NǓKPLƆNKPLƆN 43
Linlin Tɛ Klisanwun lɛ ka Ðó Na Ðó Dó Ahan Syɛnsyɛn Wu?
Gbɔn gbɛ̀ ɔ bǐ mɛ ɔ, linlin vovo wɛ mɛ lɛ nɔ ɖó dó ahan syɛnsyɛn wu. Mɛɖé lɛ nɔ gɔ́ nú xɔ́ntɔn yetɔn lɛ bɔ ye nɔ nu hweɖelɛnu. Mɛ ɖevo lɛ tíìn bo nɔ ba xó tɔn ɖebǔ ǎ. É ɖò mɔ̌ có, mɛ ɖevo lɛ nɔ nu kaka bo nɔ mú. Etɛ Biblu ka ɖɔ dó ahan syɛnsyɛn wu?
1. É nyla ɖɔ è ni nu ahan syɛnsyɛn wɛ à?
Biblu gbɛ́ ɖɔ è ma nu ahan syɛnsyɛn ó ǎ. É nyɔ́ wà ɔ, hwenu e Biblu ɖò nǔ tobutobu e Mawu na mǐ lɛ é slɛ́ wɛ é ɔ, é kɛnu dó vɛ̌ɛn lɔ wu, bo ɖɔ ɖɔ “vɛ̌ɛn . . . nɔ dó wǔyá lanmɛ nú mɛ.” (Ðɛhan 104:14, 15) Sunnu kpo nyɔnu kpo gbejinɔtɔ́ e xó è ɖɔ ɖò Biblu mɛ lɛ é ɖé lɛ nu ahan syɛnsyɛn.—1 Timɔtée 5:23.
2. Wě tɛ Biblu ka ɖè xá mɛ ɖěɖee wá gbeta ɔ kɔn bo na nɔ nu ahan lɛ é?
Jehovah gbɛ́ wǎn nú ahan nu zɛ jlɛ̌ wu kpo ahannumu kpo. (Galatinu lɛ 5:21) Xó tɔn ɖɔ: “Ma dó ahannumunɔ sín gbɛ̌ ó.” (Nǔnywɛxó 23:20) Enɛ wu ɔ, nú mǐ wá gbeta ɔ kɔn bá nɔ nu ahan, é na bo tlɛ nyí ɖò nǔglɔ́ ɔ, mǐ ɖó na nɔ nu kaka bɔ tamɛ linlin ganji na gló mǐ ǎ; mɔ̌ jɛn mǐ ma na lɛ́ nu kaka, b’ɛ na zɔ́n bɔ mǐ sɔ́ na tuùn nǔ e ɖɔ wɛ mǐ ɖè é kpo nǔ e wà wɛ mǐ ɖè lɛ é kpo, alǒ wà nǔ dó lanmɛ na nɔ ganji mǐtɔn wu ǎ é nɛ. Nú mǐ ma sixu kpéwú bo ɖó dogbó nú bǎ e mɛ mǐ nɔ nu yì ɖó é ǎ ɔ, é na nyɔ́ hugǎn ɖɔ mǐ ni gbɔ bo jó ahan dó.
3. Nɛ̌ mǐ ka sixu ɖó sísí nú gbeta e kɔn mɛ ɖevo lɛ wá dó ahan wu é gbɔn?
Nú è na nu ahan syɛnsyɛn alǒ gbɔ ɔ, mɛ ɖokpo ɖokpo wɛ ɖó na wá gbeta tɔn kɔn. Mǐ ɖó na dóhwɛ mɛ e wá gbeta ɔ kɔn bo na nɔ nu ahan ɖó jlɛ̌ jí é ǎ, mɔ̌ jɛn mǐ ma ka ɖó na dó cɔcɔ nú mɛ e ma ba na nu ahan ǎ é ɖɔ é ni nu ǎ é nɛ. (Hlɔmanu lɛ 14:10, nwt) Nú ahan nunu mǐtɔn sixu dɔn tagba wá nú mɛ ɖevo lɛ ɔ, mǐ nɔ wá gbeta ɔ kɔn bo sɔ́ nɔ nu ɖě ǎ. (Xà Hlɔmanu lɛ 14:21.) Mǐ nɔ ba ‘ɖagbe mǐɖesunɔ tɔn ǎ; loɔ, mǐ nɔ ba ɖagbe mɛ ɖevo lɛ tɔn.’—Xà 1 Kɔlɛntinu lɛ 10:23, 24.
BA DÒ NÚ NǓ D’EJI
Mǐ ni kpɔ́n nǔgbododó Biblu tɔn ɖěɖee sixu d’alɔ we, bɔ a na kpɔ́n ɖɔ emi sixu nu ahan alǒ gbɔ à jí lɛ é. Nú a ka jló na nu wɛ ɔ, bǎ tɛ mɛ a ka na nu yì ɖó. Nú a ɖò xwi ɖí xá ahan syɛnsyɛn nunu sín tagba ɖé wɛ ɔ, mǐ na lɛ́ kpɔ́n nǔ e a sixu wà é.
4. Kpɔ́n ɖɔ emi sixu nu ahan syɛnsyɛn alǒ gbɔ wɛ à jí
Linlin tɛ Jezu ka ɖó dó ahan syɛnsyɛn nunu wu? Nú a na mɔ xósin ɔ hǔn, mǐ ni gbéjé nǔjiwǔ nukɔntɔn e é bló é kpɔ́n. Xà Jaan 2:1-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ nǔjiwǔ enɛ e Jezu bló é ka sixu kplɔ́n mǐ dó linlin e é ɖó dó ahan syɛnsyɛn kpo mɛ ɖěɖee nɔ nu lɛ é kpo wu?
Ðó Jezu ma gbɛ́ ahan syɛnsyɛn nunu ǎ wutu ɔ, linlin tɛ Klisanwun ɖé ka ɖó na ɖó dó mɛ e wá gbeta ɔ kɔn bo na nu é wu?
Amɔ̌, ɖɔ e è ɖɔ ɖɔ Klisanwun ɖé vo bo na nu ahan syɛnsyɛn kpowun é ɔ, ɖiɖɔ wɛ è ɖè ɖɔ nǔnywɛnú wɛ é nyí hwebǐnu ɖɔ é ni nɔ wà mɔ̌ ǎ. Xà Nǔnywɛxó 22:3, enɛ gudo hǔn, mi gbéjé kpɔ́n ɖɔ é ka sɔgbe ɖɔ è ni nu ahan ɖò ninɔmɛ elɔ lɛ mɛ à jí:
A jló na kun kɛkɛ alǒ mɔ̌to, abǐ zán macinu ɖé.
A ɖò xò.
Dotóo ɖɔ nú we ɖɔ hwi kún ɖó na nu ahan syɛnsyɛn ó.
É vɛwǔ nú we bɔ a na ɖó dogbó nú bǎ e mɛ a nɔ nu yì ɖó é.
Sɛ́n na gbè we bonu a na nu ahan syɛnsyɛn ǎ.
A ɖò mɛ e wá gbeta ɔ kɔn bo ma sɔ́ na nu ahan ɖě ǎ, ɖó é ko vɛwǔ n’i wá yì bɔ é na ɖó dogbó nú bǎ e mɛ é nɔ nu yì ɖó é é kpá.
A ka ɖó na xwlé ahan syɛnsyɛn mɛ ɖò alɔwliwli sín jonɔyiyi, alǒ ɖò nǔwiwa mɛkplékpɔ́mɛ tɔn ɖevo lɛ domɛ wɛ à? Nú a na mɔ nǔ e sixu d’alɔ we, bɔ a na wá gbeta ɖé kɔn ɖò ali enɛ nu é hǔn, xò VIDEO ɔ.
Xà Hlɔmanu lɛ 13:13 kpo 1 Kɔlɛntinu lɛ 10:31, 32 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:
Nɛ̌ nǔgbododó enɛ xwixwedó ka sixu d’alɔ we, bɔ a na wá gbeta e na nyɔ́ Jehovah nukúnmɛ é kɔn gbɔn?
Klisanwun ɖokpo ɖokpo wɛ na wá gbeta ɔ kɔn ɖɔ emi na nu ahan syɛnsyɛn alǒ gbɔ. É na bo tlɛ nɔ nu ahan syɛnsyɛn hweɖelɛnu ɔ, hweɖevolɛnu ɔ, é sixu wá gbeta ɔ kɔn ɖɔ emi kún na nu ó
5. Wǎ gbeta bǎ e mɛ a na nu yì ɖó é tɔn kɔn
Nú a wá gbeta ɔ kɔn bo na nɔ nu ahan syɛnsyɛn hǔn, flín nǔ elɔ: Jehovah gbɛ́ ahan syɛnsyɛn nunu ǎ có, é ka gbɛ́ ahan nu zɛ jlɛ̌ wu. Etɛwu? Xà Ozée 4:11, 18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú mɛɖé nu ahan zɛ xwé wu ɔ, etɛ ka sixu jɛ?
Nɛ̌ mǐ ka sixu nyi alɔ nú ahan nu zɛ xwé wu gbɔn? Mǐ ɖó na nɔ jlɛ̌ jí, alǒ tuùn dogbó mǐtɔn lɛ. Xà Nǔnywɛxó 11:2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu é ka nyí nǔ ɖagbe ɖɔ a ni wá gbeta bǎ e mɛ a na nu ahan yì ɖó é tɔn kɔn?
6. Ðu ɖò kannumɔ nyínyí nú ahan syɛnsyɛn nunu jí
Kpɔ́n nǔ e d’alɔ nya ɖé b’ɛ ma sɔ́ nyí kannumɔ nú ahan syɛnsyɛn nunu ǎ é. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Ðò video ɔ mɛ ɔ, nɛ̌ ahan syɛnsyɛn nunu ka wà nǔ dó lee Dmitry nɔ wà nǔ gbɔn é wu gbɔn?
É ka kpéwú bo ɖó ahan nunu te azɔn nukɔntɔn ɔ à?
Nɛ̌ é ka wá kpéwú bo jó ahan dó bǐ mlɛ́mlɛ́ gbɔn?
Xà 1 Kɔlɛntinu lɛ 6:10, 11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nɛ̌ ahannumu ka nyla sɔ?
Etɛ ka xlɛ́ ɖɔ mɛ e nyí kannumɔ nú ahan syɛnsyɛn nunu é ɖé sixu wá huzu?
Xà Matie 5:30, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nǔjlɛdonǔwu e Jezu zán bo ɖɔ ɖɔ è ni sɛ́n alɔ síìn é ɔ, ɖiɖɔ wɛ é ɖè ɖɔ mǐ ɖó na dó gǎn bo jó nǔɖe lɛ dó, bá dó nyɔ́ Jehovah nukúnmɛ. Nú é ɖò wǔ vɛ́ nú we wɛ bonu a na ɖu ɖò kannumɔ nyínyí nú ahan syɛnsyɛn nunu jí ɔ, etɛ a ka sixu wà?a
Xà 1 Kɔlɛntinu lɛ 15:33, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Alɔ tɛ xɔ́ntɔn towe lɛ ka sixu ɖó ɖò bǎ e mɛ a na nu ahan yì ɖó é mɛ?
MƐÐÉ SIXU KANBYƆ ÐƆ: “Ahan syɛnsyɛn nunu nyla wɛ à?”
Xósin tɛ hwɛ ka na na mɛ mɔ̌hun?
ETƐ LƐ A KA KPLƆ́N?
Jehovah sɔnǔ nú ahan bonu mǐ na ɖu vivǐ tɔn, amɔ̌, é gbɛ́ ahan nu zɛ jlɛ̌ wu kpo ahannumu kpo.
Vɔ̌gbɔnji
Etɛ Biblu ka ɖɔ dó ahan syɛnsyɛn wu?
Awovínú tɛ lɛ ka ɖò ahan nu zɛ xwé wu mɛ?
Nɛ̌ mǐ ka sixu ɖó sísí nú gbeta e kɔn mɛ ɖevo lɛ wá dó ahan syɛnsyɛn wu é gbɔn?
KÍJÉ
Nɛ̌ mɛ winnyawinnya lɛ ka sixu wá gbeta ɖagbe lɛ kɔn dó ahan syɛnsyɛn wu gbɔn?
Kpɔ́n afɔ ɖěɖee a sixu ɖè, bá ɖu ɖò ahan sín tagba ɖé jí é.
“Sɔ́ Ahan Ðó Ahan Tɛnmɛ” (Atɔxwɛ [Flansegbe], 1er janvier 2010)
Klisanwun ɖé ka ɖó na xò kɔ́fu ɖě dó ɖě wu à?
“Nǔ E Nǔxatɔ́ lɛ Kanbyɔ lɛ É” (Atɔxwɛ [Gungbe], 15 février 2007)
Ðò tan gbɛzán tɔn “Un Dóve Ðò Ahan Nunu Mɛ Ð’ayǐ” mɛ ɔ, kpɔ́n lee nya ɖé ɖó ahan nu zɛ xwé wu te gbɔn é.
“Biblu Nɔ Huzu Gbɛzán Mɛtɔn” (Atɔxwɛ [Flansegbe], 1er mai 2012)
a É sixu byɔ ɖɔ mɛ ɖěɖee ko huzu kannumɔ nú ahan syɛnsyɛn nunu lɛ é ni yì ba alɔdó ɖò dotóo ényɔ́watɔ́ ɖé gɔ́n, bá dó gán ɖò ahan sí. Dotóo gegě ɖɔ ɖɔ mɛ ɖěɖee ko ɖó ahan sín tagba lɛ é kún sɔ́ ɖó na nu ahan ɖebǔ ó.