Etɛ Biblu ka Ðɔ Dó Xomɛsin Wu?

Xósin e Biblu na é

Biblu kplɔ́n mɛ ɖɔ xomɛsin syɛnsyɛn nɔ hɛn nǔ gblé dó mɛ e ɖò xomɛ sin wɛ é kpo mɛ e lɛlɛ̌ dó è lɛ é kpo wu. (Nǔnywɛxó 29:22) Nǔgbo wɛ ɖɔ xomɛsin sixu nyɔ́ hweɖelɛnu, amɔ̌, Biblu ɖɔ ɖɔ mɛ ɖěɖee nɔ fɔ́n bo nɔ ɖò ‘ma jɛ’ wɛ lɛ é kún na mɔ hwlɛngán ó. (Galatinu lɛ 5:19-21) Nǔgbododó ɖěɖee sixu d’alɔ mɛɖé b’ɛ na ɖí xwi xá xomɛsin lɛ é ɖò Biblu mɛ.

• Hwebǐnu wɛ xomɛsin ka nyla à?

• Hwetɛnu wɛ xomɛsin ka nyla?

• Nɛ̌ a ka sixu ɖí xwi xá xomɛsin gbɔn?

• Wemafɔ Biblu tɔn ɖěɖee ɖɔ xó dó xomɛsin wu lɛ é

Hwebǐnu wɛ xomɛsin ka nyla à?

Eǒ. Xomɛsin sixu nyɔ́ ɖò ninɔmɛ ɖé lɛ mɛ. Ði kpɔ́ndéwú ɔ, “xomɛ sin” nya gbejinɔtɔ́ Nɛɛmíi “ɖesu,” hwenu e é sè ɖɔ è ɖò tagba dó nú Mawu sɛntɔ́ gbɛ̌ tɔn ɖé lɛ wɛ é.—Nɛɛmíi 5:6.

Hweɖelɛnu ɔ, Mawu nɔ sin xomɛ. Ði kpɔ́ndéwú ɔ, hwenu e togun tɔn hwexónu tɔn gbà akɔ e ye jɛ xá ɛ ɖɔ emi na sɛn éɖokponɔ géé é, bo jɛ vodun sɛn jí é ɔ, ‘Jehovah sin xomɛ’ dó ye. (Hwɛɖɔtɔ́ 2:13, 14) É ɖò mɔ̌ có, xomɛsin wɛ nyí nǔ e Jehovah Mawu nɔ ɖu é ǎ. Hwebǐnu wɛ xomɛsin tɔn nɔ sɔgbe, bɔ é nɔ lɛ́ ɖu ɖ’eji.—Tíntɔ́n 34:6; Ezayíi 48:9.

Hwetɛnu wɛ xomɛsin ka nyla?

Enyi xomɛsin ɖé syɛn, alǒ ma nyɔ́ ǎ hǔn, é nyla nɛ; xomɛ alɔkpa e gbɛtɔ́ hwɛhutɔ́ lɛ nɔ yawǔ sin é nɛ. Ði kpɔ́ndéwú ɔ:

• Kanyɛ́ɛ ‘sin xomɛ ɖesu’ hwenu e Mawu gbɛ́ vɔ̌ e é sá n’i é. Kanyɛ́ɛ jó xomɛsin tɔn dó, b’ɛ syɛn kaka bɔ é hu nɔví tɔn.—Bǐbɛ̌mɛ 4:3-8.

• Gbeyiɖɔ Jonasi “sin xomɛ” hwenu e Mawu kú nǔblawu nú Ninivunu lɛ é. Mawu jla linlin Jonasi tɔn ɖó, bo ɖexlɛ́ ɛ ɖɔ é kún nyí ‘nǔ ɖagbe wà wɛ é ɖè bo ɖò xomɛ sin wɛ ó,’ lé emi ɖó na kú nǔblawu nú hwɛhutɔ́ ɖěɖee lɛkɔ sín hwɛ yetɔn gudo lɛ é.—Jonasi 3:10–4:1, 4, 11.a

Kpɔ́ndéwú enɛ lɛ ɖexlɛ́ ɖɔ nú gbɛtɔ́ hwɛhutɔ́ lɛ ɔ, “mɛ e sin xomɛ ɔ nɔ wà nǔ e sɔgbe ɖò Mawu nukúnmɛ é ǎ.”—Jaki 1:20.

Nɛ̌ a ka sixu ɖí xwi xá xomɛsin gbɔn?

• Tuùn awovínú e ɖò xomɛsin syɛnsyɛn mɛ é. Mɛɖé lɛ sixu lin ɖɔ xomɛsin jijodó nɔ xlɛ́ ɖɔ emi ɖó hlɔnhlɔn. Nǔgbo ka wɛ, mɛ e ma sixu nɔ ɖu ɖò xomɛsin tɔn jí ǎ é ɖó gǎnmaɖó syɛnsyɛn ɖé. “Mɛ e sin xomɛ ɔ, é ma nɔ sixu yì agbɔ̌n jí ǎ ɔ, cí toxo e ahohó tɔn lɛ mu, bɔ é ɖò nuvo ɔ ɖɔhun.” (Nǔnywɛxó 25:28; 29:11) Ðò alɔ ɖevo mɛ ɔ, nú mǐ sɔnǔ nú nǔwukpíkpé ɔ bo nɔ ɖu ɖò xomɛsin mǐtɔn jí ɔ, xíxlɛ́ wɛ mǐ ɖè ɖɔ mǐ ɖó hlɔnhlɔn nǔgbo, bo lɛ́ ɖó nukúnnúmɔjɛnǔmɛ. (Nǔnywɛxó 14:29) Biblu ɖɔ: “Mɛ e nɔ lín cobo nɔ sin xomɛ é kpɔ́n te hú sunnu hlɔnhlɔnnɔ ɖé.”—Nǔnywɛxó 16:32, nwt.

• Ðǐ xwi xá xomɛsin hwɛ̌ cobonu é ni zɔ́n nǔ e a ma jló na wà é wà we. “Jǒ xomɛsin dó, jǒ hunnylanylá dó,” wɛ Ðɛhan 37:8 ɖɔ. É ɖɔ gɔ́ na ɖɔ: “Ma sin xomɛ ó, a táa wà nǔ nyi dò.” Ðǒ ayi wu ɖɔ enyi mǐ sin xomɛ ɔ, mǐ sixu wá gbeta ɔ kɔn bo na jó xomɛsin ɔ dó, bo ma wá “wà nǔ nyi dò” ó. Efɛzinu lɛ 4:26 ɖɔ: “Enyi mi sin xomɛ hǔn, mi cɔ́ miɖée bo ma jɛ hwɛ mɛ ó.”

• Enyi é nyɔ́ bló hǔn, gosin fí e a ɖè é cobonu xomɛ ni sin we. “È bɛ́ jlɛ hǔn, è hun ali nú tagba nɛ,” wɛ Biblu ɖɔ. “È bo yawǔ ɖè afɔ sín mɛ cobonu hun na bɛ́.” (Nǔnywɛxó 17:14) Nǔgbo wɛ ɖɔ nǔnywɛnú wɛ é nyí ɖɔ è ni yawǔ ɖeɖɛ tagba lɛ dó mɛhwenu, amɔ̌, hwi kpo mɛ e kpo tɛntin tagba ɔ ɖè é ɖó na tó fá hwɛ̌ cobo ɖɔ xó dó xó ɔ jí ganji.

• Ðǒ kúnnuɖenú lɛ. “Gbɛtɔ́ e bí é nɔ yawǔ sin xomɛ ǎ,” wɛ Nǔnywɛxó 19:11 ɖɔ. Cobonu mǐ na wá gbeta ɖé kɔn ɔ, nǔnywɛnú wɛ é na nyí ɖɔ mǐ ni tó xò kúnnuɖenú lɛ bǐ kplé hwɛ̌. Enyi mǐ xwè sɔ bo ɖótó xó ɔ sín gǒflɛ́mɛ lɛ bǐ ɔ, mǐ na yawǔ sin xomɛ e ma sɔgbe ǎ é ǎ.—Jaki 1:19.

• Xoɖɛ bo byɔ fífá ayi mɛ tɔn. Ðɛ sixu d’alɔ we bɔ a na mɔ “fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ” é. (Filipunu lɛ 4:7) Ðɛxixo nyí ɖokpo ɖò ali taji e nu mǐ nɔ mɔ gbigbɔ mímɛ́ Mawu tɔn ɖè é mɛ, gbigbɔ mímɛ́ enɛ sixu bló bɔ mǐ na ɖó jijɔ lěhun lɛ: fífá, suúlu kpo mɛɖéejiɖuɖe kpo.—Luki 11:13; Galatinu lɛ 5:22, 23.

• Cyan gbɛ̌ e a na dó lɛ é kpo sɔxwixwe kpo. Mǐ nɔ jló na cí mɛ e mǐ nɔ dó gbɛ̌ xá lɛ é ɖɔhun. (Nǔnywɛxó 13:20; 1 Kɔlɛntinu lɛ 15:33) Enɛ wɛ zɔ́n bɔ Biblu sín hwɛ jɔ, b’ɛ gb’akpá nú mɛ ɖɔ: “Ma zun xɔ́ntɔn xá xomɛsinnɔ ó; ma dó mɛ e aɖi nɔ ɖò ɖiɖó wɛ ɔ sín gbɛ̌ ó.” Aniwu? “É ma nyí mɔ̌ ǎ ɔ, a táa wá cí étɔn ɖɔhun, bo na jɛ kú sín mɔ mɛ.”—Nǔnywɛxó 22:24, 25.