Ezayíi
8 Jexóva ɖɔ nú mì ɖɔ: “Sɔ́ awǐnnyatɛ gblogblo ɖokpó, bo wlán ‘Maɛ́ɛ-Caláli-Xaci-Bázi’* d’é jí kpó wětín kpaa* kpó. 2 Un ba ɖɔ kúnnuɖetɔ́ gbejínɔtɔ́ Ulíi vɔ̌sánúxwlémawutɔ́ ɔ kpó Zakalíi Yebelɛkíya ví ɔ kpó ní wlán nǔ dó dó zǒgbe nǔ e a wlán é jí.”*
3 Énɛ́ gúdo ɔ, un ɖóxó xá gbeyíɖɔ nyɔ̌nu ɔ,* bɔ é mɔ xo bo wá ji vǐ súnnu ɖokpó. Jexóva wá ɖɔ nú mì ɖɔ: “Sun nyǐ i ɖɔ Maɛ́ɛ-Caláli-Xaci-Bázi, 4 ɖó cóbónú súnnuví ɔ ná tuun lěe è nɔ ɖɔ ‘papá’ alǒ ‘mamáa’ gbɔn é ɔ, è ná bɛ́ nǔɖókan Damási tɔn lɛ́ kpó dɔkun Samalíi tɔn lɛ́ kpó yi Asilíi xɔ́sú ɔ nukɔn.”
5 Jexóva lɛ́ ɖɔ nú mì ɖɔ:
6 “Ðó togun élɔ́ gbɛ́ Silowée* sín tɔsisa wlɛ́wlɛ́ lɛ́,
bɔ Hlesíni kpó Hlemalíya ví ɔ kpó wɛ nɔ dó xomɛhunhun n’i wútu ɔ,
7 éɖíe! Jexóva ná fɔ́n Tɔsisa ɔ*
sín sin hlɔ̌nhlɔ́nnɔ tobutóbú lɛ́ dó yě jí,
bo ná fɔ́n axɔ́sú Asilíi tɔn ɔ kpó susu tɔn bǐ kpó dó yě jí.
É ná cyɔ́n tɔzan tɔn lɛ́ bǐ jí,
bo ná ɖí bú agě tɔn lɛ́ bǐ,
8 lobo za nǔ gbɔn Judáa.
É ná cí tɔgbamɛ ɖɔhun, bo ná gba Judáa, lobo ná gbɔn mɛ dín, bo ná fán mɛ dó kɔ;
Emanuwɛ́li* è,
awa towe e vlɔ́n lɛ́ é ná cyɔ́n to towe blěbú!”
9 Gbɛtɔ́ lɛ́ mi, mi gblé wǔ yě, amɔ̌, è ná gba mi hánnyá.
Mi mɛ e gosín fí e lín hú gǎn ɖo ayǐkúngban jí lɛ́ mi, mi bǐ mi ɖótó!
Mi ní sɔ́ ahwannú,* amɔ̌, è ná gba mi hánnyá!
Mi ní sɔ́ ahwannú, amɔ̌, è ná gba mi hánnyá!
10 Mi ní bló tuto ɖé, amɔ̌, è ná hɛn gblé!
Mi ní ɖɔ nǔ e jló mi é, amɔ̌, é ná yi ta ǎ,
ɖó Mawu ɖo kpɔ́ xá mǐ!*
11 Alɔ hlɔ̌nhlɔ́nnɔ Jexóva tɔn ɖo jǐ ce, bɔ é gb’akpá élɔ́ nú mì ɖɔ nyi ní nɔ zɔ nú lěe togun énɛ́ nɔ wa nǔ gbɔn é:
12 “Mi ɖó ná ylɔ́ nǔ e togun ɔ nɔ ylɔ́ ɖɔ gběblá é ɖɔ gběblá ǎ!
Mi ma ɖi xɛsi nú nǔ e yě nɔ ɖi xɛsi ná é ó;
mi ma sísɔ́ ɖó énɛ́ wú ó.
13 Jexóva ahwankpá lɛ́ tɔn wɛ nyí Mɛ e mi ɖó ná kpɔ́n dó mɔ mɛ mímɛ́ é,
é wɛ nyí Mɛ e mi ɖó ná ɖi xɛsi ná é,
é wɛ nyí Mɛ e ɖó ná zɔ́n bɔ mi ná sísɔ́ é.”
14 É ná cí tɛn mímɛ́ ɖé ɖɔhun,
amɔ̌, é ná lɛ́ cí awǐnnya e ná gba nǔ hánnyá é ɖɔhun,
bo ná cí awǐnnya e wú è ná klɛ́n afɔ dó é ɖɔhun
nú xwé Izlayɛ́li tɔn we lɛ́ bǐ,
bo ná cí fɛ́ca kpó mɔ kpó ɖɔhun
nú mɛ e nɔ nɔ Jeluzalɛ́mu lɛ́ é.
15 Gěgé yětɔn ná klɛ́n afɔ, j’ayǐ, bo gba hánnyá;
yě ná jɛ mɔ mɛ, bɔ è ná wlí yě.
16 Mlǎ kúnnuɖenú e è wlán ɖ’ayǐ é,
ɖǒ wuntun sɛ́n* ɔ ɖo ahwanvú ce lɛ́ tɛ́ntin!
17 Un ná kpo ɖo nukún ɖó Jexóva wɛ,* é hwlá nukúnmɛ tɔn dó kúnkan Jakɔ́bu tɔn, un ná ɖo nukún ɖó è wɛ.
18 Éɖíe! Wuntun kpó nǔjíwǔ kpó ɖɔhun wɛ nyɛ kpó vǐ e Jexóva ná mì lɛ́ é kpó cí ɖo Izlayɛ́li, bo gosín Jexóva ahwankpá lɛ́ tɔn e nɔ nɔ Sinyɔ́ɔ só ɔ jí é gɔ́n.
19 Ényí yě ɖɔ nú mi ɖɔ: “Mi kan nǔ byɔ́ bokantɔ́, alǒ amɔɛkantɔ́ ɖěɖěe nɔ dó xɛgbe, bo nɔ dó awɔntínmɛgbe lɛ́ é” ɔ, mi ná wa mɔ̌ wɛ a? Mawu togun ɖé tɔn wɛ togun ɔ ɖó ná kan nǔ byɔ́ ǎ cé? Yě ɖó ná kan nǔ byɔ́ mɛ e kú lɛ́ é dó mɛ e ɖo gbɛ lɛ́ é tamɛ wɛ a? 20 É nyɔ́ wa ɔ, sɛ́n ɔ kpó kúnnuɖenú e è wlán ɖ’ayǐ é kpó wɛ yě ɖó ná kan nǔ byɔ́!
Ényí yě ma ɖɔ xó sɔgbe xá xó énɛ́ ɔ ǎ ɔ, yě ɖó wěziza ɖě ǎ. 21 Yě mɛ ɖokpó ɖokpó ná gbɔn to ɔ mɛ wǔbláwúblá kpó xovɛ́ kpó, bɔ ɖó xovɛ́ ɖo sinsin i wɛ, bɔ akpɔ ɖo ɖǐɖó è wɛ wútu ɔ, é ná dó nu axɔ́sú ɔ kpó Mawu tɔn kpó hwenu e é ná ɖo jǐ kpɔ́n wɛ é. 22 Énɛ́ gúdo ɔ, é ná kpɔ́n ayǐkúngban ɔ jí bo ná mɔ wǔvɛ́ kpó zǐnflú kpó kɛ́ɖɛ́, ablu kpó hwenu vɛ́ wǔ lɛ́ kpó kɛ́ɖɛ́, lobo ná mɔ ablu bɔ wěziza ná hán.