Ezayíi
10 Heelú mɛ e nɔ ɖe gbetakɛ́n e nɔ hɛn nǔ gblé dó mɛ wú lɛ́ é tɔ́n lɛ́ é,
mɛ ɖěɖěe nɔ ɖo sɛ́n e nɔ gbídí kɔ nú mɛ lɛ́ é wlán wɛ magbokɔ lɛ́ é!
2 Yě nɔ wa mɔ̌ dó sú ali dó hwɛ wamamɔnɔ lɛ́ tɔn ɖiɖɔ,
dó tɛ hwɛjijɔ mɛmaɖómɛɖé e ɖo togun ce mɛ lɛ́ é.
Yě nɔ bɛ́ nǔɖókan asúkúsi lɛ́ tɔn,
bo nɔ vɔ tɔ́cyɔvǐ lɛ́!
3 Étɛ́ mi ka ná wa ɖo gbeɖíɖózán* gbe,
hwenu e nǔ e ná sú kún dó nú mi é ná gosín fí línlín wá é?
Mɛ̌ gɔ́n mi ka ná hɔn yi bo ná byɔ́ alɔdó?
Fítɛ́ mi ka ná jó dɔkun* mitɔn dó nyi?
4 Mi sɔ́ ná sixú wa nǔ ɖěbǔ zɛ mi ná jɛ kpo ɖo gantɔ́ lɛ́ tɛ́ntin,
alǒ j’ayǐ ɖo mɛ e è hu lɛ́ é tɛ́ntin wú ǎ.
Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,
bɔ alɔ tɔn kpo ɖo dlɛ̌ndlɛ́n jí, bónú é ná xo yě.
5 “Mi kpɔ́n! Asilíinu ɔ,
é wɛ nyí kpo e ná ɖe xomɛsin ce xlɛ́ é,
ɛɛn, kpo e ɖo alɔ tɔn mɛ, bo ná ɖe xomɛ e sin mì syɛ́nsyɛ́n é xlɛ́ é!
6 Un ná sɛ́ ɛ dó bɔ é ná tɔ́n ahwan togun gǔfɔ́ndómawujítɔ́ ɖé,
é ná tɔ́n ahwan togun e dó xomɛsin ɖaxó nú mì é;
un ná ɖe gbe n’i ɖɔ é ní bɛ́ nǔɖókan tɔn lɛ́, lobo vɔ ɛ,
é ní sɔ́ afɔ dó gbídí yě babá e ɖo toxomɛli lɛ́ jí é ɖɔhun.
7 Amɔ̌, é ná ba ná wa nǔ gbɔn mɔ̌ ǎ,
ayi tɔn ná bló tuto énɛ́ ǎ;
ɖó nǔ e ɖo ayi tɔn mɛ é wɛ nyí ɖɔ é ná sú kún dó nú nǔ mlɛ́mlɛ́,
é ná gba akɔta gěgé, é nyí kpɛɖé ǎ.
8 Ðó é ɖɔ:
‘Axɔ́ví ce lɛ́ bǐ wɛ nyí axɔ́sú ǎ cé?
9 Kaakemíci ɖɔhun jɛ́n Kalúnɔ cí ǎ cé?
Aapádu ɖɔhun jɛ́n Hamáti cí ǎ cé?
Damási ɖɔhun jɛ́n Samalíi cí ǎ cé?
10 Alɔ ce jɛ axɔ́súɖuto e nǔmɛsɛn yětɔn lɛ́ ma nyí nǔɖéwanú ǎ,
bɔ bǒcyɔ kpikpa yětɔn lɛ́ sukpɔ́ hú Jeluzalɛ́mu kpó Samalíi kpó tɔn lɛ́ é wú!
11 Nǔ e un wa nú Samalíi kpó nǔmɛsɛn tɔn e ma nyí nǔɖéwanú ǎ lɛ́ é kpó é,
wɛ un ná lɛ́ wa nú Jeluzalɛ́mu kpó bǒcyɔ tɔn lɛ́ kpó ǎ cé?’
12 “Hwenu e Jexóva ná fó azɔ̌ tɔn bǐ ɖo Sinyɔ́ɔ só ɔ jí, bo ná fó ɖo Jeluzalɛ́mu é ɔ, É* ná dɔn tó nú Asilíi xɔ́sú ɔ ɖó mɛmasí tɔn, goyíyí tɔn kpó nyi wɛ sɔ lě tɔn kpó wú. 13 Ðó é ɖɔ:
‘Un ná wa mɔ̌ kpó alɔ ce sín hlɔ̌nhlɔ́n kpó,
kpó nǔnywɛ́ ce kpó, ɖó un nyɔ́nǔi.
Un ná ɖe dogbó togun lɛ́ tɔn lɛ́ síin,
bo ná vɔ dɔkun yětɔn lɛ́,
lobo ná ɖu ɖo mɛ e ɖo to ɔ mɛ lɛ́ é jí, mɛ hlɔ̌nhlɔ́nnɔ ɖé ɖɔhun.
14 Alɔ ce ná bɛ́ dɔkun togun lɛ́ tɔn lɛ́,
lěe mɛɖé nɔ sɔ́ alɔ dó adɔ̌ mɛ gbɔn é ɖɔhun;
un ná xo ayǐkúngban ɔ blěbú kplé,
mɛ e ɖo azin e è jó dó lɛ́ é xo kplé wɛ é ɖɔhun!
Mɛ ɖěbǔ ná xo awa, alǒ hun nu, alǒ fan ǎ.’”
15 Asyɔ́ ná sɔ́ éɖée dó jǐ dó mɛ e sɔ́ ɛ dó ɖo nǔ sɛ́n ná wɛ é jí wɛ a?
Sá ná sɔ́ éɖée dó jǐ dó mɛ e sɔ́ ɛ dó ɖo nǔ sɛ́n ná wɛ é jí wɛ a?
Kpo sixú dán mɛ e sɔ́ ɛ dó jǐ é wɛ a?
Alǒ, kpo sixú sɔ́ mɛ e hɛn ɛ é dó jǐ wɛ a?
16 Énɛ́ wú ɔ, Aklúnɔ nǔgbó ɔ, Jexóva ahwankpá lɛ́ tɔn,
ná bló bɔ mɛ tɔn* e ɖó hlɔ̌nhlɔ́n lɛ́ é ná xú gǒ,
bo ná flɔ́ myɔ hɛhɛ dó susu tɔn glɔ́.
17 Wěziza Izlayɛ́li tɔn ná húzú myɔ,
bɔ Mɛ mímɛ́ tɔn ná húzú myɔ;
é ná ji, bo ná fyɔ́ gběhan nyanya tɔn lɛ́ kpó wunkan tɔn lɛ́ kpó ɖo azǎn ɖokpó jí.
18 É ná sú zungbó tɔn kpó atínsínsɛ́ngbo tɔn kpó sín susu dó mlɛ́mlɛ́;
é ná cí mɛ e ɖo azɔn jɛ wɛ bo ɖo gǒ xú wɛ é ɖɔhun.
19 Atín nabí e ná kpo ɖo zungbó tɔn mɛ é
ná hwe sɔmɔ̌ bɔ vǐ kpɛví ɖé ná kpé wú bo sɔ́ kɛ́n yětɔn.
20 Azǎn énɛ́ gbe ɔ, Izlayɛ́li sín mɛ e kpo lɛ́ é
kpó kúnkan Jakɔ́bu tɔn sín mɛ e gán lɛ́ é kpó
sɔ́ ná nɔ gán jɛ mɛ e xo yě é wú ɖě ǎ;
amɔ̌, yě ná gán jɛ Jexóva,
Mɛ mímɛ́ Izlayɛ́li tɔn ɔ wú kpó gbejíninɔ kpó.
21 Mɛ kpɛɖé jɛ́n ná lɛ́ kɔ,
ɛɛn, Jakɔ́bu sín mɛ e kpo lɛ́ é, wá Mawu hlɔ̌nhlɔ́nnɔ ɔ gɔ́n.
22 Ðó Izlayɛ́li è, togun towe
sukpɔ́ nyɛ̌kɛ́n e ɖo xutó é ɖɔhun có,
yě mɛ kpɛɖé jɛ́n ná lɛ́ kɔ.
È ko wá gbeta ɔ kɔn bo ná sú kún dó nú yě,
bɔ hwɛjijɔ* ná mì yě.
23 Ɛɛn, kún yětɔn súsú dó sín gbeta e kɔn Aklúnɔ Nǔbǐwúkpétɔ́, Jexóva ahwankpá lɛ́ tɔn wá é,
ná jɛnu ɖo to ɔ bǐ mɛ.
24 Énɛ́ wú ɔ, nǔ e Aklúnɔ Nǔbǐwúkpétɔ́, Jexóva ahwankpá lɛ́ tɔn ɖɔ é ɖíe: “Togun ce e nɔ nɔ Sinyɔ́ɔ é, ma ɖi xɛsi ɖó Asilíinu e sɔ́ kpo dó xo we ná, bo sɔ́ kpo tɔn dó jǐ towe Ejípu ɖɔhun é wú ó. 25 Ðó é kpo kpɛví títí ɖé bɔ xomɛsin syɛ́nsyɛ́n ɔ ná fá; xomɛsin ce ná sú kún dó nú yě. 26 Jexóva ahwankpá lɛ́ tɔn ná ɖó bǎ n’i, lěe é ɖu ɖo Madiyáni jí ɖo awǐnnya Olɛ́bu tɔn kɔn gbɔn é ɖɔhun. Kpo tɔn ná ɖo dlɛ̌ndlɛ́n dó xu ɔ jí, bɔ é ná sɔ́ dó aga lěe é bló gbɔn xá Ejípu é ɖɔhun.
27 Ðo azǎn énɛ́ gbe ɔ, agban tɔn ná gosín abɔ̌ta towe,
bɔ agbanhɛnkpo tɔn ná gosín kɔ towe,
lobɔ è ná wɛ́n agbanhɛnkpo ɔ, ɖó ami ɔ wú.”
28 É wá Ayáti;
é gbɔn Miglɔ́ni dín;
é sɔ́ agban tɔn ɖó Mikumási.
29 Yě gbɔn tɔgbotɛn ɔ;
yě nɔ Geba zǎn ɔ mɛ;
Hlǎma sísɔ́, Gibéya Sawúlu tɔn hɔn.
30 Vǐ nyɔ̌nu Galímu tɔn è, sú xó bo dó cáxóxoóó!
Layíca è, tɛ́ tó!
Anatɔ́ti ɖěmaɖoɖěnánɔ è, sú xó!
31 Madumɛ́na hɔn yi.
Mɛ e nɔ nɔ Gebímu lɛ́ é ba bibɛtɛn.
32 Ðo azǎn énɛ́ gbe ɖokpó ɔ, é ná nɔ te ɖo Nɔbu.
É myɔ́ akpotokwín dó vǐ nyɔ̌nu Sinyɔ́ɔ tɔn sín só ɔ jí,
énɛ́ wɛ nyí Jeluzalɛ́mu só ɔ.
33 Kpɔ́n! Aklúnɔ nǔgbó ɔ, Jexóva ahwankpá lɛ́ tɔn
ɖo ala lɛ́ sɛ́n síin wɛ kpó zǐngídi ɖaxó ɖé kpó;
è ɖo atín ɖaxó ɖaxó lɛ́ gbo zin dɛ́ wɛ,
bɔ ɖěɖěe yi aga lɛ́ é ɔ, è dɔn yě dó do.
34 É zán azɔ̌wanú e è sɔ́ gan dó bló é* dó xo zun e ɖo zungbó ɔ mɛ lɛ́ é,
mɛ hlɔ̌nhlɔ́nnɔ ɖé ná zin atín e ɖo Libáan lɛ́ é dɛ́.