Nǔ E Nǔxatɔ́ lɛ Kanbyɔ lɛ É

Jijɔ e è slɛ́ dó Galatinu lɛ 5:22, 23 mɛ lɛ é kɛɖɛ jɛn ‘gbigbɔ mímɛ́ nɔ na mɛ’ à?

Wemafɔ enɛ lɛ slɛ́ jijɔ Klisanwun tɔn tɛnnɛ: “Nǔ e [gbigbɔ mímɛ́] nɔ na mɛ ɔ wɛ nyí wanyiyi, xomɛhunhun, [fífá], suúluɖiɖó, xomɛnyínyɔ́, ɖagbewiwa, [nǔɖiɖi], [xomɛfífá], mɛɖéejiɖuɖe.” Amɔ̌, é nyí jijɔ enɛ lɛ kɛɖɛ wɛ gbigbɔ Mawu tɔn nɔ d’alɔ mǐ bɔ mǐ nɔ sɔnǔ na ǎ.

Ð’ayi nǔ e mɛsɛ́dó Pɔlu wlan ɖò wemafɔ e jɛ nukɔn lɛ é mɛ é wu: “Nǔ nyanya e gbɛtɔ́ nɔ wà lɛ . . . wɛ nyí: agalilɛ, nǔkwijikwijiwiwa, nǔnyanyawiwa, vodunsinsɛn, majiki blobló, wangbɛnúmɛ, jlɛɖiɖɔ, wuhwinhwan, majijɛ, zalixámɛ, nǔmɛkínkɛ́n, gbemanɔkpɔ́, mɛnújlojló, ahannumu, nǔ ɖu dingan kpodo nǔ hǔnmɛ enɛ lɛ kpan.” (Ga. 5:19-21) Pɔlu sixu lɛ́ slɛ́ “nǔ nyanya e gbɛtɔ́ nɔ wà lɛ” é ɖevo lɛ, ɖi ɖěɖee xó è ɖɔ ɖò Kolosinu lɛ 3:5 mɛ é. Mɔ̌ ɖokpo ɔ, hwenu e é slɛ́ jijɔ ɖagbe tɛnnɛ fó é ɔ, é ɖɔ: “Sɛ́n ɔ gbɛ́ nǔ [mɔhun] lɛ ǎ.” Hǔn, Pɔlu slɛ́ jijɔ ɖagbe e gbigbɔ mímɛ́ sixu d’alɔ mǐ bɔ mǐ na sɔnǔ na lɛ é bǐ ǎ.

Hwenu e mǐ jlɛ́ nǔ e gbigbɔ nɔ na mɛ lɛ é dó sínsɛ́n weziza tɔn e wu Pɔlu wlan nǔ dó sɛ́dó agun Efɛzi tɔn é wu é ɔ, mǐ mɔ nǔ jɛ enɛ wu. É ɖɔ: “Weziza wɛ nɔ zɔ́n, bɔ è nɔ wà nǔ ɖagbe; è nɔ wà nǔ jlɔjlɔ bo nɔ ɖɔ nǔgbo.” (Efɛ. 5:8, 9) Nǔgbo ɔ, ‘sínsɛ́n weziza tɔn’ sín akpáxwé ɖé wɛ ‘ɖagbewiwa,’ gɔ́ nú nǔjlɔjlɔwiwa kpo nǔgboɖiɖɔ kpo nyí, bo lɛ́ nyí ‘nǔ e gbigbɔ mímɛ́ nɔ na mɛ lɛ é’ sín akpáxwé ɖé.

Mɔ̌ ɖokpo ɔ, Pɔlu dó wusyɛn lanmɛ nú Timɔtée ɖɔ é ni sɔnǔ nú jijɔ ɖagbe ayizɛ́n elɔ lɛ: ‘Hwɛjijɔ, sísí ɖó nú Mawu, nǔɖiɖi, wanyiyi, didɛ kpodo xomɛfífá kpo.’ (1 Tim. 6:11) Ðò jijɔ enɛ lɛ mɛ ɔ, atɔn (nǔɖiɖi, wanyiyi kpo xomɛfífá kpo) jɛn ɖò ‘nǔ e gbigbɔ nɔ na mɛ lɛ é’ mɛ. Amɔ̌, é ɖò wɛn ɖɔ Timɔtée na lɛ́ ɖó hudo alɔdó gbigbɔ mímɛ́ tɔn tɔn bo na dó sɔnǔ nú hwɛjijɔ, sísí ɖó nú Mawu, kpo didɛ kpo.—Jlɛ̌ dó Kolosinu lɛ 3:12 kpo 2 Piyɛ́ɛ 1:5-7 kpo wu.

Hǔn, é nyí jijɔ e Klisanwun lɛ ɖó na sɔnǔ na lɛ é bǐ nɛ Galatinu lɛ 5:22, 23 slɛ́ nɛ ǎ. Gbigbɔ Mawu tɔn sixu d’alɔ mǐ bɔ mǐ na sɔnǔ nú ‘nǔ e gbigbɔ mímɛ́ nɔ na mɛ lɛ é’ sín akpáxwé tɛnnɛ lɛ. Amɔ̌, jijɔ ɖevo lɛ tíìn bɔ é byɔ ɖɔ mǐ ni sɔnǔ nú ye cobo na nyí Klisanwun e zin lɛ é, lobo na “sɔ́ mɛ yɔyɔ̌ e Mawu bló, bɔ é cí éɖesunɔ ɖɔhun ɔ dó. Mɛ yɔyɔ̌ enɛ nɔ ɖè éɖée xlɛ́ ɖò gbɛ̀ jlɔjlɔ, gbɛ̀ mímɛ́ e nǔgbo ɔ nɔ sɔ́ dó ayi mɛ nú mɛ ɔ mɛ.”—Efɛ. 4:24.