Abudiyási
1 Nǔmimɔ Abudiyási* tɔn:
Nǔ e Aklúnɔ Nǔbǐwúkpétɔ́ Jexóva ɖɔ dó Edɔ́mu wú é ɖíe:
“Mǐ se gbeɖíɖó ɖé sín Jexóva gɔ́n,
é sɛ́ mɛɖé dó akɔta lɛ́ mɛ, bónú é ná ɖɔ:
‘Mi sí te, mi nú mǐ ní sɔ́ nǔ bá fun ahwan xá ɛ.’”*
2 “Ðǒtó! Un bló bɔ a nyí nǔɖéwanú ɖo akɔta lɛ́ mɛ ǎ;
è gbɛ́ wǎn nú we ɖésú.
3 Go e a nɔ yí é flú we,
hwi mɛ e nɔ nɔ bibɛtɛn sókan mɛ tɔn lɛ́,
bo nɔ nɔ só lɛ́ ta é ɔ, a nɔ ɖɔ dó ayi mɛ ɖɔ:
‘Mɛ̌ ka ná dɔn mì sín jǐ wá do?’
4 Ényí a na bo tlɛ bló bɔ nɔtɛn towe yi jǐ* hɔ̌n ɖɔhun,
alǒ a xo adɔ̌ towe nyi sunví lɛ́ tɛ́ntin ɔ,
un ná dɔn we sín dɔ̌n wá do,” wɛ Jexóva ɖɔ.
5 “Ényí ajotɔ́ lɛ́ wá gɔ̌n towe ɔ, ényí mɛvɔtɔ́ lɛ́ wá zǎnmɛ ɔ,
nǔ e jló yě lɛ́ é kɛ́ɖɛ́ wɛ yě ná fin ǎ cé?
Alǒ, ényí vǐwungbɛtɔ́ lɛ́ wɛ ná wá gɔ̌n towe ɔ,
yě ná blɛ́ vǐwun ɖé lɛ́ ǎ cé?
Amɔ̌ hwɛ ɔ, è ná sú kún dó nú we bǐ mlɛ́mlɛ́.*
6 Kpɔ́n lěe è xwe tɛ́ bo ba kúnkan Esáwu tɔn gbɔn é!
Lěe è kíjé dɔkun tɔn e ɖo hwlǎhwlá lɛ́ é sɔ é!
7 Yě nya we káká yi dogbó ɔ kɔn.
Mɛ e kpó hwi kpó nɔ ɖó gbe kpɔ́ lɛ́ é* bǐ flú we.
Mɛ e ɖo fífá mɛ xá we lɛ́ é ɖu ɖo jǐ towe.
Mɛ e nɔ ɖu nǔ xá we lɛ́ é ná ɖó mɔ nú we,
bɔ a ka ná ɖ’ayi wú ǎ.
8 Gbe énɛ́ gbe ɔ,” wɛ Jexóva ɖɔ,
“un ná sú kún dó nú nǔnywɛ́tɔ́ lɛ́ sín Edɔ́mu,
bo ná sú kún dó nú nukúnnúmɔjɛnǔmɛtɔ́ lɛ́ sín sókan mɛ gbéjí Esáwu tɔn.
9 Temáni è, ado ná hu ahwanfuntɔ́ hlɔ̌nhlɔ́nnɔ towe lɛ́,
ɖó è ná sú kún dó nú yě mɛ ɖokpó ɖokpó ɖo sókan mɛ gbéjí Esáwu tɔn ɖo mɛhuhu ɔ hwenu.
10 Ðó adǎka e a xo nɔví towe Jakɔ́bu wú é wútu ɔ,
winnyá ná vun blá we,
bɔ è ná sú kún dó nú we káká sɔ́yi.
11 Gbe e gbe a cí te ma wa nǔɖé,
gbe e gbe jǒnɔ lɛ́ kplá nɔví towe sín ahwankpá yi kannumɔgbénu,
bɔ toɖévomɛnu lɛ́ byɔ́ toxo* tɔn mɛ, bo nyi akɔ dó Jeluzalɛ́mu é ɔ,
hwi lɔ wa nǔ yěɖɔhun.
12 A ɖó ná ɖú ahwannɔwe gbe e gbe awě ná xo nɔví towe é ǎ.
A ɖó ná j’awǎ gbe e gbe togun Judáa tɔn ná dɔn é ǎ.
Bɔ a ɖó ná ɖɔ xó kpó goyíyí kpó gbe e gbe yě ná ɖo wǔvɛ́ mɛ é ǎ.
13 A ɖó ná byɔ́ togun ce sín toxo* mɛ gbe e gbe adǎn ná gbo yě é ǎ.
A ɖó ná ɖú ahwannɔwe gbe e gbe awě ná xo nɔví towe é ǎ.
Bɔ a ɖó ná klá jɛ dɔkun tɔn lɛ́ nu gbe e gbe adǎn ná gbo è é ǎ.
14 A ɖó ná nɔ te ɖo alikpléhɔ̌nkantɛn lɛ́, bo ná hu mɛ tɔn e hɔn lɛ́ é ǎ.
Bɔ a ɖó ná jó mɛ tɔn e gán lɛ́ é nú kɛntɔ́ yětɔn lɛ́ ɖo wǔvɛ́ sín azǎn gbe ǎ.
15 Ðó azǎn e gbe Jexóva ná tɔ́n ahwan akɔta lɛ́ bǐ é ko sɛkpɔ́.
Nǔ e a wa n’i é wɛ è ná wa nú hwi lɔ.
Lěe a wa nǔ xá mɛ ɖěvo lɛ́ gbɔn é wɛ è ná wa xá hwi lɔ gbɔn.*
16 Ðó lěe a nu vɛ̌ɛn ɖo só mímɛ́ ce jí gbɔn é ɔ,
mɔ̌ wɛ akɔta lɛ́ bǐ ná nɔ ɖo xomɛsin ce nu wɛ magbokɔ vɛ̌ɛn ɖɔhun gbɔn é nɛ́.
É ɖo wɛn ɖɔ yě ná nu, bo ná mì gulawun,
bɔ yě ná bú wǎn cí nǔ ɖɔ yě kún nɔ gbɛ kpɔ́n ó ɖɔhun.
17 Amɔ̌, mɛ e xo gló ɖo togun ce mɛ lɛ́ é ná nɔ Sinyɔ́ɔ só jí,
bɔ é ná nyí só mímɛ́,
bɔ kúnkan Jakɔ́bu tɔn ná vɔ́ nǔ e nyí étɔn lɛ́ é yí.
18 Kúnkan Jakɔ́bu tɔn ná cí myɔ ɖɔhun.
Kúnkan Jozɛ́fu tɔn ná cí myɔɖɛ́ ɖɔhun.
Bɔ kúnkan Esáwu tɔn ná cí nǔywɛ́ ɖɔhun.
È ná dó nǔywɛ́ ɔ zo bɔ é ná ji kɔn afín,
bɔ mɛ ɖěbǔ ná gán ɖo kúnkan Esáwu tɔn mɛ ǎ.
Ðó Jexóva ɖésúnɔ wɛ ɖɔ xó.
19 Yě ná yí Nɛgɛ́bu kpó sókan mɛ gbéjí Esáwu tɔn kpó,
gɔ́ nú Ceféla kpó ayǐkúngban Filisitɛ́ɛn lɛ́ tɔn kpó.
Yě ná yí Eflayímu yíkúngban kpó Samalíi yíkúngban kpó,
bɔ Bɛnjamɛ́ɛ ná yí Galádi.
20 Mɛ ɖěɖěe ɖo ahohó énɛ́ mɛ bo ɖo kannumɔgbénu lɛ́ é,
énɛ́ wɛ nyí togun Izlayɛ́li tɔn, ná yí Kanáanu lɛ́ sín ayǐkúngban káká yi Salɛpúta.
Bɔ mɛ e nɔ nɔ Jeluzalɛ́mu, bo ɖo kannumɔgbénu ɖo Sefaládi lɛ́ é ná yí toxo Nɛgɛ́bu tɔn lɛ́.
21 Mɛhwlɛ́ngántɔ́ lɛ́ ná yi Sinyɔ́ɔ só jí,
bo ná ɖɔ hwɛ xá mɛ e nɔ nɔ sókan mɛ gbéjí Esáwu tɔn lɛ́ é,
bɔ axɔ́súɖuto ɔ ná húzú Jexóva tɔn.”