Ayi Tɔn Ðò Te Bɔ É Wà Nùnywɛnú

1-3. (a) Etɛwu awovinú ka ja jijɛ dó xwédo Abigayilu tɔn jí gbé? (b) Etɛ mǐ ka na kplɔ́n dó nyɔnu nukúnɖeji enɛ wu?

ABIGAYILU mɔ ɖɔ xɛsi ɖò dɔnkpɛvu ɔ jí. É ka na ɖi xɛsi ɔ, nǔ ɖò gaàn wɛ. Awovinú ɖé wɛ ɖò na jɛ wɛ. Ðó, ahwanfuntɔ́ 400 mɔ̌ ɖò ali jí ja, bo kanɖeji ɖɔ emi na hu Nabalu e nyí Abigayilu sín asú é kpo sunnu e ɖò xwé tɔn gbé lɛ é bǐ kpo. Ðó aniwu?

² Nabalu wu wɛ nǔ ɔ bǐ sín. É ko lɛ́ xò daka bo lɛ́ dó mɛmasigbé lee é ko nyí aca tɔn gbɔn é. Amɔ̌ dìn tɔn ɔ, é sixu kpa ɛ ǎ, ɖó Davidi e ɖò ahwangɔnu gbejinɔtɔ́ e tuùn azɔ̌ ganji e nu é wɛ é zun. Dɔnkpɛvu e nɔ w’azɔ̌ nú Nabalu é ɖokpo yí mɔ Abigayilu, ɖó é ganjɛwu ɖɔ é na mɔ wlɛnwín ɖé bo na hwlɛn ye gan. Amɔ̌, ani nyɔnu tósí ka sixu wà ɖò ahwangɔnu ɖé nukɔn?

³ Mǐ ni tó ɖɔ xó kpɛɖé dó nyɔnu nukúnɖeji enɛ wu hwɛ̌. Mɛ̌ ka nyí Abigayilu tawun? Nɛ̌ tagba e xó ɖɔ wɛ mǐ ɖè dìn é ka fɔ́n gbɔn? Etɛ nùɖiɖi tɔn ka sixu kplɔ́n mǐ?

“Nyɔnu ɔ Ðó Nùnywɛ, Bo Lɛ́ Nyɔ́ Ðɛkpɛ Ðesu”

4. Gbɛtɔ́ alɔkpa tɛ Nabalu ka nyí?

⁴ Abigayilu kpo Nabalu kpo jɛxa yeɖée ɖebǔ ǎ. Abigayilu ɔ, nyɔnu jɔ nyɔnu wɛ, amɔ̌, asú e é da é ɔ, xú wɛ nyí bo xá kɔ n’i. Nugbǒ wɛ ɖɔ nya ɔ dɔkunnɔ wɛ, bo nɔ mɔ éɖée dó mɔ mɛjɔmɛ. Amɔ̌, nukún tɛ mɛ ɖevo lɛ ka nɔ sɔ́ dó kpɔ́n ɛ? Mɛ e wu Biblu ɖɔ xó nyanya sɔmɔ̌ dó é sù ɖebǔ ǎ. Nyikɔ tɔn sín tinmɛ ɖesu ko xlɛ́ mɔ̌, é wɛ nyí: “Xlonɔ,” alǒ “Gɔgɔnɔ.” É sixu ko nyí ɖɔ mɛjitɔ́ tɔn lɛ wɛ sun nyǐ enɛ ɛ hwenu e ye jì i é, alǒ nǔwiwa tɔn lɛ wɛ wá ɖó nyikɔ enɛ n’i. É na bo nyí gbɔn ɖebǔ ɔ, nyikɔ enɛ sɔgbe xá nǔwiwa tɔn lɛ. Nabalu “nylahun, bo nɔ xò daka.” É nɔ doya nú mɛ bo nɔ lɛ́ nu ahan mú, mɛ gègě nɔ ɖi xɛsi dó wutu tɔn bo nɔ lɛ́ gbɛ́ wǎn n’i.—1 Sam. 25:2, 3, 17, 21, 25.

5, 6. (a) Jijɔ ɖagbe hugǎn tɛ lɛ Abigayilu ka ɖó? (b) Aniwu Abigayilu ka sixu ko da nya nùvɔnɔ mɔhun?

⁵ Abigayilu ka gbɔn vo nú Nabalu bǐ mlɛ́mlɛ́. Nyikɔ tɔn sín tinmɛ wɛ nyí: “Tɔ́ Ce Dó Awǎjijɛ nú Éɖée.” Mɛjitɔ́ gègě nɔ gó, ɖó ye ɖó vǐ nyɔnu ɖɛkpɛɖɛkpɛ wutu, amɔ̌, mɛjitɔ́ e nyɔ̌nùí lɛ é ɔ, ɖɛkpɛ nyìnyɔ́ xomɛ tɔn vǐ yetɔn tɔn wɛ nɔ dó awǎjijɛ nú ye hugǎn. Hwɛhwɛ ɔ, mɛ e nyɔ́ ɖɛkpɛ lɛ é nɔ mɔ ɖɔ é kún ɖò dandan ɖɔ emi ni tɛnkpɔn bo ɖó jijɔ lěhun lɛ ó: ayiɖote, nùnywɛ, akɔnkpinkpan alǒ nùɖiɖi. Abigayilu tɔn ka nyí mɔ̌ ǎ. Biblu ɖɔ ɖɔ gɔ́ nú ɖɛkpɛ e é nyɔ́ é ɔ, ayi tɔn lɛ́ ɖò te.—Xà 1 Samuwɛli 25:3.

⁶ Mɛɖé lɛ sixu kanbyɔ ɖɔ: ‘Aniwu ɖyɔvǐ bíbí mɔhun ka wá yì da nya nùvɔnɔ ɖé?’ Flín ɖɔ ɖò hwenu e è wlan Biblu ɔ é ɔ, alɔwliwli gègě tíìn bɔ mɛjitɔ́ lɛ wɛ bló tuto tɔn. Enyi mɛjitɔ́ lɛ ma yí gbè tɔn ǎ ɔ, alɔ ɔ nɔ vɛ́ wlí. Mɛjitɔ́ Abigayilu tɔn lɛ ka yí gbè nú alɔwliwli enɛ alǒ tlɛ bló tuto tɔn, ɖó Nabalu nyí dɔkunnɔ bo lɛ́ nyí mɛ nukúnɖeji wutu wɛ à? Ya wɛ ma ka na gbɔn ye ǎ bɔ ye gbɔ bo yí gbè na à? É na bo nyí gbɔn ɖebǔ ɔ, Nabalu sín dɔkun zɔ́n bonu é nyí asú ɖagbe ǎ.

7. (a) Enyi mɛjitɔ́ lɛ jló na kplɔ́n linlin e sɔgbe é vǐ yetɔn lɛ dó alɔwliwli wu ɔ, etɛ ye ka ɖó na nyì alɔ na? (b) Etɛ Abigayilu ka ɖò gbesisɔmɛ bo na wà?

⁷ Mɛjitɔ́ nùnywɛtɔ́ lɛ nɔ d’alɔ vǐ yetɔn lɛ céɖécéɖé bonu ye ni ɖó linlin e sɔgbe é dó alɔwliwli wu. Ye nɔ dó cɔcɔ nú vǐ yetɔn lɛ bonu ye ni yawu d’asú alǒ d’asì hwenu e ye ma ko ɖó xwè tɔn ǎ é ǎ, mɔ̌ jɛn ye ma ka nɔ lɛ́ zín ye jǐ bonu ye ni yí da mɛɖé ɖó akwɛ wutu ǎ é nɛ. (1 Kɔ. 7:36, NW) Amɔ̌, Abigayilu sɔ́ sixu lin nǔ mɔhun dìn ǎ. É na bo nyí hwɛjijɔ ɖebǔ wutu wɛ ɔ, é ko da Nabalu bo ɖò gbesisɔmɛ bo na wà nǔ e wu é kpé lɛ é bǐ bo dɛ ɖò wuvɛ̌ e mɔ wɛ é ɖè lɛ é nu.

“Gǎn Mǐtɔn Yí Ye Ganji Ǎ”

8. Mɛ̌ Nabalu ka zun? Etɛwu a ka mɔ ɖɔ é kún nyí nùnywɛnú ɖebǔ ó?

⁸ Nabalu ko lɛ́ dó wuvɛ̌ wuvɛ̌ jí nú Abigayilu tawun. Davidi wɛ nyí mɛ e é zun é. Davidi nyí Jehovah sɛntɔ́ gbejinɔtɔ́ ɖé, bɔ gbeyiɖɔ Samuwɛli kɔn ami dó ta n’i bo dó ɖexlɛ́ ɖɔ é wɛ Mawu sɔ́, bɔ é na jɛ axɔsu Sawulu tɛnmɛ. (1 Sam. 16:1, 2, 11-13) Davidi ɖò hinhɔn nú Axɔsu Sawulu wǔhwantɔ́ mɛhutɔ́ ɔ wɛ, bɔ é kpo ahwanfuntɔ́ gbejinɔtɔ́ tɔn 600 lɛ kpo wá yì cí gbetótló mɛ.

9, 10. (a) Wuvɛ̌ tɛ lɛ Davidi kpo mɛ tɔn lɛ kpo ka ɖó na ɖí xwi xá? (b) Etɛwu nǔ e Davidi kpo mɛ tɔn lɛ kpo wà é ka ɖó na sù Nabalu nukúnmɛ? (Lɛ̌ kpɔ́n akpáxwé 10gɔ́ ɔ sín tinmɛ dò tɔn.)

⁹ Nabalu nɔ nɔ Mawɔni, amɔ̌, é cí ɖɔ é ɖó ayikúngban bɔ é sɛkpɔ Kaamɛli bo nɔ w’azɔ̌ ɖò finɛ.a Nabalu ɖó lɛngbɔ̌ 3000 bɔ toxo enɛ lɛ ka ɖò kpó jí bo nyɔ́ bɔ è hɛn ɔ, è na nyì kanlin ɖ’eji. Amɔ̌, mɛ ɖě ka nɔ lɛ̀ gle gbɔn xá enɛ lɛ mɛ ǎ. Gbetótló ɖaxó Palani tɔn ɖò tofɔligbé. Ðò zǎnzǎnhweji ɔ, ali e yì Xù Kúkú ɔ kɔn é gbɔn gbetótló e mɛ tɔdo kpo sókan lɛ kpo sukpɔ́ ɖè é. Davidi kpo mɛ tɔn lɛ kpo ɖó na xò kàn ɖesu cobo nɔ gbɛ̀ ɖò gbě enɛ lɛ jí. É ɖò gaàn ɖɔ ye nɔ xò kàn tawun cobo nɔ mɔ nǔ ɖu; ye ka ɖó na lɛ́ dɛ ɖò wuvɛ̌ gègě ɖevo lɛ nu. Ye nɔ mɔ lɛngbɔnyitɔ́ Nabalu dɔkunnɔ ɔ tɔn lɛ hwɛhwɛ.

¹⁰ Nɛ̌ ahwanfuntɔ́ azɔ̌syɛnsyɛnwatɔ́ enɛ lɛ ka wà nǔ gbɔn xá lɛngbɔnyitɔ́ lɛ? Ye hɛn ɔ, ye na ko nɔ fin lɛngbɔ̌ lɛ ɖokpo ɖokpo có, ye ka wà mɔ̌ ǎ. É nyɔ́ wà ɔ, ye nya xɛ ɖò Nabalu sín kanlin lɛ kpo mɛsɛntɔ́ tɔn lɛ kpo jí. (Xà 1 Samuwɛli 25:15, 16.) Adǎn gègě wɛ nɔ gbò lɛngbɔ̌ kpo lɛngbɔnyitɔ́ lɛ kpo. Adankanlin lɛ sukpɔ́ lobɔ ajotɔ́ lɛ lɔ ka nɔ yawu gbà mɛ, ɖó dogbó tofɔligbé Izlayɛli tɔn tɔn sɛkpɔ ye tawun wutu.b

11, 12. (a) Nɛ̌ Davidi ka xlɛ́ ɖɔ emi wlí yɛ̌yi nú Nabalu bo lɛ́ ɖó sísí n’i hwenu e é sɛ́ wɛn dó é ɔ gbɔn? (b) Etɛ ka nyla ɖò lee Nabalu yí mɛ e Davidi sɛ́dó é lɛ é gbɔn é mɛ?

¹¹ Nùɖuɖu nina mɛ enɛ lɛ bǐ ɖò gbetótló mɛ na nyí jɛ bɔ è na kán ɖu ǎ. Enɛ wu wɛ Davidi sɛ́ mɛ wǒ dó Nabalu bonu ye na yí byɔ alɔdo. Davidi ba hwenu e ye na yì dó bɔ é na nyɔ́ hugǎn é. Fún kpíkpá nú lɛngbɔ̌ lɛ sín xwè hwenu wɛ; hwenɛnu wɛ gbɛtɔ́ lɛ nɔ yawu na nǔ mɛ. Davidi lɛ́ xwè sɔ dó cyan xógbe tɔn lɛ, bo ɖɔ xó sɛ́dó é kpo sísí kpo. É tlɛ ylɔ éɖée ɖɔ “nyɛ mɛsɛntɔ́ tɔn Jɛsée ví ɔ,” vlafo bo dó sɔ́ mɛxo tɛnmɛ e Nabalu ɖè é n’i. Amɔ̌, nɛ̌ Nabalu ka wà nǔ gbɔn?—1 Sam. 25:5-8.

¹² Xomɛ sìn i bɔ é “yí ye ganji ǎ.” Lee dɔnkpɛvu e xó mǐ ɖɔ ɖò bǐbɛ̌mɛ é tín nǔ e jɛ é mɛ nú Abigayilu gbɔn é nɛ. Nabalu gwěnɔ ɔ gbɛ́ ɖɔ emi kún na na wɔxúxú, sìn kpo lan emitɔn lɛ kpo ɖě ye ó, ɖó nǔ enɛ lɛ xɔ akwɛ ɖò nukún tɔn mɛ tawun. É mɔ Davidi dó mɔ nùvɔnɔ ɖé bo ko, é lɛ́ sɔ́ ɛ jlɛ́ dó mɛsɛntɔ́ e hɔn jɛ gbě é ɖé wu. Nabalu sixu ko ɖó linlin ɖokpo ɔ e Sawulu wangbɛnumɛtɔ́ ɔ ɖó dó Davidi wu é. Amɔ̌, ye mɛ wè enɛ lɛ ɖebǔ ɖó linlin Jehovah tɔn ǎ. Éyɛ yí wǎn nú Davidi bo nɔ mɔ ɛ dó mɔ axɔsu Izlayɛli tɔn sɔgudo tɔn ɔ. É nɔ mɔ ɛ dó mɔ mɛsɛntɔ́ gǔfɔntɔ́ ɖé ǎ.—1 Sam. 25:10, 11, 14.

13. (a) Nɛ̌ Davidi ka jló na wà nǔ gbɔn hwenu e mɛ tɔn lɛ wá ɖó gbè n’i é? (b) Etɛ nugbodòdó e ɖò Jaki 1:20 mɛ é ka kplɔ́n mǐ dó nǔwiwa Davidi tɔn wu?

¹³ Ee mɛ e Davidi sɛ́dó lɛ é wá ɖó gbè nú Davidi é ɔ, xomɛ sìn i ɖesu. Bɔ é ɖegbe ɖɔ: “Mɛ ɖokpo ɖokpo ni bla hwǐ tɔn.” Davidi kpo ahwanfuntɔ́ tɔn 400 kpo sɔ́ ahwan nú bo tɔ́n Nabalu gbé. Ye kanɖeji ɖɔ emi na hu sunnu e ɖò Nabalu xwé lɛ é bǐ. (1 Sam. 25:12, 13, 21, 22) Hwɛ Davidi tɔn jɔ bɔ é na sìn xomɛ, amɔ̌, nǔ e é lin na wà é sɔgbe ǎ. Ðó Biblu ɖɔ: “Mɛ e sìn xomɛ ɔ nɔ wà nǔ e sɔgbe ɖò Mawu nukúnmɛ é ǎ.” (Ja. 1:20) Amɔ̌, nɛ̌ Abigayilu ka sixu hwlɛn xwédo tɔn gbɔn?

‘Un Dokú nú Hwi Mɛ E Ðó Nùnywɛ É’

14. (a) Ali tɛ nu Abigayilu ka wà nǔ bo jla nǔ nyanya e Nabalu wà é ɖó ɖè? (b) Nǔ ɖagbe tɛ vogbingbɔn e ɖò Nabalu kpo Abigayilu kpo tɛntin é ka sixu kplɔ́n mǐ?

¹⁴ Ðò ali ɖé nu ɔ, Abigayilu ko wà nùɖé bo jla nǔ nyanya e jɛ é ɖó. Abigayilu gbɔn vo nú asú tɔn Nabalu, ɖó é ɖò gbesisɔmɛ bo na ɖótó mɛ. Mɛsɛntɔ́ Nabalu tɔn ɖɔ dó wutu tɔn ɖɔ: “Eɖíe ka nyí mɛɖé, bɔ jijɔ tɔn ma nyɔ́ ɖebǔ, bonu è na sixu glá ɖɔ xó ɖé n’i ǎ é.” (1 Sam. 25:17) É blawu ɖɔ lee Nabalu nɔ mɔ éɖée sɔ́ é zɔ́n bɔ é nɔ ba na ɖótó mɛɖé ǎ. Égbé dìn ɔ, mɔ̌ jɛn goyiyi mɔhun lɛ́ gbakpé gbɛ̀ ɔ mɛ é nɛ. Amɔ̌, dɔnkpɛvu ɔ tuùn ɖɔ Abigayilu gbɔn vo, nǔ e wu é yí ɖɔ xó ɔ n’i é nɛ.

15, 16. (a) Nɛ̌ Abigayilu ka ɖexlɛ́ ɖɔ emi cí nyɔnu jɔ nyɔnu e wema Nùnywɛxó tɔn jlɛ́ é ɖɔhun gbɔn? (b) Etɛwu nǔ e Abigayilu wà é ma ka xlɛ́ ɖɔ é fɔ́n gǔ dó asú tɔn jí ǎ?

¹⁵ Abigayilu yawu lin tamɛ bo wà nǔ. Biblu ɖɔ: “É yawu.” Mǐ mɔ ɖò tan ɔ mɛ azɔn ɛnɛ ɖɔ Abigayilu yawu wà nǔ. É bló tuto nùnina gègě tɔn nú Davidi kpo mɛ tɔn lɛ kpo. Wɔxúxú, vɛɛn, gbɔ̌, nǔkún mimɛ, viwun xúxú kpo fígi mlìmlí kpo ɖò nùnina enɛ lɛ mɛ. É ɖò wɛn ɖɔ Abigayilu nyí xwési ɖagbe ɖé bo tuùn nǔ e ɖò xwé ɔ gbè lɛ é ganji. É cí nyɔnu jɔ nyɔnu e wema Nùnywɛxó tɔn wá jlɛ́ é ɖɔhun. (Nùnywɛxó 31:10-31) É fɔ nùnina lɛ nú mɛsɛntɔ́ tɔn lɛ bɔ ye jɛ nukɔn bɔ éyɛ wá jɛ gudo yetɔn. “É ka ɖɔ xó ɖebǔ nú asú tɔn ǎ,” wɛ Biblu ɖɔ.—1 Sam. 25:18, 19.

¹⁶ Enɛ ka xlɛ́ ɖɔ Abigayilu fɔ́n gǔ dó asú tɔn e nyí gǎn tɔn é jí wɛ à? Eǒ. Flín ɖɔ nǔ e Nabalu wà nú mɛsɛntɔ́ yí ami dó ɖè Jehovah tɔn é kún nyɔ́ ɖebǔ ó, bɔ enɛ sixu ko zɔ́n bɔ xomɛvɔnɔ gègě na kú ɖò Nabalu sín xwégbe. Enyi Abigayilu ma ko wà mɔ̌ ǎ ɔ, é lɔ ka sixu ko hɛn nǔ e asú tɔn wà é sín agban à cé? Ðò ninɔmɛ elɔ mɛ ɔ, é ɖó na setónú nú Mawu hú asú tɔn.

17, 18. Nɛ̌ Abigayilu ka wà nǔ gbɔn hwenu e é mɔ Davidi é? Etɛ é ka ɖɔ n’i? Etɛ ka zɔn bɔ xó tɔn lɛ w’azɔ̌?

¹⁷ Zaanɖé ɔ, Abigayilu kpé Davidi kpo mɛ tɔn lɛ kpo. É lɛ́ yawu jɛte sín tócí tɔn jí bo xwè agbɔnnúsú dò ɖò Davidi sá mɛ bo ɖèkɔ́. (1 Sam. 25:20, 23) Enɛ gudo ɔ, é ɖɔ nǔ e ɖò ayi tɔn mɛ é bǐ nú Davidi, bo byɔ ɛ ɖɔ é ni kú nǔblawu nú asú emitɔn kpo xwédo emitɔn kpo. Etɛ ka zɔ́n bɔ xó tɔn lɛ w’azɔ̌?

¹⁸ É yí nǔ e jɛ lɛ é sín agban ɖó ta bo byɔ Davidi ɖɔ é ni sɔ́ hwɛ kɛ emi. É yí gbè ɖɔ asú emitɔn nyí gɔgɔnɔ lee nyikɔ tɔn xlɛ́ gbɔn é, bo ɖɔ nú Davidi vlafo ɖɔ enyi é jɛ gbɛtɔ́ mɔhun gudo ɔ, é na sɔ́ éɖée kɔn nyì ayǐ. É ɖexlɛ́ ɖɔ emi ɖeji ɖɔ Davidi nyí afɔsɔ́ɖótetɔ́ Jehovah tɔn bo nɔ “fun ahwan n’i.” É lɛ́ xlɛ́ ɖɔ emi tuùn axɔsuɖuɖu sín akpá e Jehovah dó nú Davidi é, ɖó é ɖɔ: ‘Jehovah na sɔ́ we ɖó Izlayɛli togun ɔ nu.’ Gɔ́ nú enɛ ɔ, é lɛ́ ɖɔ nú Davidi ɖɔ é ni ma wà nǔ ɖebǔ bo wá ɖu hun xɔ, bonu ayi tɔn wá xò hun xá ɛ ó. (Xà 1 Samuwɛli 25:24-31.) Xó enɛ lɛ byɔ ayi mɛ nú mɛ tawun!

19. Ee Abigayilu ɖɔ xó fó é ɔ, nɛ̌ Davidi ka wà nǔ gbɔn? Etɛwu é ka kpa ɛ?

¹⁹ Nɛ̌ Davidi ka wà nǔ gbɔn? É yí nǔ e Abigayilu hɛn wá lɛ é bo ɖɔ: “Un dokú nú Mawu Izlayɛli tɔn e sɛ́ we dó, bɔ a wá kpé mì égbé dìn é. Un dokú nú hwi lɔmɔ̌; hwi mɛ e ɖó nùnywɛ, bo hɛn mì ɖó te, bɔ un ma kɔn hun kɔn nyì ayǐ dó ba hwɛjijɔ nú nyɛɖée ǎ é.” Davidi kpa ɛ ɖó lee é kpankɔ́n bo yawu wá kpé é gbɔn é wu, bo lɛ́ yí gbè ɖɔ é zɔ́n bɔ emi kún kɔn hun kɔn nyì ayǐ ó. É ɖɔ n’i ɖɔ: “A na yì xwé ɖagbe,” bo lɛ́ sɔ́ éɖée hwe, bo ɖɔ: “Un sè xó e a ɖɔ ɔ.”—1 Sam. 25:32-35.

“Un Na Huzu Kannumɔ nú Sɛ́ Ce”

20, 21. (a) Etɛ ka dɔn we ɖò lee Abigayilu ɖò gbesisɔmɛ bo lɛkɔ yì asú tɔn gɔ́n é mɛ? (b) Nɛ̌ hwenu e Abigayilu ba dó ɖɔ xó nú Nabalu é ka xlɛ́ ɖɔ é kpankɔ́n bɔ ayi tɔn ɖò te gbɔn?

²⁰ Ee Abigayilu gosin finɛ gudo é ɔ, é sixu ko lin nǔ kpɔ́n dó xóɖɔɖókpɔ́ enɛ jí bo na ko ɖó ayi wu ɖɔ vogbingbɔn ɖò nya gbejinɔtɔ́ xomɛnyɔtɔ́ enɛ kpo asú kanɖutɔ́ e é da é kpo tɛntin. Amɔ̌, é lin nǔ kpɔ́n dó nǔ mɔhun jí dingan ǎ. Biblu ɖɔ ɖɔ Abigayilu wá yì xwégbe. É lɛkɔ wá yí asú tɔn gɔ́n bo lɛ́ kanɖeji bǐ mlɛ́mlɛ́ bo na wà nǔ e wu é kpé lɛ é bǐ bo na nyí asì ɖagbe n’i. É ɖó na ɖɔ nùnina e é hɛn yí jó nú Davidi kpo mɛ tɔn lɛ kpo é n’i. Nabalu ɖó acɛ bo na sè. Abigayilu ɖó na lɛ́ ɖɔ awovi e é yì kpá é n’i. É ma nyí mɔ̌ ǎ bonu é yí sè ɖò fí ɖevo ɔ, é na nyí winnyanú tawun. É ɖò mɔ̌ có, é sixu lɛ́ ɖɔ n’i tlolo ǎ, ɖó é ko ɖò agɔ̌ ɖu wɛ axɔsu ɖé ɖɔhun bo ko nu ahan mú bǐ vɛ́jɛ́vɛ́jɛ́.—1 Sam. 25:36.

²¹ É lɛ́ xlɛ́ ɖɔ emi kpankɔ́n bɔ ayi emitɔn lɛ́ ɖò te, ɖó é nɔte kaka jɛ ayihɔngbe tɔn zǎnzǎn hwenu e ahan ɔ hɔ́n n’i é. Enɛ ɔ, ayi tɔn na ɖò te céɖécéɖé bɔ é na ɖótó é, é ɖò mɔ̌ có, é ka sixu lɛ́ zɔ́n bɔ é lɛ́ nyla hun d’eji. Amɔ̌, é kpɔ́n enɛ ǎ, é sɛkpɔ ɛ bo ɖɔ nǔ e jɛ é bǐ n’i. Abigayilu sixu ko ɖó nukún ɖɔ é na jɛ adǎn, bo sixu lɛ́ xò emi. Amɔ̌, nǔ ka nyí mɔ̌ ǎ, é nyɔ́ wà ɔ, é junjɔn ayǐ, bo sɔ́ sixu xò nǔ ɖò wǔ ǎ.—1 Sam. 25:37.

22. Etɛ ka jɛ dó Nabalu wu? Etɛ nǔ e ɖò te kpɔ́n mɛ e nɔ doya alǒ kpa acɛ ganna ganna nú mɛ gbɔn alɔkpa ɖebǔ ɖò xwédo mɛ é ka sixu kplɔ́n mǐ?

²² Etɛ ka jɛ dó Nabalu wu? “Nabalu sín hǔn zɛ, bɔ é sɔ́ sixu xò nǔ ɖò wǔ ǎ.” Vlafo é sixu ko bú dó éɖée. Azǎn wǒ gudo ɔ, é kú. Azɔn wɛ é jɛ dandan cobonu nǔ nyí mɔ̌ ǎ. Tan ɔ ɖɔ nú mǐ ɖɔ: “Mawu Mavɔmavɔ sín alɔ jɛ Na[b]alu wu bɔ é kú.” (1 Sam. 25:38) Hwɛɖónúmɛ enɛ e sɔgbe é zɔ́n bɔ wuvɛ̌ Abigayilu tɔn lɛ wá vivɔnu. Nugbǒ wɛ ɖɔ Jehovah sɔ́ nɔ ɖó kú hwɛ nú mɛ gbɔn nùjiwǔ gblamɛ égbé ǎ, amɔ̌, tan enɛ flín mǐ ɖɔ enyi mɛɖé nɔ doya alǒ kpa acɛ ganna ganna nú mɛ gbɔn alɔkpa ɖebǔ ɖò xwédo mɛ ɔ, Jehovah nɔ ɖó ayi wu. Bɔ hwetɔnnu wá sù ɔ, é na ɖó hwɛ nú mɛ ɔ géé.—Xà Luki 8:17.

23. Nyɔna ɖevo tɛ Abigayilu ka mɔ? Nɛ̌ é ka xlɛ́ ɖɔ é kpó ɖò éɖée sɔ́ hwe wɛ hwenu e ali hun n’i bɔ é na huzu Davidi sín asì é gbɔn?

²³ Enyi kàn kɛɖɛ wɛ jó Abigayilu ǎ, é lɛ́ mɔ nyɔna ɖevo. Ee Davidi sè ɖɔ Nabalu kú é ɔ, é sɛ́ wɛn dó Abigayilu ɖɔ é ni wá huzu asì emitɔn. Abigayilu yí gbè bo ɖɔ: “Un na huzu kannumɔ nú sɛ́ ce, bo na nɔ klɔ́ afɔ nú mɛsɛntɔ́ tɔn lɛ.” É ɖò wɛn ɖɔ hwenu e Davidi ɖɔ ɖɔ é ni wá huzu asì emitɔn é ɔ, é kpó ɖò éɖée sɔ́ hwe wɛ; é tlɛ ɖɔ ɖɔ emi na nɔ klɔ́ afɔ nú mɛsɛntɔ́ tɔn lɛ! Biblu xlɛ́ ɖɔ é lɛ́ yawu bo ɖò gbesisɔmɛ bo na yí da Davidi.—1 Sam. 25:39-42.

24. Wuvɛ̌ ɖevo tɛ lɛ Abigayilu ka mɔ? Nukún tɛ asú tɔn kpo Mawu kpo ka sɔ́ dó kpɔ́n ɛ?

²⁴ Enɛ ko xlɛ́ ɖɔ é kún sɔ́ na mɔ wuvɛ̌ ɖebǔ ó ǎ. Gbɛ̀ na ɖò tɔnfinnɔɔ n’i hwebǐnu, ɖó é da Davidi wutu ǎ. Davidi ko da Axinɔwamu. Mawu tin bɔ sunnu lɛ nɔ da asì gègě hwenɛnu, amɔ̌, é ɖò gaàn ɖɔ enɛ kún nɔ bɔkun nú nyɔnu gbejinɔtɔ́ lɛ ɖebǔ hwenɛnu ó. Gɔ́ nú enɛ ɔ, Davidi ko nyí axɔsu hwe ɔ nu ǎ. Wuvɛ̌ syɛnsyɛn ɖé lɛ tíìn bɔ ye ɖó na tó ɖí xwi xá hwɛ̌ cobɔ Davidi na jɛ sinsɛnzɔ́ mɔhun wá nú Jehovah jí. Amɔ̌, Abigayilu d’alɔ Davidi bo nɔ gudo tɔn hwebǐnu. É sixu ko jì vǐ sunnu ɖokpo n’i; é mɔ nǔ jɛ wu ɖɔ asú emitɔn nɔ sɔ́ emi sù bo nɔ nya xɛ ɖò emi jí. Davidi tlɛ hwlɛn ɛ gbè ɖokpo sín kannumɔgbenu! (1 Sam. 30:1-19) Kpɔ́ndéwú Jehovah Mawu tɔn wɛ é xwedó, ɖó Jehovah nɔ yí wǎn nú nyɔnu ayiɖotenanɔ, akɔnkpantɔ́ kpo gbejinɔtɔ́ lɛ kpo bo nɔ sɔ́ ye sù.