Zakalíi
13 “Ðo azǎn énɛ́ gbe ɔ, è ná kun dotɔ ɖé dó kúnkan Davídi tɔn kpó mɛ e nɔ nɔ Jeluzalɛ́mu lɛ́ é kpó tamɛ, bo ná dó slá wǔ nú yě sín hwɛhuhu kpó nǔ blíblí kpó sí.
2 “Ðo azǎn énɛ́ gbe ɔ,” wɛ Jexóva ahwankpá lɛ́ tɔn ɖɔ, “un ná súnsún bǒcyɔ lɛ́ sín nyǐkɔ lɛ́ síin, bɔ è sɔ́ ná flín yě ɖě ǎ. Un ná ɖe gbeyíɖɔ lɛ́ kpó gbigbɔ nǔblíblíwiwa tɔn kpó sín to ɔ mɛ. 3 Ényí mɛɖé ná lɛ́ wa gbeyíɖɔzɔ́ ɔ, tɔ́ e ji i é kpó nɔ e ji i é kpó ná ɖɔ n’i ɖɔ: ‘A ná nɔ gbɛ ǎ, ɖó a ɖó adingban ɖo Jexóva nyíkɔ mɛ.’ Tɔ́ e ji i é kpó nɔ e ji i é kpó ná sɔ́ nǔ i ɖó gbeyíɖɔzɔ́ e é wa é wú.
4 “Ðo azǎn énɛ́ gbe ɔ, winnyá ná hu gbeyíɖɔ ɖokpó ɖokpó ɖó nǔmimɔ tɔn wú, hwenu e é ná ɖo gbeyíɖɔzɔ́ tɔn wa wɛ é; yě ná dó awu fúnnɔ e gbeyíɖɔ lɛ́ nɔ dó é dó blɛ́ mɛ ǎ. 5 Yě mɛ ɖokpó ɖokpó ná ɖɔ: ‘Un nyí gbeyíɖɔ ɖě ǎ. Gle wɛ un nɔ lɛ, ɖó hwenu e un ɖo wǐnnyáwínnyá mɛ é wɛ nya ɖé xɔ mì.’ 6 Bɔ ényí mɛɖé kanbyɔ́ yě ɖě ɖɔ: ‘Akpa tɛ́ ka nyí énɛ́ lɛ́ bo ɖo abɔ̌ towe lɛ́ mɛ ɔ?,’* é ná ná xósin ɖɔ: ‘Xɔ́ntɔn ce lɛ́* sín xwégbe wɛ è gblé wǔ mì ɖe.’”
7 “Hwǐ è, sí te dó lɛ̌ngbɔ́nyitɔ́ ce jí,
dó nya e nyí hǎgbɛ́ ce é jí,” wɛ Jexóva ahwankpá lɛ́ tɔn ɖɔ.
“Xú nǔ lɛ̌ngbɔ́nyitɔ́ ɔ, bónú lɛ̌ngbɔ́hwan ɔ* ní gba dó;
un ná lílɛ́ alɔ ce, bɔ é ná jɛ ɖěɖěe ma hwɛ́n nǔɖé ǎ lɛ́ é wú.”
8 “Gbɔn to ɔ bǐ mɛ ɔ,” wɛ Jexóva ɖɔ,
“è ná ɖe akpáxwé we ɖo atɔn jí mɛ e ɖo to ɔ mɛ lɛ́ é tɔn síin bɔ yě ná dɔn;*
bɔ è ná jó akpáxwé atɔngɔ́ ɔ dó nyi mɛ.
9 Un ná dɔn akpáxwé atɔngɔ́ ɔ gbɔn myɔ mɛ;
un ná ɖe nǔ kwíji sín yě wú lěe è nɔ ɖe nǔ kwíji sín kpatágan wú gbɔn é ɖɔhun,
bo ná xo zo dó yě lěe è nɔ xo zo dó siká gbɔn é ɖɔhun.
Yě ná ylɔ́ nyǐkɔ ce,
bɔ un ná sɔ nú yě.
Un ná ɖɔ: ‘Togun ce wɛ yě nyí,’
bɔ yě ná ɖɔ: ‘Jexóva wɛ nyí Mawu mǐtɔn.’”