14. Hwetɛnu Jowɛli 3:1, 2 ka jɛnu?

¹⁴ Jowɛli ɖó wɛnɖagbe ɖé bo na dó dìn. Jì na lɛ́ jɛ ɖò tò ɔ mɛ. (Jowɛ. 2:23-26) Enɛ gudo ɔ, ɖò hweɖenu ɖò sɔgudo ɔ, nǔɖuɖu gbigbɔ tɔn gegě na tíìn. Jehovah ɖɔ: “Un na gbà [gbigbɔ] ce kɔn nyi mɛ bǐ jí; vǐ mitɔn lɛ, sunnu kpo nyɔnu kpo na nyí gbeyiɖɔ . . . Un na gbà [gbigbɔ] ce kɔn nyi mɛsɛntɔ́ sunnu kpo nyɔnu kpo ɖesu jí.” (Jowɛ. 3:1, 2) Mawu kɔn gbigbɔ tɔn dó Izlayɛli-ví lɛ jí, hwenu e ye lɛkɔ sín Babilɔnu wá tò yetɔn mɛ tlolo é ǎ. É nyɔ́ wà ɔ, enɛ jɛ ɖò xwè kanweko mɔkpan gudo ɖò Pantekotu xwè 33 H.M. tɔn. Nɛ̌ mǐ ka wà gbɔn bo tuùn?

15. Sɔgbe xá Mɛsɛ́dó 2:16, 17 ɔ, xógbe e gbɔn vo é tɛ Piyɛ́ɛ ka zán hwenu e é ɖè xó sín Jowɛli 3:1 mɛ é? Etɛ enɛ ka xlɛ́?

¹⁵ Gbigbɔ mímɛ́ d’alɔ mɛsɛ́dó Piyɛ́ɛ bɔ é zán xó e ɖò Jowɛli 3:1, 2 mɛ é nú nǔjiwǔ e jɛ ɖò Pantekotu zán enɛ gbè é. Zǎnzǎn gan tɛnnɛ mɛ mɔ̌ wɛ; ɖò ali jiwǔ ɖé nu ɔ, Mawu kɔn gbigbɔ mímɛ́ tɔn dó mɛɖé lɛ jí, bɔ enɛ zɔ́n bɔ ye jɛ “azɔ̌ ɖagbeɖagbe e Mawu wà lɛ é sín xó” ɖɔ jí. (Mɛ. 2:11) Gbigbɔ mímɛ́ d’alɔ Piyɛ́ɛ bɔ é zán xógbe e gbɔn vo kpɛɖé é hwenu e é ɖè xó sín nǔɖɔɖ’ayǐ Jowɛli tɔn mɛ é. A ka ɖ’ayi fí e vogbingbɔn ɔ ɖè é wu à? (Xà Mɛsɛ́dó 2:16, 17.) Xógbe “enɛ ɔ gudo ɔ” wɛ ɖò bǐbɛ̌mɛ fí e Piyɛ́ɛ ɖè xó sín é tɔn có, é ka ɖɔ: “Ðò azǎn gudogudo tɔn lɛ mɛ ɔ,” bo dó dó gesí azǎn gudogudo tɔn akɔta Jwifu lɛ tɔn tɔn; hwenɛnu wɛ Mawu kɔn gbigbɔ mímɛ́ tɔn dó “mɛ bǐ” jí. Enɛ xlɛ́ ɖɔ xwè gegě ko wá yì cobɔ nǔɖɔɖ’ayǐ Jowɛli tɔn wá jɛnu.

16. Ðagbe tɛ lɛ gbigbɔ mímɛ́ Mawu tɔn ka wà nú wɛnɖagbejijlazɔ́ ɔ ɖò xwè kanweko nukɔntɔn ɔ mɛ kpo hwe mǐtɔn nu kpo?

¹⁶ Ðò xwè kanweko nukɔntɔn ɔ mɛ ɔ, Mawu tó kɔn gbigbɔ mímɛ́ dó ye jí cobɔ wɛnɖagbejijlazɔ́ ɔ jɛ kan vlɔ́n jí gbɔn gbɛ̀ ɔ bǐ mɛ. Hwenu e mɛsɛ́dó Pɔlu wlan wema tɔn sɛ́dó Kolosinu lɛ ɖò xwè 61 H.M. tɔn mɔ̌ é ɔ, é sixu ɖɔ ɖɔ è dó wɛnɖagbe ɔ “nǔ e Mawu bló ɖò gbɛ̀ ɔ mɛ lɛ é” bǐ. (Kolo. 1:23) Ðò Pɔlu hwenu ɔ, xógbe “nǔ e Mawu bló ɖò gbɛ̀ ɔ mɛ lɛ é” bǐ ɔ, ɖò gesí dó fí e è tuùn ɖò gbɛ̀ ɔ mɛ hwenɛnu lɛ é wɛ. Kpo alɔdó gbigbɔ mímɛ́ hlɔnhlɔnnɔ Jehovah tɔn tɔn kpo ɔ, wɛnɖagbejijlazɔ́ ɔ gbakpé hugǎn “kaka yì fí e gbɛ̀ ɔ kponu ɖó é” ɖò hwe mǐtɔn nu.—Mɛ. 13:47; kpɔ́n gbǎví “Un Na Gbà [Gbigbɔ] Ce Kɔn Nyi” Mɛsɛntɔ́ Ce lɛ Jí.