Matíe 11:28-30: “Mi wá gɔ̌n ce, . . . bónú ma ná gbɔjɛ mi”

“Mi wá gɔ̌n ce, mi mɛ e nǔ ci kɔ ná, bɔ agban kpinkpɛn ɖo kɔ jí ná lɛ́ é bǐ, bónú má fá kɔ nú mi. Mi sɔ́ agbanhɛnkpo ce ɖó kɔ bo kplɔ́n nǔ ɖo gɔ̌n ce, ɖó mɛfífá wɛ un nyí bo nyí mɛɖéesɔ́hwetɔ́ ɖo ayi mɛ, énɛ́ ɔ, mi ná mɔ kɔ dó sa fún. Ðó agbanhɛnkpo ce vɛ́ hɛn ǎ, bɔ agban ce fúɖá.”—Matíe 11:28-30, Biblu gbɛ yɔ̌yɔ́ ɔ tɔn.

“Mi wá gɔ̌n ce; mi mɛ e agban kpinkpɛn hinhɛn ci kɔ ná lɛ́ é bǐ, bónú má ná gbɔjɛ mi. Mi yí nǔkplɔ́nmɛ ce lɛ́ se, bónú lǐndɔ̌n mitɔn lɛ́ ná vo, ɖó mɛfífá wɛ un nyí, bo nyí xomɛnyɔ́tɔ́. Ðó nǔkplɔ́nmɛ ce lɛ́ vɛ́ wǔ ǎ, su ce lɛ́ ka vɛ́ nyi ǎ.”—Matíe 11:28-30, MAWUXÓWÉMA.

Tínmɛ Matíe 11:28-30 tɔn

Jezu ylɔ́ tóɖóetɔ́ lɛ́ kpó akpakpa sɔ́ mɛ kpó ɖɔ yě ní wá gɔ̌n émítɔn. É ná gǎnjɛwú yě ɖɔ ényí yě kplɔ́n nǔ ɖo émí gɔ́n ɔ, yě ná mɔ kɔ dó sa fún, bo ná lɛ́ mɔ vivo.

“Mi wá gɔ̌n ce, mi mɛ e nǔ ci kɔ ná, bɔ agban kpinkpɛn ɖo kɔ jí ná lɛ́ é bǐ.” Mɛ e Jezu ylɔ́ kpó akpakpa sɔ́ mɛ kpó lɛ́ é ɔ, sɛ́n kpó hwɛndonúwiwa gbɛtɔ́ tɔn kpó e sinsɛngán yětɔn lɛ́ hɛn yě gǎnnugǎnnu ɖɔ yě ní xwedó lɛ́ é nyí “agban kpinkpɛn” ɖo kɔ jí nú yě. (Matíe 23:4; Maki 7:7) Adohu adohu kpó kan xixo, énɛ́ wɛ nyí azɔ̌ syɛ́nsyɛ́n wiwa nú hwenu gěgé cóbó mɔ nǔ ɖu kpó lɔmɔ̌ nyí agban kpinkpɛn bo ɖo kɔ jí nú gěgé mɛ lɛ́ tɔn.

“Má fá kɔ nú mi.” Jezu d’akpá bo ná ná vivo, alǒ gbɔjɛ mɛ ɖěɖěe yí gbe nú ylɔ̌ e é ylɔ́ mɛ kpó xomɛnyínyɔ́ kpó lɛ́ é. Lěe é wa mɔ̌ gbɔn é wɛ nyí ɖɔ é d’alɔ yě bɔ yě mɔ nukúnnú jɛ nǔ e Mawu nɔ ɖó nukún ɖo yě sí nǔgbó nǔgbó é mɛ. (Matíe 7:24, 25) Nǔtuuntuun énɛ́ ɖe yě sín linlin agɔ lɛ́ kpó nǔwalɔ sinsɛn tɔn e nyí agban lɛ́ é kpó kannu. (Jaan 8:31, 32) Nǔkplɔ́nmɛ Jezu tɔn lɛ́ kplɔ́nkplɔ́n bo lɛ́ zán nɔ byɔ́ gǎndídó có, mɔ̌ wiwa ka nɔ fá kɔ nú mɛ.

“Mi sɔ́ agbanhɛnkpo ce ɖó kɔ bo kplɔ́n nǔ ɖo gɔ̌n ce.” Ðo Biblu sín táan mɛ ɔ, hwɛhwɛ wɛ azɔ̌watɔ́ lɛ́ nɔ zán agbanhɛnkpo, énɛ́ wɛ nyí kpo e è nɔ hɛn ɖó abɔ̌ta é ɖé, dó hɛn agban kpinkpɛn lɛ́ ná. Énɛ́ wú ɔ, xókwín “agbanhɛnkpo” ɔ sín tínmɛ wɛ nyí ɖɔ è ɖo mɛ ɖěvo sín acɛ glɔ́, bɔ mɛ ɔ nɔ lɛ́ xlɛ́ ali mɛ. (Levíi ví lɛ́ 26:13; Ezayíi 14:25; Jelemíi 28:4) È sixú lɛ́ tínmɛ nukɛgbe “mi . . . kplɔ́n nǔ ɖo gɔ̌n ce” ɔ gbɔn lě: “Mi . . . húzú ahwanvú (nǔkplɔ́ntɔ́) ce lɛ́.” Hǔn, Jezu ɖo wǔsyɛ́n dó lanmɛ nú tóɖóetɔ́ lɛ́ wɛ ɖɔ yě ní húzú ahwanvú émítɔn lɛ́ gbɔn émí xwixwedó kpó kpɔ́ndéwú émítɔn xwixwedó kpó gblamɛ.—Jaan 13:13-15; 1 Piyɛ́ɛ 2:21.

“Mi ná mɔ kɔ dó sa fún.” Jezu d’akpá ɖɔ émí ná ɖó nǔ tagba lɛ́ bǐ nu afɔjíafɔjí ǎ. É ɖo mɔ̌ có, é d’alɔ tóɖóetɔ́ lɛ́ bɔ yě mɔ gbɔdónúmɛ bo lɛ́ ɖó nukúnɖíɖó. (Matíe 6:25-32; 10:29-31) Mɛ ɖěɖěe húzú ahwanvú tɔn lɛ́, bo yí gbe nú nǔkplɔ́nmɛ tɔn lɛ́ é mɔ ɖɔ mawusinsɛn kún nyí agban ó, é nyɔ́ wá ɔ, mɔ̌ wiwa nɔ zɔ́n bɔ gbɛzán mɛtɔn nɔ jɛmɛ nú mɛ nǔgbó nǔgbó.—1 Jaan 5:3.

“Ðó agbanhɛnkpo ce vɛ́ hɛn ǎ, bɔ agban ce fúɖá.” Jezu gbɔn vo nú sinsɛngán hwetɔnnu tɔn lɛ́, mɛɖéesɔ́hwetɔ́ wɛ n’i bo lɛ́ nyí mɛfífá. (Jaan 7:47-49) É nɔ syɛ́n nukún, alǒ nɔ byɔ́ nǔ ɖo mɛ sí zɛ xwé wú gbeɖé ǎ. É nyɔ́ wa ɔ, é nɔ nyɔ́ xomɛ bo lɛ́ nyɔ́ líyá. É nɔ nɔ jlɛ̌ jí ɖo nǔ e é nɔ ɖó nukún ɖo ahwanvú tɔn lɛ́ sí é linu. (Matíe 7:12; Maki 6:34; Luki 9:11) É lɛ́ xlɛ́ yě lěe yě ná ɖu nǔbláwǔkúnúmɛ Mawu tɔn sín le, bo mɔ kɔ dó sa fún ɖó yě ɖó ayixa mímɛ́ ɖé wútu gbɔn é. (Matíe 5:23, 24; 6:14) Jijɔ ɖaaɖagbe Jezu tɔn lɛ́ dɔn mɛ lɛ́ bɔ yě sɛkpɔ́ ɛ, énɛ́ kɛ́ɖɛ́ ka wɛ ǎ, yě lɛ́ sísɛ́ mɛ lɛ́ bɔ yě yí gbe nú agbanhɛnkpo tɔn e ma vɛ́ hɛn ǎ é, bo húzú ahwanvú tɔn lɛ́.

Nǔ e lɛ́ lɛ̌ dó Matíe 11:28-30 lɛ́ é

Jezu ɖɔ xó e è wlán dó Matíe 11:28-30 mɛ lɛ́ é hwenu e é ɖo wɛnɖagbejíjlázɔ́ ɖaxó ɖé wa wɛ ɖo Galilée ɖo xwe 31 H.M. tɔn é. Mɛsɛ́dó Matíe wɛ nyí wɛnɖagbewlántɔ́ ɖokpó géé e ɖɔ mɛylɔ́ylɔ́ xomɛnyínyɔ́ tɔn Jezu tɔn énɛ́ sín xó é. Ðó Matíe ko nyí tokwɛ́yítɔ́ kpɔ́n bo lɛ́ nyí Jwifu wútu ɔ, é tuun ganjí ɖɔ gěgé mɛ lɛ́ tɔn ɖo wǔvɛ́ mɔ wɛ, é ka nyí takwɛ́ Hlɔ̌ma tɔn kɛ́ɖɛ́ wú wɛ ǎ, loɔ, ɖó tuto nǔɖuɖonǔmɛ tɔn sinsɛn tɔn Jwifu lɛ́ tɔn lɔmɔ̌ wú. Énɛ́ wú ɔ, ée é mɔ bɔ Jezu zán acɛ e Tɔ́ tɔn Jexóvaa ná ɛ é dó ylɔ́ mɛɖéesɔ́hwetɔ́ lɛ́ kpó mɛ e dó ya ná wɛ è ɖe lɛ́ é kpó é ɔ, é ɖo wɛn ɖɔ é dó wǔsyɛ́n lanmɛ n’i.—Matíe 11:25-27.

Wɛn ɖagbe Matíe tɔn tɛ ɖɛ̌ jijɔ ɖaaɖagbe e Jezu ɖe xlɛ́ lɛ́ é jí; é wɛ nyí Mɛsíya e sín akpá è dó é, bo lɛ́ nyí axɔ́sú sɔgúdo tɔn Axɔ́súɖuto Mawu tɔn tɔn.—Matíe 1:20-23; Ezayíi 11:1-5.

Kpɔ́n video kléwún élɔ́ bo ná dó mɔ nǔ tawun tawun e jí wěma Matíe tɔn ɖɔ xó dó lɛ́ é.