Ðǒ Sísí nú Gbɛ̀ Lee Mawu Jló Gbɔn É

1. Mɛ̌ ka ɖó nǔ e ɖò gbɛ̀ lɛ é bǐ?

GBEYIÐƆ Jelemii ɖɔ: “Nugbǒ ɔ, Jehovah wɛ nyí Mawu. É wɛ nyí Mawu gbɛɖe ɔ.” (Jérémie 10:10) Gɔ́ na ɔ, Jehovah Mawu wɛ ɖó nǔ e ɖò gbɛ̀ lɛ é bǐ. Nǔɖògbɛ e ɖò jixwé lɛ é ɖɔ n’i ɖɔ: “A blǒ nǔ bǐ; hwi wɛ jló bɔ ye tíìn; hwi wɛ jló bɔ ye ɖò gbɛ̀.” (Nǔɖexlɛ́mɛ 4:11) Hú mɔ̌ ɔ, hwenu e Pɔlu wlan wema sɛ́dó Timɔtée é ɔ, é ylɔ Mawu ɖɔ “Mawu e na gbɛ̀ nǔ bǐ” é. (1 Timɔtée 6:13) Hǔn, gbɛ̀ ɔ, nùnina Mawu tɔn wɛ é nyí nɛ.

2. Etɛ Mawu ka wà bo na dó wlíbò nú gbɛ̀ mǐtɔn?

² Jehovah nɔ lɛ́ wlíbò nú gbɛ̀ mǐtɔn. (Mɛsɛ́dó 17:28) É na mǐ nùɖuɖu bɔ mǐ nɔ ɖu, sìn bɔ mǐ nɔ nu, jɔhɔn bɔ mǐ nɔ gbɔ́n, bo lɛ́ na mǐ ayikúngban bɔ mǐ ɖ’eji. (Mɛsɛ́dó 14:15-17) Jehovah bló nǔ enɛ lɛ ɖó alɔkpa ɖé bonu gbɛ̀ na víví. Amɔ̌, bonu mǐ na ɖu gbɛ̀ ɔ sín vivǐ ganji ɔ, mǐ ɖó na kplɔ́n sɛ́n Mawu tɔn lɛ bo setónú nú ye.—Isaïe 48:17, 18.

ÐǑ SÍSÍ NÚ GBƐ̀

3. Etɛ Mawu ka lin dó Abɛli huhu wu?

³ Mawu jló ɖɔ mǐ ni ɖó sísí nú gbɛ̀ mǐtɔn kpo mɛ ɖevo lɛ tɔn kpo. Ði kpɔ́ndéwú ɖé ɔ, ɖò Adamu kpo Ɛva kpo sín hwenu ɔ, vǐ yetɔn Kanyɛɛ wá sìn xomɛ tawun dó nɔví tɔn kpɛví Abɛli wu. Jehovah gbò akpá nú Kanyɛɛ ɖɔ xomɛsin tɔn sixu zɔ́n bɔ é na hu hwɛ syɛnsyɛn. Kanyɛɛ keya nú xó enɛ ǎ. É ‘zɔn nɔví tɔn Abɛli jí bo hu.’ (Genèse 4:3-8) Jehovah dɔn tó nú Kanyɛɛ ɖó nɔví tɔn e é hu é wu.—Genèse 4:9-11.

4. Ðò Mɔyizi Sɛ́n ɔ mɛ ɔ, nɛ̌ Mawu ka ɖè nǔ e mǐ ɖó na nɔ lin dó gbɛ̀ wu é xlɛ́ gbɔn?

⁴ Xwè 2400 mɔ̌ gudo ɔ, Jehovah dó sɛ́n tɔn lɛ nú togun Izlayɛli tɔn. Sɛ́n enɛ lɛ na d’alɔ ye bɔ ye na sɛ́n ɛ lee é jló gbɔn é. È nɔ ylɔ sɛ́n enɛ lɛ hweɖelɛnu ɖɔ Mɔyizi Sɛ́n, ɖó gbeyiɖɔ Mɔyizi jí wɛ Mawu gbɔn bo dó ye. Akpáxwé Mɔyizi Sɛ́n ɔ tɔn ɖé ɖɔ: “A ɖó na hu mɛ ǎ.” (Deutéronome 5:17) Enɛ xlɛ́ Izlayɛli-ví lɛ ɖɔ gbɛ̀ gbɛtɔ́ tɔn xɔ akwɛ nú Mawu, bɔ gbɛtɔ́ lɛ bǐ ɖó na xlɛ́ ɖɔ gbɛ̀ mɛ ɖevo lɛ tɔn xɔ akwɛ.

5. Etɛ mǐ ka ɖó na lin dó xoɖiɖe wu?

⁵ Bɔ gbɛ̀ vǐ e ɖò nɔ tɔn xomɛ é tɔn ka ló? Sɔgbe kpo Mɔyizi Sɛ́n ɔ kpo ɔ, é nyla ɖɔ vǐ e ɖò nɔ tɔn xomɛ é ni kú dó mɛɖé kɔ. Nugbǒ ɔ, vǐ ɔ na bo tlɛ ɖò nɔ tɔn sín xomɛ ɔ, gbɛ̀ tɔn xɔ akwɛ nú Jehovah. (Exode 21:22, 23; Psaume 127:3) Enɛ xlɛ́ ɖɔ xoɖiɖe nyla.

6. Etɛwu mǐ ma ka ɖó na gbɛ́ wǎn nú nɔzo mǐtɔn ǎ?

⁶ Sísí ɖiɖó nú gbɛ̀ lɛ́ byɔ ɖɔ è ni ɖó linlin e sɔgbe é dó nɔzo mɛtɔn wu. Biblu ɖɔ: “Mɛɖebǔ e gbɛ́ wǎn nú nɔví tɔn ɔ mɛhutɔ́ wɛ é nyí; mi ka tuùn ɖɔ mɛhutɔ́ ɖebǔ kún ɖó gbɛ̀ mavɔmavɔ ó.” (1 Jaan 3:15) Enyi mǐ jló na mɔ gbɛ̀ mavɔmavɔ ɔ, mǐ ɖó na ɖè wǎn ɖebǔ e mǐ gbɛ́ nú nɔzo mǐtɔn é sín ayi mɛ, ɖó wangbɛnumɛ nɔ zɔ́n dakaxixo mɛ. (1 Jaan 3:11, 12) É ɖò dandan ɖɔ mǐ ni kplɔ́n bo nɔ yí wǎn nú mɛ ɖevo lɛ.

7. Nùwálɔ̀ tɛ lɛ ka nɔ xlɛ́ ɖɔ è kún ɖó sísí nú gbɛ̀ ó?

⁷ Nɛ̌ mǐ ka na xlɛ́ ɖɔ mǐ ɖó sísí nú gbɛ̀ mǐɖesunɔ tɔn gbɔn? Ðò kpaà mɛ ɔ, mɛɖebǔ nɔ ba na kú ǎ, amɔ̌, mɛɖé lɛ sixu kú, ɖó gbɛɖuɖu kpowun wu. Ði kpɔ́ndéwú ɖé ɔ, mɛ gègě nɔ fún azɔ, nɔ dó azɔ ɖɛ̌, nɔ nu azɔ, alǒ nɔ nu gě bo na dó ɖè ayi ɖ’ayǐ. Nǔ enɛ lɛ nɔ dó azɔn agbaza bo nɔ hu mɛ e nɔ zán lɛ é hwɛhwɛ. Mɛ e nɔ wà nǔ enɛ lɛ é sɔ́ gbɛ̀ ylɔ ɖɔ nǔ mímɛ́ ǎ. Walɔ enɛ lɛ kwiji ɖò Mawu sín nukúnmɛ. (Hlɔmanu lɛ 6:19; 12:1; 2 Kolɛntinu lɛ 7:1) Bonu mǐ na sɛ̀n Mawu lee é jló gbɔn é ɔ, mǐ ɖó na jó walɔ mɔhun lɛ dó. Mɔ̌ biblo sixu vɛwǔ, amɔ̌, Jehovah hɛn ɔ, é na d’alɔ mǐ. É nɔ tuùn kàn e ván wɛ mǐ ɖè bo na wlíbò nú gbɛ̀ mǐtɔn e nyí nùnina xɔ akwɛ bo gosin gɔ̌n tɔn é nú mǐ.

8. Etɛwu mǐ ka ɖó na hɛn nǔ e mǐ na bló bo ma na zé gbɛ̀ mǐtɔn ɖó agbagbaɖa ǎ é dó ayi mɛ?

⁸ Enyi mǐ ɖó sísí nú gbɛ̀ ɔ, mǐ ɖó na nɔ hɛn nǔ e mǐ na bló bo ma na zé gbɛ̀ mǐtɔn ɖó agbagbaɖa ǎ é dó ayi mɛ. Mǐ na nyí vɛ̌donúnǔtɔ́ ǎ, mǐ ka na lɛ́ sɔ́ gbɛ̀ mǐtɔn ɖó axɔ nu ɖó gbɛɖuɖu kpowun alǒ awekikɛ wu ǎ. Mǐ ɖó na nɔ nɔ acéjí hwenu e mǐ ɖò kɛkɛ alǒ mɔ̌to kun wɛ é, bo na nɔ lɛ́ nyì alɔ nú ayihun zingidi tɔn lɛ. (Psaume 11:5) Mawu dó sɛ́n nú Izlayɛli hwexónu tɔn bo ɖɔ: “Enyi a gbá xɔ yɔyɔ̌ ɖé [bonu é ɖó xɔta] ɔ, a ɖó na lɛ́ dó glɔn [alǒ mɛ̀ dǒ kpɛví] ɖé nú xɔta towe, bo ma hɛn hun wá xwé towe jí ó, ɖó mɛɖé sixu flɛ́ bo j’ayǐ sín finɛ.” (Deutéronome 22:8) Sɔgbe kpo nugbodòdó e ɖò sɛ́n enɛ ɔ mɛ é kpo ɔ, wlǐbò nú nǔ ɖebǔ e a ɖó lɛ é ganji, ɖi dò ɖebǔ e ɖò xwé towe gbè é bonu mɛɖebǔ ni ma wá jɛ mɛ bo gblewu ó. Enyi a ɖó kɛkɛ alǒ mɔ̌to hǔn, mɔ nǔ jɛ wu ɖɔ é ɖò ganji. Ma lɔn bonu xwé towe, kɛkɛ towe, alǒ mɔ̌to towe ni hɛn awovinú ɖé wá nú we alǒ nú mɛ ɖevo lɛ ó.

9. Enyi mǐ ɖó sísí nú gbɛ̀ ɔ, nɛ̌ mǐ ka na nɔ wà kanlin lɛ sín nǔ gbɔn?

⁹ Bɔ gbɛ̀ kanlin ɖé tɔn ka ló? Nǔ mímɛ́ wɛ elɔ nyí nú Gbɛɖotɔ́ ɔ. Mawu na gbè bɔ è nɔ hu kanlin lɛ bo nɔ ɖu, bo nɔ dó bló nǔzìnzán, alǒ bo na dó cyɔn alɔ gbɛ̀ gbɛtɔ́ lɛ tɔn jí. (Genèse 3:21; 9:3; Exode 21:28) É ɖò mɔ̌ có, dakaxixo kanlin lɛ wu alǒ è na hu ye dó d’ayihun kpowun sɔgbe ǎ, bo lɛ́ xlɛ́ ɖɔ è kún ɖó sísí nú nǔ mímɛ́ e gbɛ̀ nyí é ó.—Proverbes 12:10.

ÐǑ SÍSÍ NÚ HUN

10. Nɛ̌ Mawu ka ɖexlɛ́ ɖɔ gɛdɛ ɖé ɖò gbɛ̀ kpo hun kpo tɛntin gbɔn?

¹⁰ Ee Kanyɛɛ hu nɔví tɔn Abɛli gudo é ɔ, Jehovah ɖɔ n’i ɖɔ: “Nɔví towe sín hun ɖò xó sú wá gɔ́n ce wɛ sín ayikúngban ɔ jí.” (Genèse 4:10) Gbɛ̀ Abɛli tɔn xó ɖɔ wɛ Mawu ɖè hwenu e é ɖɔ hun tɔn é. Kanyɛɛ hu Abɛli, bɔ dìn ɔ, è ɖó na dɔn tó n’i. É cí ɖɔ hun alǒ gbɛ̀ Abɛli tɔn ɖò xó sú sɛ́dó Jehovah wɛ ɖɔ é ni da hwɛ ɖɔhun. Ee Sìn Vɔ Gbɛ̀ ɖò Nɔwee hwenu gudo é ɔ, Mawu lɛ́ ɖè gɛdɛ e ɖò gbɛ̀ kpo hun kpo tɛntin é xlɛ́. Jɛ nukɔn nú Sìn Vɔ Gbɛ̀ ɔ, atín sínsɛ́n, mǎ, kpo jinukún lɛ kpo kɛɖɛ wɛ gbɛtɔ́ lɛ nɔ ɖu. Ðò Sìn Vɔ Gbɛ̀ ɔ gudo ɔ, Jehovah ɖɔ nú Nɔwee kpo vǐ tɔn lɛ kpo ɖɔ: “Mi hɛn ɔ, mi na ɖu kanlin e nɔ yì bo ɖò gbɛ̀ lɛ é bǐ. Lee un na mǎ mi gbɔn é ɔ, mɔ̌ wɛ un na ye bǐ mi.” É ɖò mɔ̌ có, Mawu dó sɛ́n elɔ: “Lan ɔ kpo lindɔ̌n [alǒ gbɛ̀] tɔn kpo kɛɖɛ, é wɛ nyí hun tɔn, wɛ mi ma ɖó na ɖu ǎ.” (Genèse 1:29; 9:3, 4) Jehovah xlɛ́ céɖécéɖé ɖɔ gɛdɛ syɛnsyɛn ɖé ɖò gbɛ̀ kpo hun nùɖíɖó ɖé tɔn kpo tɛntin.

11. Sɛ́n tɛ Mawu ka dó dó hun wu sín Nɔwee hwenu?

¹¹ Mǐ nɔ ɖu hun ǎ bo nɔ dó xlɛ́ ɖɔ mǐ ɖó sísí na. Ðò Sɛ́n e Jehovah dó nú Izlayɛli-ví lɛ é mɛ ɔ, é ɖegbe ɖɔ: “Enyi mɛɖebǔ . . . yì gbě, bo wlí gběkanlin alǒ xɛ e è nɔ ɖu é ɔ, mɛ enɛ ɔ ɖó na kɔn hun tɔn bo bú kɔ́ dó. . . . Un ɖɔ nú togun Izlayɛli tɔn ɖɔ: ‘Mi ɖó na ɖu hun nǔɖògbɛ ɖebǔ tɔn ǎ.’” (Lévitique 17:13, 14) Xwè 800 mɔ̌ jɛ nukɔn ɔ, Mawu ko dó hun kanlin tɔn ɖuɖu sín sɛ́n enɛ azɔn nukɔntɔn ɔ nú Nɔwee. Sɛ́n enɛ ka kpó ɖò te. Linlin Jehovah tɔn ɖò nǔglɔ ǎ: mɛ e nɔ sɛ̀n ɛ lɛ é hɛn ɔ, ye na ɖu kanlin sín lan, amɔ̌, ye na ɖu hun kanlin tɔn ǎ. Ye ɖó na kɔn hun ɔ dó kɔ́ mɛ. Mɔ̌ biblo xlɛ́ ɖɔ è lɛkɔ nú gbɛ̀ nùɖíɖó ɔ tɔn sɛ́dó Mawu.

12. Sɛ́n tɛ è ka dó dó hun wu gbɔn gbigbɔ mímɛ́ gblamɛ ɖò xwè kanweko nukɔntɔn ɔ mɛ, bɔ é kpó ɖò te jɛ égbé?

¹² Sɛ́n ɖokpo ɔ lɛ́ kpó ɖò te nú Klisanwun lɛ. Mɛsɛ́dó lɛ kpo sunnu ɖevo e nɔ nɔ nu nú ahwanvu Jezu tɔn lɛ ɖò xwè kanweko nukɔntɔn ɔ mɛ lɛ é kpo xò yeɖee kplé bo na dó ɖɔ xó dó sɛ́n e mɛ bǐ ɖó na nyì ɖò agun Klisanwun tɔn mɛ lɛ é jí. Gbeta e jí ye wá cí te dó é ɖíe: “[Gbigbɔ mímɛ́] kpodo mǐ kpo mɔ ɖɔ mǐ kún sɔ́ na zɔ́n azɔ̌ ɖevo mi zɛ ee ɖò taji bɔ mi ɖó na wà ɔ wu ó; é wɛ nyí ɖɔ: mi ma ɖu nǔ e è xwlé vodun e ɖě ó; mi ma ɖu hun ó [alǒ mi nɔ zɔ nú hun, NW]; mi ma ɖu kanlin e è glɔ̌n agbɔ̌n na bo hu lɛ ɖě sín lan ó; mi ma ka lɛ̀ aga ó.” (Mɛsɛ́dó 15:28, 29; 21:25) Enɛ wu ɔ, mǐ ɖó na “nɔ zɔ nú hun.” Ðò nukún Mawu tɔn mɛ ɔ, mɔ̌ biblo mǐtɔn ɖò taji lee alɔ nyìnyì nú vodun sínsɛ́n kpo aga kpo ɖò taji nú mǐ gbɔn é ɖɔhun.

13. Jlɛ̌ nǔ e wu sɛ́n e ɖɔ è ni nɔ zɔ nú hun é lɛ́ kúnkplá hundido é dó nùɖé wu.

¹³ Sɛ́n e ɖɔ è ni nɔ zɔ nú hun é ka kúnkplá hundido wɛ à? Ganji. Nùjlɛdonǔwu ɖé ɖíe: Enyi dotóo towe ɖɔ nú we ɖɔ a ni nɔ zɔ nú ahan syɛnsyɛn ɔ, ɖiɖɔ wɛ é ɖè ɖɔ a kún ɖó na nu ahan syɛnsyɛn ó, amɔ̌, a hɛn ɔ, a na dó dó lanmɛ à? É ɖò gaàn ɖɔ é kún nyí mɔ̌ ó! Mɔ̌ ɖokpo ɔ, zɔ ninɔ nú hun sín tinmɛ wɛ nyí ɖɔ é kún ɖó na byɔ lan mɛtɔn mɛ gbɔn alɔkpa ɖebǔ ó. Enɛ wu ɔ, sɛ́n e ɖɔ mǐ ni nɔ zɔ nú hun é lɛ́ ɖò ɖiɖɔ wɛ ɖɔ mǐ kún ɖó na lɔn bonu mɛɖebǔ na dó hun nú mǐ ó.

14. Enyi dotóo lɛ ɖɔ ɖɔ Klisanwun ɖé ɖó na dó hun ɔ, nɛ̌ é ka na wà nǔ gbɔn?

¹⁴ Enyi Klisanwun ɖé gblewu vantankannya alǒ è ɖó na wà azɔ̌ n’i ɔ ka ló? Mǐ ni ɖɔ ɖɔ dotóo lɛ ɖɔ ɖɔ é ɖó na dó hun, é ma nyí mɔ̌ ǎ ɔ, é na kú. Nugbǒ wɛ ɖɔ Klisanwun ɔ kún na jló na kú ó. Bo na dó hwlɛn gbɛ̀ e nyí nùnina xɔ akwɛ ɖé bo gosin Mawu gɔ́n é ɔ, é na yí gbè nú nukún kpé dó mɛ wu alɔkpa ɖevo e ma na byɔ ɖɔ è ni zán hun nyì dò ǎ lɛ é. Enɛ wu ɔ, é na ba nukún kpé dó mɛ wu mɔhun lobo na yí gbè nú nǔ ɖevo e sixu nɔ hun ɔ tɛnmɛ bo ɖè lɛ é.

15. Etɛwu sɛ́n Mawu tɔn lɛ nyínyí ka ɖó lè nú mǐ?

¹⁵ Klisanwun ɖé na gbà sɛ́n Mawu tɔn bo na dó sixu lɛ́ nɔ gbɛ̀ kpɛɖé d’eji kpowun ɖò gbɛ̀ elɔ mɛ wɛ à? Jezu ɖɔ: “Mɛ e jló na hwlɛn gbɛ̀ éɖee tɔn gán ɔ, gbɛ̀ tɔn na bú dó é; mɛ e ka na hɛn gbɛ̀ tɔn bú ɖó nyɛ wutu ɔ, na hwlɛn gbɛ̀ tɔn gán.” (Matie 16:25) Mǐ jló na kú ǎ. Amɔ̌, enyi mǐ gbà sɛ́n Mawu tɔn bo dó hwlɛn gbɛ̀ mǐtɔn ɔ, mǐ sixu xò gbɛ̀ mavɔmavɔ ɔ kpò. Enɛ wu ɔ, mǐ ɖó na ɖeji dó sɛ́n Mawu tɔn wu, bo na ɖó ganjɛwu kpíkpé ɖɔ enyi mǐ na bo kú ɖó nǔ ɖebǔ wutu ɔ, Gbɛnamɛtɔ́ mǐtɔn na flín mǐ bo na fɔ́n mǐ, lobo na lɛ́ na mǐ nùnina xɔ akwɛ enɛ e nyí gbɛ̀ é.—Jaan 5:28, 29; Eble lɛ 11:6.

16. Etɛ Mawu sɛntɔ́ lɛ ka nɔ kudeji bo na wà dó hun wu?

¹⁶ Ðò égbé ɔ, Mawu sɛntɔ́ gbejinɔtɔ́ lɛ nɔ kudeji bo na nyì sɛ́n e é dó dó hun wu é. Ye nɔ ɖu hun gbɔn alɔkpa ɖebǔ mɛ ǎ, mɔ̌ jɛn ye ma ka nɔ yí gbè bo nɔ lɛ́ dó, ɖó lanmɛ yetɔn na nɔ ganji wutu ǎ é nɛ.a Ye ɖó jiɖiɖe ɖɔ Mawu e ɖó hun é tuùn nǔ e na nyí ɖagbe nú ye hugǎn é. Hwi lɔ ka ɖi ɖɔ é tuùn nugbǒ à?

HUN ZINZAN ALƆKPA ÐOKPO E SƆGBE É

17. Hun zinzan alɔkpa ɖě tɛ kɛɖɛ Jehovah Mawu ka yí gbè na nú Izlayɛli-ví hwexónu tɔn lɛ?

¹⁷ Mɔyizi Sɛ́n ɔ tɛɖɛ̌ hun zinzan alɔkpa ɖokpo e sɔgbe é jí. Jehovah ɖegbe nú Izlayɛli-ví hwexónu tɔn lɛ dó sinsɛn biblo e é ba ɖò ye sí é wu ɖɔ: “Hun ɔ nɔte nú gbɛ̀ nùɖíɖó ɔ tɔn, bɔ nyɛɖesu kɔn dó vɔsakpe ɔ jí nú mi nú yɛsu lindɔ̌n [alǒ gbɛ̀] mitɔn tɔn, ɖó hun ɔ wɛ nɔ fɔ yɛsu.” (Lévitique 17:11) Enyi Izlayɛli-ví lɛ hu hwɛ ɔ, Mawu hɛn ɔ, é na sɔ́ kɛ ye. Amɔ̌, ye na tó sɔ́ kanlin ɖé sɔ́ dó savɔ̌ bo kɔn hun tɔn kpɛɖé dó vɔsakpe ɔ jí ɖò goxɔ Mawu tɔn mɛ hwɛ̌. Hwenu e è wá gbá tɛmpli ɔ é ɔ, ye nɔ lɛ́ bló mɔ̌ ɖ’emɛ. Vɔsisa mɔhun lɛ kɛɖɛ hwenu wɛ hun zinzan sɔgbe ɖè.

18. Lè kpo nyɔna tɛ lɛ kpo mǐ ka sixu mɔ ɖó hun Jezu tɔn e kɔn nyì ayǐ é wu?

¹⁸ Klisanwun nugbǒ lɛ sɔ́ ɖò Mɔyizi Sɛ́n ɔ glɔ ǎ. Enɛ wu ɔ, ye sɔ́ nɔ sɔ́ kanlin dó savɔ̌ bo nɔ kɔn hun tɔn dó vɔsakpe ɖé jí ǎ. (Eble lɛ 10:1) É ɖò mɔ̌ có, hun kinkɔn dó vɔsakpe ɔ jí ɖò Izlayɛli-ví hwexónu tɔn lɛ hwenu nyí yɛ vɔsisa xɔ akwɛ Vǐ Mawu tɔn Jezu Klisu tɔn tɔn. Lee mǐ ko kplɔ́n gbɔn ɖò Wemata 5gɔ́ wema elɔ tɔn mɛ é ɔ, Jezu yí gbè bɔ è kɔn hun tɔn kɔn nyì ayǐ vɔsisa ɖé ɖɔhun bo dó sɔ́ gbɛ̀ tɔn jó dó ta mǐtɔn mɛ. Enɛ gudo ɔ, é lɛkɔ yì jixwé bo sɔ́ lee hun tɔn e kɔn nyì ayǐ é xɔ akwɛ gbɔn é xwlé Mawu azɔn ɖokpo bɔ xó fó. (Eble lɛ 9:11, 12) Enɛ hun sisɔkɛ hwɛ mǐtɔn lɛ tɔn kpodo gbɛ̀ mavɔmavɔ kpo sín ali nú mǐ. (Matie 20:28; Jaan 3:16) Hun zinzan alɔkpa enɛ xɔ akwɛ tawun. (1 Piyɛɛ 1:18, 19) Nùɖiɖi ɖiɖexlɛ́ ɖò hun Jezu tɔn e kɔn nyì ayǐ é mɛ kɛɖɛ wɛ sixu zɔ́n bɔ mǐ na mɔ hwlɛngán.

19. Etɛ mǐ ka ɖó na wà bo na dó xlɛ́ ɖɔ mǐ “mɛ́ sín hun gbɛtɔ́ lɛ bǐ tɔn mɛ”?

¹⁹ Mǐ ɖó na tuùn nùnina wanyiyinɔ e nyí gbɛ̀ bɔ Jehovah na mǐ é n’i tawun. Enɛ ɖó na sísɛ́ mǐ bɔ mǐ na tinmɛ nú mɛ ɖevo lɛ ɖɔ gbɛ̀ mavɔmavɔ sín ali hun nú ye bɔ ye ɖó na ɖè nùɖiɖi xlɛ́ ɖò vɔsisa Jezu tɔn mɛ bo na mɔ. Ya ké nú gbɛ̀ nɔzo mǐtɔn lɛ tɔn Mawu ɖɔhun na sísɛ́ mǐ bɔ mǐ na ɖókan dó xó tɔn ɖiɖɔ nú ye wu. (Ézékiel 3:17-21) Enyi mǐ nɔ wà azɔ̌ enɛ ganji ɔ, mǐ hɛn ɔ, mǐ na ɖɔ mɛsɛ́dó Pɔlu ɖɔhun ɖɔ: “Enyi mɛɖé dɔn ɖò mi mɛ ɔ, é sɔ́ kàn mì ǎ [un mɛ́ sín hun gbɛtɔ́ lɛ bǐ tɔn mɛ, NW]! Ðó un jla tito Mawu tɔn ɔ bǐ mǐ.” (Mɛsɛ́dó 20:26, 27) Xó Mawu tɔn kpo linlin tɔn lɛ kpo ɖiɖɔ nú mɛ ɖevo lɛ nyí wlɛnwín ɖagbe ɖokpo bɔ mǐ na dó xlɛ́ ɖɔ mǐ ɖó sísí ɖaxó nú gbɛ̀ kpo hun kpo.