Nɔ gǔdo nú alixlɛ́mɛtɔ́ mǐtɔn Jezu

1. Étɛ́ ka nyí jlǒ Jehovah tɔn ɖo égbé?

ÉGBÉ ɔ, jlǒ Mawu tɔn wɛ nyí ɖɔ è ní jlá wɛn ɖagbe Axɔ́súɖuto ɔ tɔn gbɔn ayǐkúngban ɔ bǐ jí. (Mak. 13:10; 1 Tim. 2:3, 4) Azɔ̌ Jehovah tɔn wɛ, bɔ é ɖo tají sɔmɔ̌ bɔ é sɔ́ Vǐɖokpónɔ tɔn ɖ’é nu. Mǐ sixú kán ɖ’é jí ɖɔ, ɖó Jezu wɛ ɖo ali xlɛ́ mǐ wɛ wútu ɔ, è ná wa azɔ̌ wɛn ɖagbe jíjlá tɔn ɔ bǐ mlɛ́mlɛ́ lěe Jehovah ba gbɔn é, cóbɔ vivɔnu ɔ ná wá.—Mat. 24:14.

2. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Jezu ɖo “[deví] gbejínɔtɔ́ ayiɖotenánɔ” ɔ zán dó ɖo nǔɖuɖu gbigbɔ tɔn ná ahwanvú tɔn lɛ́ wɛ. É nɔ lɛ́ gbɔn jǐ tɔn dó bló tuto lěe yě ná wa wɛnɖagbejíjlázɔ́ ɖaxó hú gǎn e è ma ko wa kpɔ́n ǎ é gbɔn é tɔn. Ðo xóta élɔ́ mɛ ɔ, mǐ ná gbéjé lěe nǔ nɔ nyí mɔ̌ gbɔn é kpɔ́n. (Mat. 24:45) Mǐ ná lɛ́ mɔ nǔ e mǐ mɛ ɖokpó ɖokpó sixú wa dó nɔ gǔdo nú Jezu kpó deví gbejínɔtɔ́ ɔ kpó é.

JEZU NƆ KPÉ NUKÚN DÓ WƐNÐAGBEJÍJLÁZƆ́ Ɔ WÚ

3. Acɛ tɛ́ è ka ná Jezu?

³ Jezu ɖo nukún kpé dó wɛnɖagbejíjlázɔ́ ɔ wú wɛ. Étɛ́wú mǐ ka ɖeji ɖɔ nǔ nyí mɔ̌? Jǐxwé yiyi Jezu tɔn kpo kpɛɖé é ɔ, é bló kplé ɖokpó xá ahwanvú tɔn gbejínɔtɔ́ ɖé lɛ́ ɖo Galilée só ɔ jí. É ɖɔ nú yě ɖɔ: “Mawu ná acɛ e ɖo jǐnukúnsin, kpódó éé ɖo ayǐkúngban jí ɔ kpó bǐ mì.” Ð’ayi xó élɔ́ e é ɖɔ bɔ d’é wú tlóló é wú: “Hǔn, mi yi bo kplɔ́n nǔ akɔta lɛ́ bǐ, bónú yě ní húzú ahwanvú ce.” (Mat. 28:18, 19) Énɛ́ xlɛ́ ɖɔ è ko ná acɛ Jezu bɔ é ná kpé nukún dó wɛnɖagbejíjlázɔ́ ɔ wú.

4. Étɛ́wú mǐ ka sixú kán ɖ’é jí ɖɔ Jezu kpo ɖo nukún kpé dó wɛnɖagbejíjlázɔ́ ɔ wú wɛ?

⁴ Jezu ɖɔ ɖɔ è ná wa wɛnɖagbejíjlá kpó nǔ kplɔ́nkplɔ́n mɛ lɛ́ bónú yě ná húzú ahwanvú kpó sín azɔ̌ ɔ gbɔn “akɔta lɛ́ bǐ mɛ,” bɔ émí ná ɖo kpɔ́ xá ahwanvú émítɔn lɛ́ “káká yi jɛ gbe e gbe gbɛ ɔ ná vɔ dó é.” (Mat. 28:20) Xó énɛ́ lɛ́ xlɛ́ céɖécéɖé ɖɔ Jezu ná kpo ɖo nukún kpé dó wɛnɖagbejíjlázɔ́ ɔ wú wɛ káká jɛ hwe mǐtɔn nu.

5. Étɛ́ mǐ ka sixú wa dó d’alɔ bɔ xó e ɖo Ðɛhan 110:3 mɛ lɛ́ é ná jɛnu?

⁵ Jezu ɖi xɛsi ɖɔ azɔ̌watɔ́ lɛ́ kún ná sukpɔ́ ɖo vivɔnu gbɛ ɔ tɔn ó ǎ. É tuun ɖɔ xó élɔ́ lɛ́ e ɖɛhanwlántɔ́ ɔ ɖɔ ɖ’ayǐ lɛ́ é ná jɛ nu: “Togun towe ná zé yěɖée jó kpó jlǒ kpó ɖo ahwangɔnu towe sín azǎn gbe.” (Ðɛh. 110:3, nwt) Ényí a ɖo alɔ ɖó ɖo wɛnɖagbejíjlázɔ́ ɔ mɛ wɛ hǔn, gǔdo nɔ nú Jezu kpó deví gbejínɔtɔ́ ɔ kpó wɛ a ɖe, bo lɛ́ ɖo alɔ dó wɛ bónú nǔɖɔɖayǐ énɛ́ ná jɛnu nɛ́. Azɔ̌ ɔ ɖo nukɔn yi wɛ, amɔ̌, wǔvɛ́ ɖé lɛ́ ka ɖ’é kɔn.

6. Ðɔ wǔvɛ́ e wɛnjlátɔ́ Axɔ́súɖuto ɔ tɔn lɛ́ nɔ mɔ ɖo égbé é ɖokpó.

⁶ Wǔvɛ́ e wɛnjlátɔ́ Axɔ́súɖuto ɔ tɔn lɛ́ nɔ mɔ é ɖokpó wɛ nyí gbeklánxámɛ. Gǔfɔ́ndómawujítɔ́ lɛ́, sinsɛngán lɛ́ kpó toxóɖɔtɔ́ lɛ́ kpó ko kɔn cí gěgé dó azɔ̌ mǐtɔn wú. Ényí hɛ̌nnumɔ mǐtɔn lɛ́, mɛ ɖěvo e mǐ tuun lɛ́ é kpó azɔ̌gbɛ́ mǐtɔn lɛ́ kpó ɖi nǔ nú adingbanxó énɛ́ lɛ́ ɔ, yě sixú dó cɔcɔ nú mǐ ɖɔ mǐ ní ɖó Jehovah sinsɛn kpó wɛn ɖagbe e mǐ nɔ jlá é kpó te. Ðo to ɖé lɛ́ mɛ ɔ, kɛntɔ́ mǐtɔn lɛ́ nɔ dó xɛsi nɔví mǐtɔn lɛ́, nɔ gblɔ́n adǎn nú yě, nɔ wlí yě, lobo tlɛ nɔ dó yě mɛ ɖé lɛ́ gan. Nǔ énɛ́ lɛ́ e yě nɔ wa xá mǐ é nɔ kpácá mǐ ǎ. Jezu ko ɖɔ ɖ’ayǐ ɖɔ: “Mɛ bǐ ná gbɛ́ wǎn nú mi, ɖó nyɛ wú.” (Mat. 24:9) Wǎngbɛ́númɛ alɔkpa énɛ́ lɛ́ e sín wǔvɛ́ se wɛ mǐ ɖe é xlɛ́ ɖɔ mǐ nɔ xwedó kpɔ́ndéwú Jezu tɔn, bɔ nǔ mǐtɔn lɛ́ nyɔ́ Jehovah nukúnmɛ. (Mat. 5:11, 12) Awǒvi wɛ ɖo gǔdo nú gbeklánxámɛ énɛ́. Amɔ̌, Jezu ka ɖó hlɔ̌nhlɔ́n tawun hú Satáan! Alɔ e Jezu nɔ dó mǐ é zɔ́n bɔ mǐ kpo ɖo wɛn ɖagbe ɔ jlá wɛ gbɔn akɔta lɛ́ bǐ mɛ. Mǐ ní gbéjé kúnnuɖenú ɖé lɛ́ kpɔ́n.

7. Kúnnuɖenú tɛ́ mǐ ka ɖó ɖɔ Nǔɖexlɛ́mɛ 14:6, 7 ɖo jijɛnu wɛ?

⁷ Ðó mǐ nyí wɛnɖagbejlátɔ́ Axɔ́súɖuto ɔ tɔn lɛ́ wútu ɔ, mǐ nɔ lɛ́ mɔ wǔvɛ́ ɖěvo, énɛ́ wɛ nyí ɖɔ mɛ gěgé nɔ dó gbe e mǐ ma se ǎ lɛ́ é. Ðo nǔ e Jezu ɖe xlɛ́ mɛsɛ́dó Jaan é mɛ ɔ, é ɖɔ ɖ’ayǐ ɖɔ wɛn ɖagbe ɔ ná xo wǔvɛ́ énɛ́ zlɛ́ ɖo azǎn mǐtɔn gbe. (Xa Nǔɖexlɛ́mɛ 14:6, 7.) Gbɔn nɛ̌ é? Mǐ nɔ tɛ́n kpɔ́n gbɔn alɔkpa lɛ́ bǐ mɛ bo nɔ bló bɔ mɛ gěgé nɔ se wɛn Axɔ́súɖuto ɔ tɔn. Égbé ɔ, ɖó wěma jínjɔ́n Biblu jí mǐtɔn lɛ́ ko ɖo gbe hú gǎn 1000 mɛ ɖo tɛn Ɛntɛnɛ́ti tɔn mǐtɔn jw.org jí wútu ɔ, mɛ ɖěɖěe gbɔn gbɛ ɔ bǐ mɛ lɛ́ é sixú ɖu le tɔn! Hǎgbɛ́ alixlɛ́mɛtɔ́ ɔ ná gbe bónú è ná lílɛ́ wěma Ðu gbɛ víví káká sɔ́yi! ɔ dó gbe 700 jɛjí mɛ; azɔ̌wanú tají énɛ́ wɛ mǐ nɔ zán dó kplɔ́n nǔ mɛ lɛ́ bónú yě ná húzú ahwanvú. Nǔɖuɖu gbigbɔ tɔn ko tíin dó video sín alɔ jí, nú tókúnɔ lɛ́, bo lɛ́ ɖo nukúntɔ́nnɔ lɛ́ sín nǔwlánwlán lɔ jí. Nǔɖɔɖayǐ Biblu tɔn lɛ́ ɖo jijɛnu wɛ ɖo nukún mǐtɔn mɛ. Mɛ ɖěɖěe nɔ “dó gbe vovo” lɛ́ é ɖo “gbe mímɛ́” nǔgbó Biblu tɔn tɔn kplɔ́n wɛ. (Zak. 8:23; Sof. 3:9, nwt) Ali e xlɛ́ Hǎgbɛ́ alixlɛ́mɛtɔ́ ɔ wɛ Jezu Klísu ɖe é wɛ zɔ́n bɔ nǔ dó ɖo mɔ̌ nyí wɛ.

8. Káká jɛ din ɔ, le tɛ́ lɛ́ wɛnɖagbejíjlázɔ́ mǐtɔn ka ko hɛn wá?

⁸ Égbé ɔ, gbɛtɔ́ 8000000 jɛjí ɖo to 240 mɛ wɛ ɖo tutoblónúnǔ Jehovah tɔn mɛ, bɔ ɖo xwe ɖokpó ɖokpó mɛ ɔ, gbɛtɔ́ afatɔ́n mɔ̌kpán wɛ nɔ bló batɛ́mu! Amɔ̌, nǔɖé ɖe bo lɛ́ ɖo tají hú kɛ́n lɛ́, é wɛ nyí jijɔ Klisánwun tɔn lɛ́, ɖo xógbe ɖěvo mɛ ɔ, “gbɛtɔ́ yɔ̌yɔ́ ɔ”; é wɛ ahwanvú yɔ̌yɔ́ lɛ́ ko sɔ́ dó. (Koló. 3:8-10) Yě mɛ gěgé ko jó nǔblíblíwiwa, dǎkaxixo, mɛ ɖiɖe ɖó vo ɖo mɛ mɛ kpó hunjijɛ dó to mɛtɔn jí kpó dó. Nǔɖɔɖayǐ e ɖo Ezayíi 2:4 mɛ é ɖo jijɛnu wɛ; yě sɔ́ ɖo lěe ‘è nɔ fun ahwan gbɔn é kplɔ́n wɛ ǎ.’ Ðó mǐ nɔ dó gǎn bo nɔ sɔ́ gbɛtɔ́ yɔ̌yɔ́ ɔ dó wútu ɔ, mǐ nɔ d’alɔ mɛ ɖěvo lɛ́ bɔ yě nɔ sɛkpɔ́ tutoblónúnǔ Mawu tɔn; mɔ̌ mɛ ɔ, mǐ nɔ ɖe xlɛ́ ɖɔ mǐ ɖo Klísu Jezu e ɖo ali xlɛ́ mǐ wɛ é xwedó wɛ. (Jaan 13:35; 1 Pi. 2:12) Nǔ énɛ́ lɛ́ ɖě nyí kosɔ ǎ. Jezu wɛ ɖo alɔ dó mǐ wɛ.

JEZU SƆ́ DEVÍ ÐOKPÓ

9. Sɔgbe xá Matíe 24:45-47 ɔ, étɛ́ Jezu ka ɖɔ ɖ’ayǐ ɖɔ é ná jɛ ɖo azǎn gǔdo gúdo tɔn lɛ́ mɛ?

⁹ Xa Matíe 24:45-47. Jezu ɖɔ ɖ’ayǐ ɖɔ ɖo azǎn gǔdo gúdo tɔn lɛ́ mɛ ɔ, émí ná sɔ́ “[deví] gbejínɔtɔ́ ayiɖotenánɔ” ɖé b’ɛ ná nɔ ná nǔɖuɖu gbigbɔ tɔn mɛ. Énɛ́ wú ɔ, mǐ ná ɖó nukún ɖɔ deví énɛ́ ná wa azɔ̌ syɛ́nsyɛ́n ɖo azǎn mǐtɔn gbe. Mɔ̌ wɛ é ka nyí nǔgbó. Jezu ɖo gbɛ̌ta mɛ yí ami dó ɖe lɛ́ tɔn kléwún ɖé zán wɛ dó ɖo nǔɖuɖu gbigbɔ tɔn ná togun Mawu tɔn kpó jlǒɖótɔ́ lɛ́ kpó wɛ “dó hwetɔnnu.” Súnnu énɛ́ lɛ́ nɔ mɔ ɖɔ émí nyí gǎn, bo ɖó ná kp’acɛ dó nǔɖiɖi mɛ ɖěvo lɛ́ tɔn jí ǎ. (2 Kɔ. 1:24) É nyɔ́ wa ɔ, yě tuun ɖɔ Jezu Klísu wɛ nyí “gǎn, bo kpa acɛ” nú togun tɔn.—Eza. 55:4.

10. Wěma e ɖo fɔtóo lɛ́ jí lɛ́ é ɖětɛ́ ka sísɛ́ we bɔ a jɛ Jehovah sɛn jí?

¹⁰ Sín 1919 ɔ, deví gbejínɔtɔ́ ɔ ko sɔ́ nǔ nú wěma vovo lɛ́ bɔ yě ko hun ali ɔ nú jlǒɖótɔ́ yɔ̌yɔ́ lɛ́ bɔ yě kplɔ́n nǔgbó e ɖo Xó Mawu tɔn mɛ lɛ́ é azɔn nukɔntɔn ɔ ɖo gbɛzán yětɔn mɛ. Ðo 1921 ɔ, deví ɔ sɔ́ nǔ nú wěma e nɔ nyí La Harpe de Dieu é, bo ná dó d’alɔ jlǒɖótɔ́ lɛ́ bónú yě ná mɔ nǔ jɛ nǔkplɔ́nmɛ dodó Biblu tɔn lɛ́ wú. Hwenu ɖo yiyi wɛ é ɔ, deví ɔ lɛ́ sɔ́ nǔ nú wěma ɖěvo lɛ́. Wěma ɖětɛ́ ka d’alɔ we bɔ a tuun Tɔ́ mǐtɔn jǐxwé tɔn ɔ, lobo lɛ́ yí wǎn n’i? “Que Dieu soit reconnu pour vrai!,” Nugbo he Nọ Planmẹ Sọyi Ogbẹ̀ Mavọmavọ Mẹ, Hiẹ Sọgan Nọgbẹ̀ Kakadoi to Paladisi mẹ to Aigba Ji, Oyọnẹn He Nọ Planmẹ Sọyi Ogbẹ̀ Madopodo Mẹ, Étɛ́ Biblu ka kplɔ́n mɛ tawun?, Étɛ́ Biblu ka sixú kplɔ́n mǐ?, alǒ Ðu gbɛ víví káká sɔ́yi! e nyí wěma mǐtɔn yɔ̌yɔ́ ɔ é wɛ a? È sɔ́ nǔ nú wěma énɛ́ lɛ́ bǐ bónú yě ná d’alɔ mǐ bónú mǐ ná kplɔ́n nǔ mɛ ɖěvo lɛ́ bónú yě ná húzú ahwanvú. Gɔ́ ná ɔ, hwenu e è ɖe wěma énɛ́ lɛ́ ɖokpó ɖokpó tɔ́n é ɔ, nǔ e sín hudó è ɖó é pɛ́ɛ wɛ yě nɔ nyí.

11. Étɛ́wú é ka ɖo tají ɖɔ mǐ mɛ bǐ ní nɔ kplɔ́n nǔ dó Jehovah kpó Xó tɔn Biblu ɔ kpó wú?

¹¹ Ényí jlǒɖótɔ́ yɔ̌yɔ́ lɛ́ kɛ́ɖɛ́ wɛ ɖó hudó nǔɖuɖu gbigbɔ tɔn syɛ́nsyɛ́n tɔn ǎ. Mǐ mɛ bǐ wɛ ɖó hudó tɔn. Mɛsɛ́dó Pɔ́lu wlán ɖɔ: “Nǔɖuɖu syɛ́nsyɛ́n ɔ, mɛxó lɛ́ tɔn wɛ.” Pɔ́lu ɖɔ gɔ́ ná ɖɔ ényí mǐ nɔ zán nǔ e mǐ nɔ kplɔ́n ɖo Biblu mɛ lɛ́ é ɔ, énɛ́ ná d’alɔ mǐ bɔ mǐ ná “tuun nǔ ɖagbe ɖo nǔ nyanya mɛ.” (Ebl. 5:14) É sixú vɛ́ wǔ nú mǐ tawun din bónú mǐ ná se tónú nú nǔgbódodó Jehovah tɔn lɛ́, ɖó mɛ gěgé wɛ nyí nǔblíblíwatɔ́. Amɔ̌, Jezu nɔ mɔ nǔ jɛ wú ɖɔ mǐ kplɔ́n nǔ ɖěɖěe ná d’alɔ mǐ bɔ mǐ ná bló bɔ nǔɖiɖi mǐtɔn ná kpo ɖo dǒ lí wɛ lɛ́ é. Xó Mawu tɔn Biblu ɔ mɛ wɛ nǔkplɔ́nmɛ énɛ́ lɛ́ nɔ gosín. Jezu nɔ xlɛ́ ali deví gbejínɔtɔ́ ɔ, bɔ é nɔ sɔ́ nǔ nú nǔɖuɖu énɛ́ lɛ́ bo nɔ lɛ́ má yě.

12. Nɛ̌ mǐ ka nɔ wlí yɛ̌yi nú nyǐkɔ Mawu tɔn Jezu ɖɔhun gbɔn?

¹² Jezu ɖɔhun ɔ, mǐ nɔ wlí yɛ̌yi e jɛxá é nú nyǐkɔ Mawu tɔn. (Jaan 17:6, 26) Ði kpɔ́ndéwú ɔ, ɖo 1931 ɔ, mǐ jɛ nyǐkɔ e jínjɔ́n Biblu jí é ɖé zán jí; nyǐkɔ énɛ́ wɛ nyí Kúnnuɖetɔ́ Jehovah tɔn. Nyǐkɔ énɛ́ e mǐ ɖó ɖo ta é xlɛ́ lě do nyǐkɔ Mawu tɔn ɖo tají nú mǐ sɔ é, bo lɛ́ xlɛ́ ɖɔ mǐ ba ɖɔ è ní tuun nyǐkɔ Tɔ́ mǐtɔn jǐxwé tɔn ɔ tɔn dó mǐ wú. (Eza. 43:10-12) Gɔ́ ná ɔ, sín octobre xwe énɛ́ tɔn ɔ, nyǐkɔ Mawu tɔn nɔ tɔ́n ɖo akpa Atɔxwɛ tɔn jí. Gbɔn vo nú énɛ́ ɔ, Lẹdogbedevomẹ Aihọn Yọyọ Tọn lɛ́ sɔ́ nyǐkɔ Mawu tɔn ɖó tɛn ɖěɖěe mɛ é ɖó ná nɔ lɛ́ é. Énɛ́ gbɔn vo tawun nú nǔ e klisánwun-nyíjɛtɔ́ lɛ́ wa é; yědɛɛ lɛ́ ɖe nyǐkɔ Mawu tɔn sín Biblu gěgé mɛ.

JEZU BLÓ TUTO LĚE AHWANVÚ TƆN LƐ́ NÁ WA NǓ GBƆN É TƆN

13. Étɛ́ ka zɔ́n bɔ a kú d’é jí ɖɔ Jezu ɖo “[deví] gbejínɔtɔ́ ayiɖotenánɔ” ɔ zán wɛ ɖo égbé? (Jaan 6:68)

¹³ Jezu gbɔn “[deví] gbejínɔtɔ́ ayiɖotenánɔ” ɔ jí, bo ɖó tutoblónúnǔ jí wǔ ɖé ayǐ ɖo ayǐkúngban ɔ jí, bónú é ná jɛ hun dó lěe Mawu ba ɖɔ è ní sɛn émí gbɔn é jí. Nɛ̌ nǔ ka nɔ cí nú we dó tutoblónúnǔ énɛ́ wú? Vlafo lěe nǔ cí nú mɛsɛ́dó Piyɛ́ɛ e kan nǔ élɔ́ byɔ́ Jezu é wɛ é ná ko cí nú hwi lɔ: “Mɛ̌ gɔ́n mǐ ka ná lɛ́ yi? É ma nyí nu towe mɛ wɛ è nɔ se xó e nɔ ná gbɛ mavɔmavɔ mɛ ɔ ɖe ǎ cé?” (Jaan 6:68) Ényí mǐ ma ko mɔ tutoblónúnǔ Jehovah tɔn wɛ ǎ ɔ, fítɛ́ mǐ ka ná ɖe égbé? Gbɔn tutoblónúnǔ ɔ gblamɛ ɔ, Klísu nɔ tɛ́n kpɔ́n bɔ mǐ nɔ mɔ nǔ ɖu ganjí ɖo gbigbɔ lixo. É nɔ lɛ́ kplɔ́n azɔ̌ mǐ bónú mǐ ná wa sinsɛnzɔ́ mǐtɔn ganjí. Gɔ́ ná ɔ, é nɔ lɛ́ d’alɔ mǐ bónú mǐ ná sɔ́ “mɛ yɔ̌yɔ́ ɔ” dó bɔ nǔ mǐtɔn ná nɔ nyɔ́ Jehovah nukúnmɛ.—Efɛ́. 4:24.

14. Ðagbe tɛ́ tutoblónúnǔ Jehovah tɔn e mɛ a ɖe é ka wa nú we ɖo jɛmɛjí Covid-19 hwenu?

¹⁴ Jezu nɔ ɖe wě e nǔnywɛ́ kpé lɛ́ é xá mǐ ɖo hwenu vɛ́ wǔ lɛ́ mɛ. Ðagbe e wěɖexámɛ énɛ́ lɛ́ nɔ wa é jɛ wě hwenu e jɛmɛjí Covid-19 bɛ́ é. Hwenu e mɛ e ɖo gbɛ ɔ mɛ lɛ́ é gěgé ma tuun lěe yě ná wa nǔ gbɔn é ǎ é ɔ, Jezu nɔ tɛ́n kpɔ́n bɔ è nɔ ɖe wě e za wě lɛ́ é xá mǐ bónú mǐ ná dó kpo ɖo ayijayǐ mɛ. È dó wǔsyɛ́n lanmɛ nú mǐ ɖɔ mǐ ní nɔ cyɔ́n nǔ d’awɔntín nu hwenu e mǐ ɖo mɛ gěgé tɛ́ntin é, bo ma ka nɔ lɛ́ sɛkpɔ́ mɛ ɖěvo lɛ́ tútútú ó. È flín nǔ mɛxó agun tɔn lɛ́ ɖɔ yě ní nɔ tɛ́n kpɔ́n bo nɔ mɔ nǔ jɛ lěe mɛ e ɖo agun ɔ mɛ lɛ́ é ɖokpó ɖokpó ɖe gbɔn é wú, lobo tuun nǔ e hudó yě ɖo agbaza kpó gbigbɔ kpó lixo lɛ́ é. (Eza. 32:1, 2) Gbeɖíɖó Hǎgbɛ́ alixlɛ́mɛtɔ́ ɔ tɔn lɛ́ nɔ ɖɔ nǔ ɖěvo e mǐ sixú wa lɛ́ é nú mǐ, lobo nɔ lɛ́ dó wǔsyɛ́n nú mǐ.

15. Wě tɛ́ lɛ́ è ka ɖe xá mǐ dó lěe mǐ ná nɔ bló kplé mǐtɔn lɛ́, bo lɛ́ wa wɛnɖagbejíjlázɔ́ mǐtɔn gbɔn é wú ɖo jɛmɛjí ɔ hwenu? Le tɛ́ lɛ́ énɛ́ ka hɛn wá?

¹⁵ Ðo jɛmɛjí ɔ hwenu ɔ, è lɛ́ ɖe wě e za wě lɛ́ é xá mǐ dó lěe mǐ ná nɔ bló kplé mǐtɔn lɛ́ gbɔn é kpó lěe mǐ ná nɔ wa wɛnɖagbejíjlázɔ́ mǐtɔn gbɔn é kpó wú. É sɔ́ lín ɖěbǔ ǎ bɔ mǐ jɛ kplé klisánwun tɔn lɛ́ kpó kpléɖókpɔ́ lɛ́ kpó bló jí gbɔn kan jí. Gɔ́ ná ɔ, wěma wínwlán sɛ́dó mɛ kpó alǒkan zínzán kpó wɛ wá nyí wlɛnwín tají e mǐ nɔ zán dó ɖɔ mawuxó ná é. Jehovah kɔn nyɔ̌ná dó gǎndídó mǐtɔn lɛ́ jí. Alaxɔ gěgé ɖó gbe ɖɔ kɛ́n wɛnjlátɔ́ lɛ́ tɔn jɛjí tawun. Nǔgbó ɔ, mɛ gěgé ɖu nǔ e dó wǔsyɛ́n lanmɛ nú mɛ lɛ́ é sín vǐví ɖo hwe énɛ́ nu.—Kpɔ́n gbǎví “Jehovah nɔ kɔn nyɔ̌ná dó wɛnɖagbejíjlázɔ́ mǐtɔn jí.”

16. Jiɖe tɛ́ mǐ ka sixú ɖó?

¹⁶ Mɛɖé lɛ́ sixú ko mɔ ɖɔ tutoblónúnǔ ɔ sín ayi ɖo te dín dó jɛmɛjí ɔ wú. Amɔ̌, azɔn mɔ̌kpán wɛ mǐ ko mɔ vaan ɖɔ wě e nǔnywɛ́ kpé lɛ́ é wɛ é nɔ ɖe xá mǐ. (Mat. 11:19) Gɔ́ ná ɔ, ényí mǐ nɔ lin tamɛ dó ali e nu Jezu nɔ xlɛ́ ali togun tɔn kpó wǎnyíyí kpó ɖe é jí ɔ, mǐ nɔ ɖeji ɖɔ gbɛ ná bo wá gbɔn ɖěbǔ ɔ, Jehovah kpó Vǐ vívɛ́ná tɔn kpó ná nɔ kpɔ́ xá mǐ.—Xa Eblée lɛ́ 13:5, 6.

17. Ényí Jezu ɖo ali xlɛ́ we wɛ ɔ, nɛ̌ nǔ ka nɔ cí nú we?

¹⁷ É víví nú mǐ tawun ɖɔ Jezu wɛ ɖo ali xlɛ́ mǐ wɛ! Aca vovo wɛ mǐ ɖó ɖo tutoblónúnǔ mǐtɔn mɛ, bo gosín to vovo mɛ lobo nɔ lɛ́ dó gbe vovo có, nǔ énɛ́ lɛ́ ɖě ka nɔ nyí afɔklɛ́nnú nú mǐ ǎ. Nǔ gěgé wɛ è nɔ sɔ́ Mawuxówéma ɔ dó kplɔ́n mǐ, lobo nɔ lɛ́ kplɔ́n azɔ̌ e sín hudó mǐ ɖó bá wa wɛnɖagbejíjlázɔ́ ɔ é bǐ mǐ. È nɔ kplɔ́n lěe mǐ mɛ ɖokpó ɖokpó ná sɔ́ gbɛtɔ́ yɔ̌yɔ́ ɔ dó bo lɛ́ yí wǎn nú mǐɖée gbɔn é mǐ. Mǐ ɖó hwɛjijɔ e wú mǐ ná gó é gěgé ɖó Jezu wɛ ɖo ali xlɛ́ mǐ wɛ!