Hwetɛnu È ka Na Ðɔ Xó B’ɛ Na Jɛ Gan?

1. Etɛ Nǔnywɛtɔ́xó 3:7 ka kplɔ́n mǐ?

MƐÐÉ lɛ ɖò mǐ mɛ bo nɔ ɖɔ xó dín. Mɛ ɖevo lɛ ka nɔ cí xwíi. Lee wemafɔ e jí xóta elɔ jinjɔn é xlɛ́ gbɔn é ɔ, hwenu e è na ɖɔ xó dó é ɖè, bɔ hwenu e è na nɔ abwɛ dó é ɖè. (Xà Nǔnywɛtɔ́xó 3:7.) É ɖò mɔ̌ có, mǐ sixu nɔ ba ɖɔ nɔví mǐtɔn ɖé lɛ ni nɔ ɖɔ xó hugǎn, bonu ye mɛ ɖevo lɛ ni nɔ ɖè xó kpò.

2. Mɛ̌ ka ɖ’acɛ bo na ɖɔ hwenu e mǐ ɖó na ɖɔ xó dó é kpo lee mǐ ɖó na ɖɔ xó gbɔn é kpo?

² Nǔnina Jehovah tɔn wɛ xóɖiɖɔ nyí. (Tín. 4:10, 11; Nǔɖe. 4:11) Ðò Xó tɔn mɛ ɔ, é d’alɔ mǐ bɔ mǐ mɔ nǔ jɛ lee mǐ sixu zán nǔnina enɛ ganji gbɔn é mɛ. Ðò xóta elɔ mɛ ɔ, mǐ na ɖɔ xó dó kpɔ́ndéwú Biblu tɔn ɖěɖee na d’alɔ mǐ bɔ mǐ na tuùn hwenu e mǐ na ɖɔ xó dó é kpo hwenu e mǐ na nɔ abwɛ dó é kpo lɛ é jí. Mǐ na lɛ́ mɔ lee nǔ nɔ cí nú Jehovah dó xó e mǐ nɔ ɖɔ nú mɛ ɖevo lɛ é wu é. Mǐ ni tó kɛnu dó hwenu e mǐ na ɖɔ xó dó é wu hwɛ̌.

HWETƐNU MǏ KA ÐÓ NA ÐƆ XÓ?

3. Sɔgbe xá Hlɔmanu lɛ 10:14 ɔ, hwetɛnu mǐ ka ɖó na ɖɔ xó dó?

³ Mǐ ɖó na ɖò gbesisɔmɛ bo na ɖɔ xó dó Jehovah kpo Axɔ́suɖuto ɔ kpo wu hwebǐnu. (Mat. 24:14; xà Hlɔmanu lɛ 10:14.) Nú mǐ nɔ wà mɔ̌ hǔn, kpɔ́ndéwú Jezu tɔn xwedó wɛ mǐ ɖè nɛ. Hwɛjijɔ taji e wu Jezu wá ayikúngban jí lɛ é ɖokpo wɛ nyí ɖɔ é na kplɔ́n nǔgbo ɔ mɛ ɖevo lɛ dó Tɔ́ tɔn wu. (Jaan 18:37) Amɔ̌, mǐ ɖó na lɛ́ flín ɖɔ lee mǐ nɔ ɖɔ xó gbɔn é lɔ ɖò taji. Enɛ wu ɔ, nú mǐ ɖò xó ɖɔ nú mɛ ɖevo lɛ dó Jehovah wu wɛ ɔ, “gbè fífá kpo mɛ sísí kpo wɛ” mǐ ɖó na sɔ́ dó wà mɔ̌, mǐ ɖó na lɛ́ kéya nú lee nǔ nɔ cí nú ye é kpo nǔ e ye ɖi nǔ na lɛ é kpo. (1 Pi. 3:15, 16a) Enɛ wu ɔ, mǐ ɖó na wà nǔ zɛ xóɖiɖɔ nú mɛɖé wu; mǐ na kplɔ́n nǔ i, bo na tɛ́n kpɔ́n bɔ xó ɔ na byɔ ayi tɔn mɛ.

4. Sɔgbe xá Nǔnywɛxó 9:9 ɔ, nɛ̌ xó mǐtɔn lɛ ka sixu d’alɔ mɛ ɖevo lɛ gbɔn?

⁴ Nú mɛxo lɛ mɔ ɖɔ nɔví ɖé ɖó hudo wěɖexámɛ tɔn ɔ, ye ɖó na nɔ xò nǔ kpɔ́n cobo ɖɔ xó ǎ. É ɖò wɛn ɖɔ ye na ba hwenu e é jɛxa dó ɖɔ è ni ɖɔ xó é bo ma dó winnya mɛ ɔ ó. Ye na ba na nɔte kaka jɛ hwenu e mɛɖé ma na ɖò finɛ ǎ é. Mɛxo lɛ ɖó na tɛ́n kpɔ́n hwebǐnu bo na ɖɔ xó nú mɛ ɖó alɔkpa ɖé b’ɛ na kɔ́n wi mɛ ɔ tɔn ǎ. É ɖò mɔ̌ có, ye nɔ gɔn nǔgbododó Biblu tɔn e sixu d’alɔ mɛ ɖevo lɛ bɔ ye na wà nǔ kpo nǔnywɛ kpo é má xá ye ǎ. (Xà Nǔnywɛxó 9:9.) Etɛwu é ka ɖò taji tawun ɖɔ mǐ ni kpankɔ́n bo ɖɔ xó hwenu e é ɖò dandan é? Kpɔ́n kpɔ́ndéwú vovo we elɔ lɛ: Nukɔntɔn ɔ, nya ɖé ɖó na gbɛ́ nǔ nú vǐ sunnu tɔn lɛ, wegɔ́ ɔ, nawe ɖé ɖó na yì ɖɔ xó nú mɛ e na wá nyí axɔ́su ɖò sɔgudo é ɖé.

5. Hwetɛnu Vɔsanúxwlémawutɔ́ Ðaxó Eli ɖó na ɖɔ xó dó bo ma ka ɖɔ ǎ?

⁵ Vɔsanúxwlémawutɔ́ Ðaxó Eli ɖó vǐ sunnu we, bo ka yí wǎn nú ye tawun. Ye mɛ ɖě ka ɖó sísí nú Jehovah ǎ. Ye ɖò tɛn taji ɖé mɛ; é wɛ nyí ɖɔ ye nyí vɔsanúxwlémawutɔ́ ɖò Goxɔ ɔ mɛ. Amɔ̌, ye nɔ zán acɛ yetɔn nyi dò bo nɔ ɖó sísí ɖebǔ nú vɔsanú e è nɔ xwlé Jehovah lɛ é ǎ, lobo nɔ lɛ̀ aga kpo wunhinhɔ́n kpo. (1 Sam. 2:12-17, 22) Sɔgbe xá Mɔyizisɛ́n ɔ ɔ, è ɖó na hu Eli ví enɛ lɛ, amɔ̌, Eli nɔ gbɛ́ nǔ nú ye vlɛ́kɛsɛ́ɛ kpowun, bo lɛ́ yí gbè bɔ ye kpó ɖò sinsɛnzɔ́ wà wɛ ɖò Goxɔ ɔ mɛ. (Sɛ́n. 21:18-21) Nɛ̌ Jehovah ka wà nǔ gbɔn dó lee Eli kpé nukún dó ninɔmɛ ɔ wu gbɔn é wu? É ɖɔ nú Eli ɖɔ: “Nɛ̌ ka gbɔn bɔ a nɔ sɔ́ vǐ towe lɛ sù hú nyɛ?” Jehovah wá gbeta ɔ kɔn ɖɔ è na hu mɛ nyanya we enɛ lɛ.—1 Sam. 2:29, 34.

6. Etɛ lee Eli wà nǔ gbɔn é ka sixu kplɔ́n mǐ?

⁶ Lee Eli wà nǔ gbɔn é sixu kplɔ́n nǔ taji ɖé mǐ. Nú mǐ mɔ nú xɔ́ntɔn ɖé alǒ hɛ̌nnumɔ ɖé gbà sɛ́n Mawu tɔn ɔ, mǐ ɖó na ɖɔ xó n’i bo flín i nǔgbododó Jehovah tɔn lɛ. Enɛ gudo ɔ, mǐ ɖó na mɔ nǔ jɛ wu ɖɔ é ɖɔ nú afɔsɔ́ɖótetɔ́ Jehovah tɔn lɛ bɔ ye d’alɔ ɛ. (Ja. 5:14) Mǐ jló na cí Eli ɖɔhun bo na sɔ́ xɔ́ntɔn ɖé alǒ hɛ̌nnumɔ ɖé sù hú Jehovah gbeɖé ǎ. É nɔ byɔ akɔ́nkpinkpan cobɔ è na ɖɔ xó nú mɛ e ɖó hudo nǔgbɛnúmɛ tɔn é, amɔ̌, enɛ ka sixu tɔ́n kɔ dó ɖagbe mɛ. Mǐ ni kpɔ́n vogbingbɔn e ɖò kpɔ́ndéwú Eli tɔn kpo Izlayɛli-ví nyɔnu e nɔ nyí Abigayilu é kpo tɔn tɛntin é.

7. Etɛwu Abigayilu ka ɖɔ xó nú Davidi?

⁷ Nya dɔkunnɔ e nɔ nyí Nabalu é sín asì wɛ Abigayilu nyí. Hwenu e Davidi kpo mɛ tɔn lɛ kpo ɖò hinhɔn nú Axɔ́su Sawulu wɛ é ɔ, ye zán hwenu ɖé xá Nabalu sín lɛngbɔ̌nyitɔ́ lɛ bo cyɔn alɔ lɛngbɔ̌kpó Nabalu tɔn lɛ jí sín ajotɔ́ axánsúnxó lɛ sí. Alɔdó yetɔn ka sù Nabalu nukúnmɛ à? Eǒ. Hwenu e Davidi byɔ Nabalu ɖɔ é ni na nǔɖuɖu kpo sin kpo kpɛɖé mɛ emitɔn lɛ é ɔ, Nabalu sin xomɛ bo súxó dó ta nú ye. (1 Sam. 25:5-8, 10-12, 14) É sín enɛ wu bɔ Davidi ɖɔ ɖɔ emi na hu mɛ e ɖò Nabalu xwégbe lɛ é bǐ. (1 Sam. 25:13, 22) Nɛ̌ è ka sixu gbò kpò nyi ali jí nú awě mɔhun gbɔn? Abigayilu mɔ ɖɔ hwenu e è na ɖɔ xó dó é wɛ, enɛ wu ɔ, é kpankɔ́n bo yì kpé sunnu 400 e ɖò xovɛ́ bo ɖò xomɛsin jí lobo sɔ́ ahwannú lɛ é bo na dó ɖɔ xó nú Davidi.

8. Etɛ kpɔ́ndéwú Abigayilu tɔn ka kplɔ́n mǐ?

⁸ Hwenu e Abigayilu mɔ Davidi é ɔ, é ɖɔ xó kpo akɔ́nkpinkpan kpo kpodo sísí kpo bɔ xó tɔn ɖu ɖò Davidi jí. Abigayilu wɛ è na dóhwɛ ɖó ninɔmɛ nyanya enɛ wu ǎ có, é ka dó kɛnklɛn nú Davidi. É bló bɔ jijɔ ɖagbe Davidi tɔn lɛ jɛ wě, é lɛ́ ganjɛ alɔdó Jehovah tɔn wu. (1 Sam. 25:24, 26, 28, 33, 34) Abigayilu ɖɔhun ɔ, nú mǐ mɔ nú mɛɖé wlí ali nyanya ɖé ɔ, mǐ ɖó na kpankɔ́n bo ɖɔ xó n’i. (Ðɛh. 141:5) Mǐ ɖó na ɖè sísí xlɛ́, bo ka ɖó na lɛ́ kpankɔ́n. Nú mǐ ɖè wě e ɖò dandan é xá mɛɖé kpo wanyiyi kpo ɔ, mǐ xlɛ́ ɖɔ mǐ nyí xɔ́ntɔn nǔgbo ɖé nɛ.—Nǔx. 27:17.

9-10. Etɛ mɛxo lɛ ka ɖó na flín hwenu e ye ɖò wě ɖè xá mɛ ɖevo lɛ wɛ é?

⁹ Ðò taji ɔ, mɛxo lɛ ɖó na nɔ kpankɔ́n bo ɖɔ xó nú mɛ ɖěɖee ɖò agun ɔ mɛ bo ɖè afɔ nyi dò é. (Ga. 6:1) Mɛxo lɛ nɔ sɔ́ yeɖée hwe bo nɔ tuùn ɖɔ emi lɔ nyí hwɛhutɔ́ b’ɛ sixu byɔ ɖɔ è ni ɖè wě xá emi lɔ gbè ɖokpo. Amɔ̌, enɛ nɔ zɔ́n bonu mɛxo lɛ nɔ gbɔ nǔ gbɛ́ nú mɛ e è ɖó na gbɛ́ nǔ na é ǎ. (2 Tim. 4:2; Ti. 1:9) Nú ye ɖò wě ɖè xá mɛɖé wɛ ɔ, ye nɔ zán nǔnina xóɖiɖɔ tɔn yetɔn bo nɔ kplɔ́n nǔ mɛ ɔ kpo azɔ̌tuùntuùn kpo kpodo suúlu kpan. Ye yí wǎn nú nɔví yetɔn lɛ bɔ enɛ nɔ sísɛ́ ye bɔ ye nɔ wà nǔ. (Nǔx. 13:24) Amɔ̌, nǔ e nɔ ɖu ayi mɛ nú ye hugǎn é wɛ nyí ɖɔ ye na zunfan nǔgbododó Jehovah tɔn lɛ bo cyɔn alɔ agun ɔ jí sín nǔ nyanya sí, bo gbɔn mɔ̌ mɛ bo sɔ́ Jehovah sù.—Mɛ. 20:28.

¹⁰ Kaka jɛ dìn ɔ, hwenu e mǐ na ɖɔ xó dó é wɛ mǐ gbéjé kpɔ́n. Amɔ̌, hweɖelɛnu tíìn bɔ é na nyɔ́ hugǎn ɖɔ mǐ ni ma ɖɔ xó tí ó. Wuvɛ̌ tɛ lɛ mǐ ka sixu mɔ hwe enɛ lɛ nu?

HWETƐNU MǏ KA ÐÓ NA NƆ ABWƐ?

11. Nǔjlɛdonǔwu tɛ Jaki ka zán? Etɛwu é ka sɔgbe?

¹¹ É sixu vɛwǔ nú mǐ bɔ mǐ na hɛn nu mǐtɔn. Biblu wlantɔ́ Jaki zán nǔjlɛdonǔwu e sɔgbe é ɖé dó tinmɛ wuvɛ̌ ɔ. É ɖɔ: “Enyi mɛɖé ma wà nǔ nyi dò gbeɖé ɖò xóɖiɖɔ tɔn lɛ mɛ ǎ ɔ, mɛ maɖóblɔ̌ ɖò wǔ wɛ nyí mɛ enɛ; mɛ enɛ hɛn ɔ, é na lɛ́ ɖu ɖò agbaza éɖée tɔn bǐ jí. Mǐ nɔ dó gan nu nú sɔ́ lɛ, bonu ye na sixu setónú nú mǐ; enɛ ɔ, mǐ na dɔn ye yì fí e jló mǐ é.” (Ja. 3:2, 3) Enyi sɔ́kuntɔ́ ɖé dɔn kan e ɖò gan ɔ wu lɛ é ɔ, é sixu xlɛ́ ali sɔ́ ɔ alǒ ɖó è te. Nú sɔ́kuntɔ́ ɖé ma hɛn kan lɛ ganji ǎ bonu ye gosin alɔ tɔn mɛ ɔ, sɔ́ ɔ sixu zlɔ́n kpo hlɔnhlɔn kpo bo gblewǔ éɖée alǒ sɔ́kuntɔ́ ɔ. Ðò ali ɖokpo ɔ nu ɔ, enyi mǐ ma nɔ hɛn nu mǐtɔn ǎ ɔ, é sixu hɛn nǔ gblé tawun. Mǐ ni kpɔ́n ninɔmɛ e mɛ mǐ ɖó na hɛn nu mǐtɔn bo ma na ɖɔ xó ǎ ɖè é ɖé lɛ.

12. Hwetɛnu mǐ ka ɖó na hɛn nu mǐtɔn bo na nɔ abwɛ?

¹² Nú nɔví ɖé hɛn kpáxó ɖé xomɛ ɔ, nɛ̌ a ka nɔ wà nǔ gbɔn? Ði kpɔ́ndéwú ɔ, enyi a xò gò mɛ e nɔ nɔ fí e è gbɛ́ azɔ̌ mǐtɔn ɖè é ɖé ɔ, a na tɛ́n kpɔ́n bo kan doyidoslɔ́ lee è nɔ wà azɔ̌ mǐtɔn gbɔn ɖò tò enɛ mɛ é tɔn byɔ ɛ wɛ à? É ɖò wɛn ɖɔ linlin ɖagbe wu wɛ a sixu ba na tuùn. Mǐ yí wǎn nú nɔví mǐtɔn lɛ bɔ nǔ e ɖò jijɛ dó ye wu wɛ lɛ é nɔ ɖu ayi mɛ nú mǐ. Mǐ nɔ lɛ́ ba na byɔ nǔ tawun tawun ɖé lɛ dó ye tamɛ ɖò ɖɛ mǐtɔn lɛ mɛ. É ɖò mɔ̌ có, hwenu e mǐ ɖó na hɛn nu mǐtɔn bo gɔn xó ɖɔ é ɖokpo nɛ. Nú mǐ zín mɛɖé jí bonu é na ɖɔ kpáxó lɛ nú mǐ hǔn, mǐ ɖó wanyiyi n’i ǎ; mǐ ka lɛ́ ɖó nú nɔví ɖěɖee ganjɛ wǔ tɔn ɖɔ é na hɛn kpáxó e kúnkplá azɔ̌ yetɔn lɛ é dó xomɛ é ǎ. É ɖò wɛn ɖɔ mǐ mɛ ɖě kún na ba na bló bɔ nɔví mǐtɔn e ɖò tò e mɛ è gbɛ́ azɔ̌ mǐtɔn ɖè lɛ é é na lɛ́ mɔ wuvɛ̌ dó wuvɛ̌ jí ó. Mɔ̌ ɖokpo ɔ, nɔví e ɖò tò mɔhun mɛ lɛ é ɖě na ba na ɖɔ lee Kúnnuɖetɔ́ e ɖò tò enɛ lɛ mɛ lɛ é nɔ wà sinsɛnzɔ́ yetɔn alǒ Klisanwun sín azɔ̌ yetɔn gbɔn é ǎ.

13. Lee è ɖɔ gbɔn ɖò Nǔnywɛxó 11:13 mɛ é ɔ, etɛ mɛxo lɛ ma ka ɖó na wà ǎ? Aniwu?

¹³ Ðò taji ɔ, mɛxo lɛ ɖó na zán nǔgbododó e ɖò Nǔnywɛxó 11:13 mɛ é bo hɛn kpáxó lɛ dó xomɛ. (Xà.) Nú mɛxo ɖé ɖó asì ɔ wɛ mɔ̌ wiwa sixu vɛwǔ tawun. Enyi asú kpo asì kpo lɛ nɔ ɖɔ xó xá yeɖée, nɔ ɖɔ linlin e ɖò ayi gɔngɔn yetɔn mɛ lɛ é, lee nǔ cí nú ye é kpo linkpɔ́n yetɔn lɛ kpo nú yeɖée ɔ wɛ kancica yetɔn nɔ syɛn hugǎn. Amɔ̌, mɛxo ɖé tuùn ɖɔ emi kún ɖó na ɖɔ nǔ e kan mɛ ɖěɖee ɖò agun ɔ mɛ lɛ é nú asì emitɔn ó. Nú é wà mɔ̌ ɔ, è sɔ́ na ɖeji dó wǔ tɔn ǎ, bɔ nyikɔ ɖagbe tɔn na lɛ́ gblé. Agbanɖotananɔ e ɖò agun ɔ mɛ lɛ é ɖó na nyí nuwenɔ ǎ. (1 Tim. 3:8) Enɛ wɛ nyí ɖɔ ye na nɔ flú mɛ alǒ yí wǎn nú mɛnúɖiɖɔ ǎ. Nú mɛxo ɖé yí wǎn nú asì tɔn ɔ, é na ɖɔ nǔ e é ma ɖó na sè ǎ lɛ é n’i dó dó agban kpinkpɛn n’i ǎ.

14. Nɛ̌ mɛxo agun tɔn sín asì ɖé ka sixu d’alɔ asú tɔn b’ɛ na ɖó nyikɔ ɖagbe ɖé gbɔn?

¹⁴ Nú asì ɖé ma nɔ zín asú tɔn jí ɖɔ é ni ɖɔ kpáxó lɛ nú emi ǎ ɔ, é sixu d’alɔ asú tɔn b’ɛ na ɖó nyikɔ ɖagbe ɖé. Nú asì ɖé nɔ zán wěɖexámɛ enɛ ɔ, é ɖò gudo nɔ nú asú tɔn wɛ bo lɛ́ ɖò yɛ̌yi wlí nú mɛ ɖěɖee ɖɔ xomɛ nú asú tɔn é wɛ nɛ. Taji hugǎn ɔ wɛ nyí ɖɔ é nɔ hɛn xomɛ Jehovah tɔn hun, ɖó bǔninɔ kpo fífá agun ɔ tɔn kpo gɔ́ sò na wɛ é ɖè.—Hlɔ. 14:19.

NƐ̌ XÓ E MǏ NƆ ÐƆ LƐ É KA NƆ CÍ NÚ JEHOVAH?

15. Nɛ̌ nǔ ka cí nú Jehovah dó xɔ́ntɔn Jɔbu tɔn atɔn wu? Aniwu?

¹⁵ Wema Biblu tɔn e nyí Jɔbu é sixu kplɔ́n nǔ gegě mǐ dó lee mǐ na ɖɔ xó gbɔn é kpo hwenu e mǐ na ɖɔ xó dó é kpo wu. Ee awě ɖebɔdoɖewu lɛ xò Jɔbu gudo é ɔ, sunnu ɛnɛ wá bo na dó gbɔ n’i lobo lɛ́ ɖè wě xá ɛ. Ye nɔ abwɛ nú táan gegě. Amɔ̌, xó e ye mɛ atɔn, enɛ wɛ nyí Elifazi, Biludadi kpo Sofáa kpo wá ɖɔ lɛ é xlɛ́ nyi wɛn ɖɔ ye kún zán hwenu enɛ dó lin tamɛ dó lee ye sixu d’alɔ Jɔbu gbɔn é jí ó. É nyɔ́ wà ɔ, lee ye na xlɛ́ ɖɔ Jɔbu wà nǔɖe nyi dò gbɔn é jí wɛ ye lin tamɛ dó. Xó yetɔn ɖé lɛ sɔgbe, amɔ̌, xó e ye ɖɔ dó Jɔbu kpo Jehovah kpo wu lɛ é gegě nyí xomɛnyínyɔ́xó alǒ xó nǔgbo ǎ. Ye ɖó hwɛ nú Jɔbu ɖɔ é nyí mɛ nyanya. (Jɔb. 32:1-3) Nɛ̌ Jehovah ka wà nǔ gbɔn? Xomɛ sin i tawun dó ye mɛ atɔn enɛ lɛ wu. É ylɔ́ ye ɖɔ xlonɔ, bo byɔ Jɔbu ɖɔ é ni xoɖɛ dó ta yetɔn mɛ.—Jɔb. 42:7-9.

16. Etɛ lɛ kpɔ́ndéwú nyanya e Elifazi, Biludadi kpo Sofáa kpo zé ɖ’ayǐ lɛ é ka sixu kplɔ́n mǐ?

¹⁶ Kpɔ́ndéwú nyanya e Elifazi, Biludadi kpo Sofáa kpo sɔ́ ɖ’ayǐ lɛ é kplɔ́n nǔ gegě mǐ. Nukɔntɔn, mǐ ɖó na ɖó hwɛ nú nɔví mǐtɔn lɛ ǎ. (Mat. 7:1-5) É nyɔ́ wà ɔ, mǐ ɖó na ɖótó ye kpo sɔxwixwe kpo cobo ɖɔ xó. Enɛ gudo kɛɖɛ jɛn mǐ sixu mɔ nǔ jɛ ninɔmɛ yetɔn mɛ. (1 Pi. 3:8, nwt) Wegɔ́, nú mǐ ja xó ɖɔ gbé ɔ, mǐ ɖó na tɛ́n kpɔ́n bɔ xó mǐtɔn lɛ na nyí xomɛnyínyɔ́xó bo lɛ́ sɔgbe. (Efɛ. 4:25) Atɔngɔ́, xó e mǐ nɔ ɖɔ nú mǐɖée é nɔ ɖu ayi mɛ nú Jehovah tawun.

17. Etɛ kpɔ́ndéwú Elihu tɔn ka sixu kplɔ́n mǐ?

¹⁷ Elihu, hɛ̌nnumɔ Ablaxamu tɔn wɛ nyí mɛ ɛnɛgɔ́ e jló na dó gbɔ nú Jɔbu é. É ɖótó Jɔbu kpo mɛ atɔn ɖě lɛ kpo hwenu e ye ɖò xó ɖɔ wɛ é. É ɖó ayi xó e ye ɖɔ lɛ é wu céɖécéɖé, ɖó é kpéwú bo ɖè wě e wuvɛ̌sexámɛ kpé bo ka ɖò tlɔlɔ bo na d’alɔ Jɔbu b’ɛ na jla linlin tɔn ɖó lɛ é ɖé lɛ xá ɛ. (Jɔb. 33:1, 6, 17) Nǔ e ɖu ayi mɛ nú Elihu hugǎn é wɛ nyí ɖɔ é na kpa susu nú Jehovah; é nyí éɖesunɔ alǒ gbɛtɔ́ ɖě ǎ. (Jɔb. 32:21, 22; 37:23, 24) Kpɔ́ndéwú Elihu tɔn kplɔ́n mǐ ɖɔ hwenu e è na nɔ abwɛ bo ɖótó mɛ dó é tíìn. (Ja. 1:19, nwt) Mǐ lɛ́ kplɔ́n ɖɔ nú mǐ jló na ɖè wě xá mɛ ɔ, nǔ e ɖó na mya nukún nú mǐ tawun é wɛ nyí ɖɔ mǐ na kpa susu nú Jehovah, é nyí mǐɖesunɔ ǎ.

18. Nɛ̌ mǐ ka sixu xlɛ́ ɖɔ nǔnina xóɖiɖɔ tɔn ɔ xɔ akwɛ nú mǐ gbɔn?

¹⁸ Mǐ sixu xlɛ́ ɖɔ nǔnina xóɖiɖɔ tɔn ɔ xɔ akwɛ nú mǐ gbɔn wě e Biblu ɖè xá mǐ dó hwenu e mǐ na ɖɔ xó dó é kpo lee mǐ na ɖɔ gbɔn é kpo wu é xwixwedó gblamɛ. Mawu sɔ́ d’ayi mɛ nú axɔ́su nǔnywɛtɔ́ Salomɔ́ɔ b’ɛ wlan ɖɔ: “Xó e è ɖɔ bɔ é jɛ gan ɔ, cí nǔ xɔ akwɛ sikánú ɖɔhun, sikánú e è bló kpatagan gbɔn wu dó ɖó acɔ́ na é ɖɔhun.” (Nǔx. 25:11) Nú mǐ nɔ xwè sɔ bo nɔ ɖótó mɛ ɖevo lɛ lobo nɔ lin tamɛ cobo nɔ ɖɔ xó ɔ, xó mǐtɔn lɛ sixu cí nǔ xɔ akwɛ enɛ ɖɔhun. Enɛ ɔ, enyi mǐ ma nɔ ɖɔ xó kaka ɖé ǎ, alǒ nɔ ɖɔ xó kpɛɖé ɔ, xó mǐtɔn lɛ na hɛn mɛ ɖevo lɛ lidǒ, bo lɛ́ bló bɔ Jehovah na gó dó mǐ wu. (Nǔx. 23:15; Efɛ. 4:29) Ali ɖagbe hugǎn e nu mǐ sixu xlɛ́ ɖɔ nǔnina Mawu tɔn enɛ sù nukún mǐtɔn mɛ ɖè é nɛ.