Zakalíi
6 Énɛ́ gúdo ɔ, un lɛ́ kpɔ́n aga bo mɔ ahwankɛkɛ́ ɛnɛ, bɔ yě tɔ́n sín só we tɛ́ntin jawě, ganvɔsó wɛ nyí só lɛ́. 2 Ahwankɛkɛ́ nukɔntɔn ɔ, sɔ́ vɔvɔ lɛ́ wɛ ɖo dindɔn wɛ, bɔ ahwankɛkɛ́ wegɔ́ ɔ, sɔ́ wiwi lɛ́ wɛ ɖo dindɔn wɛ. 3 Ahwankɛkɛ́ atɔngɔ́ ɔ, sɔ́ wěwé lɛ́ wɛ ɖo dindɔn wɛ, bɔ ahwankɛkɛ́ ɛnɛgɔ́ ɔ, sɔ́ wlanwlan lɛ́ kpó éé ɖó sinmɛ tɛnmɛ tɛnmɛ lɛ́ é kpó wɛ ɖo dindɔn wɛ.
4 Un kanbyɔ́ wɛnsagun e ɖo xó ɖɔ xá mì wɛ é ɖɔ: “Ahwankɛkɛ́ tɛ́ ka nyí énɛ́ lɛ́, aklúnɔ ce?”
5 Wɛnsagun ɔ yí gbe nú mì ɖɔ: “Jǐxwé sín gbigbɔ ɛnɛ e tɔ́n hwenu e yě ko sɔ́ yěɖée xlɛ́ Aklúnɔ ayǐkúngban ɔ bǐ tɔn gúdo lɛ́ é wɛ. 6 Ahwankɛkɛ́ e sɔ́ wiwi lɛ́ dɔn é tɔ́n, bo ɖidó to totaligbé tɔn mɛ; sɔ́ wěwé lɛ́ tɔ́n bo ɖidó xu ɔ gúdo, bɔ sɔ́ wlanwlan lɛ́ tɔ́n bo ɖidó to tofɔligbé tɔn mɛ. 7 Lobɔ sɔ́ e ɖó sinmɛ tɛnmɛ tɛnmɛ lɛ́ é ɔ, akpakpa ɖo yě sɔ́ wɛ bónú yě ná tɔ́n bo gbɔn ayǐkúngban ɔ jí.” Énɛ́ gúdo ɔ, é ɖɔ: “Mi yi, bo gbɔn ayǐkúngban ɔ jí.” Bɔ yě jɛ ayǐkúngban ɔ jí gbɔn jí.
8 Énɛ́ gúdo ɔ, é sú xó ylɔ́ mì, bo ɖɔ: “Kpɔ́n, sɔ́ ɖěɖěe tɔ́n bo ɖidó to totaligbé tɔn mɛ lɛ́ é xo hwihwɛ́ gbigbɔ Jexóva tɔn ɖo to totaligbé tɔn ɔ mɛ.”
9 Jexóva lɛ́ ɖɔ xó nú mì, bo ɖɔ: 10 “Yǐ nǔ e Hɛludáyi, Tobíya kpó Yedáya kpó hɛn sín mɛ e ɖo kannumɔgbénu lɛ́ é gɔ́n lɛ́ é; bɔ gbe nɛ́ gbe ɖokpó ɔ, a ɖó ná yi Joziyási vǐ súnnu Sofoníi tɔn sín xwégbe, hwi kpó yě mɛ énɛ́ lɛ́ e gosín Babilɔ́nu lɛ́ é kpó. 11 A ɖó ná sɔ́ kpatágan kpó siká kpó dó bló gǎngbákún ɖokpó,* bo xwe nú vɔ̌sánúxwlémawutɔ́ ɖaxó Jozuwée Yexosadáki ví ɔ. 12 Bo ɖɔ n’i ɖɔ:
“‘Nǔ e Jexóva ahwankpá lɛ́ tɔn ɖɔ é ɖíe: “Nya e è nɔ ylɔ́ ɖɔ Kun é ɖíe. É ná tɔ́n kun sín nɔtɛn éɖésúnɔ tɔn, bo ná gbá sinsɛnxɔ Jexóva tɔn. 13 É wɛ nyí mɛ e ná gbá sinsɛnxɔ Jexóva tɔn é, bo lɛ́ nyí mɛ e ná mɔ susu yí é. É ná jínjɔ́n axɔ́súzinkpo tɔn jí bo ná kpa acɛ; é ná lɛ́ nyí vɔ̌sánúxwlémawutɔ́ ɖo axɔ́súzinkpo tɔn jí, bɔ nǔwaɖókpɔ́ ná tíin ɖo we lɛ́* tɛ́ntin.* 14 Gǎngbákún ɔ* ná nɔ sinsɛnxɔ Jexóva tɔn mɛ, bɔ è ná nɔ dó flín Helɛ́mu, Tobíya, Yedáya kpó Hɛni vǐ súnnu Sofoníi tɔn ɔ kpó ná. 15 Bɔ mɛ ɖěɖěe ɖo fí línlín tawun lɛ́ é ná wá bo ná ɖ’alɔ ɖo sinsɛnxɔ Jexóva tɔn gbígbá mɛ.” Énɛ́ ɔ, mi ná wá tuun ɖɔ Jexóva ahwankpá lɛ́ tɔn wɛ sɛ́ mì dó mi gɔ́n. Ényí mi ma gɔn tó ɖó Jexóva Mawu mitɔn sín gbe ǎ ɔ, nǔ ná nyí mɔ̌.’”