Ezayíi
56 Nǔ e Jexóva ɖɔ é ɖíe:
“Jɛ hun dó hwɛjijɔ jí bo wa nǔ jlɔ́jlɔ́,
ɖó un ná hɛn hwlɛngán wá ɖo malínmálín mɛ,
bɔ è ná ɖe nǔjlɔ́jlɔ́wiwa ce xlɛ́.
2 Awǎjijɛnɔ wɛ nyí mɛ e nɔ wa mɔ̌ é,
gbɛtɔ́ví e nɔ hɛn wú gbánwúngbánwún é,
mɛ e nɔ nyi gbɔjɛzán ɔ, bo ma nɔ hɛn blí ǎ é,
mɛ e ma nɔ ɖ’alɔ ɖo nǔ nyanya alɔkpa ɖěbǔ mɛ ǎ é.
3 Toɖévomɛnu e nɔ sɛn Jexóva é ɖó ná ɖɔ xó élɔ́ ǎ:
‘É ɖo wɛn ɖɔ Jexóva ná ɖe mì ɖó vo nú togun tɔn.’
Bɔ agooɖojǐe ɔ ɖó ná ɖɔ: ‘Mi kpɔ́n! Atín xúxú wɛ nú mì’ ǎ.”
4 Ðó nǔ e Jexóva ɖɔ é ɖíe: “Un ɖo ɖiɖɔ nú agooɖojǐe ɖěɖěe nɔ nyi gbɔjɛzán ce lɛ́, bo nɔ wa nǔ e nɔ dó xomɛhunhun nú mì, lobo nɔ tɛ́ dó akɔjijɛ ce wú gbánwúngbánwún lɛ́ é wɛ ɖɔ:
5 Un ná mɛ kpe ɖokpó nú we bo ná ná we nyǐkɔ ɖokpó ɖo xwé ce gbe kpó dǒ ce lɛ́ tɛ́ntin kpó,
nǔɖé wɛ bo nyɔ́ hú gǎn vǐ súnnu kpó vǐ nyɔ̌nu kpó.
Un ná ná yě nyǐkɔ mavɔmavɔ ɖé,
nyǐkɔ ɖé wɛ bo ná sú dó ǎ.
6 Toɖévomɛnu ɖěɖěe wá gɔ́ nú Jexóva bo ná dó sɛn ɛ,
bo ná dó yí wǎn nú nyǐkɔ Jexóva tɔn,
lobo ná nyí mɛsɛntɔ́ tɔn lɛ́ é,
ɛɛn, mɛ ɖěɖěe nɔ nyi gbɔjɛzán ɔ bo ma nɔ hɛn blí ǎ,
lobo nɔ tɛ́ dó akɔjijɛ ce wú gbánwúngbánwún lɛ́ é bǐ ɔ,
7 un ná lɛ́ kplá yě wá só mímɛ́ ce jí,
bo ná bló bɔ yě ná j’awǎ ɖo ɖɛxwé ce.
È ná yí gbe nú nǔníná yětɔn e è nɔ dó blěbú tɔn zo é kpó vɔ̌sísá yětɔn lɛ́ kpó ɖo vɔ̌sákpe ce jí.
Ðó è ná ylɔ́ xwé ce ɖɔ ɖɛxwé togun lɛ́ bǐ tɔn.”
8 Aklúnɔ Nǔbǐwúkpétɔ́ Jexóva e ɖo Izlayɛ́li sín mɛ e fúnfún kpé lɛ́ é xo kplé wɛ é ɖɔ:
“Un ná xo mɛ ɖěvo lɛ́ kplé n’i dó mɛ ɖěɖěe è ko xo kplé lɛ́ é kpá.”
9 Gběkanlin e ɖo gle mɛ lɛ́ é mi, mi bǐ ní wá ɖu nǔ,
ɛɛn, mi gběkanlin e ɖo zungbó mɛ lɛ́ é bǐ.
10 Mɛcɔ́tɔ́ tɔn lɛ́ tɔ́n nukún, yě ɖě sɔ́ nǔ e sixú jɛ é sín kɛ́n ɖ’ayǐ ǎ.
Cukú e ma nɔ kɛ nu ǎ lɛ́ é wɛ yě bǐ nyí, yě nɔ sixú hó nǔ ǎ.
Yě ɖo gbigbɔjɛ wɛ voovoo bo mlɔ́ ayǐ; yě yí wǎn nú kɔmlɔgɔ́ sisa.
11 Cukú e sín adɔ ɖo kɔ lɛ́ é wɛ yě nyí;
yě nɔ gɔ́ xo gbeɖé ǎ.
Lɛ̌ngbɔ́nyitɔ́ e ma ɖó nukúnnúmɔjɛnǔmɛ ɖě ǎ lɛ́ é wɛ yě nyí.
Yě bǐ wɛ mlɛ́ ali yěɖésúnɔ tɔn;
yě mɛ ɖokpó ɖokpó nɔ ba afuli bo nɔ ɖɔ:
12 “Mi wa! Mi nú má hɛn vɛ̌ɛn wá.
Mǐ ní nu ahan syɛ́nsyɛ́n káká bo mú.
Sɔ ná cí égbé ɖɔhun, é tlɛ ná nyɔ́ hú tawun wɛ lɔ!”