Ezayíi
51 “Mi mɛ e ɖo nǔjlɔ́jlɔ́wiwa gbé nya wɛ lɛ́ é mi, mi ɖótó mì,
mi mɛ e ɖo Jexóva ba wɛ lɛ́ é.
Mi kpɔ́n awǐnnya e wú è kpa mi sín é,
bo kpɔ́n awǐnnyakan e mɛ è kun mi sín é.
2 Mi kpɔ́n tɔ́ mitɔn Ablaxámu,
bo kpɔ́n Sala e ji mi* é.
Ðó mɛ ɖokpó wɛ é nyí hwenu e un ylɔ́ ɛ é,
bɔ un kɔn nyɔ̌ná dó jǐ tɔn, bo bló bɔ kúnkan tɔn sukpɔ́.
3 Ðó Jexóva ná dó gbɔ nú Sinyɔ́ɔ.
É ná dó gbɔ nú aglingbigba tɔn lɛ́ bǐ,
bo ná bló bɔ gbětótló tɔn ná cí Edɛ́ni ɖɔhun,
lobɔ gbětótló tɔn ná cí jikpá Jexóva tɔn ɖɔhun.
Xomɛhunhun kpó awǎjijɛ kpó ná tíin ɖo fínɛ́,
gɔ́ nú kúdídó kpó han e nyɔ́ se lɛ́ é kpó.
4 Togun ce, mi ɖótó mì,
akɔta ce, mi ɖótó mì ganjí.
Ðó un ná ɖe sɛ́n ɖokpó tɔ́n,
bo ná ɖó hwɛjijɔ ce ayǐ bɔ é ná nyí wěziza nú togun lɛ́.
5 Nǔjlɔ́jlɔ́wiwa ce ko sɛkpɔ́.
Hwlɛngán ce ná tɔ́n wá mi gɔ́n,
bɔ awa ce lɛ́ ná ɖɔ hwɛ xá togun lɛ́,
nyɛ wɛ tɔtɛ́ntinto lɛ́ ná ɖó nukún,
yě ná nɔ te kpɔ́n awa* ce.
6 Mi kpɔ́n jǐxwé sɛ́dó,
bo kpɔ́n ayǐkúngban ɔ jí do.
Ðó jǐxwé ná kɛn azizɔ ɖɔhun;
ayǐkúngban ɔ ná gbi awu ɖɔhun,
bɔ mɛ e nɔ nɔ jí lɛ́ é ná kú jɛxlí ɖɔhun.
Amɔ̌, hwlɛngán ce ná nɔ te káká sɔ́yi,
bɔ nǔjlɔ́jlɔ́wiwa ce ná vɔ gbeɖé ǎ.*
7 Mi ɖótó mì, mi mɛ e tuun nǔjlɔ́jlɔ́wiwa lɛ́ é,
togun e sín ayi mɛ sɛ́n* ce ɖe é.
Mi ma ɖi xɛsi nú slamɛ ɖiɖɔ gbɛtɔ́ e nɔ kú lɛ́ é tɔn lɛ́ ó,
ado ní ma hu mi ɖó mɛzunzun yětɔn lɛ́ wú ó.
8 Ðó avɔɖwivɔɖwi ná ɖu yě mlɛ́mlɛ́ lěe é nɔ ɖu awu gbɔn é ɖɔhun;
lakpálakpá* ná ɖu yě lěe é nɔ ɖu lɛ̌ngbɔ́fún gbɔn é ɖɔhun.
Amɔ̌, nǔjlɔ́jlɔ́wiwa ce ná nɔ te káká sɔ́yi,
bɔ hwlɛngán ce ná nɔ ayǐ nú jijimɛ lɛ́ bǐ.”
9 Awa Jexóva tɔn è,
fɔ́n! Fɔ́n! Nǎ hlɔ̌nhlɔ́n hwiɖée!*
Fɔ́n, lěe a nɔ bló gbɔn ɖo hwenu línlín lɛ́ ɖíe é, ɖo jijimɛ e wá yi lɛ́ é mɛ é.
É ma nyí hwi wɛ gba Hlaxábu* hánnyá,
bo sɔ́ hwǎn nǔdabaɖa xu mɛ tɔn ɔ ǎ cé?
10 É ma nyí hwi wɛ mɛ xu, énɛ́ wɛ nyí sin e ɖo do gɔngɔn ɔ mɛ lɛ́ é ǎ cé?
É ma nyí hwi wɛ sɔ́ xu ɔ sín azan lɛ́ dó ɖó ali nú mɛ e è vɔ́ xɔ lɛ́ é, bónú yě ná gbɔn jí ǎ cé?
11 Mɛ e Jexóva xɔ gbɛ ná lɛ́ é ná lɛ́ kɔ wá.
Yě ná ɖo xó sú wɛ kpó awǎjijɛ kpó, bo ná lɛ́ kɔ wá Sinyɔ́ɔ,
awǎjijɛ e ma ɖó dogbó ǎ é ná nyí jɛ̌gbákún nú yě.*
Xomɛhunhun kpó awǎjijɛ kpó ná nyí yětɔn,
bɔ aluwɛ kpó azɔnwinwɛn kpó ná blí bú.
12 “Nyi wɛ nyí Mɛ e nɔ dó gbɔ nú mi é.
Étɛ́wú a ka ná ɖi xɛsi nú gbɛtɔ́ e nɔ kú é?
Gbɛtɔ́ví e nɔ mlú ɖa gběhan mǔ ɖɔhun é?
13 Étɛ́wú a ka wɔn Jexóva, Mɛ e bló we é?
Mɛ e vlɔ́n jǐnukúnsin, bo ɖó dodónu ayǐkúngban ɔ tɔn ayǐ é?
Bɔ ɖo azǎn lɛ́ bǐ jí ɔ, a nɔ ɖo xɛsi jí magbokɔ ɖó yadónúmɛtɔ́ ɔ sín xomɛsin syɛ́nsyɛ́n ɔ wútu,
cí nǔ ɖɔ é ɖo gbesisɔmɛ bo ná sú kún dó nú we wɛ ɖɔhun.
Din ɔ, fítɛ́ xomɛsin syɛ́nsyɛ́n yadónúmɛtɔ́ ɔ tɔn ka ɖe?
14 È ná ɖe mɛ e ɖo tɔ́tɔ́ ɖo wlɔ mɛ é nyi te zaanɖé;
é ná kú bo ná yi do mɛ ǎ,
mɔ̌ jɛ́n é ma ná ba wɔ̌xúxú tɔn kpo ǎ é nɛ́.
15 Amɔ̌, nyɛ wɛ nyí Jexóva Mawu towe,
mɛ e nɔ fɔ́n xu sí te, bo nɔ bló bɔ aslɔkɛ́ tɔn lɛ́ nɔ wa adǎn é,
Jexóva ahwankpá lɛ́ tɔn wɛ nyǐkɔ ce nɔ nyí.
16 Un ná sɔ́ xó ce lɛ́ dó nu towe mɛ,
bo ná cyɔ́n alɔ jǐ towe kpó alɔ ce sín yɛtɛn kpó,
bo ná dó ɖó jǐnukúnsin ayǐ, lobo ɖó dodónu ayǐkúngban ɔ tɔn ayǐ,
bo ɖɔ nú Sinyɔ́ɔ ɖɔ: ‘Hwi wɛ nyí togun ce.’
17 Jeluzalɛ́mu, hwi mɛ e nu xomɛsin kɔ́fu Jexóva tɔn ɖo alɔ tɔn mɛ é,
fɔ́n! Fɔ́n! Sí te.
A kɔn gannú ɔ nu;
a kɔn kɔ́fu e nɔ zɔ́n bɔ è nɔ fún sa é nu.
18 Ðo vǐ súnnu e é hɛn lɛ́ é bǐ mɛ ɔ, ɖě ɖo fínɛ́ bo ná xlɛ́ ali i ǎ,
bɔ ɖo vǐ súnnu e é kplɔ́n lɛ́ é bǐ mɛ ɔ, ɖě ɖe bo hɛn alɔ tɔn ǎ.
19 Nǔ we énɛ́ lɛ́ jɛ dó jǐ towe.
Mɛ̌ ka ná se wǔvɛ́ xá we?
Nǔhɛngblé kpó kúnsúdónúnǔ kpó, xovɛ́ kpó hwǐ kpó!
Mɛ̌ ka ná dó gbɔ nú we?
20 Vǐ súnnu towe lɛ́ xɛ́ nǔ.
Yě mlɔ́ ayǐ ɖo aliklán lɛ́ bǐ,*
lɛ̌ngbɔ́ gbě tɔn e ɖo ɖɔ mɛ é ɖɔhun.
Xomɛsin Jexóva tɔn, ɛɛn, nǔgbɛ́númɛ Mawu towe tɔn kɔn nyi yě jí mlɛ́mlɛ́.”
21 Énɛ́ wú ɔ, kɛnklɛ́n bo ɖótó nǔ élɔ́,
hwi nyɔ̌nu e se wǔvɛ́ bo mú, bɔ é ma ka nyí ɖó vɛ̌ɛn wú ǎ é.
22 Nǔ e Aklúnɔ Jexóva, Mawu towe e nɔ jɛ hun dó togun tɔn jí é ɖɔ é ɖíe:
“Éɖíe! Un ná yí kɔ́fu e nɔ zɔ́n bɔ è nɔ fún sa é sín alɔ towe mɛ,
gannú ɔ, xomɛsin ce sín kɔ́fu ɔ;
a sɔ́ ná nu i ɖě gbeɖé ǎ.
23 Un ná sɔ́ ɛ ɖó yadónúmɛtɔ́ towe lɛ́ sín alɔ mɛ,
yě mɛ e nɔ ɖɔ nú we* ɖɔ: ‘Mlɔ̌ ayǐ, bónú mǐ ní dó sixú ɖi zɔnlin gbɔn jǐ towe!’ lɛ́ é,
énɛ́ ɔ, a nɔ bló bɔ nɛgbé towe nɔ cí kɔ́mɛ ɖɔhun,
bo nɔ cí toxomɛli ɖɔhun nú yě, bónú yě ná gbɔn jí.”