Etɛ ka Nyí Wiwá Klisu Tɔn?
Xósin e Biblu na é
Mawuxówema ɔ ɖɔ xó azɔn mɔ̌kpan dó hwenu e Klisu na wá, bo na dá hwɛ nú gbɛtɔ́ e ɖò ayikúngban ɔ jí lɛ é wu.a Ði kpɔ́ndéwú ɔ, Matie 25:31-33 ɖɔ:
“Hwenu [e] nyɛ Gbɛtɔ́ví ɔ [Jezu Klisu] na lɛkɔ wá, kpodo susu kpo, ɖò wɛnsagun lɛ bǐ tɛntin ɔ, un na wá jinjɔn axɔ́suzinkpo ce jí, bɔ è na kplé akɔta lɛ bǐ ɖó nukɔn ce, bɔ un na má ye ɖó donu we, lee lɛngbɔ̌nyitɔ́ nɔ cyan lɛngbɔ̌ lɛ ɖó vo, bo nɔ cyan gbɔ̌ lɛ ɖó vo gbɔn é. Un na sɔ́ mɛ ɖagbe lɛ ɖó ɖisí ce xwé, bo na sɔ́ mɛ nyanya lɛ ɖó amyɔ ce xwé.”
Hwɛɖiɖɔ sín hwenu enɛ na nyí akpáxwé ya ɖaxó e mɔ̌hunkɔtɔn ma tíìn kpɔ́n gbeɖé ɖò hwenuxó gbɛtɔ́ tɔn mɛ ǎ é ɖé tɔn. Ya enɛ na fó kpo ahwan Haamagedɔni tɔn kpo. (Matie 24:21; Nǔɖexlɛ́mɛ 16:16) È “na sɔ́ kú mavɔmavɔ dó dɔn tó nú” kɛntɔ́ Klisu tɔn lɛ e é sɔ́ jlɛ́ dó gbɔ̌ lɛ wu é. (2 Tɛsalonikinu lɛ 1:9; Nǔɖexlɛ́mɛ 19:11, 15) Amɔ̌, “gbɛ̀ mavɔmavɔ” sín ali na hun nú mɛsɛntɔ́ tɔn gbejinɔtɔ́ lɛ, ye wɛ nyí lɛngbɔ̌ lɛ.—Matie 25:46.
Hwetɛnu Klisu ka na wá?
Jezu ɖɔ: “Mɛɖé tuùn azǎn ɔ ǎ; mɛɖé ka tuùn gan ɔ mɛ ǎ.” (Matie 24:36, 42; 25:13) É ɖò mɔ̌ có, é ɖɔ nǔ ɖěɖee na jɛ bɔ è na mɔ, b’ɛ na nyí wuntun ɖé, lobo na ɖè táan e na hun nǔ sín wiwá tɔn nu é xlɛ́ é xó.—Matie 24:3, 7-14; Luki 21:10, 11.
Klisu na zɔn gbigbɔ mɛ bo wá wɛ à, alǒ agbaza mɛ?
È fɔ́n Jezu dó agbaza gbigbɔ tɔn mɛ, é na wá ɖi nǔɖiɖó gbigbɔ tɔn ɖé, é na nyí ɖò agbaza gbɛtɔ́ tɔn mɛ ǎ. (1 Kɔlɛntinu lɛ 15:45; 1 Piyɛ́ɛ 3:18) Ðó hwɛjijɔ enɛ wu ɔ, é sɔgbe ɖɔ Jezu ɖɔ nú ahwanvu tɔn lɛ azǎn e jɛ nukɔn nú gbè e gbè è na hu i é ɖɔ: “Zaanɖé dìn ɔ, mɛ e nyí gbɛ̀ ɔ tɔn lɛ sɔ́ na mɔ mì ǎ.”—Jaan 14:19
Nukúnnúmɔjɛnǔmɛ agɔ lɛ dó wiwá Klisu tɔn wu
Nukúnnúmɔjɛnǔmɛ agɔ: Ee Biblu ɖɔ ɖɔ mɛ lɛ na mɔ Jezu “ɖò akpɔ́kpɔ́ jí jawě” é ɔ, ɖiɖɔ wɛ é ɖè ɖɔ è na mɔ Jezu cɔɔ lě.—Matie 24:30
Nǔgbo: Hwɛhwɛ ɔ, Biblu nɔ dɔn akpɔ́kpɔ́ cá xá nǔ e è ma sixu mɔ ǎ é. (Levíi ví lɛ 16:2; Kɛ́nsísɔ́ 11:25; Sɛ́nflínmɛ 33:26) Ði kpɔ́ndéwú ɔ, Mawu ɖɔ nú Mɔyizi ɖɔ: “Un na zɔn akpɔ́kpɔ́ wiwi ɖé mɛ wá gɔ̌n towe.” (Tíntɔ́n 19:9) Mɔyizi mɔ Mawu cɔɔ lě ǎ. Mɔ̌ ɖokpo ɔ, Klisu “ɖò akpɔ́kpɔ́ jí jawě” sín tinmɛ wɛ nyí ɖɔ mɛ lɛ sixu mɔ ɛ cɔɔ lě ǎ có, ye ka na tuùn ɖɔ é wá.
MNukúnnúmɔjɛnǔmɛ agɔ: Xógbe “mɛ bǐ na mɔ ɛ,” ee è zán dó ɖɔ xó dó wiwá Klisu tɔn wu ɖò Nǔɖexlɛ́mɛ 1:7 mɛ é ɔ, è ɖó na mɔ nukúnnú jɛ mɛ ɖó gbɛɖe gbɛɖe.
Nǔgbo: Ðò Biblu mɛ ɔ, è nɔ zán xókwín Glɛkigbe tɔn e è lilɛ dó “nukún,” kpo “mɔ” kpo lɛ é hweɖelɛnu nú nǔwukpíkpé nǔtuùntuùn, alǒ ayi ɖiɖó nǔɖe wu tɔn hugǎn nǔɖe mimɔ cɔɔ lě.b (Matie 13:15; Luki 19:42; Hlɔmanu lɛ 15:21; Efɛzinu lɛ 1:18) Biblu ɖɔ ɖɔ Jezu e è fɔ́n sín kú é “ɖò weziza e mɛɖé ma sixu sɛkpɔ́ ǎ é mɛ; . . . mɛɖé ka sixu mɔ ɛ . . . ǎ.” (1 Timɔtée 6:16) Hǔn, “mɛ bǐ na mɔ ɛ” sín tinmɛ wɛ nyí ɖɔ mɛ lɛ bǐ na tuùn ɖɔ Jezu wɛ nyí mɛ e gblamɛ Mawu na gbɔn bo na ɖó hwɛ nú mɛ é.—Matie 24:30
Nukúnnúmɔjɛnǔmɛ agɔ: Xó e è ɖɔ ɖò 2 Jaan 7 mɛ lɛ é xlɛ́ ɖɔ Jezu na zɔn agbaza mɛ bo wá.
Nǔgbo: Wemafɔ Biblu tɔn enɛ ɖɔ: “Adingbannɔ gegě gbakpé gbɛ̀ ɔ mɛ, bo nɔ gbɛ́ ɖɔ Jezu Klisu kún zɔn agbaza mɛ wá ó.”
Ðò mɛsɛ́dó Jaan hwenu ɔ, mɛɖé lɛ nɔ gbɛ́ ɖɔ Jezu kún zɔn agbaza mɛ wá ayikúngban jí gbɛtɔ́ ɖé ɖɔhun ó. Gnostique lɛ wɛ è nɔ ylɔ́ ye ɖɔ. È wlán 2 Jaan 7 bo na dó ɖexlɛ́ ɖɔ adingban wɛ ye ɖó.
a Mɛ gegě nɔ zán xógbe “wiwá wegɔ́” dó dó gesí wiwá Klisu tɔn, amɔ̌, xógbe enɛ ɖò Biblu mɛ ǎ.
b Kpɔ́n The New Thayer’s Greek-English Lexicon of the New Testament (1981), wexwɛ 451 kpo 470 kpo.