Ezayíi
50 Nǔ e Jexóva ɖɔ é ɖíe:
“Fítɛ́ nɔ mitɔn e un nya é sín mɛgbígbɛ́wéma ka ɖe?
Alǒ, axɔ́tɔ́nɔ ce lɛ́ ɖětɛ́ un ka sa mi ná?
Éɖíe! Nǔwanyido miɖésúnɔ tɔn lɛ́ wú wɛ è sa mi,
nǔwanyido miɖésúnɔ tɔn lɛ́ wú wɛ è nya nɔ mitɔn.
2 Étɛ́wú hwenu e un wá é ɔ, mɛ ɖěbǔ ma ka ɖo fí ǎ lo?
Hwenu e un ylɔ́ mi é ɔ, aniwú mɛ ɖěbǔ ma ka sɔ ǎ?
Alɔ ce hwe dín bónú má xɔ gbɛ nú mɛ wɛ a?
Alǒ, hlɔ̌nhlɔ́n ɖě ɖo wǔ ce bónú má hwlɛ́n mɛ gán ǎ wɛ a?
Éɖíe! Gbɔn nǔ e un nɔ gbɛ́ nú mɛ é gblamɛ ɔ, un nɔ bló bɔ xu nɔ mɛ;
un nɔ bló bɔ tɔsisa lɛ́ nɔ húzú gbětótló.
Hweví yětɔn lɛ́ nyɔ, ɖó sin e hán é wú,
yě kú, ɖó yě ba sin kpo wútu.
3 Un sɔ́ ablu dó nú jǐnukúnsin,
bo sɔ́ ati dó bló wǔcyɔ́n n’i.”
4 Aklúnɔ Nǔbǐwúkpétɔ́ Jexóva ná mì mɛ e è kplɔ́n nǔ lɛ́ é sín ɖɛ̌,*
bónú má dó sixú tuun lěe un ná ná xósin* mɛ e nǔ ci kɔ ná é kpó xókwín e sɔgbe é* kpó gbɔn é.
É nɔ fɔ́n mì zǎnzǎn tɛgbɛ;
é nɔ hun tó ce, bónú má ɖótó, mɛ e è kplɔ́n nǔ lɛ́ é ɖɔhun.
5 Aklúnɔ Nǔbǐwúkpétɔ́ Jexóva hun tó ce,
un ka fɔ́n gǔ ǎ.
Un mlɛ́ ali ɖěvo ǎ.
6 Un jó nɛgbé ce nú mɛ ɖěɖěe ɖo xixo mì wɛ lɛ́ é,
bo jó klɛ̌n ce lɛ́ dó nú mɛ ɖěɖěe ɖo atán ce sun wɛ lɛ́ é.
Un hwlá nukúnmɛ ce dó winnyádómɛ sín nǔ lɛ́ kpó atántúndómɛ kpó ǎ.
7 Amɔ̌, Aklúnɔ Nǔbǐwúkpétɔ́ Jexóva ná d’alɔ mì.
Nǔ e wú winnyá ma ná hu mì ǎ é nɛ́.
Énɛ́ wú wɛ un bló bɔ nukúnmɛ ce cí awǐnnya ɖíɖá ɖé ɖɔhun,
bɔ un tuun ɖɔ è kún ná dó winnyá mì ó.
8 Mɛ e nɔ ylɔ́ mì ɖɔ nǔjlɔ́jlɔ́watɔ́ é ko sɛkpɔ́.
Mɛ̌ ka sixú ylɔ́ hwɛ* mì?
Mi nú mǐ ní sí te ɖó kpɔ́.*
Mɛ̌ ka jló ná dó hwɛ mì?
É ní sɛkpɔ́ mì.
9 Éɖíe! Aklúnɔ Nǔbǐwúkpétɔ́ Jexóva ná d’alɔ mì.
Mɛ̌ ka ná ɖɔ un kú hwɛ?
Éɖíe! Yě bǐ wɛ ná gbi awu ɖɔhun.
Avɔɖwivɔɖwi ná ɖu yě mlɛ́mlɛ́.
10 Mɛ̌ ka ɖo mi mɛ bo nɔ ɖó sísí e gɔ́ngɔ́n é nú Jexóva,
lobo nɔ ɖótó mɛsɛntɔ́ tɔn sín gbe?
Mɛ̌ ka ɖi zɔnlin ɖo ablu gɔngɔn mɛ, wěziza ɖěbǔ mɛvo?
É ní ɖeji dó nyǐkɔ Jexóva tɔn wú, bo gán jɛ Mawu tɔn wú.*
11 “Éɖíe! Mi mɛ e ɖo myɔ flɔ́ wɛ,
bo ɖo blǒbló wɛ bɔ myɔ ɖo zlɔ̌nzlɔ́n sín mɛ wɛ lɛ́ é mi,
mi ɖi zɔnlin ɖo myɔ mitɔn sín wěziza nu,
ɖo myɔ e mi flɔ́ bɔ é ɖo zlɔ̌nzlɔ́n wɛ é tɛ́ntin.
Nǔ e mi ná mɔ yí ɖo alɔ ce mɛ é ɖíe:
mi ná mlɔ́ ayǐ ɖo wǔvɛ́ syɛ́nsyɛ́n mɛ.