-
Nǔ E È Ni Ðó Wǔ Zɔ Nyí ÉÐu Gbɛ̀ Víví Kaka Sɔyi!: Biblu Kplɔnkplɔn E Na Hɛn Lè Wá nú We É
-
-
NǓKPLƆNKPLƆN 45
Nǔ E È Ni Ðó Wǔ Zɔ Nyí É
Jezu kplɔ́n mɛ ɖɔ ahwanvu emitɔn lɛ kún ɖó na “nyí gbɛ̀ ɔ tɔn” ó. (Jaan 15:19) Enɛ byɔ ɖɔ è ni ɖó wǔ zɔ; tinmɛ tɔn wɛ nyí ɖɔ è ni ma ɖó nu ɖò toxóɖiɖɔ kpo ahwan kpo gbɛ̀ ɔ tɔn lɛ mɛ ó. È ka na ɖɔ xó jɔ xó ɔ, é nɔ bɔwǔ hwebǐnu bonu è na ɖó wǔ zɔ ǎ. È sixu ko mǐ, ɖó mǐ ɖó wǔ zɔ wutu. Nɛ̌ mǐ ka sixu ɖó wǔ zɔ bo na kpò ɖò gbeji nú Jehovah Mawu gbɔn?
1. Linlin tɛ Klisanwun nǔgbo lɛ ka nɔ ɖó dó acɛkpikpa gbɛtɔ́ tɔn lɛ wu?
Klisanwun lɛ nɔ ɖó sísí nú acɛkpikpa. Mǐ nɔ bló nǔ e Jezu ɖɔ é bo nɔ “sɔ́ nǔ e nyí Dada Hlɔma tɔn tɔn ɔ jó nú Dada Hlɔma tɔn,” é wɛ nyí ɖɔ mǐ nɔ setónú nú sɛ́n tò ɔ tɔn lɛ, ɖi ɖěɖee byɔ ɖɔ mǐ ni sú takwɛ lɛ é mɔ̌. (Maki 12:17) Biblu kplɔ́n mɛ ɖɔ acɛkpikpa gbɛtɔ́ tɔn lɛ ɖò acɛ kpa wɛ, ɖó Jehovah wɛ na gbè tɔn wutu. (Hlɔmanu lɛ 13:1) Enɛ wu ɔ, mǐ tuùn ɖɔ acɛkpikpa gbɛtɔ́ tɔn lɛ ɖó dogbó. Mǐ ɖò nukún ɖó wɛ ɖɔ Mawu kpo Axɔ́suɖuto tɔn jixwé tɔn kpo na ɖeɖɛ tagba gbɛtɔ́ tɔn lɛ.
2. Nɛ̌ mǐ ka sixu xlɛ́ ɖɔ mǐ ɖó wǔ zɔ gbɔn?
Jezu ɖɔhun ɔ, mǐ nɔ ɖó nu ɖò toxóɖiɖɔ mɛ ǎ. Hwenu e gbɛtɔ́ lɛ mɔ nǔjiwǔ e Jezu bló lɛ é ɖokpo, bo tɛ́n kpɔ́n bo na sɔ́ ɛ axɔ́su yetɔn ɖò ayikúngban jí é ɔ, é lɔn nú ye ǎ. (Jaan 6:15) Etɛwu? Ðó é wá ɖɔ ɖò nukɔnmɛ ɖɔ: “Axɔ́suɖuɖu ce nyí gbɛ̀ mɛ fí tɔn ǎ.” (Jaan 18:36) Ðó mǐ nyí ahwanvu Jezu tɔn lɛ wutu ɔ, mǐ nɔ ɖè wǔ e mǐ ɖó zɔ é xlɛ́ ɖò ali gegě nu. Ði kpɔ́ndéwú ɔ, mǐ nɔ yì ahwan ǎ. (Xà Micée 4:3.) Mǐ nɔ ɖó sísí nú wuntun tò tɔn lɛ, ɖi asya mɔ̌, amɔ̌, mǐ nɔ sɛn ye ǎ. (1 Jaan 5:21) Mǐ ka nɔ lɛ́ nɔ toxóɖɔgbɛ́ta ɖě, alǒ mɛ e ja gǎn ɖu gbé é ɖě jí ǎ. Mɔ̌ jɛn mǐ ma ka nɔ lɛ́ klán gbè xá ye ǎ é nɛ. Ðò ali enɛ lɛ kpo ɖevo lɛ kpo nu ɔ, mǐ nɔ ɖexlɛ́ ɖɔ mǐ ɖò gbeji nú acɛkpikpa Mawu tɔn bǐ mlɛ́mlɛ́, é wɛ nyí Axɔ́suɖuto tɔn.
BA DÒ NÚ NǓ D’EJI
Mǐ ni kpɔ́n ninɔmɛ ɖěɖee sixu tɛ́n wǔ e mǐ ɖó zɔ é kpɔ́n lɛ é, kpo lee mǐ sixu wá gbeta ɖěɖee na nyɔ́ Jehovah nukúnmɛ lɛ é kɔn gbɔn é kpo.
3. Klisanwun nǔgbo lɛ nɔ ɖó wǔ zɔ
Jezu kpo ahwanvu tɔn lɛ kpo sɔ́ kpɔ́ndéwú ɔ ɖ’ayǐ nú mǐ. Xà Hlɔmanu lɛ 13:1, 5-7 kpo 1 Piyɛ́ɛ 2:13, 14 kpo. Enɛ gudo hǔn, xò VIDEO ɔ bonu mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Etɛwu mǐ ka ɖó na nɔ ɖó sísí nú acɛkpikpa e ɖò ayǐ lɛ é?
Ali tɛ lɛ nu mɔ̌ mǐ ka sixu ɖexlɛ́ ɖɔ mǐ nɔ hwíhwɛ́ mǐɖée dó glɔ̌ yetɔn ɖè?
Ðò ahwan hwenu ɔ, tò ɖé lɛ sixu xlɛ́ ɖɔ emi ɖó wǔ zɔ, cobo ka nɔ ɖò gudo nú akpáxwé we e ɖò ahwan fún xá yeɖée lɛ wɛ é fɛɛ. Etɛ wǔ ɖiɖó zɔ nǔgbo ɔ ka nyí? Xà Jaan 17:16. Enɛ gudo hǔn, xò VIDEO ɔ bonu mi ɖɔ xó ɖó kpɔ́ dó nǔkanbyɔ e bɔ d’ewu é jí.
Etɛ ka nyi tinmɛ è ni ɖó wǔ zɔ tɔn?
Nú acɛkpikpa lɛ byɔ nǔɖe ɖò así we, b’ɛ ka sɔ́ ta sɛ́n Mawu tɔn ɔ lo? Xà Mɛsɛ́dó 5:28, 29. Enɛ gudo hǔn, xò VIDEO ɔ bonu mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Nú sɛ́n gbɛtɔ́ tɔn sɔ́ ta sɛ́n Mawu tɔn ɔ, ɖětɛ mǐ ka ɖó na setónú na?
Ninɔmɛ tɛ lɛ mɛ mɔ̌ Klisanwun lɛ ma ka na setónú nú acɛkpikpa lɛ ɖè ǎ bɔ a lin?
4. Ðǒ wǔ zɔ ɖò linlin kpo nǔwalɔ kpo mɛ
Xà 1 Jaan 5:21. Enɛ gudo hǔn, xò VIDEO ɔ bonu mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, etɛwu Ayenge ka wá gbeta ɔ kɔn ɖɔ emi kún na xò kpóɖó nú toxóɖɔgbɛ́ta ɔ, alǒ ɖ’alɔ ɖò hunjijɛ dó tò mɛtɔn jí núwiwa lɛ mɛ ó, ɖi gbedidó asya mɔ̌?
A ka lin ɖɔ é wá gbeta e nǔnywɛ kpé é kɔn à?
Ninɔmɛ ɖevo tɛ lɛ ka sixu lɛ́ tɛ́n wǔ e mǐ ɖó zɔ é kpɔ́n? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Nú mǐ ɖò lɔnyiji-fɔnkan-yihun lɛ kpɔ́n wɛ ɔ, nɛ̌ mǐ ka sixu kpò ɖò wǔ ɖó zɔ wɛ gbɔn?
Enyi gbeta e kɔn toxóɖɔtɔ́ lɛ wá é tlɛ wà nǔ dó mǐ wu, alǒ hɛn lè wá nú mǐ ɔ, nɛ̌ mǐ ka sixu kpò ɖò wǔ ɖó zɔ wɛ gbɔn?
Nɛ̌ nǔ e mǐ nɔ se ɖò xójɛɖotozɔ́watɔ́ lɛ, alǒ mɛ e mǐ nɔ dó gbɛ̌ xá lɛ é nu é ka sixu wà nǔ dó wǔ e mǐ ɖó zɔ é wu gbɔn?
Ali tɛ lɛ nu Klisanwun ɖé ka ɖó na ɖó wǔ zɔ ɖò linlin kpo nǔwalɔ kpo mɛ ɖè?
MƐÐÉ SIXU KANBYƆ ÐƆ: “Etɛwu a ma ka nɔ dó gbè asya, alǒ jì tohan ǎ?”
Xósin tɛ hwɛ ka na na mɛ mɔ̌hun?
ETƐ LƐ A KA KPLƆ́N?
Klisanwun lɛ nɔ dó gǎn syɛnsyɛn bo nɔ ɖó wǔ zɔ ɖò toxóɖiɖɔ linu, ɖò linlin, xó kpo nǔwalɔ kpo yetɔn lɛ mɛ.
Vɔ̌gbɔnji
Etɛ sín axɔ́ mǐ ka ɖu dó acɛkpikpa gbɛtɔ́ tɔn lɛ?
Etɛwu mǐ ka nɔ ɖó wǔ zɔ ɖò toxóɖiɖɔ linu?
Ninɔmɛ tɛ lɛ ka sixu tɛ́n wǔ e mǐ ɖó zɔ é kpɔ́n?
KÍJÉ
Vɔ̌ tɛ lɛ é ka sixu byɔ ɖɔ mǐ ni sá, bá dó ɖó wǔ zɔ?
Etɛ xwédo lɛ ka sixu bló, bá dó sɔnǔ ɖ’ayǐ jɛ nukɔn nú nǔ ɖěɖee na tɛ́n wǔ e ye ɖó zɔ é kpɔ́n é?
Etɛwu hun jɛ dó tò mɛtɔn jí ma ka nyí wi ɖaxó hugǎn e mɛɖé sixu ɖó é ǎ?
Hwenu e a na ɖò gbeta azɔ̌ e a na wà é tɔn kɔn wá wɛ é ɔ, kpɔ́n lee a ma na nyí gbɛ̀ ɔ tɔn ǎ gbɔn é.
“Mɛ Ðokpo Ðokpo Ðó Na Wà Azɔ̌ E Nyí Étɔn É” (Atɔxwɛ [Gungbe], 15 mars 2006)
-
-
A Sixu Dɛ Ðò Yadonúmɛ NuÐu Gbɛ̀ Víví Kaka Sɔyi!: Biblu Kplɔnkplɔn E Na Hɛn Lè Wá nú We É
-
-
É lín oo, é yá oo, Klisanwun lɛ bǐ wɛ è na klán gbè xá, bo tlɛ na dóya na. Enɛ ɖó na hu ado nú mǐ wɛ à?
1. Etɛwu mǐ ka nɔ ɖó nukún yadonúmɛ?
Biblu ɖɔ nyi wɛn ɖɔ: “Mɛ e jló na zán gbɛ̀ yetɔn nú Mawu kpo sísí kpo, ɖò bǔ e ye ɖè xá Klisu Jezu é mɛ ɔ bǐ wɛ è na tlɛ dóya na lɔ.” (2 Timɔtée 3:12) È dóya nú Jezu, ɖó é nyí gbɛ̀ Satáan tɔn tɔn ǎ. Mǐ lɔ nyí gbɛ̀ ɔ tɔn ǎ, enɛ wu ɔ, nú acɛkpikpa gbɛ̀ ɔ tɔn lɛ kpo tutoblonunu sinsɛn tɔn lɛ kpo ɖò ya dó nú mǐ wɛ ɔ, é nɔ kpaca mǐ ǎ.—Jaan 15:18, 19.
2. Nɛ̌ mǐ ka sixu sɔnǔ ɖ’ayǐ nú yadonúmɛ gbɔn?
Mǐ ɖó na na hlɔnhlɔn jiɖe e mǐ ɖó dó Jehovah wu é dìn. Nɔ ba hwenu gbè bǐ gbè dó xoɖɛ sɛ́dó è, bo nɔ lɛ́ xà Xó tɔn. Nɔ yì kplé agun tɔn lɛ ɖò gbesisɔmɛ. Nǔ enɛ lɛ na na we hlɔnhlɔn e sín hudo a ɖó é, bɔ a na ɖí xwi xá yadonúmɛ ɖebǔ kpo akɔ́nkpinkpan kpo, nú yadonúmɛ ɔ tlɛ gosin mɛ e ɖò xwédo towe mɛ lɛ é gɔ́n ɔ nɛ. Mɛsɛ́dó Pɔlu e è dóya na tawun é ɖɔ: “Aklunɔ wɛ nyí mɛ e nɔ d’alɔ mǐ é. Un na ɖi xɛsi nú nǔɖe ǎ.”—Eblée lɛ 13:6.
Mǐ sixu lɛ́ na hlɔnhlɔn akɔ́nkpinkpan mǐtɔn gbɔn wɛnɖagbe ɔ jijla ɖò gbesisɔmɛ gblamɛ. Wɛn ɔ jijla nɔ d’alɔ mǐ bɔ mǐ nɔ ɖeji dó Jehovah wu, bo nɔ lɛ́ ɖu ɖò xɛsi ɖebǔ e gbɛtɔ́ nɔ dó mǐ é jí. (Nǔnywɛxó 29:25) Nú a sɔnǔ nú akɔ́nkpinkpan bo nɔ jlá wɛn ɔ dìn ɔ, a na kpéwú bo na kpò ɖò wɛnɖagbe ɔ jlá wɛ, nú acɛkpikpa lɛ na bo tlɛ ɖó dogbó nú azɔ̌ mǐtɔn ɔ nɛ.—1 Tɛsalonikinu lɛ 2:2.
3. Nú mǐ nɔ dɛ ɖò yadonúmɛ nu ɔ, lè tɛ lɛ mǐ ka na mɔ?
Nǔgbo wɛ ɖɔ mǐ kún nɔ ba ɖɔ è ni dóya nú mǐ ó, amɔ̌, nú mǐ dɛ ɖò yadonúmɛ ɔ nu kaka yì fó ɔ, nǔɖiɖi mǐtɔn nɔ lidǒ d’eji. Mǐ nɔ lɛ́ sɛkpɔ́ Jehovah d’eji, ɖó nú mǐ mɔ ɖɔ mǐ kún sɔ́ ɖó hlɔnhlɔn kaka ɖé ó ɔ, é nɔ d’alɔ mǐ. (Xà Jaki 1:2-4.) Nú Jehovah mɔ nú mǐ ɖò wuvɛ̌ sè wɛ ɔ, é nɔ vɛ́ n’i, amɔ̌, nú é mɔ nú mǐ ɖò didɛ wɛ ɔ, é nɔ víví n’i. Biblu ɖɔ: “Nú mi wà nǔ ɖagbe bɔ è dóya nú mi, bɔ mi dɛ ɖ’enu ɔ, nǔ ɖagbe wɛ é nyí ɖò Mawu nukúnmɛ.” (1 Piyɛ́ɛ 2:20) Nú mǐ nɔ gbeji ɔ, Jehovah na sɔ́ gbɛ̀ mavɔmavɔ dó d’ajɔ mǐ ɖò gbɛ̀ yɔyɔ̌ ɔ mɛ. Enɛ gudo ɔ, mɛ e na nɔ gbɛ̀ ɖò finɛ lɛ é bǐ na sɛn Jehovah, bɔ mɛɖé sɔ́ na klán gbè xá ye ǎ.—Matie 24:13.
BA DÒ NÚ NǓ D’EJI
Nú gbeklánxámɛ na bo ɖò finɛ ɔ, mǐ ni kpɔ́n nǔ ɖěɖee na d’alɔ we bɔ a na kpò ɖò gbeji nú Jehovah é, kpo lee é na d’ajɔ we gbɔn é kpo.
4. A sixu dɛ ɖò gbeklánxámɛ xwédo tɔn nu
Jezu tuùn ganji ɖɔ xwédo mǐtɔn sixu nɔ ma ba ɖɔ mǐ ni sɛn Jehovah. Xà Matie 10:34-36, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛ ka sixu jɛ hwenu e mɛ e ɖò xwédo ɖé mɛ é ɖé wá gbeta ɔ kɔn bá sɛn Jehovah é?
Nú a na mɔ kpɔ́ndéwú tɔn ɖé hǔn, xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nú hɛ̌nnumɔ towe ɖé, alǒ xɔ́ntɔn towe ɖé tɛ́n kpɔ́n bá bló bonu a na ɖó Jehovah sinsɛn te ɔ, etɛ a ka na wà?
Xà Ðɛhan 27:10 kpo Maki 10:29, 30 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:
Nú xwédo towe, alǒ xɔ́ntɔn towe lɛ klán gbè xá we ɔ, nɛ̌ akpá enɛ ka sixu d’alɔ we gbɔn?
5. Yadonúmɛ na bo ɖò ayǐ hǔn, kpò ɖò Jehovah sɛn wɛ
É nɔ byɔ akɔ́nkpinkpan cobɔ mǐ na sɛn Jehovah, hwenu e mɛ ɖevo lɛ na ɖò tintɛnkpɔn wɛ bá ɖó mǐ te é. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nɛ̌ kpɔ́ndéwú e ɖò video enɛ mɛ lɛ é ka na hlɔnhlɔn we gbɔn?
Xà Mɛsɛ́dó 5:27-29 kpo Eblée lɛ 10:24, 25 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:
Nú è na bo tlɛ ɖó dogbó nú wɛnɖagbejijlazɔ́ mǐtɔn, alǒ kplé mǐtɔn lɛ ɔ, etɛwu é ka ɖò taji tawun ɖɔ mǐ ni kpò ɖò Jehovah sɛn wɛ?
6. Jehovah na d’alɔ we bɔ a na dɛ
Kúnnuɖetɔ́ Jehovah tɔn e ɖó xwè vovo bo gosin fí vovo lɛ é kpò ɖò Jehovah sɛn wɛ kpo gbejininɔ kpo. Gbeklánxámɛ ɖò finɛ có, nǔ ka nyí mɔ̌. Nú a jló na tuùn nǔ e d’alɔ ye é hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ðò video ɔ mɛ ɔ, etɛ ka d’alɔ Kúnnuɖetɔ́ enɛ lɛ bɔ ye dɛ?
Xà Hlɔmanu lɛ 8:35, 37-39 kpo Filipunu lɛ 4:13 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:
Nɛ̌ wemafɔ enɛ ka na ganjɛwu we ɖɔ a hɛn ɔ, a na dɛ ɖò tɛnkpɔn ɖebǔ nu gbɔn?
Xà Matie 5:10-12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú è na bo tlɛ dóya nú we ɔ, etɛwu a ka sixu ɖó awǎjijɛ?
Jehovah sɛntɔ́ livi mɔ̌kpan ko ɖí xwi xá gbeklánxámɛ b’ɛ kpa ye. Hwi lɔ sixu kpéwú!
MƐÐÉ LƐ ÐƆ: “Nyɛ ɔ, un sixu kpéwú bo dɛ ɖò yadonúmɛ nu ǎ.”
Wemafɔ tɛ lɛ ka sixu na jiɖe ee sín hudo ye ɖó é ye?
SETƐ LƐ A KA KPLƆ́N?
Yadonúmɛ na bo ɖò ayǐ ɔ, gǎn ɖěɖee mǐ nɔ dó bo nɔ kpò ɖò Jehovah sɛn wɛ lɛ é nɔ xɔ akwɛ ɖò nukún tɔn mɛ tawun. Kpo alɔdó tɔn kpo ɔ, mǐ hɛn ɔ, mǐ na dɛ kaka yì fó!
Vɔ̌gbɔnji
Etɛwu Klisanwun lɛ ka ɖó na ɖó nukún yadonúmɛ?
Etɛ lɛ a ka sixu wà dìn, bo na ɖò gbesisɔmɛ nú yadonúmɛ e na wá wá é?
Etɛ ka sixu d’alɔ we bɔ a na ɖó jiɖe ɖɔ nú tɛnkpɔn ɖebǔ na bo ɖò ayǐ ɔ, emi hɛn ɔ, emi na kpò ɖò Jehovah sɛn wɛ?
KÍJÉ
Nɔví sunnu winnyawinnya ɖé tinmɛ lee Jehovah d’alɔ ɛ gbɔn b’ɛ dɛ, hwenu e è wlí i dó ganmɛ ɖó wǔ ɖiɖó zɔ tɔn wu é. Kpɔ́n!
Kpɔ́n nǔ e d’alɔ asú kpo asì kpo ɖé, bɔ gbeklánxámɛ ɖò finɛ có, ye ka sɛn Jehovah kpo gbejininɔ kpo nú xwè gegě é.
Kpɔ́n lee a sixu dɛ ɖò yadonúmɛ nu kpo akɔ́nkpinkpan kpo gbɔn é.
“Sɔnǔ Ð’ayǐ Dìn Bá Ðí Xwi Xá Yadonúmɛ” (Atɔxwɛ, juillet 2019)
Nukún tɛ mǐ ka ɖó na nɔ sɔ́ dó kpɔ́n gbeklánxámɛ xwédo tɔn na? Nɛ̌ mǐ ka sixu ɖí xwi xá wuvɛ̌ e é nɔ dɔn wá lɛ é gbɔn b’ɛ na kpa mǐ?
“Nugbǒ ɔ ‘Hɛn Fífá Wá Ǎ, Loɔ, Hwǐ Wɛ É Hɛn Wá’” (Atɔxwɛ, octobre 2017)
-