Etɛ Hwɛɖɔzán ka Nyí?

ETƐ a ka nɔ lin dó Hwɛɖɔzán wu? Mɛ gègě nɔ lin ɖɔ gbɛtɔ́ liva mɔkpan na tò ɖò axɔsuzinkpo Mawu tɔn nukɔn, bɔ é na ɖɔ hwɛ xá mɛ ɖokpo ɖokpo, lobo na d’ajɔ mɛ ɖé lɛ bɔ ye na yì jixwé bɔ mɛ ɖevo lɛ na yì zomɛ̀. É ɖò mɔ̌ có, nǔ vo sésé wɛ Biblu ɖɔ. Biblu ɖexlɛ́ ɖɔ Hwɛɖɔzán kún nyí xɛsi sín hwenu ó, amɔ̌, hwenu nukúnɖiɖo kpo nùvɔjlaɖó kpo tɔn wɛ.

Mɛsɛ́dó Jaan ɖè lee Hwɛɖɔzán na cí é xlɛ́ ɖò Nǔɖexlɛ́mɛ 20:11, 12 mɛ bo ɖɔ: “Un mɔ axɔsuzinkpo ɖaxó wewé ɖé kpo mɛ e ɖò ayijunjɔn ɖ’eji ɔ kpo. Ayikúngban kpo jinukúnsin kpo hɔn sín nukɔn tɔn, bɔ é sɔ́ mɔ ye ǎ. Bɔ un mɔ mɛkúkú lɛ, mɛxo kpo yɔkpɔvu kpo ɖò te ɖò axɔsuzinkpo ɔ nukɔn. È hun wema ɖé lɛ. È lɛ́ hun wema ɖevo; . . . [gbɛwema] ɔ wɛ. Mɛkúkú lɛ ɔ, è ɖɔhwɛ xá ye bɔ é sɔgbe xá nǔ e ye wà bɔ è wlǎn dó wema lɛ mɛ é.” Mɛ̌ ka nyí Hwɛɖɔtɔ́ e xó è ɖɔ ɖò fí é?

Jehovah Mawu wɛ nyí Hwɛɖɔtɔ́ kpabliba gbɛtɔ́ lɛ tɔn. É ɖò mɔ̌ có, é ɖè mɛɖé bɔ é na wà hwɛɖɔtɔ́zɔ́ enɛ. Sɔgbe kpo Mɛsɛ́dó 17:31 kpo ɔ, mɛsɛ́dó Pɔlu ɖɔ ɖɔ Mawu “sɔ́ azǎn ɖokpo ɖó te, bɔ azǎn enɛ ɔ gbè ɔ, é na xwedó hwɛjujɔ, bo ɖɔhwɛ xá gbɛtɔ́ lɛ bǐ, gbɔn mɛ e éɖesunɔ ko ɖè ɖó vò ɔ jí.” Jezu Klisu e è fɔ́n sín kú é wɛ nyí Hwɛɖɔtɔ́ enɛ e è ɖè ɖó vò é. (Jaan 5:22) Hwetɛnu wɛ Hwɛɖɔzán ɔ ka na bɛ́ lo? Nɛ̌ é ka na lín sɔ?

Wema Nǔɖexlɛ́mɛ tɔn xlɛ́ ɖɔ Hwɛɖɔzán ɔ na bɛ́ ɖò Amagedɔ́ɔ́n gudo ɖò hwenu e è na ko sú kún dó nú gbɛ̀ Sataan tɔn elɔ é.a (Nǔɖexlɛ́mɛ 16:14, 16; 19:19–20:3) Ðò Amagedɔ́ɔ́n gudo ɔ, è na wlí Sataan kpo awovi tɔn lɛ kpo ɖó dò ma ɖó azan ɔ mɛ bɔ ye na nɔ mɛ kaka nú xwè afatɔ́ɔ́n. Ðò hwenɛnu ɔ, mɛ 144 000 e na yì jixwé lɛ é na ɖɔhwɛ lobo na “ɖu axɔsu xá Klisu nú xwè afatɔ́ɔ́n.” (Nǔɖexlɛ́mɛ 14:1-3; 20:1-4; Hlɔmanu lɛ 8:17) Hǔn, Hwɛɖɔzán na nyí nǔwiwa kéze ɖokpo tɔn, alǒ kplakpla jí sín nǔ ǎ, xwè afatɔ́ɔ́n wɛ é na xɔ.

Ðò xwè afatɔ́ɔ́n enɛ hwenu ɔ, Jezu Klisu na “ɖɔhwɛ xá mɛ e ɖò gbɛ̀ lɛ kpodo mɛ e ɖò kú lɛ kpan.” (2 Timɔtée 4:1) “Mɛ e ɖò gbɛ̀ lɛ” é na nyí “mɛ wɔbuwɔbu” e xò Amagedɔ́ɔ́n zlɛ lɛ é. (Nǔɖexlɛ́mɛ 7:9-17) Mɛsɛ́dó Jaan lɛ́ mɔ “mɛkúkú lɛ . . . ɖò te ɖò axɔsuzinkpo ɔ nukɔn” bɔ è na ɖɔhwɛ xá ye. Lee Jezu ko d’akpá tɔn gbɔn é ɔ, è na fɔ́n mɛkúkú lɛ. (Jaan 5:28, 29; Mɛsɛ́dó 24:15) Amɔ̌, dodonú tɛ jí è ka na ɖɔhwɛ xá mɛ lɛ bǐ ɖè?

Sɔgbe kpo nǔ e mɛsɛ́dó Jaan mɔ é kpo ɔ, “è hun wema ɖé lɛ,” bɔ “mɛkúkú lɛ ɔ, è ɖɔhwɛ xá ye bɔ é sɔgbe xá nǔ e ye wà bɔ è wlǎn dó wema lɛ mɛ é.” Nǔ e ye wà cobo kú lɛ é wɛ ka ɖò wema lɛ mɛ à? Eǒ, è na ɖɔhwɛ xá mɛ lɛ ɖò dodonú nǔ e ye ko wà cobo kú lɛ é tɔn jí ǎ. Nɛ̌ mǐ ka wà gbɔn bo tuùn mɔ̌? Biblu ɖɔ: “Mɛ e kú é sɔ́ ɖó hwɛ ɖě ɖò kɔ ǎ.” (Hlɔmanu lɛ 6:7, NW) Enɛ wu ɔ, mɛ e è na fɔ́n wá gbɛ̀ lɛ é sɔ́ na ɖó hwɛ ɖě ɖò kɔ ǎ. Hǔn, wema lɛ ɖó na nɔte nú nǔ ɖevo e Mawu na jló ɖɔ è ni wà lɛ é. Bo na dó nɔ gbɛ̀ kaka sɔyi ɔ, mɛ e na gán ɖò Amagedɔ́ɔ́n hwenu lɛ é kpo mɛ e è na fɔ́n sín kú lɛ é kpo ɖó na setónú nú sɛ́n Mawu tɔn lɛ kpo nǔ yɔyɔ̌ ɖevo e é sixu lɛ́vɔ byɔ ɖò xwè afatɔ́ɔ́n ɔ hwenu ɖɔ ye ni bló lɛ é kpo. Hǔn, è na ɖɔhwɛ xá mɛ ɖokpo ɖokpo ɖò dodonú nǔ e é na wà ɖò Hwɛɖɔzán ɔ hwenu é tɔn jí.

Hwɛɖɔzán ɔ na hun ali nú gbɛtɔ́ liva mɔkpan bɔ ye na kplɔ́n jlǒ Mawu tɔn azɔn nukɔntɔn ɔ lobo na wà nǔ sɔgbe kpo nǔ e ye na kplɔ́n lɛ é kpo. Enɛ ɔ xlɛ́ ɖɔ azɔ̌ nùkplɔnmɛ tɔn ɖaxó ɖé na tíìn. Nú è ma na ɖó nùvú ǎ ɔ, “nǔjlɔjlɔwiwa wɛ mɛ e na nɔ ayikúngban ɔ jí lɛ é na kplɔ́n dandan.” (Isaïe 26:9) É ɖò mɔ̌ có, mɛ lɛ bǐ wɛ na jló bo na wà nǔ sɔgbe kpo jlǒ Mawu tɔn kpo ǎ. Isaïe 26:10 ɖɔ: “Nú è tlɛ kú nǔblawu nú mɛ nyanya ɔ, é na kplɔ́n nǔjlɔjlɔwiwa gbeɖé ǎ. Ðò ayikúngban nǔjlɔjlɔwiwa tɔn jí ɔ, nǔ agɔ jɛn é na wà bo na mɔ lee Jehovah d’agba sɔ é ǎ.” È na sú kún dó nú mɛ nyanya enɛ lɛ kaka sɔyi ɖò Hwɛɖɔzán ɔ hwenu.—Isaïe 65:20.

Ðò vivɔnu Hwɛɖɔzán ɔ tɔn ɔ, mɛ e è na hwlɛngán lɛ é na “wá gbɛ̀” bo na huzu mɛ maɖóblɔ̌ lɛ, bɔ nǔ bǐ na vɔ ɖ’ewu. (Nǔɖexlɛ́mɛ 20:5) Hǔn, è na jla ninɔmɛ gbɛtɔ́ lɛ tɔn ɖó lee Mawu ko jló gbɔn ɖò bǐbɛ̌mɛ é ɖò Hwɛɖɔzán ɔ hwenu. (1 Kolɛntinu lɛ 15:24-28) Enɛ gudo ɔ, mɛ gbéjé kpɔ́n gudo tɔn ɖé na tíìn. È na ɖè Sataan nyite sín gankpa tɔn mɛ bo na tin bɔ é na lɛ́ tɛ́n gbɛtɔ́ lɛ kpɔ́n azɔn gudo tɔn ɔ. (Nǔɖexlɛ́mɛ 20:3, 7-10) Mɛ e na dɛ ɖ’enu lɛ é na ɖu akpá Biblu tɔn elɔ sín vivǐ: “Ayikúngban ɔ na nyí nǔjlɔjlɔwatɔ́ lɛ tɔn, bɔ ye na nɔ jí kaka sɔyi.” (Psaume 37:29) Nugbǒ ɔ, Hwɛɖɔzán ɔ na hɛn nyɔna wá nú gbejinɔtɔ́ lɛ bǐ!