Ezayíi
52 Sinyɔ́ɔ è, fɔ́n! Fɔ́n! Nǎ hlɔ̌nhlɔ́n hwiɖée,*
Jeluzalɛ́mu toxo mímɛ́ ɔ è, sɔ́ awu towe ɖɛkpɛ ɖɛkpɛ lɛ́ dó!
Ðó mɛ e ma gbo ada ǎ é kpó mɛ e nyí mɛ blíblí é kpó sɔ́ ná byɔ́ toxo ɔ mɛ ǎ.
2 Jeluzalɛ́mu è, sí te sín afúntúntún mɛ, fɛ́ afúntúntún sín hwiɖée wú bo jínjɔ́n ayǐ.
Vǐ nyɔ̌nu Sinyɔ́ɔ tɔn e nyí kannumɔ é, blǒ bónú gɛdɛ e ɖo kɔ nú we é ní fúɖá.
3 Ðó nǔ e Jexóva ɖɔ é ɖíe:
“È sa mi vɔ̌nu,
è ná vɔ́ mi xɔ akwɛ́ mɛvo.”
4 Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Jɛ nukɔn hwɛ̌ ɔ, togun ce jɛ te yi Ejípu, bo ná dó nyí jǒnɔ ɖo dɔ̌n;
énɛ́ gúdo ɔ, Asilíi nɔ yǎyá bo dó ya nú yě.”
5 “Étɛ́ un ka ɖó ná wa ɖo fí lo?” wɛ Jexóva ɖɔ.
“Ðó è kplá togun ce yi vɔ̌nu.
Mɛ ɖěɖěe nɔ kp’acɛ dó yě jí lɛ́ é nɔ ɖo ɖuɖéjí sín xó sú wɛ,” wɛ Jexóva ɖɔ,
“hwebǐnu ɖo azǎn lɛ́ bǐ jí ɔ, è nɔ ɖó sísí nú nyǐkɔ ce ǎ.
6 Ðó hwɛjijɔ énɛ́ wú ɔ, togun ce ná tuun nyǐkɔ ce;
ɖó hwɛjijɔ énɛ́ wú ɔ, yě ná tuun ɖo azǎn énɛ́ gbe ɖɔ nyɛ wɛ nyí mɛ e ɖo xó ɖɔ wɛ é.
Éɖíe! Nyi wɛ!”
7 Mɛ e ɖo só lɛ́ jí bo hɛn wɛn ɖagbe jawě é sín afɔ lɛ́ nyɔ́ kpɔ́n mɛ nya!
Mɛ e ɖo fífá jlá wɛ é,
mɛ e hɛn nǔ e nyɔ́ hú gǎn é ɖé sín wɛn ɖagbe ja é,
mɛ e ɖo hwlɛngán jlá wɛ é,
mɛ e ɖo ɖiɖɔ nú Sinyɔ́ɔ wɛ ɖɔ: “Mawu towe húzú Axɔ́sú” é!
8 Ðǒtó! Mɛcɔ́tɔ́ towe lɛ́ nɔ sɔ́ gbe dó jǐ.
Yě nɔ sú xó kpó awǎjijɛ kpó ɖó kpɔ́,
ɖó hwenu e Jexóva ná vɔ́ Sinyɔ́ɔ ɖó ayǐ é ɔ, yě ná mɔ vaan.*
9 Aglingbigba Jeluzalɛ́mu tɔn lɛ́ mi, xomɛ ní hun mi, mi sú xó kpó awǎjijɛ kpó ɖó kpɔ́,
ɖó Jexóva dó gbɔ nú togun tɔn; é vɔ́ Jeluzalɛ́mu xɔ.
10 Jexóva ɖe awa tɔn mímɛ́ ɔ jɛ wěxo ɖo akɔta lɛ́ bǐ nukúnmɛ;
fí e ayǐkúngban ɔ kponu ɖó lɛ́ é bǐ ná mɔ hwlɛngán núwiwa Mawu mǐtɔn tɔn lɛ́.*
11 Mi lɛ́ kɔ, mi lɛ́ kɔ, mi gosín fínɛ́, mi ma ɖ’alɔ nǔ e nyí nǔ blíblí é ɖěbǔ wú ó!
Mi gosín tɛ́ntin tɔn, mi hɛn miɖée ɖó mǐmɛ́ jí,
mi mɛ e hɛn nǔzínzán Jexóva tɔn lɛ́ é.
12 Mi ná zɔn síjá jí bo ná ɖidó ǎ,
mɔ̌ jɛ́n é ma ná byɔ́ ɖɔ mi ní hɔn ǎ é nɛ́,
ɖó Jexóva ná jɛ nukɔn nú mi,
bɔ Mawu Izlayɛ́li tɔn ná nya xɛ ɖo mi jí ɖo gǔdo.
13 Éɖíe! Mɛsɛntɔ́ ce ná wa nǔ kpó nukúnnúmɔjɛnǔmɛ kpó.
È ná sɔ́ ɛ dó jǐ,
è ná sɔ́ ɛ su, bo ná kpa susu n’i ɖésú.
14 Mɛ gěgé kpɔ́n ɛ dáán, bɔ é kpácá yě,
ɖó nukún tɔn mɛ gblé hú gbɛtɔ́ ɖěvo ɖěbǔ tɔn,
bɔ ninɔmɛ susunɔ e é ɖó é gblé hú gbɛtɔ́ lɛ́ tɔn wútu.
15 Amɔ̌ din ɔ, é ná dó xɛsi akɔta gěgé.
Axɔ́sú lɛ́ ná bɔ nu dó aɖǔ ɖo nukɔn tɔn,*
ɖó yě ná mɔ nǔ e è ma ko ɖɔ nú yě ǎ é,
bo ná sɔ́ ayi ɖó nǔ e yě ma ko se ǎ é jí.