Mɛ Atɔnɖòbǔ Wɛ Nyí Mawu À alǒ Mɛ Ðokpo?

MƐ E ɖi nǔ nú nùkplɔnmɛ Atɔnɖòbǔ tɔn lɛ é nɔ ɖɔ ɖɔ mɛ atɔn wɛ ɖò Mawu mɛ: Tɔ́ ɔ, Vǐ ɔ kpo Gbigbɔ Mímɛ́ ɔ kpo. Ye nɔ ɖɔ ɖɔ mɛ atɔn enɛ lɛ bǐ wɛ ɖò zɛ̌nzɛ̌n, nyí nǔbǐwukpétɔ́, bo kún ɖó bìbɛ̌ ó. Enɛ wu ɔ, sɔgbe kpo nùkplɔnmɛ Atɔnɖòbǔ tɔn ɔ kpo ɔ, Tɔ́ ɔ nyí Mawu, Vǐ ɔ nyí Mawu, bɔ Gbigbɔ Mímɛ́ ɔ lɔ nyí Mawu, lobɔ ye bǐ kplé bo nyí Mawu ɖokpo géé.

Mɛ e ɖi nǔ nú Atɔnɖòbǔ lɛ é gègě yí gbè ɖɔ emi kún sixu tinmɛ nùkplɔnmɛ enɛ ó. É ɖò mɔ̌ có, ye sixu nɔ lin ɖɔ nùkplɔnmɛ Biblu tɔn wɛ. Amɔ̌, xókwin “Atɔnɖòbǔ” ɔ ɖò fí ɖebǔ ɖò Biblu ɔ mɛ ǎ. Nùkplɔnmɛ ɖé ka vlɛ́ Atɔnɖòbǔ ɖò Biblu mɛ wɛ à? Bonu mǐ na na xósin nùkanbyɔ enɛ tɔn ɔ, mi nú mǐ ni ba dò nú wemafɔ e mɛ e nɔ jɛ hun dó Atɔnɖòbǔ jí lɛ é nɔ zán hwɛhwɛ é ɖokpo.

‘XÓ Ɔ NYÍ MAWU’

Jaan 1:1 ɖɔ: “Cobonu Mawu na ɖó gbɛ̀ ɔ, [Xó] ɔ ko tíìn; é ko ɖè kpodo Mawu kpo, bo nyí Mawu.” Ðò nukɔn ɖò wemata ɖokpo ɔ mɛ ɔ, mɛsɛ́dó Jaan xlɛ́ céɖécéɖé ɖɔ Jezu wɛ nyí “Xó ɔ.” (Jaan 1:14) É ɖò mɔ̌ có, ɖó è ylɔ Xó ɔ ɖɔ Mawu wutu ɔ, mɛ ɖé lɛ wá gbeta ɔ kɔn ɖɔ Vǐ ɔ kpo Tɔ́ ɔ kpo ɖó na ɖò Mawu ɖokpo ɔ mɛ.

Flín ɖɔ akpáxwé Biblu tɔn enɛ ɔ, Glɛkigbe mɛ wɛ è wlan dó jɛ nukɔn. Enɛ gudo ɔ, lilɛdogbeɖevomɛtɔ́ lɛ lilɛ ɛ dó gbè ɖevo lɛ mɛ. É ɖò mɔ̌ có, lilɛdogbeɖevomɛtɔ́ Biblu tɔn ɖé lɛ zán xógbe ɔ ‘Xó ɔ nyí Mawu’ ǎ. Aniwu? Ðó nukúnnúmɔjɛnǔmɛ e lilɛdogbeɖevomɛtɔ́ enɛ lɛ ɖó dó Glɛkigbe e è zán dó wlan Biblu ɔ na é wu é zɔ́n bɔ ye mɔ ɖɔ è ɖó na lilɛ xógbe ɔ ‘Xó ɔ nyí Mawu’ dó alɔkpa vo. Nɛ̌ ye ka lilɛ xógbe enɛ gbɔn? Kpɔ́ndéwú ɖé lɛ ɖíe: “Logos [Xó] ɔ nyí Mawu jɔmɔ.” (A New Translation of the Bible) “Xó ɔ nyí mawu ɖé.” (The New Testament in an Improved Version) “Xó ɔ ɖè kpo Mawu kpo bo cí éɖɔhun.” (The Translator’s New Testament) Sɔgbe kpo lilɛdogbeɖevomɛ enɛ lɛ kpo ɔ, Xó ɔ nyí Mawu Nǔbǐwukpétɔ́ ɔ ɖesu ǎ.a Ðó Xó ɔ hugǎn nùɖíɖó Jehovah tɔn lɛ bǐ wutu ɔ, è ylɔ ɛ ɖɔ “mawu ɖé.” Xógbe “mawu” e è zán ɖò fí é sín tinmɛ wɛ nyí “nǔwukpétɔ́,” é nyí Nǔbǐwukpétɔ́ ɔ ǎ.

KÚNNUÐENÚ ÐEVO LƐ

Eɖíe mɛ gègě ma ka sè Glɛkigbe e è zán dó wlan Biblu ɔ na é ǎ è, bɔ nɛ̌ ye ka sixu tuùn nǔ e ɖɔ gbé mɛsɛ́dó Jaan ja tawun é gbɔn? Lin tamɛ dó kpɔ́ndéwú elɔ wu: Mɛsi ɖé tín nùɖé mɛ nú wemaxɔmɛvi tɔn lɛ. É wá yá é ɔ, ye ɖó nukúnnúmɔjɛnǔmɛ vovo dó tinmɛ ɔ wu. Nɛ̌ wemaxɔmɛvi enɛ lɛ ka sixu wá gbeta ɖokpo ɔ kɔn gbɔn? Ye sixu lɛ́ kàn nǔ byɔ mɛsi ɔ d’eji. É ɖò gaàn ɖɔ kúnnuɖenú ɖevo e mɛsi ɔ na na ye lɛ é na d’alɔ ye bɔ ye na ɖó mɔ jɛ mɛ ganji. Mɔ̌ ɖokpo ɔ, bonu a na mɔ nukúnnú jɛ Jaan 1:1 mɛ ganji ɔ, a sixu ba dò nú tɛn e mɛ Jezu ɖè é d’eji ɖò Wɛnɖagbe Jaan tɔn mɛ. Kúnnuɖenú ɖevo lɛ mimɔ dó xó enɛ wu na d’alɔ we bɔ a na wá gbeta ɖagbe ɔ kɔn.

Ði kpɔ́ndéwú ɖé ɔ, ɖǒ ayi nǔ e Jaan lɛ́ wlan ɖò wemata 1, wemafɔ 18 mɛ é wu: “Mɛɖebǔ mɔ Mawu [Nǔbǐwukpétɔ́ ɔ] kpɔ́n gbeɖé ǎ.” É ɖò mɔ̌ có, gbɛtɔ́ lɛ ka mɔ Jezu e nyí Vǐ ɔ é kpɔ́n, ɖó Jaan ɖɔ: “Xó ɔ [Jezu] huzu gbɛtɔ́, bo wá nɔ mǐ mɛ . . . bɔ mǐ mɔ susu tɔn.” (Jaan 1:14) Enɛ wu ɔ, nɛ̌ Vǐ ɔ ka sixu nyí akpáxwé Mawu Nǔbǐwukpétɔ́ ɔ tɔn gbɔn? Jaan lɛ́vɔ ɖɔ ɖɔ Xó ɔ ko ɖè “kpodo Mawu kpo.” Enɛ ɔ xlɛ́ mǐ ɖɔ Jezu kún nyí Mawu ó, nǔ e zɔ́n bɔ é ɖè kpo Mawu kpo é nɛ, alǒ mɔ̌ wɛ à cé? Gɔ́ nú enɛ ɔ, lee è wlan gbɔn ɖò Jaan 17:3 mɛ é ɔ, Jezu xlɛ́ céɖécéɖé ɖɔ Tɔ́ emitɔn jixwé tɔn ɔ gbɔn vo nú emi. É ylɔ Tɔ́ tɔn ɖɔ “Mawu nugbǒ ɖokpo e tíìn é.” Ðibla yì vivɔnu Wɛnɖagbe Jaan tɔn tɔn ɔ, Jaan sɛ̀ sìn xwè nú xó enɛ bo ɖɔ: “È wlan elɔ lɛ, bonu mi na ɖi nǔ ɖɔ Jezu wɛ nyí Klisu Mawu-[ví] ɔ.” (Jaan 20:31) Ðǒ ayi wu ɖɔ è kún ylɔ Jezu ɖɔ Mawu ó, amɔ̌, Mawu-ví. Kúnnuɖenú enɛ e gɔ́ na bo ɖò Wɛnɖagbe Jaan tɔn mɛ ɔ xlɛ́ lee è ɖó na mɔ nukúnnú jɛ Jaan 1:1 mɛ gbɔn é. Jezu, Xó ɔ, nyí “mawu ɖé” ɖò ali ɖé nu ɖɔ é ɖò tɛn e yì aga é mɛ, amɔ̌, é nyí ɖokpo ɔ kpo Mawu Nǔbǐwukpétɔ́ ɔ tɔn kpo ǎ.

KÚNNUÐENÚ LƐ KA LIDǑ À?

Lɛ̌vɔ lin tamɛ dó kpɔ́ndéwú mɛsi ɔ kpo wemaxɔmɛvi lɛ kpo tɔn jí. Mǐ ni ɖɔ ɖɔ ee mɛsi ɔ lɛ́ tinmɛ nǔ nú wemaxɔmɛvi lɛ d’eji gudo é ɔ, ye mɛ ɖé lɛ kpó ɖò nǔ xò kpɔ́n wɛ. Etɛ ye ka sixu lɛ́ wà? Ye sixu lɛ́ yì ba tinmɛ dó nǔ ɖokpo ɔ jí ɖò mɛsi ɖevo gɔ́n. Enyi mɛsi enɛ lɔmɔ̌ na tinmɛ e mɛsi nukɔntɔn ɔ na é ɔ, nǔ e xò kpɔ́n wɛ ye mɛ ɖé lɛ ɖè é na nɔte. Mɔ̌ ɖokpo ɔ, enyi a ma ko ganjɛ nǔ e Biblu-wlantɔ́ Jaan ɖɔ dó kancica e ɖò Jezu kpo Mawu Nǔbǐwukpétɔ́ ɔ kpo tɛntin é wu é ǎ ɔ, a sixu lɛ́vɔ ba mɔ jɛ mɛ gɔ́ na ɖò akpáxwé Biblu tɔn ɖevo mɛ. Ði kpɔ́ndéwú ɖé ɔ, kpɔ́n nǔ e Matie wlan é. É wlan nǔ e Jezu ɖɔ dó gbɛ̀ elɔ sín vivɔ wu é bo ɖɔ: “Mɛɖé tuùn azǎn ɔ ǎ; mɛɖé ka tuùn gan ɔ mɛ ǎ; wɛnsagun Mawu tɔn lɛ tuùn ǎ; nyɛ Mawu-ví ɔ ɖesu tuùn ǎ; Tɔ́ ɔ ɖokponɔ géé wɛ tuùn.” (Matie 24:36) Nɛ̌ xógbe enɛ lɛ ka dó zǒgbe jí ɖɔ Jezu kún nyí Mawu Nǔbǐwukpétɔ́ ɔ ó gbɔn?

Jezu ɖɔ ɖɔ Tɔ́ ɔ tuùn nǔ gègě hú Vǐ ɔ. Enyi Jezu ko nyí akpáxwé Mawu Nǔbǐwukpétɔ́ ɔ tɔn wɛ ɔ, e na ko tuùn nǔ ɖokpo ɔ lɛ Tɔ́ tɔn ɖɔhun. Enɛ wu ɔ, Vǐ ɔ kpo Tɔ́ ɔ kpo sixu ɖò zɛ̌nzɛ̌n ǎ. É ɖò mɔ̌ có, mɛɖé lɛ sixu ɖɔ ɖɔ ‘hwenu e Jezu nyí gbɛtɔ́ ɖò ayikúngban jí fí é wɛ é ɖɔ nǔ enɛ lɛ.’ Amɔ̌, enyi é na bo nyí mɔ̌ ɔ, etɛ ka nyí gbigbɔ mímɛ́ ɔ tɔn? Enyi gbigbɔ mímɛ́ ɔ lɔ nyí akpáxwé Mawu tɔn Tɔ́ ɔ ɖɔhun ɔ, etɛwu Jezu ma ka ɖɔ ɖɔ é tuùn nǔ e Tɔ́ ɔ tuùn é ǎ?

Enyi a kpò ɖò Biblu kplɔ́n wɛ ɔ, a na wá jɛ akɔ xá wemafɔ Biblu tɔn e ɖɔ xó dó xó enɛ wu é gègě. Wemafɔ enɛ lɛ dó zǒgbe jí ɖɔ Mawu kún nyí Atɔnɖòbǔ ó.—Psaume 90:2; Mɛsɛ́dó 7:55; Kolɔsinu lɛ 1:15; Proverbes 8:22.