Nɛ̌ Jezu ka Hwlɛn Mǐ Gbɔn?
Xósin e Biblu na é
Jezu hwlɛn gbɛtɔ́ gbejinɔtɔ́ lɛ hwenu e é sɔ́ gbɛ̀ tɔn jó dó xɔ gbɛ̀ nú ye é. (Matie 20:28) Mɔ̌ mɛ ɔ, Biblu ylɔ Jezu ɖɔ “Mɛhwlɛngantɔ́ gbɛ̀ ɔ tɔn.” (1 Jaan 4:14) É lɛ́ ɖɔ: “Éɖokponɔ géé jɛn sixu hwlɛn mɛ gán; ɖó, gbɔn gbɛ̀ ɔ bǐ mɛ ɔ, Mawu sɔ́ na mɛ ɖevo gbɛtɔ́ lɛ ɖò fí ɖebǔ bɔ [mǐ] na mɔ hwlɛngán gbɔn jǐ tɔn ǎ.”—Mɛsɛ́dó 4:12.
Jezu “kú dó gbɛtɔ́” e ɖi nǔ n’i lɛ é bǐ tamɛ. (Eblée lɛ 2:9; Jaan 3:16) Enɛ gudo ɔ, “Mawu ka fɔ́n ɛ sín kú,” bɔ é nyí nùɖíɖó gbigbɔ tɔn ɖé, bo lɛkɔ yì jixwé. (Mɛsɛ́dó 3:15) Ðò dɔ̌n ɔ, Jezu kpéwú bo “na hwlɛn mɛ e gbɔn jǐ tɔn bo sɛkpɔ Mawu lɛ é bǐ gán, bɔ nǔ bǐ na vɔ ɖ’ewu sín dìn kaka sɔyi, ɖó é ɖò gbɛ̀ tɛgbɛ, bo na nɔ savo nú Mawu dó ta yetɔn mɛ.”—Eblée lɛ 7:25.
Etɛwu é ka byɔ ɖɔ Jezu ni savo dó ta mǐtɔn mɛ?
Mǐ bǐ wɛ nyí hwɛhutɔ́. (Hlɔmanu lɛ 3:23) Hwɛhuhu zɔ́n bɔ dogbó ɖé ɖò mǐ kpo Mawu kpo tɛntin, bɔ é nɔ dɔn mǐ yì kú. (Hlɔmanu lɛ 6:23) Amɔ̌, Jezu nyí “ɖɛ̌mɛnu” nú mɛ ɖěɖee ɖi nǔ nú vɔsisa gbɛxɔnumɛ tɔn ɔ lɛ é. (1 Jaan 2:1) É nɔ savo dó ta yetɔn mɛ, bo nɔ byɔ Mawu ɖɔ é ni ɖótó ɖɛ yetɔn lɛ, lobo sɔ́ hwɛ yetɔn lɛ kɛ ye gbɔn kú Jezu tɔn gblamɛ. (Matie 1:21; Hlɔmanu lɛ 8:34) Mawu nɔ yí gbè nú nǔ enɛ lɛ e Jezu nɔ byɔ é ɖó ye sɔgbe xá jlǒ Tɔn wutu. Mawu sɛ́ Jezu dó ayikúngban ɔ jí bonu “é na wá hwlɛn [gbɛtɔ́ lɛ] gán.”—Jaan 3:17.
Nùɖiɖi ɖiɖó nú Jezu kɛɖɛ kpowun wɛ na hwlɛn mǐ gán à?
Eǒ. Nugbǒ wɛ ɖɔ mǐ ɖó na ɖi nǔ nú Jezu cobo mɔ hwlɛngán, amɔ̌, é byɔ nǔ hú mɔ̌. (Mɛsɛ́dó 16:30, 31) Biblu ɖɔ: “Lee agbaza e mɛ [gbigbɔ] ma ɖè ǎ ɔ nyí nǔ kúkú gbɔn ɔ, mɔ̌ ɖokpo ɔ wɛ nùɖiɖi e ma nɔ ɖè éɖée xlɛ́ gbɔn nǔwiwa lɛ mɛ ǎ ɔ nyí nǔ kúkú gbɔn.” (Jaki 2:26) Bo na mɔ hwlɛngán ɔ, mǐ ɖó na:
Kplɔ́n nǔ dó Jezu kpo Tɔ́ tɔn, Jehovah kpo wu.—Jaan 17:3.
Ði nǔ nú ye.—Jaan 12:44; 14:1.
Ðè nùɖiɖi mǐtɔn xlɛ́ gbɔn tónúsíse nú gbeɖiɖe yetɔn lɛ gblamɛ. (Luki 6:46; 1 Jaan 2:17) Jezu kplɔ́n mɛ ɖɔ é kún nyí mɛ e nɔ ylɔ emi ɖɔ “Aklunɔ” lɛ é bǐ wɛ è na hwlɛn gán ó, loɔ, “mɛ e nɔ wà jlǒ Tɔ́ [emitɔn] e ɖò [jixwé] ɔ tɔn lɛ kɛɖɛ wɛ” è na hwlɛn gán.—Matie 7:21.
Kpó ɖò nùɖiɖi mǐtɔn ɖexlɛ́ wɛ, enyi wuvɛ̌ lɛ na bo ɖò finɛ ɔ nɛ. Jezu xlɛ́ enɛ céɖécéɖé hwenu e é ɖɔ xó elɔ lɛ é: “Mɛ e ka na dɛ ɖò ya enɛ lɛ nu kaka yì fó ɔ, è na hwlɛn ɛ gán.”—Matie 24:13.