɔta ɔ gbɛ́ wǎn ná é ɖíe:
“Axɔ́sú lɛ́ ná mɔ, bo sí te,
axɔ́ví lɛ́ ná ɖe kɔ́,
ɖó Jexóva e ɖo gbejí é,
Mɛ mímɛ́ Izlayɛ́li tɔn ɔ sɔ́ we wútu.”
8 Nǔ e Jexóva ɖɔ é ɖíe:
“Un ná xósin we ɖo fɛ́nú* hwenu,
bo d’alɔ we ɖo hwlɛngánzángbe;
Un nɔ ɖo xɛ nya ɖo jǐ we wɛ ɖ’ayǐ, bo ná dó bló bɔ a ná nyí akɔjijɛ ɖé nú togun ɔ,
bo ná dó vɔ́ to ɔ blóɖó,
bo ná dó bló bɔ gǔ yětɔn e è jó dó lɛ́ é ná jɛ yě sí,
9 lobo ná dó ɖɔ nú gantɔ́ lɛ́ ɖɔ: ‘Mi tɔ́n!’
Bo ná dó ɖɔ nú mɛ e ɖo ablu mɛ lɛ́ é ɖɔ: ‘Mi ɖe miɖée xlɛ́!’
Yě ná ɖu nǔ ɖo ali lɛ́ tó,
amagbo yětɔn lɛ́ ná ɖo ali e jí mɛ gěgé nɔ gbɔn lɛ́ é bǐ tó.*
10 Xovɛ́ ná sin yě ǎ, kɔ ná xú yě ǎ,
mɔ̌ jɛ́n yǒzo ma ná hɛn yě syɛ́nsyɛ́n, alǒ hwesivɔ́ ma ná hun dó yě jí ǎ é nɛ́,
ɖó Mɛ e kú nǔbláwǔ nú yě é ná xlɛ́ ali yě,
é ná kplá yě gbɔn tɔjɔtɛn lɛ́ tó.
11 Un ná sɔ́ só ce lɛ́ bǐ dó húzú ali,
bo ná sɔ́ ali ɖaxó ce lɛ́ dó jǐ.
12 Mi kpɔ́n! Yě gosín fí línlín jawě.
Mi kpɔ́n! Yě gosín totaligbé, bo gosín gbadahwe jí,
lobo gosín Sinímu to mɛ.”
13 Hwi jǐnukúnsin è, sú xó kpó awǎjijɛ kpó, hwi ayǐkúngban è, j’awǎ.
Só lɛ́ ní sú xó kpó awǎjijɛ kpó, bo kpa awǒbóbó.
Ðó Jexóva dó gbɔ nú togun tɔn,
bo kú nǔbláwǔ nú mɛ tɔn e ɖo wǔvɛ́ se wɛ lɛ́ é.
14 Amɔ̌, Sinyɔ́ɔ ɖo ɖiɖɔ wɛ ɖɔ:
“Jexóva jó mì dó, Jexóva wɔn mì.”
15 Nyɔ̌nu ɖé sixú wɔn vǐ tɔn e ɖo anɔ̌ nu é,
alǒ gɔn wǔvɛ́ se xá xo tɔn mɛ ví wɛ a?
Ényí nyɔ̌nu élɔ́ lɛ́ ná bo tlɛ wɔn ɔ, nyɛ ná wɔn we gbeɖé ǎ.
16 Éɖíe! Un wlán we dó alɔkpákpá ce mɛ.
Dǒ towe lɛ́ ɖo nukɔn ce hwebǐnu.
17 Vǐ súnnu towe lɛ́ yá wǔ lɛ́ kɔ.
Mɛ e vúnvún we, bo sú kún dó nú we lɛ́ é ná gosín gɔ̌n towe.
18 Sɔ́ nukún d’aga, bo kpɔ́n nǔ e lɛ́ lɛ̌ dó we lɛ́ é bǐ.
Yě bǐ xo yěɖée kplé ɖó kpɔ́.
Yě jawě gɔ̌n towe.
“Nú un ɖo gbɛ jɛ́n wɛ ɔ,” wɛ Jexóva ɖɔ,
“a ná sɔ́ yě bǐ dó ba acɔ́ ná, acɔ́ɖónú lɛ́ ɖɔhun,
bo ná sin yě dó wǔ, lěe yawó ɖé nɔ bló gbɔn é ɖɔhun.
19 È gba nɔtɛn towe lɛ́ bɔ yě lɛ́ jɛ vɔ̌, lobɔ to towe húzú aglingbigba có,
din ɔ, tɛnmɛ sɔ́ ná kpé mɛ e nɔ nɔ fínɛ́ lɛ́ é ǎ,
bɔ mɛ ɖěɖěe mì we lɛ́ é ná ɖo zɔ vwéé.
20 Vǐ e è ji hwenu e vǐ towe lɛ́ ko kú gúdo é ná ɖɔ dó tó towe mɛ ɖɔ:
‘Nɔtɛn élɔ́ hwedó mì dín.
Blǒ xɔ nú mì bónú má nɔ fí.’
21 Bɔ a ná ɖɔ dó ayi mɛ ɖɔ:
‘Mɛ̌ ka nyí tɔ́ nú vǐ énɛ́ lɛ́ e è ná mì é?
Ðó vǐ ce lɛ́ ko kú bɔ un lɛ́ nyí wɛnsinɔ,
è kplá mì yi kannumɔgbénu bɔ un nyí gantɔ́.
Mɛ̌ ka kplɔ́n vǐ élɔ́ lɛ́?
Kpɔ́n! Nyiɖokpónɔ wɛ è jó dó ɖ’ayǐ,
bɔ fítɛ́ vǐ élɔ́ lɛ́ ka gosín?’”
22 Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Éɖíe! Un ná sɔ́ alɔ ce dó jǐ nú akɔta lɛ́,
bo ná sɔ́ wuntun* ce dó jǐ nú togun lɛ́.
Yě ná hɛn vǐ súnnu towe lɛ́ dó awa mɛ* bo ná kplá yě wá,
bo ná hɛn vǐ nyɔ̌nu towe lɛ́ ɖó abɔ̌ yětɔn lɛ́ ta.
23 Axɔ́sú lɛ́ ná kpé nukún wǔ we,
bɔ axɔ́ví nyɔ̌nu yětɔn lɛ́ ná nyí vǐhɛntɔ́ towe lɛ́.
Yě ná xwe agbɔ̌nnusú do bo ná ɖe kɔ́ nú we,
lobo ná ɖíɖɔ́ afúntúntún e ɖo afɔ towe lɛ́ wú é,
bɔ a ná tuun ɖɔ nyɛ wɛ nyí Jexóva;
è ná dó winnyá mɛ e nɔ ɖó nukún mì lɛ́ é ǎ.”
24 È ka sixú yí mɛ e è ko wlí lɛ́ é sín nya hlɔ̌nhlɔ́nnɔ ɖé sí a?
Alǒ, è ka sixú hwlɛ́n acɛgannagannakpanúmɛtɔ́ sín kannumɔ lɛ́ a?
25 Amɔ̌, nǔ e Jexóva ɖɔ é ɖíe:
“È tlɛ ná bɛ́ nya hlɔ̌nhlɔ́nnɔ ɖé sín kannumɔ lɛ́ sɔ́ yi,
bo ná hwlɛ́n mɛ e acɛgannagannakpanúmɛtɔ́ ɔ wlí lɛ́ é.
Un ná klán gbe xá mɛ e klán gbe xá we lɛ́ é,
bo ná hwlɛ́n vǐ súnnu hwiɖésúnɔ tɔn lɛ́.
26 Un ná bló bɔ mɛ e nɔ dó ya nú we lɛ́ é ná ɖu agbaza yěɖésúnɔ tɔn,
yě ná nu hun yěɖésúnɔ tɔn mú, vɛ̌ɛn e víví é ɖɔhun.
Bɔ togun* lɛ́ bǐ ná tuun ɖɔ nyɛ wɛ nyí Jexóva,
Mɛhwlɛ́ngántɔ́ towe, Mɛ e vɔ́ we xɔ é,
Mɛ hlɔ̌nhlɔ́nnɔ Jakɔ́bu tɔn.”