Nǔɖexlɛ́mɛ 21:4: “È ná súnsún ɖasin bǐ sín nukún yětɔn mɛ”

“É ná súnsún ɖasin bǐ sín nukún yětɔn mɛ, kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́. Nǔ xóxó lɛ́ ko bú.”—Nǔɖexlɛ́mɛ 21:4, Biblu gbɛ yɔ̌yɔ́ ɔ tɔn.

“È ná súnsún ɖasin bǐ sín nukún yětɔn mɛ; kú sɔ́ ná tíin ǎ, aluwɛ sɔ́ ná tíin ǎ, alěníná sɔ́ ná tíin ǎ, wǔvɛ́ mimɔ sɔ́ ná tíin ǎ; nǔ xóxó lɛ́ ko bú.”—Nǔɖexlɛ́mɛ 21:4, MAWUXÓWÉMA.

Tínmɛ Nǔɖexlɛ́mɛ 21:4 tɔn

Ényí wǔvɛ́ kpó yajiji kpó e nɔ wa nǔ dó gbɛtɔ́ lɛ́ wú ɖo égbé lɛ́ é kɛ́ɖɛ́ wɛ Mawu dó akpá ɖɔ émí ná ɖe síin ǎ, loɔ, é ná lɛ́ ɖe nǔ e nɔ zɔ́n bɔ yě nɔ tíin é síin.

“É ná súnsún ɖasin bǐ sín nukún yětɔn mɛ.” Xó énɛ́ lɛ́ tɛ ɖɛ̌ akpá Jexóvaa tɔn e gbeyíɖɔ Ezayíi wlán bo ɖɔ Mawu ná “súnsún ɖasin sín nukún mɛ nú mɛ bǐ” é jí. (Ezayíi 25:8; Nǔɖexlɛ́mɛ 7:17) Xógbe énɛ́ lɛ́ xlɛ́ ɖɔ mɛ ɖěɖěe nɔ ya avǐ ɖó mɛvívɛ́ yětɔn ɖé kú alǒ ɖó yě ɖo wǔvɛ́ mɔ wɛ ɖó nǔ ɖěvo lɛ́ wútu é sín nǔ nɔ ɖu ayi mɛ nú Mawu tawun.

“Kú sɔ́ ná tíin ǎ.” È sixú lɛ́ tínmɛ nukɛgbe énɛ́ bɔ é ná nyí “kú sɔ́ ná ɖe ǎ” alǒ “kú sɔ́ ná hu nǔ ɖě ǎ.” Mawu dó akpá ɖɔ émí ná ɖe kú kpó wǔvɛ́ e é nɔ zɔ́n bɔ è nɔ se é kpó síin. Gɔ́ ná ɔ, fínfɔ́n sín kú mɛkúkú lɛ́ tɔn ná tíin. (1 Kɔlɛ́ntinu lɛ́ 15:21, 22) Mɔ̌ mɛ ɔ, è ná ‘sú kú sín kún dó.’—1 Kɔlɛ́ntinu lɛ́ 15:26.

“Mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́.” É nyí ɖiɖɔ wɛ akpá Mawu tɔn ɖe ɖɔ gbɛtɔ́ lɛ́ kún sɔ́ ná se wǔvɛ́ ɖěbǔ, ɖi ée mǐ nɔ se ɖo agbaza mɛ ɖo jɔwámɔ linu b’ɛ nɔ gb’akpá nú mǐ dó awǒvinú ɖé wú, alǒ ɖɔ mǐ ɖo wǔ ná gblé wɛ é ó ǎ. É nyɔ́ wa ɔ, xlɛ́xlɛ́ wɛ akpá énɛ́ ɖe ɖɔ wǔvɛ́ e hwɛhuhub kpó gǎnmaɖó mǐtɔn lɛ́ kpó nɔ zɔ́n bɔ mǐ nɔ se ɖo taglomɛ, lěe nǔ nɔ cí nú mɛ é linu kpó agbaza lixo kpó é kún sɔ́ ná ɖe ó.—Hlɔ̌manu lɛ́ 8:21, 22.

“Nǔ xóxó lɛ́ ko bú.” Nukɛgbe gǔdo tɔn énɛ́ sɛ sin xwe nú hǔzúhúzú jí wǔ e ná tíin nú gbɛtɔ́ lɛ́ é. Wěma alɔdlɛ́ndónǔ tɔn ɖé ɖɔ: “Lěe è nɔ zán gbɛ gbɔn é yɔ̌yɔ́ ɖěvo ná ɖyɔ́ lěe è nɔ zán gbɔn ɖ’ayǐ bɔ gbɛtɔ́ lɛ́ ma sixú nɔ xo gló kú, aluwɛ, avǐ kpó wǔvɛ́ kpó ǎ é.” Mɔ̌ mɛ ɔ, gbɛtɔ́ lɛ́ ná kpé wú bo ná ɖu vǐví gbɛ ninɔ káká sɔ́yi ɖo ayǐkúngban jí tɔn ɖo ninɔmɛ ɖagbe mɛ, lěe Mawu ko lin gbɔn ɖo bǐbɛ́mɛ é.—Bǐbɛ́mɛ 1:27, 28.

Nǔ e lɛ́ lɛ̌ dó Nǔɖexlɛ́mɛ 21:4 lɛ́ é

Ðo bǐbɛ́mɛ wěmata 21​gɔ́ ɔ tɔn ɔ, mɛsɛ́dó Jaan tínmɛ nǔ e é mɔ ɖo nǔmimɔ ɖé mɛ é: “Un mɔ jǐnukúnsin yɔ̌yɔ́ ɖé kpó ayǐkúngban yɔ̌yɔ́ ɖé kpó.” (Nǔɖexlɛ́mɛ 21:1) É ɖɔ xó ɖo nǔjlɛ́dónǔwú linu dó tínmɛ hǔzúhúzú mlɛ́mlɛ́ e sín xó wěmafɔ Biblu tɔn ɖěvo lɛ́ ko ɖɔ ɖ’ayǐ é. (Ezayíi 65:17; 66:22; 2 Piyɛ́ɛ 3:13) Acɛkpikpa jǐxwé tɔn Mawu tɔn alǒ “jǐnukúnsin yɔ̌yɔ́” ɔ, ná ɖyɔ́ tɛn nú acɛkpikpa gbɛtɔ́ tɔn lɛ́ bǐ, bo ná kpa acɛ dó “ayǐkúngban yɔ̌yɔ́ ɖé” jí, énɛ́ wɛ nyí akɔta gbɛtɔ́ lɛ́ tɔn yɔ̌yɔ́ e ɖo gbɛ nɔ wɛ ɖo ayǐkúngban ɔ jí é.—Ezayíi 65:21-23.

Étɛ́ ka xlɛ́ ɖɔ gbɛ ninɔ ɖo ayǐkúngban jí dó gesí wɛ nǔmimɔ énɛ́ ɖe? Nukɔntɔn ɔ, akpá Mawu tɔn bɛ́ kpó xógbe élɔ́ lɛ́ kpó: “Goxɔ Mawu tɔn ɖo kpɔ́ xá gbɛtɔ́ lɛ́.” (Nǔɖexlɛ́mɛ 21:3) Énɛ́ wú ɔ, é nyí wɛnsagun e ɖo jǐxwé lɛ́ é wɛ è dó akpá énɛ́ ná ǎ, loɔ, gbɛtɔ́ e ɖo ayǐkúngban jí lɛ́ é wɛ. Wegɔ́ ɔ, nǔmimɔ ɔ ɖɔ xó dó gbɛ e mɛ “kú sɔ́ ná tíin ǎ” ɖe é wú. (Nǔɖexlɛ́mɛ 21:4) Kú tíin ɖo jǐxwé kpɔ́n ǎ, loɔ, gbɛtɔ́ e ɖo ayǐkúngban jí lɛ́ é kɛ́ɖɛ́ wú wɛ é nɔ wa nǔ dó. (Hlɔ̌manu lɛ́ 5:14) Mɔ̌ mɛ ɔ, é sɔgbe ɖɔ è ní wá gbeta ɔ kɔn ɖɔ lěe gbɛ ná wá nɔ ɖo ayǐkúngban ɔ jí ɖo sɔgúdo é xó ɖɔ wɛ wěmafɔ énɛ́ ɖe.

Kpɔ́n video kléwún élɔ́ bo ná dó mɔ nǔ tawun tawun e jí wěma Nǔɖexlɛ́mɛ tɔn ɖɔ xó dó lɛ́ é.