Wlǐbo nú wǔjɔmɛ e a ɖó bo ɖo Jexóva sɛn wɛ ɖo tɛ́npli gbigbɔ tɔn tɔn mɛ é

1. Étɛ́ ɖɔ wɛ wɛnsagun ɖé ka ɖe? Nɛ̌ nǔ e é ɖɔ é ka kan mǐ gbɔn?

ÉNYÍ é byɔ́ ɖɔ wɛnsagun ɖé ní ɖɔ xó nú we ɔ, a ka ná ɖótó nǔ e ɖɔ nú we gbé é ja é a? Égbé ɔ, wɛnsagun ɖé ɖo xó ɖɔ nú “to bǐ, akɔta bǐ, gbe bǐ kpó togun bǐ kpó” wɛ. Étɛ́ ɖɔ wɛ é ka ɖe? “Mi ní ɖó sísí e gɔ́ngɔ́n é nú Mawu bo kpa susu n’i . . . mi sɛn Mɛ e bló jǐxwé, [kpó] ayǐkúngban . . . kpó é.” (Nǔɖe. 14:6, 7) Jexóva wɛ nyí Mawu nǔgbó ɖokpó e mɛ bǐ ɖó ná sɛn é. Ali bǔnɔ e é hun nú mǐ bɔ mǐ ná sɛn ɛ ɖo tɛ́npli gbigbɔ tɔn tɔn ɖaxó ɔ mɛ é su nukún mǐtɔn mɛ kpɔ́n!

2. Étɛ́ ka nyí tɛ́npli gbigbɔ tɔn Jexóva tɔn? (Lɛ̌ kpɔ́n gbǎví “Nǔ e é ma nyí ǎ é.”)

² Étɛ́ ka nyí tɛ́npli gbigbɔ tɔn ɔ tawun? Fítɛ́ mǐ ka sixú mɔ gǒflɛ́mɛ ɖěɖěe ɖɔ xó dó wǔ tɔn lɛ́ é ɖe? Tɛ́npli gbigbɔ tɔn ɔ nyí xɔ ɖé lě tawun ǎ. Tuto e Jexóva bló, bɔ è ná nɔ sɛn ɛ gbɔn vɔ̌sísá gbɛxɔnúmɛ tɔn Jezu tɔn jí, lěe é ba gbɔn é wɛ. Mɛsɛ́dó Pɔ́lu tínmɛ tuto énɛ́ ɖo wěma e é sɛ́ dó klisánwun Eblée xwe kanweko nukɔntɔn ɔ tɔn e nɔ nɔ Judée lɛ́ é mɛ.b

3-4. Étɛ́ lɛ́ ka ɖo linkpɔ́n ɖó nú Pɔ́lu wɛ dó klisánwun Eblée e ɖo Judée lɛ́ é wú? Nɛ̌ é ka d’alɔ yě gbɔn?

³ Étɛ́wú Pɔ́lu ka wlán wěma tɔn sɛ́dó klisánwun Eblée e ɖo Judée lɛ́ é? É sixú ko nyí ɖó hwɛjijɔ tají we wú. Nukɔntɔn, bo ná dó dó wǔsyɛ́n lanmɛ nú yě. Ðibla nyí yě bǐ wɛ è ji dó sinsɛn Jwifu lɛ́ tɔn mɛ. Mɛ e nyí sinsɛngán yětɔn ɖ’ayǐ lɛ́ é sixú ko nɔ cá yě ko, ɖó klisánwun e yě wá húzú é wú. Étɛ́wú? Ðó klisánwun lɛ́ ɖó tɛ́npli ɖě, bo ná yi mɛ bo yi sɛn Mawu ǎ, yě ɖó vɔ̌sákpe e jí yě ná sá vɔ̌ sɛ́dó Mawu ɖe é ɖě ǎ, mɔ̌ jɛ́n yě ma ka lɛ́ ɖó vɔ̌sánúxwlémawutɔ́ e ná sá vɔ̌ sɛ́dó Mawu dó takún yětɔn mɛ é ɖě ǎ é nɛ́. Énɛ́ sixú dó kpo awa mɛ nú ahwanvú Klísu tɔn lɛ́, bo lɛ́ zɔ́n bɔ nǔɖiɖi yětɔn ná vɔ́ da. (Ebl. 2:1; 3:12, 14) Yě mɛ ɖé lɛ́ tlɛ sixú ba ná lɛ́ kɔ yi sinsɛn Jwifu lɛ́ tɔn e mɛ yě ko nɔ ɖ’ayǐ é.

⁴ Wegɔ́, Pɔ́lu ɖɔ nú klisánwun Eblée lɛ́ ɖɔ yě kún ɖo gǎn dó wɛ, bá mɔ nukúnnú jɛ nǔ yɔ̌yɔ́, alǒ nǔkplɔ́nmɛ gbigbɔ mɛ tɔn e gɔ́ngɔ́n, énɛ́ wɛ nyí “nǔɖuɖu syɛ́nsyɛ́n” e ɖo Xó Mawu tɔn mɛ lɛ́ é mɛ wɛ ó. (Ebl. 5:11-14) É ɖo wɛn ɖɔ, yě mɛ ɖé lɛ́ kpo ɖo títɛ́dó Mɔyízisɛ́n ɔ wú wɛ. Amɔ̌, Pɔ́lu tínmɛ ɖɔ vɔ̌sísá e Sɛ́n ɔ byɔ́ lɛ́ é kún sixú súnsún hwɛ bǐ mlɛ́mlɛ́ ó. Ðó hwɛjijɔ énɛ́ wú ɔ, è “dɔn nǔ gbɔn” Sɛ́n ɔ jí. Énɛ́ wú ɔ, Pɔ́lu flín yě nǔgbó e gɔ́ngɔ́n é ɖé lɛ́. É flín klisánwun hǎtɔ́ tɔn lɛ́ ɖɔ “nukúnɖíɖó e nyɔ́ hú gǎn,” bo jínjɔ́n vɔ̌sísá Jezu tɔn jí é sixú d’alɔ yě nǔgbó nǔgbó, bɔ yě ná ‘sɛkpɔ́ Mawu.’—Ebl. 7:18, 19.

5. Étɛ́ mɛ é ka byɔ́ ɖɔ mǐ ní mɔ nǔ jɛ ɖo wěma Biblu tɔn e nɔ nyí Eblée lɛ́ é mɛ? Aniwú?

⁵ Pɔ́lu tínmɛ nú nɔví tɔn Eblée lɛ́ ɖɔ, lěe yě nɔ sɛn Jexóva gbɔn din é kpɔ́n te tawun hú lěe yě nɔ sɛn ɛ gbɔn ɖ’ayǐ é. Ali e nu Jwifu lɛ́ nɔ sɛn Mawu ɖe sɔgbe xá Sɛ́n ɔ é ɔ, “yɛ nǔ e jawě lɛ́ é tɔn” kpowun wɛ, amɔ̌, “Klísu wɛ nyí nǔjɔnǔ ɔ.” (Koló. 2:17) Yɛ ɔ, xlɛ́ nǔɖé tɔn kpowun wɛ, é nyí nǔ ɔ ɖésú ǎ. Énɛ́ wú ɔ, lěe Jwifu lɛ́ nɔ sɛn Mawu gbɔn ɖ’ayǐ é lɔ ɔ, yɛ nǔjɔnǔ e jawě lɛ́ é tɔn kpowun wɛ é nyí. É byɔ́ ɖɔ mǐ ní mɔ nukúnnú jɛ tuto e Jexóva bló nú mǐ, bónú mǐ ná dó sixú mɔ hwɛsɔ́kɛ, bɔ mɔ̌ mɛ ɔ, é ná yí gbe nú mawusinsɛn mǐtɔn é mɛ. Mi nú mǐ ní jlɛ́ “yɛ” ɔ (lěe Jwifu lɛ́ nɔ sɛn Mawu gbɔn é) dó “nǔjɔnǔ ɔ” (lěe klisánwun lɛ́ nɔ sɛn Mawu gbɔn é), éé è tínmɛ ɖo Eblée lɛ́ mɛ é wú. Ényí mǐ wa mɔ̌ ɔ, mǐ ná kpé wú bo mɔ nukúnnú jɛ tɛ́npli gbigbɔ tɔn ɔ mɛ ganjí, bo ná lɛ́ mɔ nukúnnú jɛ lěe é kan mǐ gbɔn é wú.

GOXƆ Ɔ

6. Nɛ̌ è ka nɔ zán goxɔ ɔ gbɔn?

⁶ Lěe Jwifu lɛ́ nɔ sɛn Mawu gbɔn é. Pɔ́lu sɔ́ xóɖɔɖókpɔ́ tɔn jínjɔ́n goxɔ e Mɔyízi nɔ nukɔn ná, bɔ è bló ɖo 1512 J.H.M tɔn é jí. (Kpɔ́n gbǎví: “Lěe Jwifu lɛ́ nɔ sɛn Mawu gbɔn é: Lěe klisánwun lɛ́ nɔ sɛn Mawu gbɔn é.”) È bló goxɔ ɔ ɖó alɔkpa ɖé bɔ Izlayɛ́li ví lɛ́ ja tɛn sɛ gbé hweɖébǔnu ɔ, yě nɔ sɛ tɛn kpó é kpó. Yě zán goxɔ énɛ́ nú xwe ɖibla yi 500, káká jɛ hwenu e è wá gbá tɛ́npli ɔ ɖó Jeluzalɛ́mu é. (Tín. 25:8, 9; Kɛ́n. 9:22) Fí tají e Izlayɛ́li ví lɛ́ nɔ sɛkpɔ́ Mawu, nɔ xwlé vɔ̌sánú yětɔn lɛ́ ɛ ɖe, lobo nɔ lɛ́ sɛn ɛ ɖe é wɛ “goxɔ ɔ” nyí. (Tín. 29:43-46) É ɖo mɔ̌ có, goxɔ ɔ lɛ́ nɔ te nú nǔ e nyɔ́ hú gǎn, bo ɖo nukɔn jawě nú klisánwun lɛ́ é ɖé.

7. Hwetɛ́nu tɛ́npli gbigbɔ tɔn ɔ ka jɔ?

⁷ Lěe klisánwun lɛ́ nɔ sɛn Mawu gbɔn é. Goxɔ hwexónu tɔn ɔ, “xlɛ̌ nǔ e ɖo jǐxwé lɛ́ é tɔn” wɛ é nyí, bo nɔ dó gesí tɛ́npli ɖaxó gbigbɔ tɔn Jexóva tɔn. Pɔ́lu ɖɔ ɖɔ “nǔ e ɖo jijɛ wɛ ɖo hwe élɔ́ nu din lɛ́ é sín xlɛ̌ wɛ goxɔ énɛ́ nyí.” (Ebl. 8:5; 9:9) Énɛ́ wú ɔ, hwenu e é wlán nǔ sɛ́dó Eblée lɛ́ é ɔ, tɛ́npli gbigbɔ tɔn ɔ ko tíin nɛ́. Xwe 29 H.M. tɔn wɛ è ɖ’ayǐ. Xwe énɛ́ xwe wɛ Jezu bló batɛ́mu; gbigbɔ mímɛ́ sɔ́ ɛ, bɔ é jɛ sinsɛnzɔ́ wa nú Jexóva jí ɖi “vɔ̌sánúxwlémawutɔ́ ɖaxó,” ɖo tɛ́npli gbigbɔ tɔn ɔ mɛ.c— Ebl. 4:14; Mɛ. 10:37, 38.

VƆ̌SÁNÚXWLÉMAWUTƆ́ ÐAXÓ Ɔ

8-9. Sɔgbe xá Eblée lɛ́ 7:23-27 ɔ, vogbingbɔn tají tɛ́ ka ɖo vɔ̌sánúxwlémawutɔ́ ɖaxó e ɖo Izlayɛ́li lɛ́ é kpó Vɔ̌sánúxwlémawutɔ́ ɖaxó Jezu Klísu kpó tɛ́ntin?

⁸ Lěe Jwifu lɛ́ nɔ sɛn Mawu gbɔn é. Vɔ̌sánúxwlémawutɔ́ ɖaxó ɔ nɔ sɔ́ togun ɔ sín afɔ ɖó te ɖo Mawu nukɔn. Hwenu e è ja goxɔ ɔ sɔ́ d’alɔ mɛ nú Jexóva gbé é wɛ è sɔ́ Aalɔ́ɔn, bɔ é nyí vɔ̌sánúxwlémawutɔ́ ɖaxó nukɔntɔn ɔ ɖo Izlayɛ́li. Amɔ̌, lěe Pɔ́lu tínmɛ gbɔn é ɔ, “mɛ gěgé nyí vɔ̌sánúxwlémawutɔ́ ɖě jɛ ɖě gúdo, ɖó kú nɔ zɔ́n bɔ yě nɔ nyí mɔ̌ káká sɔ́yi ǎ.”d (Xa Eblée lɛ́ 7:23-27.) Gɔ́ ná ɔ, ɖó hwɛhutɔ́ wɛ vɔ̌sánúxwlémawutɔ́ ɖaxó énɛ́ lɛ́ nyí wútu ɔ, yě ɖó ná nɔ sá vɔ̌ dó hwɛ yěɖésúnɔ lɛ́ tɔn tamɛ. Vogbingbɔn ɖaxó ɖé ɖo vɔ̌sánúxwlémawutɔ́ ɖaxó Izlayɛ́li tɔn lɛ́ kpó Jezu Klísu e nyí Vɔ̌sánúxwlémawutɔ́ ɖaxó ɔ é kpó tɛ́ntin.

⁹ Lěe klisánwun lɛ́ nɔ sɛn Mawu gbɔn é. Jezu Klísu e nyí Vɔ̌sánúxwlémawutɔ́ ɖaxó mǐtɔn é nɔ wa ‘sinsɛnzɔ́ ɖo goxɔ adodwé ɔ mɛ; Jexóva wɛ gbá goxɔ énɛ́, é nyí gbɛtɔ́ ǎ.’ (Ebl. 8:1, 2) Pɔ́lu tínmɛ ɖɔ “ɖó [Jezu] kpo ɖo gbɛ káká sɔ́yi wútu ɔ, vɔ̌sánúxwlémawutɔ́ ɖěbǔ [kún] ná jɛ tɛn tɔn mɛ [ó].” Pɔ́lu lɛ́ ɖɔ gɔ́ ná ɖɔ Jezu nyí “mɛ mímɛ́, [bo] gbɔn vo nú hwɛhutɔ́ lɛ́,” lé, “é kún byɔ́ ɖɔ é ní sá vɔ̌ ayǐhɔ́ngbe ayǐhɔ́ngbe” dó hwɛ éɖésúnɔ tɔn lɛ́ tamɛ ó, vɔ̌sánúxwlémawutɔ́ ɖaxó e ɖo Izlayɛ́li lɛ́ é tɔn ka nyí mɔ̌ ǎ. Din ɔ, mǐ ní ɖɔ xó dó vogbingbɔn ɖěɖěe ɖo vɔ̌sákpe lɛ́, gɔ́ nú vɔ̌ e Jwifu lɛ́ nɔ sá ɖo mawusinsɛn yětɔn mɛ é kpó lěe klisánwun lɛ́ nɔ sɛn Mawu gbɔn égbé é kpó tɛ́ntin é wú.

VƆ̌SÁKPE LƐ́ KPÓ VƆ̌ E È NƆ SÁ LƐ́ É KPÓ

10. Étɛ́ dó gesí wɛ vɔ̌ ɖěɖěe è nɔ sá ɖo vɔ̌sákpe e è sɔ́ ganvɔ dó bló ná é jí lɛ́ é ka ɖe?

¹⁰ Lěe Jwifu lɛ́ nɔ sɛn Mawu gbɔn é. Vɔ̌sákpe e è zé ganvɔ dó bló ná é ɖokpó ɖo goxɔ ɔ sín kɔ́xota, bɔ jǐ tɔn wɛ è nɔ sɔ́ kanlin lɛ́ dó sá vɔ̌ nú Jexóva ɖe. (Tín. 27:1, 2; 40:29) É ɖo mɔ̌ có, vɔ̌ énɛ́ lɛ́ e è nɔ sá lɛ́ é sixú súnsún togun ɔ sín hwɛ bǐ mlɛ́mlɛ́ ǎ. (Ebl. 10:1-4) Kanlin sín vɔ̌ énɛ́ lɛ́ e è nɔ ɖo sísá wɛ hwɛhwɛ ɖo goxɔ ɔ mɛ é xlɛ́ ɖɔ è ɖó hudó vɔ̌sísá ɖokpó tɔn, bɔ é ná súnsún hwɛ gbɛtɔ́ lɛ́ tɔn lɛ́ bǐ mlɛ́mlɛ́.

11. Vɔ̌sákpe tɛ́ jí Jezu ka sɔ́ éɖée dó sá vɔ̌ ɖe? (Eblée lɛ́ 10:5-7, 10)

¹¹ Lěe klisánwun lɛ́ nɔ sɛn Mawu gbɔn é. Jezu tuun ɖɔ Jexóva sɛ́ émí dó ayǐkúngban jí, bónú émí ná sɔ́ gbɛ émítɔn jó dó xɔ gbɛ nú gbɛtɔ́ lɛ́. (Mat. 20:28) Énɛ́ wú ɔ, ée Jezu bló batɛ́mu é ɔ, é sɔ́ éɖée xwlé Jexóva, bá dó wa jlǒ tɔn. (Jaan 6:38; Ga. 1:4) Vɔ̌sákpe e jí Jezu sɔ́ éɖée xwlé Mawu ɖe é nyí vɔ̌sákpe e gbɛtɔ́ sɔ́ alɔ dó bló é ǎ, loɔ, “jlǒ” Mawu tɔn wɛ é nɔ te ná. Jlǒ Jexóva tɔn wɛ nyí ɖɔ Vǐ tɔn ní sɔ́ gbɛ tɔn maɖóblɔ̌ ɔ dó sá vɔ̌ dó gbɛtɔ́ lɛ́ tamɛ. Jezu sɔ́ gbɛ tɔn dó sá vɔ̌ “azɔn ɖokpó bɔ xó fó” dó súnsún hwɛ mɛ ɖěɖěe ɖi nǔ n’i lɛ́ é bǐ tɔn. (Xa Eblée lɛ́ 10:5-7, 10.) Din ɔ, mǐ ná ɖɔ xó dó nǔ e nǔ ɖěɖěe ɖo goxɔ ɔ xomɛ lɛ́ é nɔ te ná lɛ́ é wú.

TƐN MÍMƐ́ Ɔ KPÓ TƐN MÍMƐ́ BǏ Ɔ KPÓ

12. Mɛ̌ mɛ̌ e ka sixú byɔ́ xɔ e ɖo goxɔ ɔ mɛ lɛ́ é ɖokpó ɖokpó mɛ?

¹² Lěe Jwifu lɛ́ nɔ sɛn Mawu gbɔn é. Ðibla nyí lěe goxɔ ɔ cí ɖo xomɛ é pɛ́pɛ́pɛ́ wɛ tɛ́npli e è wá gbá ɖo Jeluzalɛ́mu lɛ́ é cí. Xɔ we, yě wɛ nyí “Tɛn mímɛ́ ɔ” kpó “Tɛn mímɛ́ bǐ ɔ” kpó, bɔ è sɔ́ xɔmɛgbovɔ ɖokpó dó gbo yě ná. (Ebl. 9:2-5; Tín. 26:31-33) Nǔ élɔ́ lɛ́ wɛ ɖo Tɛn mímɛ́ ɔ mɛ: Zogbɛ́nhɛnnú e è sɔ́ siká dó bló é, vɔ̌sákpe e jí è nɔ dó zǎlínkpɔ́n zo ɖe é kpó távo e jí wɔ̌xúxú e è nɔ xwlé Mawu lɛ́ é nɔ nɔ é kpó. Mɛ ɖěɖěe è kɔn ami dó ta ná, bo sɔ́ yě “vɔ̌sánúxwlémawutɔ́” lɛ́ é kɛ́ɖɛ́ wɛ è ná gbe bɔ yě ná nɔ yi Tɛn mímɛ́ ɔ mɛ, bo ná nɔ wa sinsɛnzɔ́ mímɛ́ yětɔn. (Kɛ́n. 3:3, 7, 10) Akɔjijɛgbá e è sɔ́ siká dó bló, bɔ é ɖe xlɛ́ ɖɔ Jexóva ɖo tɛ́ntin yětɔn é ɖo Tɛn mímɛ́ bǐ ɔ mɛ. (Tín. 25:21, 22) Vɔ̌sánúxwlémawutɔ́ ɖaxó ɔ kɛ́ɖɛ́ wɛ è ná gbe, bɔ é ná nɔ zɛ xɔmɛgbovɔ ɔ wú, bo ná nɔ yi Tɛn mímɛ́ bǐ ɔ mɛ azɔn ɖokpó géé ɖo xwe ɖokpó mɛ, ɖo Hwɛsúnsúnsínkɔnúmɛzán ɖaxó ɔ gbe. (Lev. 16:2, 17) Xwewú xwewú ɔ, é nɔ hɛn hun kanlin lɛ́ tɔn byɔ́ Tɛn mímɛ́ bǐ ɔ mɛ, bo ná dó sá hwɛsúnsúnsínkɔnúmɛvɔ́ dó éɖésúnɔ kpó togun ɔ bǐ kpó tamɛ. Wǎgbɔ tɔn ɔ, Jexóva gbɔn gbigbɔ mímɛ́ tɔn gblamɛ, bo ɖe nǔ e nǔ énɛ́ lɛ́ nyí nǔgbó é xlɛ́.— Ebl. 9:6-8.e

13. Étɛ́ Tɛn mímɛ́ ɔ kpó Tɛn mímɛ́ bǐ ɔ kpó goxɔ ɔ tɔn ka nɔ te ná ɖo lěe klisánwun lɛ́ nɔ sɛn Mawu gbɔn é mɛ?

¹³ Lěe klisánwun lɛ́ nɔ sɛn Mawu gbɔn é. Ahwanvú Klísu tɔn kléwún ɖé jɛ́n gbigbɔ mímɛ́ sɔ́, bɔ yě nɔ ɖu vǐví xɔ́ntɔn bǔnɔ ɖé zunzun xá Jexóva tɔn. Mɛ 144000 énɛ́ lɛ́ ná nyí vɔ̌sánúxwlémawutɔ́ ɖo jǐxwé xá Jezu. (Nǔɖe. 1:6; 14:1) Tɛn mímɛ́ e ɖo goxɔ ɔ mɛ é xlɛ́ ɖɔ yě kpo ɖo ayǐkúngban jí có, è ko sɔ́ yě dó ɖó vǐ gbigbɔ tɔn Mawu tɔn lɛ́. (Hlɔ̌. 8:15-17) Tɛn mímɛ́ bǐ e ɖo goxɔ ɔ mɛ é nɔ te nú jǐxwé, fí e Jexóva ɖésúnɔ nɔ nɔ é. “Xɔmɛgbovɔ” e gbo Tɛn mímɛ́ ɔ kpó Tɛn mímɛ́ bǐ ɔ kpó é nɔ te nú agbaza Jezu tɔn, éé sú ali d’è, bɔ é ma sixú yi jǐxwé bo húzú Vɔ̌sánúxwlémawutɔ́ ɖaxó ɖo tɛ́npli gbigbɔ tɔn ɔ mɛ ǎ é. Hwenu e Jezu zé agbaza tɔn dó sá vɔ̌ dó gbɛtɔ́ lɛ́ tamɛ é ɔ, é hun gbɛ ninɔ ɖo jǐxwé sín ali nú klisánwun e è sɔ́ gbigbɔ dó sɔ́ lɛ́ é bǐ. Yě lɔmɔ̌ ɖó ná jó gbɛtɔ́gbaza yětɔn dó, bá dó mɔ ajɔ yětɔn jǐxwé tɔn ɔ yí. (Ebl. 10:19, 20; 1 Kɔ. 15:50) Ée Jezu fɔ́n sín kú gúdo é ɔ, é byɔ́ Tɛn mímɛ́ bǐ, éé ɖo tɛ́npli gbigbɔ tɔn ɔ mɛ é mɛ; fínɛ́ wɛ klisánwun e gbigbɔ sɔ́ lɛ́ é ná yi gɔ́ n’i ɖe.

14. Sɔgbe xá Eblée lɛ́ 9:12, 24-26 ɔ, étɛ́wú lěe è nɔ sɛn Jexóva gbɔn ɖo tɛ́npli gbigbɔ tɔn tɔn mɛ é ka nyɔ́ hú lěe Izlayɛ́li ví lɛ́ nɔ sɛn ɛ gbɔn é flaflá tɔn?

¹⁴ Jexóva zɔn dó vɔ̌sísá gbɛxɔnúmɛ tɔn Jezu Klísu tɔn kpó vɔ̌sánúxwlémawutɔ́zɔ́ e wa wɛ é ɖé é kpó jí bo bló tuto lěe è ná sɛn ɛ gbɔn, bɔ é ná yí gbe ná é tɔn nyi wɛn; tuto mawusinsɛn tɔn énɛ́ zɛ lěe Jwifu lɛ́ nɔ sɛn Mawu gbɔn ɖ’ayǐ é wú flaflá tɔn. Vɔ̌sánúxwlémawutɔ́ ɖaxó ɔ nɔ byɔ́ Tɛn mímɛ́ bǐ e gbɛtɔ́ sɔ́ alɔ dó bló é mɛ kpó hun kanlin lɛ́ tɔn kpó, amɔ̌, “jǐxwé ɖésú,” éé nyí fí e mɛ́ hú fí lɛ́ bǐ é wɛ Jezu yi, bo yi sɔ́ éɖée xwlé Mawu. Fínɛ́ wɛ é ɖe lě do gbɛ maɖóblɔ̌ tɔn e é sɔ́ jó dó ta mǐtɔn mɛ, “bo ná dó sú kún dó nú hwɛhuhu gbɔn éɖée sísɔ́ dó sá vɔ̌ gblamɛ” é xɔ akwɛ́ sɔ é xlɛ́ ɖe. (Xa Eblée lɛ́ 9:12, 24-26.) Vɔ̌sísá Jezu tɔn sixú súnsún hwɛ mǐtɔn lɛ́ bǐ mlɛ́mlɛ́. Lěe mǐ ná wá mɔ gbɔn é ɔ, ényí nukúnɖíɖó jǐxwé tɔn wɛ mǐ ɖó oo, alǒ ayǐkúngban jí tɔn wɛ mǐ ɖó ɔ, mǐ mɛ bǐ sixú sɛn Jexóva ɖo tɛ́npli gbigbɔ tɔn tɔn mɛ.

KƆ́XOTA LƐ́

15. Mɛ̌ mɛ̌ e ka nɔ wa sinsɛnzɔ́ ɖo kɔ́xota goxɔ ɔ tɔn?

¹⁵ Lěe Jwifu lɛ́ nɔ sɛn Mawu gbɔn é. Kɔ́xota ɖokpó wɛ goxɔ ɔ ɖó, fí ɖé wɛ bo ɖo gblogblo jí, bɔ è mɛ dǒ lɛ́ lɛ̌ dó; fínɛ́ wɛ vɔ̌sánúxwlémawutɔ́ lɛ́ nɔ wa azɔ̌ yětɔn lɛ́ ɖe. Vɔ̌sákpe ɖaxó e è sɔ́ ganvɔ dó bló, bo nɔ dó vɔ̌ zo ɖ’é jí é ɖokpó ɖo kɔ́xota ɔ; zɛ̌n e è zé ganvɔ dó bló, bɔ è nɔ dun sin d’é mɛ é ɖokpó lɔ ɖo fínɛ́, bɔ vɔ̌sánúxwlémawutɔ́ lɛ́ nɔ zán dó slá wǔ nú yěɖée, cóbó nɔ jɛ sinsɛnzɔ́ mímɛ́ yětɔn wú. (Tín. 30:17-20; 40:6-8) Tɛ́npli e è wá gbá ɖo nukɔnmɛ lɛ́ é lɔ ɖó kɔ́xota mɛ bǐ kpaa tɔn, bɔ fínɛ́ wɛ mɛ e ma nyí vɔ̌sánúxwlémawutɔ́ ǎ lɛ́ é nɔ nɔ, bo nɔ sɛn Mawu.

16. Mɛ̌ mɛ̌ e ka nɔ sɛn Mawu ɖo tɛ́npli ɔ sín kɔ́xota lɛ́ ɖokpó ɖokpó?

¹⁶ Lěe klisánwun lɛ́ nɔ sɛn Mawu gbɔn é. Cóbónú klisánwun e gbigbɔ mímɛ́ sɔ́, bɔ yě kpo ɖo ayǐkúngban jí lɛ́ é ná yi jǐxwé, bo yi wa vɔ̌sánúxwlémawutɔ́zɔ́ xá Jezu ɔ, yě ɖó ná to sɛn Jexóva kpó gbejíninɔ kpó ɖo kɔ́xota vɔ̌sánúxwlémawutɔ́ lɛ́ tɔn ayǐkúngban jí tɔn tɛ́npli gbigbɔ tɔn ɔ tɔn hwɛ̌. Zɛ̌n ɖaxó e mɛ è nɔ dun sin dó é nɔ flín nǔ tají ɖé yě, énɛ́ wɛ nyí ɖɔ yě ɖó ná nɔ mǐmɛ́ jí ɖo walɔ kpó gbigbɔ kpó lixo, bɔ nǔ ɖokpó ɔ wɛ é nɔ flín klisánwun lɛ́ bǐ. Bɔ fítɛ́ “ahwan ɖaxó” e ɖo gbejí, bo ɖo gǔdo nú nɔví Klísu tɔn e gbigbɔ sɔ́ lɛ́ é ka ɖo Jexóva sɛn ɖe wɛ? Mɛsɛ́dó Jaan mɔ yě, bɔ yě ‘ɖo te ɖo axɔ́súzinkpo ɔ nukɔn,’ bo “ɖo sinsɛnzɔ́ mímɛ́ wa [nú Mawu] wɛ zǎn kéze ɖo tɛ́npli tɔn mɛ.” Ahwan ɖaxó ɔ ɖo mɔ̌ wa wɛ ɖo ayǐkúngban jí fí, ɖo kɔ́xota mɛ bǐ kpaa tɔn tɛ́npli gbigbɔ tɔn ɔ tɔn. (Nǔɖe. 7:9, 13-15) É su nukún mǐtɔn mɛ tawun ɖɔ Jexóva hun ali bǔnɔ ɖé nú mǐ, bónú mǐ ná sɛn ɛ ɖo tɛ́npli gbigbɔ tɔn tɔn ɖaxó ɔ mɛ!

WǓJƆMƐ E MǏ ÐÓ BO NÁ SƐN JEXÓVA É

17. Nǔ tɛ́ lɛ́ è ka jɔ wǔ mǐ bɔ mǐ sixú ná Jexóva?

¹⁷ Égbé ɔ, klisánwun lɛ́ bǐ wɛ è jɔ wǔ, bɔ yě ná sá vɔ̌ nú Jexóva gbɔn hwenu yětɔn, hlɔ̌nhlɔ́n yětɔn kpó nǔɖókan yětɔn lɛ́ kpó zínzán dó nɔ gǔdo nú nukɔnyiyi Axɔ́súɖuto Mawu tɔn tɔn gblamɛ. Lěe mɛsɛ́dó Pɔ́lu ɖɔ nú klisánwun Eblée lɛ́ gbɔn é ɔ, mǐ sixú “nɔ sá vɔ̌ susu kpikpa tɔn nú Mawu hwebǐnu . . . ; énɛ́ wɛ nyí ɖɔ mǐ ní nɔ sɔ́ nu mǐtɔn dó ɖɔ nyǐkɔ tɔn sín xó ɖo agbawungba.” (Ebl. 13:15) Mǐ sixú xlɛ́ ɖɔ wǔ e Jexóva jɔ mǐ bɔ mǐ nɔ sɛn ɛ é xɔ akwɛ́ nú mǐ, gbɔn nǔ ɖagbe hú gǎn e mǐ ɖó lɛ́ é níná ɛ gblamɛ.

18. Sɔgbe xá Eblée lɛ́ 10:22-25 ɔ, étɛ́ mǐ ma ka ɖó ná dó vɛ̌ ná gbeɖé ǎ? Étɛ́ mǐ ma ka ɖó ná wɔn gbeɖé ǎ?

¹⁸ Xa Eblée lɛ́ 10:22-25. Ée wěma e Pɔ́lu wlán sɛ́dó Eblée lɛ́ é xwe vivɔnu é ɔ, é tɛ ɖɛ̌ akpáxwé mawusinsɛn mǐtɔn tɔn vovo e mǐ ma ɖó ná dó vɛ̌ ná gbeɖé ǎ lɛ́ é jí. Nǔ élɔ́ lɛ́ ɖo nǔ énɛ́ lɛ́ mɛ: Ðɛ xixo sɛ́dó Jexóva, mawuxó ɖiɖɔ, kplé lɛ́ yiyi kpó wǔsyɛ́n dídó lanmɛ nú mǐɖée lɛ́ “hú gǎn, din e [mǐ] mɔ ɖɔ azǎn [Jexóva tɔn] ɖo sisɛkpɔ́ wɛ é” kpó. Ée wěma Nǔɖexlɛ́mɛ tɔn xwe vivɔnu é ɔ, wɛnsagun Jexóva tɔn ɖɔ xó élɔ́ azɔn we: “Sɛn Mawu!” (Nǔɖe. 19:10; 22:9) Mi nú mǐ ní ma wɔn nǔgbó gbigbɔ tɔn e gɔ́ngɔ́n, bo kunkplá tɛ́npli ɖaxó gbigbɔ tɔn Jexóva tɔn é kpó wǔjɔmɛ bǔnɔ e mǐ ɖó, bo ná sɛn Mawu ɖaxó mǐtɔn é kpó gbeɖé ó!