“Mi Flín Agunnukɔntɔ́ Mitɔn Xóxó E Ðɔ Mawuxó nú Mi lɛ É”

BƐ́SÍN Pantekotu xwè 33 H.M. tɔn ɖidó ɔ, mɛsɛ́dó gbejinɔtɔ́ Aklunɔ Jezu Klisu tɔn lɛ nyí hagbɛ̌ alixlɛ́mɛtɔ́, bo xlɛ́ ali agun Klisanwun tɔn yɔyɔ̌ e è ɖ’ayǐ é. (Mɛ. 6:2-4; Ebl. 13:7) Ðò xwè 49 H.M. tɔn mɔ̌ ɔ, è gbló ada nú hagbɛ̌ alixlɛ́mɛtɔ́ enɛ bɔ mɛ ɖevo lɛ wá gɔ́ nú mɛsɛ́dó Jezu tɔn lɛ. Hwenu e è ɖeɖɛ adagbigboxó ɔ é ɔ, “mɛsɛ́dó lɛ kpodo agunnukɔntɔ́ [Jeluzalɛmu tɔn] lɛ kpan” wɛ ɖò hagbɛ̌ alixlɛ́mɛtɔ́ ɔ mɛ. (Mɛ. 15:1, 2) Azɔ̌ yetɔn wɛ nyí ɖɔ ye na nɔ gbéjé xó e kan Klisanwun lɛ bǐ é kpɔ́n. Ye sɛ́ wema e ye wlan lɛ é kpo gbeta e kɔn ye wá lɛ é kpo dó agun lɛ, bɔ enɛ lɛ bǐ zɔ́n bɔ agun lɛ lidǒ, bɔ ahwanvu lɛ kpó ɖò bǔ ɖò linlin kpo nǔwiwa kpo mɛ. Agun lɛ setónú bo hwíhwɛ́ yeɖée dó hagbɛ̌ alixlɛ́mɛtɔ́ ɔ sín wěɖexámɛ lɛ glɔ́, bɔ wǎgbɔ tɔn ɔ, ye mɔ nyɔna Jehovah tɔn, lobo lɛ́ yì nukɔn.—Mɛ. 8:1, 14, 15; 15:22-31; 16:4, 5; Ebl. 13:17.

² Ðò kú mɛsɛ́dó lɛ tɔn gudo ɔ, gǔfínfɔ́n ɖaxó ɔ wá xwetɔ́n. (2 Tɛ. 2:3-12) Lee Jezu ko ɖɔ gbɔn ɖò lǒ e é dó dó jinukún ɖagbe ɔ kpo gbehan nyanya ɔ kpo wu é mɛ é ɔ, è dó gbehan nyanya ɔ (Klisanwun-Nyijɛtɔ́ lɛ) dó jinukún ɖagbe ɔ (Klisanwun yí ami dó ɖè lɛ) mɛ. Nú xwè kanweko mɔkpan ɔ, è jó gbɛ̌ta we lɛ dó bɔ ye sù ɖó kpɔ́ kaka jɛ nǔkún-yiyahwenu, é wɛ nyí “gbɛvivɔzángbe.” (Mat. 13:24-30, 36-43) Ðò avla enɛ mɛ ɔ, Klisanwun yí ami dó ɖè lɛ ɖokpo ɖokpo kpó ɖò nyɔna Jezu tɔn sín lè ɖu wɛ, amɔ̌, hagbɛ̌ alixlɛ́mɛtɔ́ ɖě ɖè lě, bɔ Jezu zán dó xlɛ́ ali ahwanvu tɔn lɛ ɖò ayikúngban jí ǎ. (Mat. 28:20) É ɖò mɔ̌ có, é ɖɔ ɖ’ayǐ ɖɔ huzuhuzu ɖé na wá tíìn ɖò nǔkún-yiyahwenu.

³ “Má ɖɔ mɛ e [deví] gbejinɔtɔ́, ayiɖotenanɔ ɖi ɔ nú mi.” Gbɔn xógbe enɛ lɛ gblamɛ ɔ, Jezu hun nǔ sín nǔjlɛdonǔwu ɖé nu, b’ɛ nyí akpáxwé nǔ e na ‘ɖexlɛ́’ ɖɔ “gbɛ̀ elɔ na vɔ” é tɔn ɖé. (Mat. 24:3, 42-47) Jezu ɖexlɛ́ ɖɔ nǔɖuɖu gbigbɔ tɔn nina togun Mawu tɔn “dó hwetɔnnu” na mya nukún nú deví gbejinɔtɔ́ enɛ. Lee Jezu zán gbɛ̌ta sunnu ɖé lɛ tɔn dó xlɛ́ ali agun ɔ ɖò xwè kanweko nukɔntɔn ɔ mɛ, b’ɛ ma nyí mɛ ɖokpo géé wɛ é zán ǎ gbɔn é ɔ, deví gbejinɔtɔ́ e zán wɛ Jezu ɖè ɖò azǎn gudogudo tɔn elɔ lɛ mɛ é nyí mɛ ɖokpo géé ǎ.

‘DEVÍ GBEJINƆTƆ́ AYIÐOTENANƆ Ɔ’ TUÙNTUÙN

⁴ Mɛ̌ Jezu ka ɖè b’ɛ na na nǔɖuɖu ahwanvu tɔn lɛ? É sɔgbe ɖɔ é ni zán Klisanwun yí ami dó ɖè e ɖò ayikúngban jí lɛ é. Biblu ɖɔ dó ye wu ɖɔ ye nyí “vɔsanúxwlémawutɔ́ axɔ́su ɔ tɔn” e è ɖegbe na ɖɔ ye ni “jla azɔ̌ ɖagbeɖagbe” mɛ e “ylɔ́ [ye] nú [ye] na gosin ablu mɛ, bo wá weziza tɔn ɖagbeɖagbe ɔ nu” é tɔn lɛ. (1 Pi. 2:9; Mal. 2:7; Nǔɖe. 12:17) Mɛ yí ami dó ɖè e ɖò ayikúngban jí lɛ é bǐ wɛ ka nyí deví gbejinɔtɔ́ ɔ à? Eǒ. Hwenu e Jezu na nǔɖuɖu gbɛtɔ́ 5 000, ee mɛ è ma xà nyɔnu lɛ kpo yɔkpɔvu lɛ kpo dó ǎ é ɔ, é má nǔɖuɖu ɔ nú ahwanvu tɔn lɛ, bɔ yedɛɛ lɛ wá má nú ahwan ɔ. (Mat. 14:19) É na nǔɖuɖu mɛ gegě gbɔn mɛ kpɛɖé jí. Égbé ɔ, é nɔ na nǔɖuɖu gbigbɔ tɔn ɔ mɛ ɖò ali ɖokpo ɔ nu.

⁵ Enɛ wu ɔ, “[deví] gbejinɔtɔ́ nǔnywɛtɔ́ ɔ” wɛ nyí gbɛ̌ta klewun nɔví sunnu yí ami dó ɖè ɖěɖee nɔ ɖ’alɔ tlɔlɔ ɖò nǔsisɔ nú nǔɖuɖu gbigbɔ tɔn kpo mimǎ tɔn kpo mɛ ɖò fí ɖiɖe Klisu tɔn hwenu é. (Luk. 12:42) Ðò azǎn gudogudo tɔn elɔ lɛ mɛ ɔ, nɔví sunnu yí ami dó ɖè ɖěɖee ɖò gbɛ̌ta ‘deví gbejinɔtɔ́ ayiɖotenanɔ’ ɔ tɔn mɛ lɛ é nɔ w’azɔ̌ ɖó kpɔ́ ɖò hɔ̌nkan gbɛ̀ ɔ tɔn mǐtɔn. Égbé ɔ, nɔví sunnu yí ami dó ɖè enɛ lɛ wɛ nyí Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn.

⁶ Klisu nɔ zán hagbɛ̌ enɛ dó jla nǔ e kan nǔɖɔɖ’ayǐ Biblu tɔn lɛ sín jijɛnu é, bo nɔ lɛ́ ɖè wě xá mɛ dó lee è na zán nǔgbododó Biblu tɔn lɛ ɖò hwetɔnnu ɖò gbɛzán mɛtɔn mɛ gbɔn é jí. È nɔ má nǔɖuɖu gbigbɔ tɔn enɛ gbɔn Kúnnuɖetɔ́ Jehovah tɔn lɛ sín agun lɛ gblamɛ. (Eza. 43:10; Ga. 6:16) Ðò Biblu sín táan mɛ ɔ, deví alǒ mɛsɛntɔ́ ɖejid’ewu ɖé nɔ kpé nukún dó gǎn tɔn sín xwé wu. Mɔ̌ ɖokpo ɔ, è ɖè azɔ̌ nú deví gbejinɔtɔ́ ayiɖotenanɔ ɔ b’ɛ na nɔ kpé nukún dó xwédo nǔɖiɖi tɔn ɔ wu. Enɛ wu ɔ, deví gbejinɔtɔ́ ɔ nɔ lɛ́ kpé nukún dó nǔɖokan lɛ, wɛnɖagbejijlazɔ́ ɔ, nǔsisɔ nú kpléɖókpɔ́ lɛdo tɔn lɛ kpo kpléɖókpɔ́ ɖaxó lɛ kpo, nukúnkpénuwutɔ́ lɛ sísɔ́ ɖó tɛn vovo mɛ ɖò tutoblonunu ɔ mɛ, kpo wema jinjɔn Biblu jí lɛ zínzín kpo wu, bɔ enɛ lɛ bǐ nɔ hɛn lè wá nú ‘mɛ e ɖò xwé ɔ gbè lɛ é.’—Mat. 24:45.

⁷ Mɛ̌ mɛ̌ e ka nyí ‘mɛ e ɖò xwé ɔ gbè lɛ é’ lo? È na ɖɔ kpowun ɔ, mɛ ɖěɖee è nɔ na nǔɖuɖu lɛ é wɛ. Ðò azǎn gudogudo tɔn lɛ sín bǐbɛ̌mɛ ɔ, mɛ e ɖò xwé ɔ gbè lɛ é bǐ wɛ nyí mɛ yí ami dó ɖè. Nukɔnmɛ ɔ, ahwan wɔbuwɔbu “lɛngbɔ̌ ɖevo lɛ” tɔn wá gɔ́ nú mɛ e ɖò xwé ɔ gbè lɛ é. (Jaan 10:16) Gbɛ̌ta we lɛ bǐ wɛ nǔɖuɖu gbigbɔ tɔn e deví gbejinɔtɔ́ ɔ nɔ má lɛ é nɔ wà ɖagbe na.

⁸ Hwenu e Jezu na wá ɖò ya ɖaxó ɔ hwenu, bo na ɖó hwɛ nú gbɛ̀ nyanya elɔ é ɔ, é na sɔ́ deví gbejinɔtɔ́ ɔ “ɖó dɔkun tɔn lɛ bǐ nu.” (Mat. 24:46, 47) Ye mɛ ɖěɖee ɖò gbɛ̌ta deví gbejinɔtɔ́ ɔ tɔn mɛ lɛ é na yí ajɔ yetɔn jixwé tɔn ɔ. Ye kpo mɛ e kpò ɖò 144 000 lɛ mɛ lɛ é kpo na ɖu axɔ́su xá Klisu ɖò jixwé. Deví gbejinɔtɔ́ ayiɖotenanɔ ɖě sɔ́ na kpó ɖò ayikúngban jí hwenɛnu ǎ có, Jehovah kpo Jezu kpo na xlɛ́ ali toví Axɔ́suɖuto Mɛsiya ɔ tɔn e ɖò ayikúngban jí lɛ é, gbɔn mɛ ɖěɖee è na sɔ́ bɔ ye na nyí “gǎn” lɛ é gblamɛ.—Ðɛh. 45:17.

ETƐWU MǏ KA ÐÓ NA ‘FLÍN AGUNNUKƆNTƆ́ MǏTƆN LƐ’?

⁹ Hwɛjijɔ gegě wɛ mǐ ɖó bo na ‘flín agunnukɔntɔ́ mǐtɔn lɛ,’ bo lɛ́ ɖexlɛ́ ɖɔ mǐ ɖeji dó ye wu. Etɛwu mɔ̌ wiwa ka nɔ hɛn lè wá nú mǐ? Mɛsɛ́dó Pɔlu ɖɔ: “Ye nɔ ɖò nukún kpé dó mi wu wɛ hwebǐnu, ɖó ye ɖó na ɖó azɔ̌ e ye wà ɔ sín gbè nú Mawu. Enyi mi setónú nú ye ɔ, ye na wà azɔ̌ yetɔn kpodo xomɛhunhun kpo; enyi mi ma ka setónú nú ye ǎ ɔ, ye na wà azɔ̌ yetɔn wǔɖéwúɖé; enɛ ɔ, mi ka sɔ́ na mɔ lè ɖebǔ ɖ’emɛ ǎ.” (Ebl. 13:17) É ɖò taji tawun ɖɔ mǐ ni setónú lobo hwíhwɛ́ mǐɖée dó alixlɛ́mɛ mɛ ɖěɖee ɖò nukún kpé dó nǔ wu wɛ lɛ é tɔn glɔ́, ɖó ye nɔ nya xɛ ɖò mǐ jí bonu mǐ na nɔ ganji ɖò gbigbɔ lixo.

¹⁰ Pɔlu ɖɔ ɖò 1 Kɔlɛntinu lɛ 16:14 mɛ ɖɔ: “Mi wà nǔ bǐ kpo wanyiyi kpo.” Gbeta e kɔn è nɔ wá dó togun Mawu tɔn tamɛ lɛ é nɔ jinjɔn jujɔ ɖaxó enɛ e nyí wanyiyi é jí. Kɔlɛntinu lɛ Nukɔntɔn 13:4-8 ɖɔ dó wanyiyi wu ɖɔ: “Wanyiyi nɔ kú hǔn; é nɔ nyɔ́ xomɛ; é nɔ jló mɛ nú ǎ; é nɔ jla ajɔ nú éɖée ǎ; é nɔ yí gò ǎ. Wanyiyi nɔ wà winnyanú ɖebǔ ǎ; é nɔ ba ɖɔ emiɖokponɔ géé tɔn jɛn na nyɔ́ ǎ; nǔɖe nɔ sin xomɛ n’i ǎ; é ka nɔ lɛ́ hɛn mɛ dó xomɛ ǎ. Nǔagɔwiwa wɛ nɔ hun xomɛ nú mɛ e ɖó wanyiyi é ǎ; loɔ, nǔgbo wɛ nɔ hun xomɛ n’i. Wanyiyi nɔ zɔ́n bɔ è nɔ dɛ ɖò nǔ bǐ nu; enyi mǐ na bo ɖò ninɔmɛ ɖebǔ mɛ ɔ, wanyiyi ɔ nɔ hɛn nǔɖiɖi mǐtɔn, kpo nukúnɖiɖó mǐtɔn kpo, kpodo hǔnkúkú mǐtɔn kpan ɖó te. Wanyiyi na vɔ gbeɖé ǎ.” Ðó wanyiyi jí wɛ gbeta e na wà ɖagbe nú Jehovah sɛntɔ́ lɛ é bǐ nɔ jinjɔn wutu ɔ, mǐ ɖó hwɛjijɔ lɛ bǐ bo na mɔ ɖɔ alixlɛ́mɛ mɔhun xwixwedó nɔ zɔ́n bɔ mǐ nɔ nɔ ayijayǐ mɛ. Hú mɔ̌ ɔ, wanyiyi Jehovah tɔn sín xlɛ̌ ɖé wɛ alixlɛ́mɛ enɛ nyí kpowun.

¹¹ Lee é nyí gbɔn ɖò xwè kanweko nukɔntɔn ɔ mɛ é ɔ, sunnu hwɛhutɔ́ lɛ wɛ Jehovah ɖò zinzan wɛ dó xlɛ́ ali togun tɔn. Gbɛtɔ́ lɛ nyí hwɛhutɔ́ có, Jehovah zán ye ɖò hwexónu dó wà jlǒ tɔn. Nɔwée bló tɔjihun ɖaxó ɖé lobo jla kún súsú dó nú gbɛ̀ e na tíìn ɖò hwetɔnnu é sín wɛn. (Bǐb. 6:13, 14, 22; 2 Pi. 2:5) È sɔ́ Mɔyizi b’ɛ kplá togun Jehovah tɔn tɔ́n sín Ejipu. (Tín. 3:10) Mawu sɔ́ xó tɔn d’ayi mɛ nú gbɛtɔ́ hwɛhutɔ́ lɛ bɔ ye wlan Biblu ɔ. (2 Tim. 3:16; 2 Pi. 1:21) Gbɛtɔ́ hwɛhutɔ́ lɛ e Jehovah nɔ zán dó nɔ gudo nú wɛnɖagbejijla kpo nǔkpinkplɔn mɛ lɛ bonu ye ni huzu ahwanvu kpo sín azɔ̌ ɔ ɖò égbé é nɔ vɔ́da nú jiɖe e mǐ ɖó dó tutoblonunu Mawu tɔn wu é ǎ. É nyɔ́ wà ɔ, jiɖe mǐtɔn nɔ syɛn d’eji ɖó mǐ tuùn ɖɔ Jehovah mɛvo ɔ, tutoblonunu ɔ kún sixu kpéwú bo wà nǔ e wà wɛ é ɖè lɛ é gbeɖé ó. Deví gbejinɔtɔ́ ɔ ko ɖexlɛ́ sín xwè mɔkpan ɖíe, ɖò ninɔmɛ e tlɛ syɛn lɛ é mɛ ɖɔ gbigbɔ Mawu tɔn wɛ nɔ xlɛ́ ali emi. Nyɔna gegě wɛ è kɔn dó tutoblonunu Jehovah tɔn ayikúngban jí tɔn ɔ jí ɖò égbé. Enɛ wu ɔ, mǐ nɔ nɔ gudo n’i bǐ mlɛ́mlɛ́ kpo ayi mǐtɔn bǐ kpo, lobo nɔ lɛ́ ɖeji dó wǔ tɔn.

LEE MǏ NƆ ÐEXLƐ́ ÐƆ MǏ ÐEJI DÓ JEHOVAH KPO TUTOBLONUNU TƆN KPO WU GBƆN É

¹² Mɛ ɖěɖee è ɖè azɔ̌ na ɖò agun ɔ mɛ lɛ é nɔ ɖexlɛ́ ɖɔ emi ɖeji dó Jehovah kpo tutoblonunu tɔn kpo wu gbɔn gbeyiyi kpo awǎjijɛ kpo nú nǔ e azɔ̌ yetɔn lɛ nɔ byɔ lɛ é gblamɛ; ye nɔ lɛ́ wà mɔ̌ gbɔn azɔ̌ enɛ lɛ wiwa kpo gbejininɔ kpo gblamɛ. (Mɛ. 20:28) Ðó mǐ nyí wɛnjlatɔ́ Axɔ́suɖuto ɔ tɔn lɛ wutu ɔ, mǐ nɔ jla wɛn ɔ gbɔn xwégbe xwégbe, nɔ yì ba mɛ lɛ kpɔ́n, bo nɔ lɛ́ kplɔ́n Biblu xá mɛ lɛ ɖò xwé lɛ gbè kpo kanɖodónǔwu kpo. (Mat. 24:14; 28:19, 20) Bo na dó ɖu nǔɖuɖu gbigbɔ tɔn ɖagbeɖagbe e má wɛ deví gbejinɔtɔ́ ɔ ɖè lɛ é sín lè bǐ mlɛ́mlɛ́ ɔ, mǐ nɔ sɔnǔ nú kplé Klisanwun tɔn mǐtɔn lɛ kaka jɛ kpléɖókpɔ́ lɛdo tɔn lɛ kpo kpléɖókpɔ́ ɖaxó lɛ kpo jí, lobo nɔ yì tɛn yetɔn mɛ. Wusyɛn e mǐ nɔ dó lanmɛ nú mǐɖée hwenu e mǐ ɖò kpɔ́ xá nɔví mǐtɔn lɛ ɖò kplé Klisanwun tɔn lɛ jí é nɔ wà ɖagbe nú mǐ tawun.—Ebl. 10:24, 25.

¹³ Enyi mǐ nɔ na nǔ dó nɔ gudo nú tutoblonunu ɔ ɔ, mǐ nɔ ɖexlɛ́ ɖɔ mǐ ɖeji dó wǔ tɔn. (Nǔx. 3:9, 10) Enyi mǐ mɔ bɔ nɔví mǐtɔn lɛ ɖò nǔ agbaza tɔn lɛ sín hudo mɛ ɔ, mǐ nɔ yawǔ d’alɔ ye. (Ga. 6:10; 1 Tim. 6:18) Mǐ nɔ wà mɔ̌ ɖó wanyiyi nɔví nɔví tɔn e mǐ ɖó é wu, bo nɔ ɖò acéjí hwebǐnu bo na dó ɖexlɛ́ Jehovah kpo tutoblonunu tɔn kpo ɖò ali bǐ nu ɖɔ ɖagbe e ye wà nú mǐ é sù nukún mǐtɔn mɛ.—Jaan 13:35.

¹⁴ Mǐ nɔ lɛ́ ɖexlɛ́ ɖɔ mǐ ɖeji dó tutoblonunu ɔ wu gbɔn gudo ninɔ nú gbeta tɔn lɛ gblamɛ. Alixlɛ́mɛ mɛ e ɖò nukún kpé dó nǔ wu wɛ lɛ é, ɖi nukúnkpénuwutɔ́ lɛdo tɔn lɛ kpo mɛxo agun tɔn lɛ kpo tɔn xwixwedó kpo mɛɖéesɔ́hwe kpo lɔ ɖ’emɛ. Nɔví enɛ lɛ lɔ ɖò “agunnukɔntɔ́” ɖěɖee mǐ ɖó na setónú na lobo hwíhwɛ́ mǐɖée dó glɔ̌ na lɛ é mɛ. (Ebl. 13:7, 17) Enyi mǐ na bo ma tlɛ tuùn hwɛjijɔ e wu è wá gbeta ɖé lɛ kɔn é bǐ mlɛ́mlɛ́ ǎ ɔ, mǐ tuùn ɖɔ gbeta enɛ lɛ xwixwedó na wà ɖagbe nú mǐ kaka sɔyi. Wǎgbɔ tɔn ɔ, Jehovah nɔ kɔn nyɔna tɔn dó mǐ jí, ɖó mǐ setónú nú Xó tɔn kpo tutoblonunu tɔn kpo wutu. Mɔ̌ mɛ ɔ, mǐ nɔ ɖexlɛ́ ɖɔ mǐ hwihwɛ́ mǐɖée dó Gǎn mǐtɔn Jezu Klisu glɔ́.

¹⁵ Nǔgbo ɔ, mǐ ɖó hwɛjijɔ lɛ bǐ bo na ɖeji dó deví gbejinɔtɔ́ ayiɖotenanɔ ɔ wu. Satáan e nyí mawu gbɛ̀ elɔ tɔn é ɖò gǎn lɛ bǐ dó wɛ bo na kɔn cí dó nyikɔ Jehovah tɔn kpo tutoblonunu tɔn kpo wu. (2 Kɔ. 4:4) Ma lɔn bo jɛ mɔ Satáan tɔn lɛ mɛ gbeɖé ó! (2 Kɔ. 2:11) Ðó é tuùn ɖɔ “hwenu kpɛɖé jɛn wɛ kpò” cobɔ è na kpíkpé emi dó domaɖó-azan ɔ mɛ wutu ɔ, é jɛma bo na lɛkɔ nú mɛ e wu é kpé é bǐ sín Jehovah gudo. (Nǔɖe. 12:12) Amɔ̌, ee Satáan na ɖò gǎn dó wɛ é ɔ, mi nú mǐ ni kpó ɖò Jehovah sɛkpɔ́ d’eji wɛ. Mi nú mǐ ni ɖeji dó Jehovah kpo tutoblonunu e zán wɛ é ɖè dó ɖò ali xlɛ́ togun tɔn wɛ ɖò égbé é kpo wu. Mɔ̌ wiwa na zɔ́n bɔ kplékplé nɔví lɛ tɔn mǐtɔn na ɖò bǔ.