Ðò Nukɔn Yì Wɛ Ðò Sinsɛnzɔ́ ɔ Mɛ
1. Kpɔ́ndéwú Klisanwun xwè kanweko nukɔntɔn ɔ tɔn tɛ lɛ wɛ xlɛ́ ɖɔ mǐ ɖó na yì nukɔn ɖò sinsɛnzɔ́ ɔ mɛ?
1 Klisanwun lɛ ɖó na yì nukɔn ɖò sinsɛnzɔ́ ɔ mɛ. Nǔ e wu Jezu kplɔ́n wɛnɖagbejijlazɔ́ ɔ ahwanvu tɔn lɛ kpɛɖé kpɛɖé ɔ nɛ. (Luk. 9:1-5; 10:1-11) Nǔ ɖokpo ɔ wu wɛ Plisilu kpo Akilasi kpo dɔn Apolosu dó wǔ bo “tín Mawu sín ali ɔ mɛ n’i” ganji. (Mɛ. 18:24-26) Hwɛjijɔ ɖokpo enɛ ɔ wu wɛ Pɔlu dó wusyɛn lanmɛ nú wɛnɖagbejlatɔ́ Timɔtée e ko mɔ nǔ gègě kpɔ́n é ɖɔ é ni kpó ɖò kàn ɖó dó nùkplɔnmɛ tɔn wu wɛ bonu “mɛ bǐ na mɔ nǔ jɛ” nukɔnyiyi tɔn wu vaàn. (1 Tim. 4:13-15) Ði lee mǐ tlɛ ko ɖò Aklunɔ ɔ sɛ̀n wɛ ɖi wɛnɖagbejlatɔ́ ɖé bɔ é ma sɔ́ hwe ǎ é ɔ, mǐ ɖó na kpó ɖò nǔwukpikpé mǐtɔn lɛ hɛn kpɔ́n te d’eji wɛ.
2. Nɛ̌ mǐ ka sixu kpɔ́n dó mɛ ɖevo lɛ wu gbɔn?
2 Kpɔ́n Dó Mɛ Ðevo lɛ Wu: Ali e nu mǐ sixu hɛn nǔwukpikpé mǐtɔn lɛ kpɔ́n te ɖè é ɖokpo wɛ nyí ɖɔ mǐ ni nɔ kpɔ́n nǔ dó mɛ ɖevo lɛ wu. (Nùnywɛxó 27:17) Enɛ wu ɔ, nɔ ɖ’ayi wɛnjlatɔ́ ɖěɖee kpo hwi kpo nɔ zɔ́n lɛ é wu hwenu e ye ɖò wɛn ɔ xwlé mɛ wɛ é. Kàn nǔ tawun tawun ɖé lɛ byɔ wɛnjlatɔ́ azɔ̌tuùntɔ́ lɛ, lobo ɖótó ye ganji. (Nùnywɛxó 1:5) A nɔ bú vo ɖò lee a na ba mɛ lɛ kpɔ́n gbɔn é, lee a na bɛ́ Biblu kpinkplɔn xá ye gbɔn é, alǒ lee a na ɖ’alɔ ɖò akpáxwé sinsɛnzɔ́ ɔ tɔn ɖé lɛ mɛ gbɔn é mɛ wɛ à? Yì mɔ nukúnkpénùwùtɔ́ gbɛ̌ta kúnnuɖiɖe tɔn towe alǒ wɛnjlatɔ́ e ko mɔ nǔ kpɔ́n é ɖé, bo byɔ ɛ ɖɔ é ni kplɔ́n azɔ̌ emi. Lɛ̌ flín ɖɔ gbigbɔ mímɛ́ Jehovah tɔn sixu bló bɔ nǔwukpikpé mǐtɔn lɛ na kpɔ́n te, enɛ wu ɔ, nɔ xoɖɛ bo nɔ byɔ hwɛhwɛ.—Luk. 11:13.
3. Enyi è ɖè wě xá mǐ ɔ, nɛ̌ mǐ ka sixu wà nǔ gbɔn, nú mǐ ma tlɛ byɔ ǎ ɔ nɛ?
3 Enyi è ɖè wě xá we dó lee a na yì nukɔn gbɔn é wu hǔn, xomɛ ni ma sín we ó, nú a ma tlɛ byɔ ǎ ɔ nɛ. (Nùnywɛtɔ́xó 7:9) Apolosu ɖɔhun ɔ, sɔ́ hwiɖée hwe bo yí gbè nú wěɖexámɛ ɔ bonu é lɛ́ sù nukún towe mɛ. Mɔ̌ wiwa nɔ xlɛ́ ɖɔ è nyɔ̌nùí.—Nùnywɛxó 12:15.
4. Hwɛjijɔ taji tɛ wu mǐ ka na nɔ ɖò nukɔn yì wɛ ɖò wɛnɖagbejijlazɔ́ ɔ mɛ bɔ Jezu ɖɔ?
4 Nukɔnyiyi Nɔ Kpa Susu nú Mawu: Gbɔn nùjlɛdonǔwu ɖé gblamɛ ɔ, Jezu dó wusyɛn lanmɛ nú ahwanvu tɔn lɛ ɖɔ ye ni yì nukɔn ɖò sinsɛnzɔ́ ɔ mɛ. É zé éɖée jlɛ́ dó viwuntín ɖé wu bɔ ahwanvu tɔn yí ami dó ɖè lɛ nyí ala lɛ. É ɖɔ ɖɔ Tɔ́ ɔ nɔ jlá ala e nɔ na sínsɛ́n lɛ é ɖó, “bonu é na sixu lɛ́ sɛ́n d’eji.” (Jaan 15:2) Ði lee viwunglenɔ ɖé nɔ jló ɖɔ viwuntín emitɔn lɛ ni nɔ na sínsɛ́n d’eji é ɔ, mɔ̌ jɛn Jehovah lɔ nɔ jló ɖɔ mǐ ni ɖò nukɔn yì wɛ ɖò nǔwukpikpé mǐtɔn bo na “sɔ́ nu mǐtɔn dó kpa susu” nú emi na mɛ é nɛ. (Ebl. 13:15) Etɛ mɛ nukɔnyiyi ɖò wɛnɖagbejijlazɔ́ ɔ mɛ ka nɔ tɔ́n kɔ dó? Jezu na mǐ xósin ɔ: “Enyi mi na sínsɛ́n gègě ɔ, susu wɛ é na nyí nú Tɔ́ ce.”—Jaan 15:8.