Etɛwu Mǐ ka Ðó Na Ðó Sísí nú Acɛkpikpa Lɛ?

1, 2. (a) Nɛ̌ sísí ɖiɖó nú acɛkpikpa ka nɔ wá cí nú mǐ hweɖelɛnu? (b) Nùkanbyɔ tɛ lɛ mǐ ka na ba dò na?

ENYI è zɔ́n nǔ yɔkpɔvu ɖé bonu é ma jló na bló ǎ ɔ, a ka ko ɖó ayi lee é nɔ wà nǔ gbɔn é wu à? Lee é na nyla nukúnmɛ gbɔn é na zɔ́n bɔ a na mɔ ɖɔ nùɖé ɖò jijɛ wɛ ɖò ayi tɔn mɛ. É sè xó e mɛjitɔ́ tɔn ɖɔ é, bo tuùn ɖɔ emi ɖó na ɖó sísí nú acɛkpikpa mɛjitɔ́ emitɔn tɔn. Amɔ̌, ɖò ninɔmɛ enɛ mɛ ɔ, é ba bo na setónú ǎ kpowun wɛ. Mǐ mɛ bǐ wɛ nɔ wá mɔ mǐɖée ɖò ninɔmɛ yɔkpɔvu enɛ tɔn ɖɔhun mɛ ɖò hweɖelɛnu.

² Sísí ɖiɖó nú acɛkpikpa nɔ bɔwǔ nú mǐ hwebǐnu ǎ. A ka ko ɖó ayi wu ɖɔ sísí ɖiɖó nú mɛ e ɖó acɛ ɖé lɛ dó jǐ towe é nɔ vɛwǔ nú we hweɖelɛnu à? Enyi mɔ̌ hǔn, tuùn ɖɔ é kún nyí hwiɖokpo wɛ ó. Sísí ɖiɖó nú acɛkpikpa ɖò bubu wɛ tawun ɖò gbɛ̀ égbé tɔn mɛ. Amɔ̌, Biblu ɖɔ ɖɔ mǐ ɖó na nɔ ɖó sísí nú mɛ é ɖó acɛ dó jǐ mǐtɔn lɛ é. (Nùnywɛxó 24:21) Enyi mǐ jló na hɛn mǐɖée ɖò wanyiyi Mawu tɔn mɛ ɔ, dandan wɛ mǐ na nɔ bló mɔ̌. Nùkanbyɔ ɖé lɛ ɖíe lo: Etɛwu sísí ɖiɖó nú acɛkpikpa ka sixu vɛwǔ nú mǐ? Etɛwu Jehovah ka byɔ enɛ ɖò mǐ sí? Etɛ ka na d’alɔ mǐ bɔ mǐ na nɔ setónú hwebǐnu? Ali tɛ lɛ nu mǐ ka sixu ɖó sísí nú acɛkpikpa ɖè?

NǓ E WU É SIXU VƐWǓ É

3, 4. Nɛ̌ hwɛhuhu ka bɛ́ gbɔn? Etɛwu hwɛhutɔ́ e mǐ nyí é ka zɔ́n bɔ sísí ɖiɖó nú acɛkpikpa nɔ vɛwǔ nú mǐ?

³ Mi nú mǐ ni ɖɔ xó dó hwɛjijɔ e wu sísí ɖiɖó nú mɛ e ɖó acɛ dó mǐ jí é sixu vɛwǔ tawun é wè jí ɖò klewun mɛ. Nukɔntɔn ɔ, mǐ nyí hwɛhutɔ́; wegɔ ɔ, mɛ e nɔ ɖó acɛ dó mǐ jí lɛ é lɔmɔ̌ nyí hwɛhutɔ́. Sín hwenu e Adamu kpo Ɛvu kpo fɔ́n gǔ dó acɛkpikpa Mawu tɔn jí ɖò jikpá Edɛni tɔn mɛ é ɖokpoo wɛ gbɛtɔ́ huzu hwɛhutɔ́. Hǔn, gǔfínfɔ́n wɛ dɔn hwɛhuhu wá. Mǐ lɔ ɖu gǔ enɛ égbé, bo nɔ ba na nɔ mǐɖée sí.​—Bǐbɛ̌mɛ 2:15-17; 3:1-7; Ðɛhan 51:7; Hlɔmanu lɛ 5:12.

⁴ Ðó mǐ nyí hwɛhutɔ́ wutu ɔ, mǐ mɛ gègě nɔ yawu yigo alǒ mɔ mǐɖée. Amɔ̌, mɛɖesɔhwe wɛ nyí jijɔ e mǐ ɖó na tɛnkpɔn bo ɖó é. Jijɔ enɛ ka ɖè mɔ̌ ǎ. Enyi mǐ na bo tlɛ ko sɛ̀n Jehovah kpo gbejininɔ kpo nú xwè gègě ɔ, mǐ sixu wá jɛ ta syɛn jí, bo jɛ gò yí jí. Ði kpɔ́ndéwú ɔ, lin tamɛ kpɔ́n dó Kolée jí. É mɔ wuvɛ̌ xá togun Jehovah tɔn ɖò nǔ gègě mɛ có é ka nɔ gbeji. Amɔ̌, é wá jló bo na ɖó acɛ hú ɖee é ko ɖó é, enɛ wu ɔ, é dɔn mɛɖé lɛ bɔ ye fɔ́n gǔ dó Mɔyizi e nyí mɛɖesɔhwetɔ́ hugǎn ɖò hwe enɛ nu é jí. (Kɛ́nsísɔ́ 12:3; 16:1-3) Lɛ̌vɔ lin tamɛ kpɔ́n dó Axɔsu Oziyasi jí. Goyiyi éyɛtɔn dó cɔcɔ n’i kaka bɔ é byɔ tɛmpli Jehovah tɔn mɛ, lobo wà azɔ̌ e vɔsanúxwlémawutɔ́ lɛ wɛ ɖó na wà é. (2 Tan 26:16-21) Jehovah dɔn tó nú mɛ enɛ lɛ syɛnsyɛn ɖó gǔfínfɔ́n yetɔn wu. É ɖò mɔ̌ có, kpɔ́ndéwú nyanya yetɔn ɖó na nɔ flín mǐ mɛ bǐ ɖɔ mǐ ɖó na nɔ hɔn nú goyiyi, ɖó é wɛ nɔ zɔ́n bɔ sísí ɖiɖó nú acɛkpikpa nɔ vɛwǔ.

5. Nɛ̌ gbɛtɔ́ hwɛhutɔ́ lɛ ka nɔ zán acɛ e ye ɖó é nyì dò gbɔn?

⁵ Ðò alɔ ɖevo mɛ ɔ, gbɛtɔ́ hwɛhutɔ́ e nɔ ɖó acɛ dó mɛ jí lɛ é ɖesunɔ ko zɔ́n, bɔ è sɔ́ nɔ ɖó sísí nú ye ǎ. Ye mɛ gègě nɔ wà alànnú, nɔ zán mɛ vún, alǒ nɔ kpa acɛ ganna ganna nú mɛ. Nǔ e jɛ ɖò hwexónu lɛ é xlɛ́ céɖécéɖé ɖɔ acɛkpatɔ́ lɛ nɔ zán acɛkpikpa yetɔn nyì dò hwɛhwɛ. (Xà Nùnywɛtɔ́xó 8:9.) Ði kpɔ́ndéwú ɔ, gbɛtɔ́ ɖagbe, mɛɖesɔhwetɔ́ ɖé wɛ nú Sawulu hwenu e Mawu sɔ́ ɛ axɔsu é. É ɖò mɔ̌ có, goyiyi kpo wuhwinhwan kpo wá ɖu ɖò jǐ tɔn, bɔ é doya nú nya gbejinɔtɔ́ e nɔ nyí Davidi é tawun. (1 Samuwɛli 9:20, 21; 10:20-22; 18:7-11) Ðò gudo mɛ ɔ, David wá huzu ɖokpo ɖò axɔsu ɖagbe hugǎn e Izlayɛli ɖó lɛ é mɛ. Amɔ̌, é wá zán acɛkpikpa tɔn nyì dò, ɖó é yí Ulíi Hitíti ɔ sín asì, lobo sɛ́ xomɛvɔnɔ enɛ dó ahwan nukɔn bɔ è hu i. (2 Samuwɛli 11:1-17) É ɖò gaàn ɖɔ hwɛhutɔ́ e gbɛtɔ́ nyí é nɔ zɔ́n bɔ é nɔ sixu zán acɛkpikpa tɔn ganji ǎ. Enyi mɛ e nɔ ɖó acɛ dó mɛ jí lɛ é ma nɔ lɛ́ ɖó sísí nú Jehovah ǎ ɔ, é nɔ lɛ́ nyla hú mɔ̌. Toxóɖɔtɔ́ nukúnɖeji Grande-Bretagne tɔn ɖokpo ɖɔ: “Nǔ e jɛ hwexónu lɛ é xlɛ́ ɖɔ papa Katoliki tɔn lɛ nɔ zán acɛ e ye ɖó é dó doya nú gbɛtɔ́ lɛ.” Hwenu e mǐ na ɖò tan enɛ hɛn dó ayi mɛ wɛ é ɔ, mi nú mǐ ni ɖɔ xó dó nùkanbyɔ elɔ jí: Etɛwu mǐ ka ɖó na ɖó sísí nú acɛkpikpa?

ETƐWU MǏ KA ÐÓ NA ÐÓ SÍSÍ NÚ ACƐKPIKPA?

6, 7. (a) Etɛ wǎn e mǐ yí nú Jehovah é ka nɔ sísɛ́ mǐ bɔ mǐ nɔ wà? Etɛwu? (b) Etɛ ka nyí mɛɖée hwíhwɛ́ hwíhwɛ́?

⁶ Hwɛjijɔ taji hugǎn ɖěɖee wu mǐ ɖó na ɖó sísí nú acɛkpikpa lɛ é wɛ nyí wǎn e mǐ yí nú Jehovah, nɔzo mǐtɔn lɛ, kpo mǐɖesunɔ kpo é. Ðó mǐ yí wǎn nú Jehovah hú nǔ bǐ wutu ɔ, mǐ jló bo na hɛn xomɛ tɔn hun. (Xà Nùnywɛxó 27:11; Maki 12:29, 30.) Mǐ tuùn ɖɔ è ko dó jì Nǔbǐwukpétɔ́ e é nyí é, alǒ acɛ e é ɖó bo na ɖu gǎn dó wɛkɛ ɔ bǐ jí é sín gǔfínfɔ́n Edɛni mɛ tɔn hwenu, bɔ gbɛtɔ́ gègě ko xò kpóɖó nú Satáan bo gbɛ́ acɛkpikpa Jehovah tɔn. Xomɛ nɔ hun mǐdɛɛ tawun ɖɔ mǐ nɔ jɛhun dó Nǔbǐwukpétɔ́ e Jehovah nyí é jí. Enyi mǐ xà xógbe ɖagbeɖagbe e ɖò Nǔɖexlɛ́mɛ 4:11 mɛ lɛ é ɔ, akpàkpà ɖé nɔ sɔ́ mǐ sín xomɛ. Mǐ nɔ mɔ nǔ jɛ wu céɖécéɖé ɖɔ Jehovah wɛ ɖó na kpacɛ dó wɛkɛ ɔ jí. Mǐ nɔ nɔ gudo nú Nǔbǐwukpétɔ́ e é nyí é, lobo nɔ yí gbè nú acɛkpikpa tɔn ɖò gbɛzinzan mǐtɔn ayihɔngbe ayihɔngbe tɔn mɛ.

⁷ Sísí mɔhun nɔ byɔ tónúsíse kpo mɛɖée hwíhwɛ́ hwíhwɛ́ kpo. Mǐ nɔ sɔ́ jlǒ dó setónú nú Jehovah, ɖó mǐ yí wǎn n’i wutu. É ɖò mɔ̌ có, hweɖelɛnu nɔ wá sù bɔ tónúsíse nɔ vɛwǔ nú mǐ. Hwe mɔhun lɛ nu ɔ, mǐ ɖó na hwíhwɛ́ mǐɖée, lee yɔkpɔvu e xó mǐ ɖɔ wá yì é lɔ ɖó na bló gbɔn é. Mǐ flín ɖɔ Jezu nɔ hwíhwɛ́ éɖée dó jlǒ Tɔ́ tɔn tɔn glɔ, enyi é na bo tlɛ vɛwǔ n’i ɔ nɛ. É ɖɔ nú Tɔ́ tɔn dó kú e kú gbé é ja ɔ wu ɖɔ: “Ni ma nyí jlǒ ce ó, loɔ, ni nyí lee é jló hwɛ gbɔn é.”​—Luki 22:42.

8. (a) Etɛ mɛɖée hwíhwɛ́ hwíhwɛ́ dó acɛkpikpa Jehovah tɔn glɔ ka nɔ byɔ ɖò égbé? Etɛ ka xlɛ́ linlin e Jehovah nɔ ɖó dó ninɔmɛ enɛ wu é? (b) Etɛ ka sixu d’alɔ mǐ bɔ enyi è kplɔ́n nǔ mǐ ɔ, mǐ na nɔ ɖótó bo sè? (Kpɔ́n gbàví ɔ, “Nɔ Ðótó Kplɔ́n; È Kplɔ́n Nǔ We Hǔn Nɔ Sè.”)

⁸ É ɖò gaàn ɖɔ Jehovah nɔ ɖɔ xó nú mǐ mɛ ɖokpo ɖokpo tlɔlɔ ɖò égbé ǎ; é nɔ zán Xó tɔn kpo mɛ e nyí afɔsɔ́ɖótetɔ́ tɔn ɖò ayikúngban jí lɛ é kpo. Enɛ wu ɔ, mǐ nɔ xlɛ́ ɖɔ mǐ hwíhwɛ́ mǐɖée dó acɛkpikpa Jehovah tɔn glɔ, gbɔn sísí ɖiɖó nú mɛ enɛ lɛ e é ɖè, kabǐ tín dó bɔ ye ɖó acɛ dó mǐ jí lɛ é gblamɛ. Enyi mǐ fɔ́n gǔ dó mɛ enɛ lɛ jí ɔ, ɖi kpɔ́ndéwú ɔ, enyi mǐ gbɛ́ wěɖexámɛ kpo nǔgbɛnúmɛ junjɔn Biblu jí yetɔn lɛ kpo ɔ, mǐ na dó xomɛsin xomɛ nú Jehovah. Hwenu e Izlayɛli-ví lɛ hlun nǔ ɖɔ, bo fɔ́n gǔ dó Mɔyizi jí é ɔ, Jehovah ɖɔ ɖɔ emi wɛ ye wà nǔ enɛ lɛ na.​—Kɛ́nsísɔ́ 14:26, 27.

9. Etɛwu wǎn e mǐ yí nú nɔzo mǐtɔn lɛ é ka na sísɛ́ mǐ bɔ mǐ na nɔ ɖó sísí nú acɛkpikpa lɛ? Nǎ xlɛ̌ tɔn ɖokpo.

⁹ Mǐ nɔ lɛ́ ɖó sísí nú acɛkpikpa lɛ, ɖó mǐ yí wǎn nú nɔzo mǐtɔn lɛ wutu. Etɛwu é ka nyí mɔ̌? É nyɔ́, mǐ ni ɖɔ ɖɔ a nyí sɔja ɖò ahwangɔnu ɖé mɛ. Enyi ahwangɔnu ɔ na ɖó ɖuɖeji ɔ, é na sín lee sɔja ɖokpo ɖokpo nɔ ɖó gbè kpɔ́ xá gǎn ahwangɔnu ɔ tɔn lɛ, bo nɔ setónú, lobo nɔ ɖó sísí nú ye gbɔn é wu. Enyi a ma setónú nú ye ǎ ɔ, nǔ nyanya sixu jɛ dó sɔja hàtɔ́ towe lɛ bǐ jí. Nugbǒ wɛ ɖɔ ahwangɔnu gbɛtɔ́ lɛ tɔn lɛ nɔ hɛn nǔ gblé ɖesu ɖò gbɛ̀ ɔ mɛ égbé. Amɔ̌, hweɖelɛnu ɔ, Biblu nɔ jlɛ́ Jehovah sɛntɔ́ e ɖò ayikúngban jí lɛ é lɔmɔ̌ dó ahwangɔnu ɖé wu. Bɔ Jehovah nyí Nukɔntɔ́ nú kplékplé wɛnsagun lɛ tɔn. É ɖò mɔ̌ có, nǔ ɖagbe kɛɖɛ wɛ ahwangɔnu Jehovah tɔn lɛ nɔ wà. (Ðɛhan 68:12; Ezekiyɛli 37:1-10) Enyi mǐ nɔ fɔ́n gǔ dó mɛ e Jehovah fɔ ɖó nu mǐtɔn lɛ é jí hǔn, nǔ nyanya dɔn dó sɔja gbigbɔ mɛ tɔn hàtɔ́ mǐtɔn lɛ jí wɛ mǐ ɖè nɛ à cé? Enyi Klisanwun ɖé fɔ́n gǔ dó mɛxo agun tɔn lɛ jí ɔ, mɛ e kpò ɖò agun ɔ mɛ lɛ é lɔ sixu sún sìn tɔn. (1 Kɔlɛntinu lɛ 12:14, 25, 26) Enyi vǐ ɖé huzu gǔfɔntɔ́ ɔ, mɛ e ɖò xwédo ɔ mɛ lɛ é bǐ wɛ nɔ mɔ wuvɛ̌. Enyi mǐ nɔ tɛnkpɔn bo nɔ ɖó sísí nú acɛkpikpa lɛ, bo nɔ lɛ́ ɖó gbè kpɔ́ xá ye ɔ, é nɔ xlɛ́ ɖɔ mǐ yí wǎn nú nɔzo mǐtɔn lɛ.

10, 11. Nǔ ɖevo tɛ wu mǐ ka nɔ ɖó sísí nú acɛkpikpa lɛ?

¹⁰ Mǐ nɔ lɛ́vɔ ɖó sísí nú acɛkpikpa lɛ, ɖó lè mǐɖesunɔ tɔn wutu. Hwɛhwɛ ɔ, enyi Jehovah byɔ mǐ ɖɔ mǐ ni ɖó sísí nú mɛ e ɖó acɛ dó mǐ jí lɛ é ɔ, é nɔ lɛ́ ɖɔ lè e mǐ na mɔ ɖ’emɛ lɛ é. Ði kpɔ́ndéwú ɔ, é ɖɔ vǐ lɛ ni setónú nú mɛjitɔ́ yetɔn lɛ, enɛ ɔ, gbɛ̀ na nyɔ́ nú ye bɔ ye na lɛ́ dɔ́ji. (Sɛ́nflínmɛ 5:16; Efɛzinu lɛ 6:2, 3) É ɖɔ nú mǐ ɖɔ mǐ ni ɖó sísí nú mɛxo agun tɔn lɛ, é ma nyí mɔ̌ ǎ ɔ, kancica e ɖò mǐ kpo é kpo tɛntin é na gblé. (Eblée lɛ 13:7, 17) É lɛ́ ɖɔ mǐ ni setónú nú acɛkpikpa e ɖò tò nu lɛ é, ɖó ayijayǐ mǐɖesunɔ tɔn wutu.​—Hlɔmanu lɛ 13:4.

¹¹ A yí gbè ɖɔ enyi mǐ tuùn hwɛjijɔ e wu Jehovah jló ɖɔ mǐ ni setónú é ɔ, é nɔ d’alɔ mǐ bɔ mǐ nɔ ɖó sísí nú acɛkpikpa lɛ à cé? Enɛ wu ɔ, mi nú mǐ ni ba dò nú lee mǐ sixu ɖó sísí nú acɛkpikpa lɛ gbɔn é ɖò ali atɔn nu.

SÍSÍ ÐIÐEXLƐ́ ÐÒ XWÉDO MƐ

12. Azɔ̌ tɛ Jehovah ka zɔ́n asú ɖò xwédo mɛ? Nɛ̌ asú ɖé ka sixu wà azɔ̌ enɛ gbɔn?

¹² Jehovah ɖesunɔ wɛ ɖó tuto xwédo tɔn ayǐ. Ðó é nɔ nɔ tuto jí wutu ɔ, é tò lee nǔ lɛ na nyí gbɔn ɖò xwédo mɛ bonu é na yì ta é. (1 Kɔlɛntinu lɛ 14:33) É na acɛ asú lɛ bɔ ye na nyí ta nú xwédo ɔ. Asú ɖé nɔ xlɛ́ ɖɔ emi ɖó sísí nú Gǎn emitɔn Klisu Jezu, gbɔn xwixwedó lee Jezu nɔ zán gǎn’cɛ́ tɔn dó agun ɔ jí gbɔn é gblamɛ. (Efɛzinu lɛ 5:23) Enɛ wu ɔ, asú ɖé ɖó na hɔn jó azɔ̌ tɔn dó ǎ, loɔ, é ɖó na kpé nukún d’ewu kpo akɔnkpinkpan kpo. É ɖó na nyí acɛgannaganna-kpanúmɛtɔ́, alǒ alannuwatɔ́ ǎ; é nyɔ́ wà ɔ, é ɖó na nɔ yí wǎn nú asì tɔn kpo vǐ tɔn lɛ kpo, bo nɔ nɔ jlɛ̌ jí xá ye, lobo nɔ lɛ́ nyɔ́ xomɛ dó ye wu. É na hɛn dó ayi mɛ ɖɔ acɛ e emi ɖó é ɖó dogbó, ɖɔ é kún zɛ Jehovah tɔn wu gbeɖé ó.

13. Nɛ̌ asì ɖé ka sixu wà azɔ̌ e nyí étɔn ɖò xwédo mɛ é bɔ é na hun xomɛ nú Jehovah gbɔn?

¹³ Asì ɖé ɖó na nyí alɔgɔnúmɛtɔ́ nú asú tɔn. É lɔmɔ̌ ɖó acɛ ɖé ɖò xwédo ɔ mɛ, ɖó Biblu ɖɔ nú vǐ lɛ ɖɔ ye ni “ma hɔn nǔ e nɔ [yetɔn] nɔ kplɔ́n [ye] lɛ é nyì gbě ó.” (Nùnywɛxó 1:8) É ɖò gaàn ɖɔ acɛkpikpa tɔn ɖò asú tɔn tɔn glɔ. Asì e nyí Klisanwun é nɔ xlɛ́ sísí e é ɖó nú asú tɔn sín acɛkpikpa é, gbɔn alɔdido é bonu é na wà tatɔ́zɔ́ tɔn ɖò xwédo ɔ mɛ ganji gblamɛ. É nɔ ɖè asú tɔn kpò ǎ, é nɔ zán ayi winniwinni dó zín asú tɔn jí bonu é na wà nǔ e ba wɛ é ɖè é ǎ, é ka nɔ nyí gangannagansú ǎ. É nyɔ́ wà ɔ, é nɔ jɛhun dó jǐ tɔn, bo nɔ wà nǔ ɖó kpɔ́ xá ɛ. Enyi nǔ e jí asú ɔ site dó é ma nyɔ́ nukún tɔn mɛ ǎ ɔ, é sixu ɖɔ nǔ e é lin d’ewu é kpo sísí kpo. Amɔ̌, é ɖó na hwíhwɛ́ éɖée. Enyi asú tɔn ma nyí Kúnnuɖetɔ́ Jehovah Tɔn ǎ ɔ, tagba ɖé lɛ sixu nɔ wá wá. Loɔ, enyi é nɔ hwíhwɛ́ éɖée ɔ, enɛ sixu zɔ́n bɔ asú tɔn wá sɛ̀n Jehovah.​—Xà 1 Piyɛ́ɛ 3:1.

14. Nɛ̌ vǐ lɛ ka nɔ hɛn mɛjitɔ́ yetɔn lɛ kpo Jehovah kpo sín xomɛ hun gbɔn?

¹⁴ Enyi vǐ lɛ setónú nú tɔ́ yetɔn kpo nɔ yetɔn kpo ɔ, xomɛ Jehovah tɔn nɔ hun. Mɛjitɔ́ yetɔn lɛ lɔmɔ̌ sín xomɛ nɔ hun. (Nùnywɛxó 10:1) Ðò xwédo mɛjitɔ́ goɖokponɔ tɔn lɛ mɛ ɔ, vǐ lɛ ɖó na lɛ́ zán nugbodòdó tónúsíse tɔn ɖokpo ɔ, bo na tuùn ɖɔ tɔ́ emitɔn, alǒ nɔ emitɔn sixu jló tawun ɖɔ emi ni nɔ gudo tɔn, bo ɖó gbè kpɔ́ xá ɛ. Ðò xwédo e mɛ mɛ ɖokpo ɖokpo nɔ wà azɔ̌ e Mawu sɔ́ dó alɔ mɛ n’i é ɖè lɛ é ɔ, ye nɔ mɔ fífá kpo awǎjijɛ ɖaxó kpo. Nǔ enɛ nɔ wlí yɛ̌yi nú Jehovah Mawu, ee nyí Tɔ́ nú xwédo lɛ bǐ é.​—Efɛzinu lɛ 3:14, 15.

SÍSÍ ÐIÐEXLƐ́ ÐÒ AGUN MƐ

15. (a) Nɛ̌ mǐ ka sixu xlɛ́ ɖɔ mǐ ɖó sísí nú acɛkpikpa Jehovah tɔn gbɔn ɖò agun mɛ? (b) Nugbodòdó tɛ lɛ ka sixu d’alɔ mǐ bɔ mǐ na nyí tónúsétɔ́ nú mɛ e ɖò nu nú mǐ lɛ é? (Kpɔ́n gbàví ɔ, “Mi Setónú Nú Agunnukɔntɔ́ Lɛ.”)

¹⁵ Jehovah sɔ́ Vǐ tɔn bɔ é nyí Gǎn nú agun Klisanwun tɔn. (Kolosinu lɛ 1:13) Jezu wá ɖè ‘deví gbejinɔtɔ́, ayiɖotenanɔ’ tɔn, bonu é na kpé nukún dó togun Mawu tɔn e ɖò ayikúngban jí é sín hudo gbigbɔ tɔn lɛ wu. (Matie 24:45-47) Hagbɛ̌ Alixlɛ́mɛtɔ́ Kúnnuɖetɔ́ Jehovah Tɔn lɛ tɔn wɛ nyí ‘deví gbejinɔtɔ́, ayiɖotenanɔ ɔ.’ Lee é nyí gbɔn ɖò agun Klisanwun tɔn xwè kanweko nukɔntɔn ɔ tɔn lɛ mɛ é ɔ, Hagbɛ̌ Alixlɛ́mɛtɔ́ ɔ nɔ kplɔ́n nǔ mɛxo lɛ bo nɔ lɛ́ ɖè wě xá ye ɖò égbé. É nɔ bló mɔ̌ gbɔn wema-wlan-sɛ́dó-mɛ lɛ, alǒ afɔsɔ́ɖótetɔ́ tɔn lɛ, ɖi nukúnkpénuwutɔ́ tomɛyitɔ́ lɛ gblamɛ. Enyi mǐ mɛ ɖokpo ɖokpo nɔ ɖó sísí nú acɛkpikpa mɛxo agun tɔn lɛ tɔn hǔn, tónúsé nú Jehovah wɛ mǐ ɖè nɛ.​—Xà 1 Tɛsalonikinu lɛ 5:12; Eblée lɛ 13:17.

16. Etɛwu mǐ ka sixu ɖɔ ɖɔ gbigbɔ mímɛ́ wɛ nɔ ɖè mɛxo lɛ?

¹⁶ Hwɛhutɔ́ wɛ mɛxo lɛ kpo devizɔwatɔ́ sinsɛnzɔ́wiwa tɔn lɛ kpo nyí mǐ lɔmɔ̌ ɖɔhun. É ɖò mɔ̌ có, “nùnina” wɛ mɛxo lɛ nyí, bo na d’alɔ agun ɔ bɔ é na lidǒ ɖò gbigbɔ sín akpáxwé. (Efɛzinu lɛ 4:8, 11) Gbigbɔ mímɛ́ wɛ nɔ ɖè mɛxo lɛ. (Mɛsɛ́dó 20:28) Gbɔn nɛ̌ é? É wɛ nyí ɖɔ, sunnu mɔhun lɛ ɖó na tó ɖó jijɔ ɖěɖee gbigbɔ Mawu tɔn d’alɔ gbɛtɔ́ lɛ bɔ ye wlan dó Biblu mɛ lɛ é hwɛ̌. (1 Timɔtée 3:1-7, 12; Titu 1:5-9) Gɔ́ nú enɛ ɔ, mɛxo ɖěɖee nɔ gbéjé nɔví sunnu ɖé kpɔ́n ɖɔ é ka ɖó jijɔ enɛ lɛ à jí é nɔ xoɖɛ vívɛ́, bo nɔ byɔ ɖɔ gbigbɔ mímɛ́ Jehovah tɔn ni xlɛ́ ali emi.

17. Etɛwu Klisanwun nyɔnu lɛ ka nɔ cyɔn nǔ ta hweɖelɛnu, ɖò nǔwiwa agun tɔn yetɔn lɛ sín hwenu?

¹⁷ Ðò agun ɔ mɛ ɔ, hweɖelɛnu sixu wá sù, bɔ mɛxo kpo devizɔwatɔ́ sinsɛnzɔ́wiwa tɔn kpo ɖebǔ ɖò finɛ bo na wà azɔ̌ e ye wɛ ɖó na wà é ǎ, ɖi nukúnkpikpe dó kplé kúnnuɖegbe tɔn wu mɔ̌. Ðò ninɔmɛ mɔhun lɛ mɛ ɔ, nɔví sunnu e ko bló baptɛm é ɖevo sixu wà azɔ̌ ɔ. Enyi ɖebǔ ma ɖè ǎ ɔ, Klisanwun nyɔnu e jɛxa é ɖé sixu bló. É ɖò mɔ̌ có, enyi azɔ̌ ɖé tíìn, bɔ sunnu e ko bló baptɛm é ɖé wɛ ɖó na wà, bonu nyɔnu ɖé ɖò wiwa wɛ ɔ, é ɖó na sɔ́ nǔ cyɔn ta.a (1 Kɔlɛntinu lɛ 11:3-10) Nǔ enɛ ɖè nyɔnu lɛ kpò ǎ. É nyɔ́ wà ɔ, é hun ali nú ye bɔ ye na xlɛ́ ɖɔ emi ɖó sísí nú tuto acɛkpikpa tɔn e Jehovah sɔ́ ɖ’ayǐ, ɖò xwédo mɛ kpo agun mɛ kpo é.

SÍSÍ ÐIÐÓ NÚ ACƐKPIKPA E ÐÒ TÒ NU LƐ É

18. Tinmɛ nugbodòdó e ɖò Hlɔmanu lɛ 13:1-7 mɛ lɛ é.

¹⁸ Klisanwun nugbǒ lɛ tuùn nugbodòdó e ɖò Hlɔmanu lɛ 13:1-7 mɛ lɛ é bo nɔ setónú nú ye. (Xà.) Kaka jɛ hwenu e Jehovah na tin dó acɛkpikpa gbɛtɔ́ tɔn e ɖò tò nu lɛ é jɛ é ɔ, ye na ɖò azɔ̌ taji ɖé lɛ wà wɛ, bo na kpé nukún dó ayijayǐ wu nú toví lɛ ɖó bǎ ɖé mɛ, lobo na lɛ́ bló nǔ ɖevo e sín hudo ɖè lɛ é. Mǐ nɔ xlɛ́ ɖɔ mǐ ɖó sísí nú acɛkpikpa enɛ lɛ, gbɔn tónúsíse nú sɛ́n lɛ gblamɛ. Mǐ nɔ tɛnkpɔn bo nɔ sú takwɛ mǐtɔn lɛ, bo nɔ ɖó wema e acɛkpikpa lɛ byɔ ɖɔ è ni ɖó lɛ é, lobo nɔ lɛ́ setónú nú sɛ́n ɖebǔ e kúnkplá mǐɖesunɔ, xwédo mǐtɔn, ajɔ̌ mǐtɔn, alǒ nǔɖokan mǐtɔn lɛ é. É ɖò mɔ̌ có, enyi nǔ e acɛkpikpa e ɖò tò nu lɛ é byɔ lɛ é tɛ afɔ Mawu sín sɛ́n jí ɔ, mǐ nɔ hwíhwɛ́ mǐɖée dó glɔ̌ yetɔn ǎ. É nyɔ́ wà ɔ, mǐ nɔ ɖɔ mɛsɛ́dó lɛ ɖɔhun ɖɔ: “È ɖó na setónú nú Mawu; é nyɔ́ hú è setónú nú gbɛtɔ́.”​—Mɛsɛ́dó 5:28, 29; kpɔ́n gbàví “Acɛkpikpa Mɛ̌ Tɔn Un ka Ðó Na Setónú Na?”

19. Ali ɖevo tɛ nu mǐ ka nɔ ɖè sísí xlɛ́ acɛkpikpa e ɖò tò nu lɛ é ɖè?

¹⁹ Mǐ nɔ lɛ́ xlɛ́ sísí e mǐ ɖó nú acɛkpikpa e ɖò tò nu lɛ é ɖò lee mǐ nɔ wà nǔ xá mɛ ɖevo lɛ gbɔn é mɛ. Hweɖelɛnu ɔ, é sixu byɔ ɖɔ mǐ na kpé nǔ xá axɔsuzɔwatɔ́ lɛ tlɔlɔ. Mɛsɛ́dó Pɔlu kpé nǔ xá acɛkpatɔ́ mɔhun lɛ, ɖi Axɔsu Elodu Aglipa kpo Tokpɔngán Fɛsitusi kpo. Mɛ e wu è sixu mɔ xó ɖɔ dó lɛ é wɛ nú mɛ enɛ lɛ, có Pɔlu ɖɔ xó nú ye kpo sísí kpo. (Mɛsɛ́dó 26:2, 25) Mǐ nɔ xwedó kpɔ́ndéwú Pɔlu tɔn hwenu e mǐ kpé nǔ xá togán, alǒ kponɔ ɖé é. Ðò wemaxɔmɛ ɔ, Klisanwun lɛ ɖó na tɛnkpɔn bo ɖè sísí mɔhun xlɛ́ mɛ̌si yetɔn lɛ, gǎn wemaxɔmɛ tɔn lɛ, kpodo azɔ̌watɔ́ e ɖò wemaxɔ ɔ mɛ lɛ é kpo. É ɖò gaàn ɖɔ, mɛ e ɖi nǔ nú nǔ ɖokpo ɔ lɛ xá mǐ lɛ é kɛɖɛ wɛ mǐ nɔ ɖó sísí na ǎ; mǐ nɔ lɛ́ ɖó sísí nú mɛ e gbɛ́ wǎn nú Kúnnuɖetɔ́ Jehovah Tɔn lɛ é hwenu e mǐ kpé nùɖé xá ye é. Nugbǒ ɔ, mɛ e ma nyí Kúnnuɖetɔ́ Jehovah Tɔn ǎ lɛ é ɖó na ɖó ayi wu ɖɔ mǐ nɔ ɖó sísí nú mɛ.​—Xà Hlɔmanu lɛ 12:17, 18; 1 Piyɛ́ɛ 3:15.

20, 21. Lè tɛ lɛ sísí e sɔgbe é ɖiɖó nú acɛkpikpa lɛ ka sixu hɛn wá?

²⁰ Mɛsɛ́dó Piyɛ́ɛ wlan ɖɔ: “Mi sí gbɛtɔ́ lɛ bǐ.” (1 Piyɛ́ɛ 2:17) É nyí mɔ̌ hǔn, mi nú mǐ ni nɔ ɖó sísí jɔ sísí nú mɛ ɖevo lɛ hwebǐnu. Enyi mɛ lɛ ɖó ayi wu ɖɔ mǐ nɔ ɖó sísí jɔ sísí nú emi ɔ, é sixu jiwǔ nú ye tawun. Flín ɖɔ jujɔ enɛ ɔ vɛ́ mɔ tawun ɖò égbé. Enɛ wu ɔ, jijɔ enɛ ɔ ɖiɖexlɛ́ nyí alixo ɖokpo bɔ mǐ na gbɔn bo xlɛ́ ɖɔ mǐ ɖò tónúsé nú gbeɖiɖe Jezu tɔn elɔ wɛ: “Weziza mitɔn ni bo hɔ́n ɖò gbɛtɔ́ lɛ nukɔn, bonu ye ni mɔ nǔɖagbewiwa mitɔn lɛ, bo na dó kpa susu nú Tɔ́ mitɔn e ɖò [jixwé] é.”​—Matie 5:16.

²¹ Ðò gbɛ̀ elɔ e ɖò ablu mɛ é mɛ ɔ, gbɛtɔ́ ayijlɔjlɔnɔ lɛ ɖò weziza gbigbɔ mɛ tɔn ɔ nu wá wɛ. Enɛ wu ɔ, sísí ɖiɖexlɛ́ ɖò xwédo mɛ, ɖò agun mɛ, kpo sísí ɖiɖexlɛ́ mɛ e ɖò acɛ kpa dó tò nu wɛ lɛ é kpo sixu dɔn mɛɖé lɛ bɔ ye na wá zɔn ali xá mǐ ɖò weziza ɔ nu. Kpɔ́n lee nǔ enɛ na jiwǔ sɔ́ é! Amɔ̌, nú é ma tlɛ wá nyí mɔ̌ ǎ ɔ, jì nɔ ɖè mǐ dó nǔ ɖokpo wu. Sísí e mǐ nɔ ɖó nú gbɛtɔ́ lɛ é nɔ hun xomɛ nú Jehovah Mawu, bo nɔ lɛ́ d’alɔ mǐ bɔ mǐ nɔ hɛn mǐɖée ɖò wanyiyi tɔn mɛ. Lè tɛ ka sɔ́ sixu hugǎn enɛ?