Ezayíi
66 Nǔ e Jexóva ɖɔ é ɖíe:
“Jǐxwé wɛ nyí axɔ́súzinkpo ce, bɔ ayǐkúngban nyí afɔɖótɛn ce.
Xwé alɔkpa tɛ́ mi ka sixú gbá nú mì lo?
Fítɛ́ gbɔjɛtɛn ce ka ɖe?”
2 “Alɔ ce ɖésúnɔ wɛ bló nǔ énɛ́ lɛ́ bǐ,
bɔ lěe yě bǐ tíin gbɔn é nɛ́,” wɛ Jexóva ɖɔ.
“Énɛ́ wú ɔ, mɛ e un ná kpɔ́n é ɖíe:
mɛ e nɔ sɔ́ éɖée hwe, bɔ ayi tɔn gba dó, lobɔ é nɔ sísɔ́,* ɖó xó ce wú é.
3 Mɛ e hu nyibú é cí mɛ e hu gbɛtɔ́ é ɖɔhun.
Mɛ e sɔ́ lɛ̌ngbɔ́ dó sá vɔ̌ ná é cí mɛ e wɛ́n cukú sín kɔ é ɖɔhun.
Mɛ e ɖo nǔníná ɖé xwlé mɛ wɛ é cí mɛ e ɖo aglǔza sín hun xwlé mɛ wɛ é ɖɔhun!
Mɛ e ɖo zǎlínkpɔ́n wěwé xwlé mɛ wɛ é cí mɛ e zán majíkixó lɛ́ dó ɖo nyɔ̌ná byɔ́ nú mɛ wɛ é* ɖɔhun.
Yě sɔ́ ali yěɖésúnɔ tɔn lɛ́,
bɔ nǔ e xyɔ́ wǔ é wɛ nɔ dó xomɛhunhun nú yě.*
4 Énɛ́ wú ɔ, un ná ba ali e nu un ná dɔn tó nú yě ɖe lɛ́ é,
bɔ nǔ e yě nɔ ɖi xɛsi ná lɛ́ é wɛ un ná dɔn wá yě jí.
Ðó hwenu e un ylɔ́ yě é ɔ, mɛ ɖěbǔ sɔ ǎ;
hwenu e un ɖɔ xó é ɔ, mɛ ɖě ɖótó mì ǎ.
Yě nɔ fɔ́n bo nɔ ɖo nǔ e nylá nukún ce mɛ lɛ́ é wa wɛ,
yě wá gbeta ɔ kɔn bo wa nǔ e ma nyɔ́ nukún ce mɛ ǎ lɛ́ é.”
5 Mi mɛ e nɔ sísɔ́,* ɖó xó Jexóva tɔn wú lɛ́ é mi, mi ɖótó xó e é ɖɔ é:
“Nɔví mitɔn e gbɛ́ wǎn nú mi bo ɖe mi ɖó vo, ɖó nyǐkɔ ce wú lɛ́ é ɖɔ: ‘Susu nú Jexóva!’
Amɔ̌, é ná wá xwetɔ́n, bo ná dó awǎjijɛ nú mi,
bɔ è ná dó winnyá yědɛɛ lɛ́.”
6 È ɖo zǐngídi ɖé se wɛ sín toxo ɔ mɛ, è ɖo gbe ɖé se wɛ sín sinsɛnxɔ ɔ mɛ!
Jexóva wɛ ɖo nǔ e kɛntɔ́ tɔn lɛ́ jɛxá é sín axɔ́ sú yě wɛ.
7 Cóbónú vǐnú ná jɛ nyɔ̌nu ɔ wa jí ɔ, é ko ji vǐ.
Cóbónú é ná jɛ wǔvɛ́ ajidonu tɔn se jí ɔ, é ji vǐ súnnu ɖokpó.
8 Mɛ̌ ka se nǔ mɔ̌hun kpɔ́n?
Mɛ̌ ka mɔ nǔ mɔ̌hun lɛ́?
To ɖé nɔ sɔ́ gbe ɖokpó ɖó te bo nɔ jɔ wɛ a?
Alǒ, akɔta ɖé nɔ jɔ zǔndo mɛ wɛ a?
É ɖo mɔ̌ có, ée vǐnú jɛ Sinyɔ́ɔ wa jí lě tlóló é ɔ, é ji vǐ súnnu tɔn lɛ́.
9 “Un ná hɛn adɔgo ɔ káká jɛ vivɔnu, bo ná gɔn vǐ ɔ ji wɛ a?” wɛ Jexóva ɖɔ.
“Alǒ, un ná gba asɔ n’i, bɔ énɛ́ gúdo ɔ, un ná ɖó vǐjiji ɔ te wɛ a?” wɛ Mawu towe ɖɔ.
10 Mi mɛ e yí wǎn nú Jeluzalɛ́mu lɛ́ é mi, mi bǐ ní j’awǎ xá ɛ, ɛɛn, mi j’awǎ xá ɛ.
Mi mɛ e ɖo aluwɛ mɛ dó ta tɔn mɛ lɛ́ é mi, mi bǐ ní ɖú agbojlaka xá ɛ,
11 ɖó mi ná nɔ́ anɔ̌ tɔn, bɔ gbɔdónúmɛ sín anɔ̌ tɔn ná jɛmɛ nú mi bǐ mlɛ́mlɛ́,
mi ná nu gɔ́ xo, bo ná mɔ awǎjijɛ ɖo susu tɔn e túnflá é mɛ.
12 Ðó nǔ e Jexóva ɖɔ é ɖíe:
“Éɖíe, un ɖo fífá gba kɔn nyi jǐ tɔn wɛ tɔsisa ɖɔhun,
bo ɖo susu akɔta lɛ́ tɔn gba kɔn nyi jǐ tɔn wɛ tɔ ɖi sin ɖɔhun.
Mi ná nɔ́ anɔ̌ bɔ è ná hɛn mi ɖó akpá,
è ná dó we nú mi ɖo akɔn.
13 Lěe nɔ ɖé nɔ dó gbɔ nú vǐ súnnu tɔn gbɔn é ɔ,
mɔ̌ ɖokpó ɔ, un ná nɔ ɖo gbɔ dó nú mi wɛ;
bɔ è ná dó gbɔ nú mi, ɖó Jeluzalɛ́mu wú.
14 Mi ná mɔ mɔ̌, bo ná j’awǎ,
gbɛ ná wá xú mitɔn lɛ́ wú gběhan mǔ ɖɔhun.
Jexóva ná ɖe hlɔ̌nhlɔ́n tɔn xlɛ́ mɛsɛntɔ́ tɔn lɛ́,
amɔ̌, é ná ɖe kɛntɔ́ tɔn lɛ́ gba.”
15 Ðó Jexóva ná wá myɔ ɖɔhun,
kɛkɛ́ví tɔn lɛ́ cí axásáxásá jɔhɔn syɛ́nsyɛ́n ɖɔhun.
É ná wá bo ná sú axɔ́ mɛ kpó xomɛsin ɖaxó kpó,
lobo ná gbɛ́ nǔ nú mɛ kpó myɔ kpó.
16 Ðó Jexóva ná ɖɔ hwɛ xá mɛ kpó myɔ kpó,
ɛɛn, é ná ɖɔ hwɛ xá gbɛtɔ́ lɛ́ bǐ kpó hwǐ tɔn kpó;
mɛ e Jexóva ná hu lɛ́ é ná sukpɔ́.
17 “Mɛ ɖěɖěe nɔ slá wǔ nú yěɖée lɛ́, bo nɔ lɛ wǔ, bo ná dó byɔ́ jikpá* lɛ́ mɛ xwedó mɛ e ɖo tɛ́ntin é, mɛ ɖěɖěe nɔ ɖu aglǔzalan, nǔ e xyɔ́ wǔ lɛ́ é kpó ajaka kpó lɛ́ é ɔ, yě bǐ sín kún ná sú dó ɖó kpɔ́,” wɛ Jexóva ɖɔ. 18 “Ðó un tuun azɔ̌ yětɔn lɛ́ kpó linlin yětɔn lɛ́ kpó wú ɔ, un ná wá bo ná xo mɛ e gosín akɔta lɛ́ bǐ mɛ, bo nɔ dó gbe tɛnmɛ tɛnmɛ lɛ́ é bǐ kplé, bɔ yě ná wá, bo ná mɔ susu ce.”
19 “Un ná sɔ́ wuntun ɖé ɖó tɛ́ntin yětɔn, bo ná sɛ́ mɛ e gán é ɖé lɛ́ dó akɔta ɖěɖěe ma se xó dó wǔtu ce, alǒ mɔ susu ce ǎ lɛ́ é mɛ, énɛ́ wɛ nyí gǎdatɔ́ lɛ́ sín akɔta ɖěɖěe ɖo Taasísi, Púlu kpó Ludi kpó lɛ́ é. Un ná lɛ́ sɛ́ yě dó Tubálu kpó Yaváni kpó, bo lɛ́ sɛ́ yě dó tɔtɛ́ntinto e ɖo zɔga lɛ́ é mɛ; bɔ yě ná jlá susu ce ɖo akɔta lɛ́ tɛ́ntin. 20 Yě ná kplá nɔví súnnu mitɔn lɛ́ bǐ sín akɔta lɛ́ bǐ mɛ, bɔ yě ná nyí nǔníná nú Jexóva. Yě ná zɔn sɔ́ lɛ́ jí, yě ná zɔn kɛkɛ́ví lɛ́ kpó kɛkɛ́ví e è bú nǔ dó lɛ́ é kpó mɛ, yě ná zɔn sɔ́tócí lɛ́ kpó lǎkúnmí e yá afɔ lɛ́ é kpó jí, bo ná yi Jeluzalɛ́mu, só mímɛ́ ce jí,” wɛ Jexóva ɖɔ, “lěe togun Izlayɛ́li tɔn nɔ hɛn nǔníná yětɔn dó zɛ̌n e mɛ́ é mɛ yi xwé Jexóva tɔn gbe gbɔn é ɖɔhun.”
21 “Un ná lɛ́ sɔ́ yě mɛ ɖé lɛ́, bɔ yě ná nyí vɔ̌sánúxwlémawutɔ́ lɛ́, bo ná sɔ́ mɛ ɖěvo lɛ́, bɔ yě ná nyí Levíi ví lɛ́,” wɛ Jexóva ɖɔ.
22 “Ðó lěe jǐnukúnsin yɔ̌yɔ́ kpó ayǐkúngban yɔ̌yɔ́ kpó e bló wɛ un ɖe é ná nɔ te ɖo nukɔn ce gbɔn é ɔ,” wɛ Jexóva ɖɔ, “mɔ̌ ɖokpó ɔ, kúnkan mitɔn kpó nyǐkɔ mitɔn kpó ná nɔ ayǐ.”
23 “Sunwájǐ lɛ́ bǐ hwenu kpó gbɔjɛzángbe lɛ́ bǐ kpó ɔ,
gbɛtɔ́ lɛ́ bǐ ná wá ɖe kɔ́ nú* mì,” wɛ Jexóva ɖɔ.
24 “Yě ná tɔ́n, bo ná kpɔ́n mɛ e fɔ́n gǔ dó jǐ ce lɛ́ é sín cyɔ;
ɖó wǎnvú e ɖo yě jí lɛ́ é ná kú ǎ,
myɔ e ɖo yě fyɔ́ wɛ é ná cí ǎ,
bɔ yě ná húzú nǔ e xyɔ́ wǔ é nú gbɛtɔ́ lɛ́ bǐ.”