‘Nùnina Mawu Tɔn E È Ma Sixu Jlɛ́ Ǎ É’ Ni Ðu Ðò Jǐ We

1, 2. (a) Etɛ ka ɖò “nùnina [Mawu] tɔn e d’agba bɔ è ma sixu jlɛ́ ǎ é” mɛ? (b) Nùkanbyɔ tɛ lɛ jí mǐ ka na ɖɔ xó dó ɖò xota elɔ mɛ?

JEHOVAH na nùnina wanyiyi tɔn e d’agba hú nùnina bǐ é mǐ hwenu e é sɛ́ Vǐ vívɛ́ná tɔn Jezu dó ayikúngban jí é! (Jaan 3:16; 1 Jaan 4:9, 10) Mɛsɛ́dó Pɔlu ylɔ nùnina enɛ ɖɔ “nùnina . . . e d’agba bɔ è ma sixu jlɛ́ ǎ é.” (2 Kɔlɛntinu lɛ 9:15) Etɛwu Pɔlu ka zán xógbe enɛ?

² Pɔlu tuùn ɖɔ vɔsisa Jezu tɔn zɔ́n bɔ akpá jiwǔ Mawu tɔn lɛ bǐ na jɛ jlɔ́. (Xà 2 Kɔlɛntinu lɛ 1:20.) Enɛ xlɛ́ ɖɔ vɔ̌ e Jezu sá é kpo ɖagbe e Jehovah nɔ wà nú mǐ lɛ é bǐ kpo, kpodo xomɛ e é nɔ nyɔ́ dó mǐ wu lɛ é bǐ kpo ɖò “nùnina [Mawu] tɔn e d’agba bɔ è ma sixu jlɛ́ ǎ é” mɛ. È tuùn lee è na tinmɛ nùnina xɔ akwɛ enɛ gbɔn bɔ mǐ sixu ɖó mɔjɛmɛ tɔn bǐ mlɛ́mlɛ́ é ǎ. Nɛ̌ nùnina bunɔ enɛ ka ɖó na cí nú mǐ? Nɛ̌ nùnina enɛ ka na sísɛ́ mǐ hwenu e mǐ na ɖò nǔ sɔ́ nú Flǐn kú Klisu tɔn e è na bló ɖò Azǎngagbe azǎn 23gɔ́ ɔ Xwèjísun 2016 tɔn gbè wɛ é?

NÙNINA BUNƆ MAWU TƆN

3, 4. (a) Nú mɛɖé na nùnina ɖé we ɔ, nɛ̌ é ka nɔ cí nú we? (b) Nɛ̌ nùnina bunɔ ɖé ka sixu huzu gbɛzán towe gbɔn?

³ Enyi mɛɖé na nùnina ɖé mǐ ɔ, é nɔ víví nú mǐ. Amɔ̌, nùnina ɖé lɛ nyí nùnina taji alǒ bunɔ sɔmɔ̌, bo sixu huzu gbɛzán mǐtɔn. Ði kpɔ́ndéwú ɔ, mǐ ni ɖɔ ɖɔ a gbà sɛ́n ɖé, b’ɛ byɔ ɖɔ è na hu we. Amɔ̌, ajijimɛ ɔ, mɛ e a ma tuùn ǎ é ɖé sɔ́ jlǒ ɖagbe dó ɖɔ ɖɔ è ni dɔn tó nú emi ɖó tɛn towe mɛ. É ɖò gbesisɔmɛ bo na kú dó ta towe mɛ! Nɛ̌ nùnina bunɔ mɔhun ka na cí nú we?

⁴ Nùnina wanyiyinɔ mɔhun na zɔ́n, bɔ a na bló huzuhuzu ɖé lɛ ɖò gbɛzán towe mɛ. Mɔ̌ ɖokpo ɔ, enɛ na lɛ́ sísɛ́ we bɔ a na nɔ na nǔ mɛ, bo na lɛ́ yí wǎn nú mɛ ɖevo lɛ hugǎn, lobo na lɛ́ sɔ́ hwɛ kɛ mɛɖebǔ e ma na nyɔ́ xomɛ dó wutu towe ǎ lɛ é hugǎn. Kaka jɛ gbè e gbè a na kú é ɔ, a na nɔ ɖexlɛ́ ɖɔ vɔ̌ e mɛ ɔ sá dó ta emitɔn mɛ é sù nukún emitɔn mɛ.

5. Nɛ̌ nùnina Mawu tɔn e nyí gbɛxixɔ ɔ é ka d’agba hú nùnina ɖevo ɖebǔ gbɔn?

⁵ Nùnina Mawu tɔn e nyí gbɛxixɔ ɔ é d’agba hú nùnina e xó è ɖɔ ɖò kpɔ́ndéwú ɔ mɛ é tawun. (1 Piyɛ́ɛ 3:18) Lin tamɛ kpɔ́n dó nǔ elɔ jí: Mǐ mɛ bǐ wɛ ɖu hwɛhuhu sín gǔ ɖò Adamu gɔ́n, bɔ hwɛhuhu ɔ ka dɔn kú wá. (Hlɔmanu lɛ 5:12) Wanyiyi sísɛ́ Jehovah b’ɛ sɛ́ Jezu dó ayikúngban ɔ jí b’ɛ wá kú dó gbɛtɔ́ lɛ bǐ tamɛ, bo “ɖɔ́ kú kpɔ́n nú mɛ bǐ.” (Eblée lɛ 2:9, NW) Amɔ̌ vɔsisa Jezu tɔn tlɛ wà nǔ hú mɔ̌! É na sú kú sín kún dó kaka sɔyi. (Ezayíi 25:7, 8; 1 Kɔlɛntinu lɛ 15:22, 26) Mɛ ɖěɖee na ɖè nùɖiɖi xlɛ́ ɖò Jezu mɛ lɛ é na nɔ fífá kpo awǎjijɛ kpo mɛ kaka sɔyi, mɛɖé lɛ na nyí axɔsu kpo Klisu kpo ɖò jixwé, bɔ mɛ ɖevo lɛ na nyí toví nú Axɔsuɖuto Mawu Tɔn ɖò ayikúngban jí. (Hlɔmanu lɛ 6:23; Nǔɖexlɛ́mɛ 5:9, 10) Nyɔna ɖevo tɛ lɛ ka ɖò nùnina Jehovah tɔn mɛ?

6. (a) Nyɔna Jehovah tɔn tɛ lɛ a ka ɖò nukún ɖó wɛ? (b) Slɛ́ nǔ e nùnina Mawu tɔn na sísɛ́ mǐ bɔ mǐ na wà é atɔn.

⁶ Nǔ elɔ lɛ ɖò nùnina Mawu tɔn mɛ: Ayikúngban ɔ na huzu palaɖisi ɖé, è na gbɔ azɔn nú azinzɔnnɔ lɛ, è na fɔ́n mɛkúkú lɛ sín kú. (Ezayíi 33:24; 35:5, 6; Jaan 5:28, 29) Mǐ yí wǎn nú Jehovah kpo Vǐ vívɛ́ná tɔn kpo, ɖó ye na mǐ “nùnina” enɛ e “d’agba bɔ è ma sixu jlɛ́ ǎ é.” Etɛ nùnina enɛ ka na sísɛ́ mǐ bɔ mǐ na wà? É na sísɛ́ mǐ bɔ mǐ (1) na zé afɔ dó afɔdo Klisu Jezu tɔn lɛ mɛ, (2) na yí wǎn nú nɔví mǐtɔn lɛ, bo (3) na sɔ́ hwɛ kɛ mɛ ɖevo lɛ sín ayi mɛ.

“WANYIYI KLISU TƆN ÐU ÐÒ MǏ JÍ”

7, 8. Nɛ̌ wanyiyi Klisu tɔn ka ɖó na cí nú mǐ? Etɛ é ka ɖó na sísɛ́ mǐ bɔ mǐ na wà?

⁷ Nukɔntɔn ɔ, nùnina enɛ ɖó na sísɛ́ mǐ bɔ mǐ na zán gbɛ̀ mǐtɔn dó kpa susu nú Jezu. Mɛsɛ́dó Pɔlu ɖɔ: “Wanyiyi Klisu tɔn ɖu ɖò mǐ jí.” (Xà 2 Kɔlɛntinu lɛ 5:14, 15.) Pɔlu tuùn ɖɔ nú mǐ yí gbè nú wanyiyi ɖaxó Jezu tɔn ɔ, é na ɖu ɖò mǐ jí alǒ sísɛ́ mǐ bɔ mǐ na yí wǎn nú Jezu bo lɛ́ kpa susu n’i. Nugbǒ ɔ, enyi mǐ mɔ nukúnnú jɛ nǔ e Jehovah wà nú mǐ é mɛ bǐ dégbédégbé ɔ, wanyiyi tɔn na sísɛ́ mǐ, bɔ mǐ na zán gbɛ̀ e na xlɛ́ ɖɔ mǐ kpa susu nú Jezu é. Nɛ̌ mǐ ka na wà enɛ gbɔn?

⁸ Wanyiyi nú Jehovah na sísɛ́ mǐ bɔ mǐ na wà nǔ Jezu ɖɔhun, bo na sɔ́ afɔ dó afɔdo tɔn lɛ mɛ télélé. (1 Piyɛ́ɛ 2:21; 1 Jaan 2:6) Enyi mǐ ɖò tó nú sè nú Mawu kpo Klisu kpo wɛ ɔ, mǐ ɖò wanyiyi e mǐ ɖó nú ye é ɖexlɛ́ wɛ nɛ. Jezu ɖɔ: “Mɛ e hɛn sɛ́n ce lɛ ayi mɛ, bo nɔ nyì ye lɛ ɔ, mɛ enɛ wɛ yí wǎn nú mì. Tɔ́ ce na yí wǎn nú mɛ e yí wǎn nú mì ɔ, bɔ nyɛ lɔ na yí wǎn n’i, bo na ɖè nyɛɖée xlɛ́ ɛ.”​—Jaan 14:21; 1 Jaan 5:3.

9. Etɛ mǐ ka na ɖí xwi xá?

⁹ Ðò Flǐn sín táan elɔ mɛ ɔ, nǔ ɖagbe wɛ é na nyí ɖɔ mǐ ni lin tamɛ kpɔ́n dó lee mǐ ɖò gbɛ̀ mǐtɔn zán gbɔn wɛ é jí. Enɛ wu ɔ, kanbyɔ hwiɖée ɖɔ: ‘Ali tɛ lɛ nu un ka ko ɖò nǔ wà wɛ Jezu ɖɔhun ɖè? Ali tɛ lɛ nu un ka sixu lɛ́ yì nukɔn ɖè?’ É nyí nǔ taji ɖɔ mǐ ni kàn nǔ enɛ lɛ byɔ mǐɖée ɖó gbɛ̀ elɔ ba ɖɔ mǐ ni wà nǔ é ɖɔhun. (Hlɔmanu lɛ 12:2) Enyi mǐ ma cɔ́ mǐɖée ǎ ɔ, mǐ sixu jɛ nǔ wà jí mɛ̌si gbɛ̀ ɔ tɔn lɛ, mɛ nukúnɖeji gbɛ̀ ɔ tɔn lɛ kpo lɔnyiji-lɔnfɔnkan-yihundatɔ́ nukúnɖeji gbɛ̀ ɔ tɔn lɛ kpo ɖɔhun. (Kolosinu lɛ 2:8; 1 Jaan 2:15-17) Nɛ̌ mǐ ka sixu ɖí xwi xá enɛ gbɔn?

10. Nǔ tɛ lɛ mǐ ka sixu kanbyɔ mǐɖée ɖò Flǐn sín táan elɔ mɛ? Etɛ xósin lɛ ka na sísɛ́ mǐ bɔ mǐ na wà? (Kpɔ́n fɔtóo e ɖò bǐbɛ̌mɛ é.)

¹⁰ É nyɔ́ ɖɔ ɖò Flǐn sín táan elɔ mɛ ɔ, mǐ ni ɖè hwenu ɖó vo dó gbéjé avɔ e mǐ nɔ dó lɛ é, sinimáa e mǐ nɔ kpɔ́n lɛ́ é kpo nùxixo e mǐ nɔ ɖótó lɛ é kpo kpɔ́n kaka jɛ nǔ e ɖò ɔdinatɛ́ɛ, alokan, alǒ nǔ mǐtɔn mɔhun ɖevo lɛ jí é jí. Kanbyɔ hwiɖée ɖɔ: ‘Nú Jezu ɖò fí bo mɔ avɔ e un nɔ dó lɛ é ɔ, winnya na hu mì wɛ à?’ (Xà 1 Timɔtée 2:9, 10.) ‘Avɔ ce lɛ ka nɔ xlɛ́ ɖɔ un nyí ahwanvu Klisu tɔn à? Jezu ka na ba na kpɔ́n sinimáa e un nɔ kpɔ́n lɛ é à? É ka na ba na ɖótó nùxixo e un nɔ ɖótó lɛ é à? Enyi Jezu hwe alokan ce alǒ nǔ ce mɔhunkɔtɔn ɖé ɔ, winnya ka na hu mì dó nǔ e é na mɔ ɖ’eji lɛ é wu wɛ à? É na vɛwǔ nú mì bonu ma tinmɛ ayihundida video jí tɔn e sín vivǐ un nɔ ɖu é nú Jezu wɛ à?’ Wǎn e mǐ yí nú Jehovah é ɖó na sísɛ́ mǐ bɔ mǐ na bɛ́ nǔ e ma sɔgbe nú Klisanwun ǎ lɛ é bǐ nyì gbě, nǔ ɔ na bo v’axi gbɔn ɖebǔ ɔ nɛ. (Mɛsɛ́dó 19:19, 20) Hwenu e mǐ zé gbɛ̀ mǐtɔn jó nú Jehovah é ɔ, mǐ d’akpá ɖɔ mǐ na zán gbɛ̀ mǐtɔn dó kpa susu nú Klisu. Enɛ wu ɔ, mǐ ɖó na ɖó nǔ ɖebǔ e sixu zɔ́n bɔ nǔwiwa Jezu ɖɔhun na vɛwǔ nú mǐ lɛ é ǎ.​—Matie 5:29, 30; Filipunu lɛ 4:8.

11. (a) Nɛ̌ wǎn e mǐ yí nú Jehovah kpo Jezu kpo e ka na sísɛ́ mǐ ɖò Mawuxóɖiɖɔzɔ́ ɔ mɛ gbɔn? (b) Nɛ̌ wanyiyi mǐtɔn ka na sísɛ́ mǐ bɔ mǐ na d’alɔ mɛ ɖevo lɛ ɖò agun ɔ mɛ gbɔn?

¹¹ Wǎn e mǐ yí nú Jezu e nɔ sísɛ́ mǐ bɔ mǐ nɔ ɖɔ Mawuxó bo nɔ kplɔ́n nǔ mɛ kpo kanɖodonǔwu kpo. (Matie 28:19, 20; Luki 4:43) Ðò Flǐn sín táan mɛ ɔ, a ka sixu vɔ́ tito towe lɛ bló, bo na mɔ tɛn dó nyí gbexosin-alijitɔ́ alɔgɔtɔ́ tɔn bo na zán ganmɛ 30 alǒ 50 ɖò Mawuxóɖiɖɔzɔ́ ɔ mɛ à? Asikúsú e ɖó xwè 84 é ɖé lin ɖɔ emi kún sixu nyí gbexosin-alijitɔ́ ó, ɖó xwè tɔn kpo lanmɛ tɔn e ma ɖò ganji ǎ é kpo wu. Amɔ̌, gbexosin-alijitɔ́ e ɖò xá tɔn mɛ lɛ é jló na d’alɔ ɛ. Ye bló tuto bo na nɔ wá sɔ́ ɛ lobo lɛ́ ba fí e é sixu ɖɔ Mawuxó ɖè b’ɛ na nyɔ́ n’i é. Wǎgbɔ tɔn ɔ, nɔví sunnu ɔ kpéwú bo mɔ ganmɛ 30 e gbé nya wɛ é ɖè é. A ka sixu d’alɔ mɛɖé ɖò agun towe mɛ b’ɛ na nyí gbexosin-alijitɔ́ alɔgɔtɔ́ tɔn ɖò Xwèjísun kpo Lidosun kpo mɛ à? É ɖò gaàn ɖɔ mɛ bǐ kún sixu nyí gbexosin-alijitɔ́ ó, amɔ̌, mǐ sixu zán táan mǐtɔn kpo hlɔnhlɔn mǐtɔn kpo dó wà nǔ hugǎn ɖò sinsɛnzɔ́ Jehovah tɔn mɛ. Enyi mǐ wà nǔ gbɔn mɔ̌ ɔ, mǐ na xlɛ́ ɖɔ wanyiyi Jezu tɔn sísɛ́ mǐ Pɔlu ɖɔhun. Nǔ ɖevo tɛ wanyiyi Mawu tɔn ka na sísɛ́ mǐ bɔ mǐ na wà?

MǏ ÐÓ NA YÍ WǍN NÚ MǏÐÉE

12. Wanyiyi Mawu tɔn nɔ sísɛ́ mǐ bɔ mǐ nɔ wà etɛ?

¹² Wegɔ ɔ, wanyiyi Mawu tɔn ɖó na sísɛ́ mǐ bɔ mǐ na yí wǎn nú nɔví mǐtɔn lɛ. Mɛsɛ́dó Jaan wlan ɖɔ: “Mɛ vívɛ́ná ce lɛ mi, ee Mawu yí wǎn nú mǐ gbɔn mɔ̌ ɔ, mǐ lɔ ɖó na yí wǎn nú mǐɖée.” (1 Jaan 4:7-11) Enɛ wu ɔ, enyi mǐ yí gbè nú wanyiyi Mawu tɔn ɔ, mǐ ɖó na yí wǎn nú nɔví mǐtɔn lɛ. (1 Jaan 3:16) Nɛ̌ mǐ ka sixu ɖè wanyiyi xlɛ́ ye gbɔn?

13. Kpɔ́ndéwú tɛ Jezu ka sɔ́ ɖ’ayǐ ɖò wanyiyi ɖiɖexlɛ́ mɛ ɖevo lɛ linu?

¹³ Kpɔ́ndéwú Jezu tɔn xlɛ́ mǐ lee mǐ sixu yí wǎn nú mɛ ɖevo lɛ gbɔn é. Hwenu e é ɖò ayikúngban jí é ɔ, é d’alɔ gbɛtɔ́ lɛ, ɖò taji ɔ, mɛ e nɔ sɔ́ yeɖée hwe lɛ é. É gbɔ azɔn nú azinzɔnnɔ lɛ, afɔkponɔ lɛ, nukúntíntɔ́nnɔ lɛ, tokunɔ lɛ kpo ɖɛ̌kúnanɔ lɛ kpo. (Matie 11:4, 5) Jezu cí sinsɛngán lɛ ɖɔhun ǎ, nǔ kplɔnkplɔn gbɛtɔ́ e jló na kplɔ́n nǔ dó Mawu wu lɛ é nɔ víví n’i. (Jaan 7:49) É yí wǎn nú gbɛtɔ́ e nɔ sɔ́ yeɖée hwe lɛ é bo nɔ wà azɔ̌ syɛnsyɛn bo na d’alɔ ye.​—Matie 20:28.

14. Etɛ a ka sixu wà bo na xlɛ́ ɖɔ a yí wǎn nú nɔví towe lɛ?

¹⁴ Flǐn sín táan lɛ́ nyí hwenu ɖagbe ɖé, bɔ a na zán dó d’alɔ nɔví sunnu kpo nɔví nyɔnu kpo e ɖò agun towe mɛ lɛ é, ɖò taji ɔ, mɛxomɔ lɛ. A ka sixu ba nɔví vívɛ́ enɛ lɛ kpɔ́n à? A ka sixu hɛn nùɖuɖu ɖé yì jó nú ye, d’alɔ ye ɖò xwégbezɔ́ lɛ mɛ, sɔ́ ye yì kplé lɛ, alǒ byɔ ye ɖɔ emi na w’azɔ̌ xá ye ɖò sinsɛnzɔ́ ɔ mɛ à? (Xà Luki 14:12-14.) Nǔ wanyiyi Mawu tɔn ni sísɛ́ we bonu a ni xlɛ́ ɖɔ a yí wǎn nú nɔví towe lɛ!

MǏ NI KÚ NǓBLAWU NÚ NƆVÍ SUNNU MǏTƆN LƐ KPO NƆVÍ NYƆNU MǏTƆN LƐ KPO

15. Etɛ mǐ ka ɖó na tuùn?

¹⁵ Atɔngɔ ɔ, wanyiyi Jehovah tɔn nɔ sísɛ́ mǐ, bɔ mǐ nɔ sɔ́ hwɛ kɛ nɔví sunnu mǐtɔn lɛ kpo nɔví nyɔnu mǐtɔn lɛ kpo. Mǐ bǐ wɛ ɖu hwɛhuhu kpo kú kpo sín gǔ ɖò Adamu gɔ́n, enɛ wu ɔ, mɛɖebǔ sixu ɖɔ: “Un ɖó hudo gbɛxixɔ ɔ tɔn ǎ.” Mawu sɛntɔ́ e tlɛ nyí gbejinɔtɔ́ hugǎn é ɖó hudo gbɛxixɔ ɔ tɔn. Mǐ mɛ ɖokpo ɖokpo wɛ è sɔ́ hwɛ wɔbuwɔbu ɖé kɛ! Etɛwu é ka nyí nǔ taji ɖɔ mǐ ni tuùn enɛ? Mǐ mɔ xósin ɔ ɖò lǒ Jezu tɔn lɛ ɖokpo mɛ.

16, 17. (a) Etɛ lǒ Jezu tɔn e kúnkplá axɔsu ɔ kpo mɛsɛntɔ́ ɔ kpo é ka sixu kplɔ́n mǐ? (b) Ee a lin tamɛ kpɔ́n dó lǒ Jezu tɔn jí gudo é ɔ, etɛ a ka kanɖeji bo na wà?

¹⁶ Jezu dó lǒ ɖé dó axɔsu e sɔ́ sikágankwɛ 10 000, alǒ gankwɛ 60 000 000 kɛ mɛsɛntɔ́ tɔn lɛ ɖokpo é wu. Amɔ̌ ɖò nukɔnmɛ ɔ, mɛsɛntɔ́ enɛ sɔ́ azɔ̌gbɛ́ tɔn e ɖu gankwɛ 100 kpowun dó è ɔ sín axɔ kɛ ɛ ǎ. Nùblawukúnúmɛ axɔsu ɔ tɔn ɖó na ko sísɛ́ mɛsɛntɔ́ tɔn b’ɛ na sɔ́ axɔ ɔ kɛ azɔ̌gbɛ́ ɔ. Xomɛ sìn axɔsu ɔ hwenu e é sè ɖɔ mɛsɛntɔ́ emitɔn kún sɔ́ axɔ kpɛ enɛ kɛ azɔ̌gbɛ́ tɔn ó é. É ɖɔ: “Hwi mɛsɛntɔ́ nyanya elɔ, axɔ wɔbuwɔbu ɖee a ɖu dó mì ɔ, a savo nú mì, bɔ un sɔ́ bǐ kɛ we; aniwutu wɛ hwi lɔmɔ̌ ma sixu kú nǔblawu nú hagbɛ̌ towe, lee nyɛ kú nǔblawu nú we gbɔn é ǎ?” (Matie 18:23-35) Axɔsu ɔ ɖɔhun ɔ, Jehovah ko sɔ́ axɔ wɔbuwɔbu ɖé kɛ mǐ. Etɛ wanyiyi Jehovah tɔn kpo nùblawukúnúmɛ tɔn kpo ka ɖó na sísɛ́ mǐ bɔ mǐ na wà?

¹⁷ Ee mǐ na ɖò nǔ sɔ́ nú Flǐn ɔ wɛ é ɔ, mǐ sixu kàn nǔ elɔ lɛ byɔ mǐɖée: ‘Nɔví ɖé ka ko wà nǔ nyì dò nú mì wɛ à? É vɛwǔ nú mì bɔ un na sɔ́ hwɛ kɛ ɛ wɛ à?’ Enyi mɔ̌ wɛ ɔ, hwenu ɖagbe ɖé ɖíe bɔ è na wà nǔ Jehovah e “ɖò gbesisɔmɛ bo na sɔ́ hwɛ kɛ mɛ” é ɖɔhun. (Nɛɛmíi 9:17; Ðɛhan 86:5) Enyi nùblawukúnúmɛ ɖaxó Jehovah tɔn sù nukún mǐtɔn mɛ ɔ, mǐ lɔ na kú nǔblawu nú mɛ ɖevo lɛ bo na sɔ́ hwɛ kɛ ye sín ayi mɛ. Enyi mǐ ma nɔ yí wǎn nú nɔví mǐtɔn lɛ bo nɔ sɔ́ hwɛ kɛ ye ǎ ɔ, mǐ sixu ɖó nukún ɖɔ Jehovah ni yí wǎn nú mǐ bo sɔ́ hwɛ kɛ mǐ ǎ. (Matie 6:14, 15) Enyi mǐ sɔ́ hwɛ kɛ mɛ ɖevo lɛ ɔ, nǔ e ye wà nyì dò nú mǐ é na bú síìn ǎ, amɔ̌, é na d’alɔ mǐ bɔ mǐ na ɖó sɔgudo e ɖó awǎjijɛ hugǎn é.

18. Nɛ̌ wanyiyi Mawu tɔn ka d’alɔ nɔví nyɔnu ɖé b’ɛ dɛ ɖò nùwanyido nɔví nyɔnu ɖevo tɔn nu gbɔn?

¹⁸ É sixu vɛwǔ bɔ mǐ na dɛ ɖò hwɛhuhu nɔví sunnu kpo nɔví nyɔnu mǐtɔn lɛ kpo tɔn nu. (Xà Efɛzinu lɛ 4:32; Kolosinu lɛ 3:13, 14.) Nɔví ɖokpo wà mɔ̌ bɔ è nɔ ylɔ ɛ ɖɔ Lily.^[1] (Kpɔ́n tinmɛ e ɖò vivɔnu é.) Asúkúsi ɖé nɔ nyí Carol b’ɛ d’alɔ ɛ. Ði kpɔ́ndéwú ɔ, é nɔ kplá Carol gbɔn fí ɖebǔ e é nɔ jló na yí é, nɔ xwlé axi xá ɛ, bo nɔ lɛ́ wà nǔ gègě ɖevo lɛ n’i. É ɖò mɔ̌ có, Lily na bo wà nǔ ɖebǔ ɔ, Carol nɔ mɔ xó ɖɔ d’ewu jɛn wɛ, bɔ hweɖelɛnu ɔ, alɔdido è nɔ vɛwǔ. Amɔ̌, Lily sɔ́ ayi ɖó jijɔ ɖagbe ɖěɖee Carol ɖó lɛ é jí bo d’alɔ ɛ nú xwè ɖé lɛ kaka jɛ hwenu e Carol bɛ́ azɔn bo kú é. Alɔdido Carol tlɛ vɛwǔ nú Lily có, é ɖɔ: “Un ɖò te kpɔ́n hwenu e Carol na fɔ́n sín kú é. Un jló na tuùn i ganji hwenu e é na huzu mɛ maɖóblɔ̌ é.” É ɖò wɛn ɖɔ wanyiyi Mawu tɔn sixu sísɛ́ mǐ bɔ mǐ na dɛ ɖò nùwanyido nɔví sunnu mǐtɔn lɛ kpo nɔví nyɔnu mǐtɔn lɛ kpo tɔn nu, bo na ɖò te kpɔ́n hwenu e hwɛhuhu gbɛtɔ́ tɔn na bú bǐ mlɛ́mlɛ́ é.

19. Nɛ̌ “nùnina [Mawu] tɔn e d’agba bɔ è ma sixu jlɛ́ ǎ é” ka na sísɛ́ we gbɔn?

¹⁹ Jehovah na “nùnina . . . e d’agba bɔ è ma sixu jlɛ́ ǎ é” ɖé mǐ nugbǒ. É ni bo sù nukún mǐtɔn mɛ hwebǐnu! Flǐn sín táan elɔ nyí hwenu ɖagbe ɖé bɔ mǐ na zán dó lin tamɛ kpɔ́n dó nǔ e Jehovah kpo Jezu kpo wà nú mǐ lɛ é bǐ jí. Wanyiyi yetɔn ni bo sísɛ́ mǐ bonu mǐ na sɔ́ afɔ dó afɔdo Jezu tɔn lɛ mɛ télélé, bonu mǐ ni xlɛ́ ɖɔ mǐ yí wǎn nú nɔví mǐtɔn lɛ, bo lɛ́ sɔ́ hwɛ kɛ ye sín ayi mɛ.