Ezayíi

7 Din ɔ, ɖo axɔ́sú Judáa tɔn Akázi, éé nyí Jotámu ví, bo nyí Oziyási vívú é hwenu ɔ, axɔ́sú Silíi tɔn Hlesíni kpó axɔ́sú Izlayɛ́li tɔn Pekási e nyí Hlemalíya ví é kpó wá, bo ná fun ahwan xá Jeluzalɛ́mu, amɔ̌, é* kpé wú bo yí to ɔ ǎ. 2 È wá ɖɔ nú Davídi xwé ɔ ɖɔ: “Silíi xo kpóɖó nú Eflayímu bá fun ahwan xá mǐ.”

Akázi sín hǔn kpó togun tɔn sín hǔn kpó jɛ xixo jí, atín ɖěɖěe ɖo zungbó mɛ bɔ jɔhɔn ɖo dǐndán wɛ lɛ́ é ɖɔhun.

3 Énɛ́ ɔ, Jexóva ɖɔ nú Ezayíi ɖɔ: “Kɛnklɛ́n, tɔ́n, bo yi kpé Akázi, hwi kpó vǐ súnnu towe Cea-Yacúbu* kpó, é ɖo fí e sinhwín sindo e ɖo só ta é tɔn nɔ te ɖó, ɖo gle avɔnyatɔ́ ɔ tɔn sín ali ɖaxó ɔ kpá é. 4 A ɖó ná ɖɔ n’i ɖɔ: ‘Tɛ́n kpɔ́n bo cí xwíí. Ma ɖi xɛsi ó, ayi towe ní ma ka gba dó, ɖó atínta we énɛ́ lɛ́ e ɖo azɔ si wɛ é wú ó, ɖó xomɛsin syɛ́nsyɛ́n e jí Hlesíni, Silíi kpó vǐ súnnu Hlemalíya tɔn kpó ɖe é wú ó. 5 Ðó Silíi kpó Eflayímu kpó, kpódó vǐ súnnu Hlemalíya tɔn kpán blá gbě towe bo ɖɔ: 6 “Mǐ ní yi tɔ́n ahwan Judáa, bo gba ɛ hánnyá* lobo yí to ɔ,* mǐ ní sɔ́ vǐ súnnu Tabeɛ́li tɔn axɔ́sú ɖó nu tɔn.”

 7 “‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:

10 Jexóva kpo ɖo xó ɖɔ nú Akázi wɛ ɖɔ: 11 “Byɔ̌ wuntun ɖé Jexóva Mawu towe; é sixú yi do tawun Yɔdo* ɖɔhun, alǒ yi aga tawun jǐnukúnsin ɖɔhun.” 12 Amɔ̌, Akázi ɖɔ: “Un ná byɔ́ ǎ, mɔ̌ jɛ́n un ma ka ná lɛ́ tɛ́n Jexóva kpɔ́n ǎ é nɛ́.”

13 Énɛ́ ɔ, Ezayíi ɖɔ: “Xwé Davídi tɔn è, kɛnklɛ́n, ɖǒtó. Suúlu gbɛtɔ́ lɛ́ tɔn e a tɛ́n kpɔ́n é ko kpé ǎ cé? A ɖó ná lɛ́ tɛ́n suúlu Mawu tɔn kpɔ́n wɛ a? 14 Énɛ́ wú ɔ, Jexóva ɖésúnɔ ná ná we wuntun ɖokpó: Éɖíe! Ðyɔ̌vǐ* ɔ ná mɔ xo, bo ná ji vǐ súnnu ɖokpó, lobo ná sun nyǐ i ɖɔ Emanuwɛ́li.* 15 Cóbónú é ná tuun lěe é ná nɔ gbɛ́ nǔ nyanya, bo yí gbe nú nǔ ɖagbe gbɔn é ɔ, é ná nɔ ɖu bɔ̌ta kpó wǐin kpó. 16 Ðó cóbónú nyaví ɔ ná tuun lěe è nɔ gbɛ́ nǔ nyanya, bo nɔ yí gbe nú nǔ ɖagbe gbɔn é ɔ, axɔ́sú we e ɖi xɛsi ná wɛ a ɖe lɛ́ é sín to ná ko jɛ vɔ̌ bǐ mlɛ́mlɛ́. 17 Jexóva ná sɛ́ hwenu vɛ́ wǔ lɛ́ dó hwi kpó togun towe kpó, kpódó tɔ́ towe sín xwé ɔ kpán, bɔ ɖě ko syɛ́n sɔ azǎn e gbe Eflayímu klán jó Judáa dó é tɔn ǎ, ɖó é ná kplá Asilíi xɔ́sú ɔ wá.

18 “Ðo azǎn énɛ́ gbe ɔ, Jexóva ná kwínkwín bo ná ylɔ́ sukpɔ e ɖo Nilu sín tɔsisa e ɖo fí línlín lɛ́ é mɛ ɖo Ejípu lɛ́ é, bo ná ylɔ́ wǐin e ɖo Asilíi yíkúngban jí lɛ́ é, 19 bɔ yě mɛ bǐ ná wá, bo ná ɖó kɔn nyi tɔdo* lɛ́ mɛ, yě ná ɖó kɔn nyi sóvla lɛ́ mɛ, bo ná ɖó kɔn nyi wunkan lɛ́ bǐ mɛ, lobo ná ɖó kɔn nyi fí e sin ɖe lɛ́ é bǐ.

20 “Ðo azǎn énɛ́ gbe ɔ, gbɔn hǎ e è xáya sín Tɔsisa ɔ* sín xá mɛ é gblamɛ ɔ, ɛɛn, gbɔn Asilíi xɔ́sú ɔ gblamɛ ɔ, Jexóva ná xwlɛ́ ta n’i, bo ná xwlɛ́ fún e ɖo afɔ tɔn lɛ́ é, lobo ná lɛ́ xwlɛ́ atán n’i.

21 “Ðo azǎn énɛ́ gbe ɔ, è ná kpo nyibú wínnyáwínnyá e ɖo kanlinhwan ɔ mɛ é ɖokpó kpó lɛ̌ngbɔ́ we kpó nyi gbɛ. 22 Bɔ ɖó anɔ̌sin ná túnflá wútu ɔ, é ná nɔ ɖu bɔ̌ta, ɖó mɛ e kpo ɖo ayǐkúngban ɔ jí lɛ́ é bǐ ná nɔ ɖu bɔ̌ta kpó wǐin kpó.

23 “Ðo azǎn énɛ́ gbe ɔ, wunkan lɛ́ kpó gběhan nyanya lɛ́ kpó wɛ ná nɔ fí ɖěbǔ e vǐwuntín 1 000 nɔ nɔ ɖ’ayǐ, bo nɔ xɔ kpatágankwɛ́ 1 000 é. 24 È ná nɔ hɛn daswé* kpó gǎ kpó bo ná nɔ wá fínɛ́, ɖó wunkan kpó gběhan nyanya kpó wɛ ná blá to ɔ bǐ. 25 Bɔ só ɖěɖěe jí è nɔ sɔ́ alǐn dó xwa nǔ ɖe ɖ’ayǐ lɛ́ é ɔ, a ná sɛkpɔ́ ǎ ɖó a ná ɖo xɛsi ɖi nú wunkan lɛ́ kpó gběhan nyanya lɛ́ kpó wɛ wútu, yě ná húzú fí e nyibúsú lɛ́ nɔ ɖu ama ɖe é kpó ayǐkúngban e lɛ̌ngbɔ́ lɛ́ nɔ gbídí é kpó.”