Zakalíi
3 Bɔ é xlɛ́ mì vɔ̌sánúxwlémawutɔ́ ɖaxó Jozuwée, bɔ é ɖo te ɖo wɛnsagun Jexóva tɔn nukɔn, bɔ Satáan ɖo te ɖo aɖisílɔ tɔn xwé, bo ná klán gbe xá ɛ. 2 Énɛ́ gúdo ɔ, wɛnsagun Jexóva tɔn ɖɔ nú Satáan ɖɔ: “Satáan è, Jexóva ní gbɛ́ nǔ nú we, ɛɛn, Jexóva e sɔ́ Jeluzalɛ́mu é ní gbɛ́ nǔ nú we! Nakíkpo e ɖo jiji wɛ, bɔ è lun sín myɔ mɛ é wɛ nú nya énɛ́ ǎ cé?”
3 Awu e kwíji tawun lɛ́ é wɛ Jozuwée ka dó, bo ɖo te ɖo wɛnsagun ɔ nukɔn. 4 Wɛnsagun ɔ ɖɔ nú mɛ ɖěɖěe ɖo te ɖo nukɔn tɔn lɛ́ é ɖɔ: “Mi ɖe awu kwíjikwíji lɛ́ sín kɔ tɔn.” Énɛ́ gúdo ɔ, é ɖɔ n’i ɖɔ: “Kpɔ́n! Un ko súnsún nǔwanyido* towe, bɔ è ná dó awu ɖagbe ɖagbe lɛ́* nú we.”
5 Énɛ́ ɔ, un ɖɔ: “Mi nú è zé tablá mímɛ́ ɖé xwe n’i.” Bɔ yě zé tablá mímɛ́ ɔ xwe n’i, bo dó awu lɛ́ n’i; bɔ wɛnsagun Jexóva tɔn ɖo te ɖo akpá tɔn. 6 Énɛ́ gúdo ɔ, wɛnsagun Jexóva tɔn ɖɔ nú Jozuwée ɖɔ: 7 “Nǔ e Jexóva ahwankpá lɛ́ tɔn ɖɔ é ɖíe: ‘Ényí a nɔ ɖi zɔnlin gbɔn ali ce lɛ́ jí, bo nɔ wa azɔ̌ towe lɛ́ ɖo nukɔn ce ɔ, a ná nyí hwɛɖɔtɔ́ ɖo xwé ce gbe, bo ná nɔ kpé nukún dó kɔ́xota ce lɛ́ wú;* un ná ná gbe we, bɔ a ná nɔ nɔ te ɖo nukɔn ce, mɛ élɔ́ lɛ́ e ɖo te ɖo fí lɛ́ é ɖɔhun.’
8 “‘Vɔ̌sánúxwlémawutɔ́ ɖaxó Jozuwée è, hwi kpó gbɛ̌ towe e jínjɔ́n ayǐ ɖo nukɔn towe lɛ́ é kpó ní kɛnklɛ́n ɖótó, ɖó wuntun ɖé wɛ mi nyí; éɖíe, un ɖo mɛsɛntɔ́ ce e nyí Kun é ɖe xlɛ́ wɛ! 9 Mi kpɔ́n awǐnnya e un zé ɖó Jozuwée nukɔn é! Nukún tɛ́nwe ɖo awǐnnya ɔ jí; bɔ un ɖo nǔɖé wlán dó awǐnnya ɔ jí wɛ,’ wɛ Jexóva ahwankpá lɛ́ tɔn ɖɔ, ‘bɔ un ná ɖe hwɛhuhu ayǐkúngban énɛ́ tɔn síin ɖo kéze ɖokpó mɛ.’
10 “‘Ðo gbe nɛ́ gbe ɔ,’ wɛ Jexóva ahwankpá lɛ́ tɔn ɖɔ, ‘ɖokpó ɖokpó mitɔn ná ylɔ́ nɔzo tɔn wá vǐwuntín tɔn kpó fígitín tɔn kpó sá.’”