Alɔdlɛndónǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
3-9 DÉCEMBRE
DƆKUN MAWUXÓ Ɔ TƆN ÐÉ LƐ | MƐSƐ́DÓ 9-11
Nǔ Xɔ Akwɛ Biblu Tɔn lɛ Biba
nwtsty sín tinmɛ ɖevo dó Mɛ 10:6 jí
Sinmɔ́ɔ, anyǔzɔ́watɔ́ ɖé: Anyǔzɔ́watɔ́ ɖé nɔ zán sin e è nɔ ylɔ́ ɖɔ eau de chaux é dó ɖeɖɛ kanlin lɛ sín anyǔ na, bo nɔ ɖè fún, lanti kpo jǒ lɛ kpo síìn. Enɛ gudo ɔ, é nɔ zán ahan syɛnsyɛn ɖé dó wà anyǔ ɔ sín azɔ̌ bonu è na zán dó bló nǔ vovo lɛ. Kanlin lɛ sín anyǔ ɖiɖeɖɛ nɔ hwɛ́n wǎn tawun bo nɔ byɔ ɖɔ è ni zán sin gegě; enɛ wu wɛ Sinmɔ́ɔ na ko nɔ nɔ xutó, vlafo ɖò Jopée sín xutó. Sɔgbe xá Mɔyizi Sɛ́n ɔ ɔ, enyi mɛɖé zán kanlin kúkú lɛ dó w’azɔ̌ na ɔ, mɛ bliblí wɛ mɛ enɛ nyí. (Le 5:2; 11:39) Enɛ wu ɔ, Jwifu gegě nɔ kéya nú anyǔzɔ́watɔ́ lɛ ǎ, bo na xò nǔ kpɔ́n dó xwé yetɔn gbè dídɔ́ wu. Nǔgbo ɔ, Talmud wá da azɔ̌ e anyǔzɔ́watɔ́ ɖé nɔ wà é kpɔ́n bo mɔ ɖɔ mɛ e nɔ bɛ́ kanlin lɛ sín mǐ é ɖò nukɔn nú ye. É ɖò mɔ̌ có, Piyɛ́ɛ lɔn bɔ mɛ ɖiɖe ɖó vo zɔ́n bonu é ɖó wǔ zɔ nú Sinmɔ́ɔ ǎ. Mɛ e Piyɛ́ɛ ma kán ɖó vo ǎ é zɔ́n bɔ azɔ̌ ɖevo sín ali hun n’i, enɛ wɛ nyí ba e é yì ba Kosi ɖé kpɔ́n ɖò xwé tɔn gbè é. Akɔwé ɖé lɛ mɔ ɖɔ xókwín Glɛkigbe tɔn e è lilɛ dó “anyǔzɔ́watɔ́” (byr·seusʹ) é wɛ nyí daagbo-nyikɔ Sinmɔ́ɔ tɔn.
10-16 DÉCEMBRE
DƆKUN MAWUXÓ Ɔ TƆN ÐÉ LƐ | MƐSƐ́DÓ 12-14
Nǔ Xɔ Akwɛ Biblu Tɔn lɛ Biba
nwtsty sín tinmɛ ɖevo lɛ dó Mɛ 13:9 jí
Solu e è nɔ lɛ́ ylɔ́ ɖɔ Pɔlu ɔ: Bɛ́sín finɛ ɖidó ɔ, è nɔ ylɔ́ Solu ɖɔ Pɔlu. È jì mɛsɛ́dó ɔ b’ɛ nyí Eblée, bo ka ɖó toví Hlɔma tɔn sín acɛ. (Mɛ 22:27, 28; Fili 3:5) Enɛ wu ɔ, é sixu ko nyí ɖɔ sín vǔ tɔn wɛ é ko ɖó Eblée sín nyikɔ e nɔ nyí Solu é kpo Hlɔma sín nyikɔ e nɔ nyí Pɔlu é kpo. Jwifu gegě wɛ nɔ ɖó nyikɔ we hwenɛnu, ɖò taji ɔ, ye mɛ ɖěɖee ma nɔ nɔ Izlayɛli ǎ lɛ é. (Mɛ 12:12; 13:1) Mɔ̌ ɖokpo ɔ, hɛnnumɔ Pɔlu tɔn ɖé lɛ ɖó Hlɔma sín nyikɔ kpo Glɛki sín nyikɔ kpo. (Hlɔ 16:7, 21) Ðó Pɔlu “nyí mɛsɛ́dó nú mɛ e ma nyí Jwifu ǎ lɛ” é wutu ɔ, è ɖè azɔ̌ n’i ɖɔ é ni yì jla wɛnɖagbe ɔ mɛ e ma nyí Jwifu ǎ lɛ é. (Hlɔ 11:13) É cí ɖɔ é wá gbeta ɔ kɔn bo na zán Hlɔma nyikɔ tɔn; é sixu ko lin ɖɔ mɛ lɛ na yí emi hugǎn ɖó enɛ wu. (Mɛ. 9:15; Ga 2:7, 8) Mɛɖé lɛ ɖɔ ɖɔ é zán Hlɔma nyikɔ ɔ bo na dó wlí yɛ̌yi nú Sɛjiwusi Polusi wɛ; é ka cí ɖɔ nǔ kún nyí mɔ̌ ó ɖɔhun, ɖó Pɔlu tlɛ zán nyikɔ ɔ hwenu e é gosin Ciplu gudo é. Mɛ ɖevo lɛ ɖɔ ɖɔ Pɔlu kún zán Eblée nyikɔ tɔn ó, ɖó lee è nɔ ylɔ́ gbɔn ɖò Glɛkigbe mɛ é nyí nǔ ɖokpo ɔ xá xókwín Glɛkigbe tɔn ɖé, bɔ xókwín enɛ nɔ dó gesí gbɛtɔ́ (alǒ kanlin) e nɔ ba glǎdi dó zɔnlin mɛ é ɖé.—Kpɔ́n tinmɛ ɖevo dó Mɛ 7:58 jí.
Pɔlu: Ðò Akpáxwé Biblu Tɔn E È Wlan Dó Glɛkigbe Mɛ É mɛ ɔ, nyikɔ Paulos (Paulus ɖò Latɛ́ɛngbe mɛ) ee sín tinmɛ nyí “Kpɛɖé; Kpɛví” é ɔ, azɔn 157 wɛ è zán dó dó gesí mɛsɛ́dó Pɔlu, bo zán azɔn ɖokpo dó dó gesí tokpɔngán Ciplu tɔn e nɔ nyí Sɛjiwusi Polusi é.—Mɛ 13:7.
17-23 DÉCEMBRE
DƆKUN MAWUXÓ Ɔ TƆN ÐÉ LƐ | MƐSƐ́DÓ 15-16
Nǔ Xɔ Akwɛ Biblu Tɔn lɛ Biba
nwtsty sín tinmɛ ɖevo dó Mɛ 16:37 jí
Hlɔmanu wɛ mǐ nyí: Enɛ wɛ nyí, toví Hlɔma tɔn lɛ. Pɔlu vlafo kpo Silasi kpo nyí toví Hlɔma tɔn lɛ. Sɛ́n Hlɔma tɔn ɖɔ ɖɔ toví ɖé ɖó acɛ hwebǐnu bɔ è na ɖɔhwɛ tɔn lee é jɛxa gbɔn é, lobɔ è kún ɖó na dɔn tó n’i gbeɖé ɖò agbawungba ma tò ɖɔhwɛ tɔn hwɛ̌ ó. Toví Hlɔma tɔn nyínyí nɔ zɔ́n bɔ è nɔ ɖó acɛ ɖé lɛ kpo wǔjɔmɛ ɖé lɛ kpo ɖò fí ɖebǔ e è na yì ɖò axɔsuɖuto ɔ mɛ é. Toví Hlɔma tɔn ɖé ɖó na nyi sɛ́n Hlɔma tɔn, é nyí sɛ́n tokpɔn lɛ tɔn ǎ. Enyi è dóhwɛ ɛ ɔ, é sixu yí gbè ɖɔ è ni ɖɔhwɛ emitɔn sɔgbe kpo sɛ́n xá ɔ mɛ tɔn kpo; é ɖò mɔ̌ có, é lɛ́ ɖó acɛ bo na sɔ́ xó ɔ yì hwɛɖɔxɔsa Hlɔma tɔn ɖé. Enyi hwɛ e wu è nɔ ɖó kúhwɛ́ nú mɛ é ɖé wɛ ɔ, é ɖó acɛ bo na vɔ́ hwɛ ylɔ́ ɖò dada ɔ gɔ́n. Mɛsɛ́dó Pɔlu jla wɛnɖagbe ɔ mlɛ́mlɛ́ gbɔn Axɔsuɖuto Hlɔma tɔn ɔ bǐ mɛ. Ninɔmɛ atɔn mɛ wɛ Biblu ɖɔ nú mǐ ɖè ɖɔ é zán toví Hlɔma tɔn e é nyí é sín acɛ. Wemafɔ elɔ mɛ wɛ é zán nukɔntɔn ɔ ɖè ɖò Filipu, hwenu e é ɖɔ nú hwɛɖɔtɔ́ Filipunu lɛ tɔn lɛ ɖɔ ye xò emi dó t’afɔ acɛ emitɔn lɛ jí é.—Bo na dó tuùn ninɔmɛ we ɖě lɛ hǔn, kpɔ́n tinmɛ ɖevo lɛ dó Mɛ 22:25; 25:11 jí.
24-30 DÉCEMBRE
DƆKUN MAWUXÓ Ɔ TƆN ÐÉ LƐ | MƐSƐ́DÓ 17-18
“Xwedó Kpɔ́ndéwú Mɛsɛ́dó Pɔlu Tɔn Ðò Wɛnɖagbejijla kpo Mɛkplɔnkplɔn kpo Linu”
nwtsty sín tinmɛ ɖevo lɛ dó Mɛ 17:2, 3 jí
jlɛ́ xó dó xó wu: Pɔlu jla wɛnɖagbe ɔ ye kpowun ǎ. É tinmɛ bo lɛ́ na kúnnuɖenú lɛ sín Mawuxówema ɔ mɛ, enɛ wɛ nyí ɖɔ, sín Akpáxwé Biblu Tɔn E È Wlan Dó Ebléegbe Mɛ É mɛ. É wà nǔ hú wemafɔ lɛ xixa kpowun; é jlɛ́ xó dó xó wu sín ye mɛ, lobo huzu xó tɔn sɔgbe xá tóɖóetɔ́ lɛ. Xókwín Glɛkigbe tɔn di·a·leʹgo·mai sín tinmɛ wɛ nyí “è ni bɛ́ xóɖɔɖókpɔ́ xá mɛ; è ni ɖɔ xó xá mɛ; è ni ɖɔ xó ɖó kpɔ́.” Tinmɛ tɔn nɔ lɛ́ nyí nǔwaɖókpɔ́ xá mɛ lɛ. È lɛ́ zán xókwín Glɛkigbe tɔn enɛ ɖò Mɛ 17:17, nwt; 18:4, 19, nwt; 19:8, 9; 20:7, 9 mɛ.
ɖò ɖiɖexlɛ́ wɛ gbɔn alɔdlɛndónǔ lɛ gblamɛ: Xógbe Glɛkigbe tɔn ɔ sín tinmɛ tlɔlɔ wɛ nyí “è ni xokplé (dɔn ɖó kpɔ́).” Enɛ sixu xlɛ́ ɖɔ Pɔlu xwè sɔ bo jlɛ́ nǔɖɔɖ’ayǐ e kan Mɛsiya ɔ bo ɖò Akpáxwé Biblu Tɔn E È Wlan Dó Ebléegbe Mɛ É mɛ lɛ é dó nǔ ɖěɖee jɛ ɖò gbɛzán Jezu tɔn mɛ lɛ é wu, bo dó xlɛ́ lee nǔɖɔɖ’ayǐ enɛ lɛ jɛnu gbɔn Jezu jí gbɔn é.
nwtsty sín tinmɛ ɖevo dó Mɛ 17:17 jí
axi mɛ: Axi Atɛni tɔn (agora ɖò Glɛkigbe mɛ) ɖò totaligbé-gbadahweji Acropole tɔn, bo ɖó ɛtáa 5 alǒ hú mɔ̌. É nyí nǔ kɛɖɛ wɛ è nɔ sà bo nɔ lɛ́ xɔ ɖò axi ɔ mɛ ǎ. É wɛ lɛ́ nyí azinkan nú nǔ ɖěɖee kan akwɛzinzan, toxóɖiɖɔ, kpo aca toxo ɔ tɔn lɛ kpo lɛ é. Atɛninu lɛ nɔ yí wǎn nú kplé biblo ɖò tokplétɛn enɛ, bɔ wemasetɔ́ lɛ nɔ ɖɔ xó ɖó kpɔ́ ɖò finɛ.
nwtsty sín tinmɛ ɖevo dó Mɛ 17:22, 23 jí
Nú Mawu e è ma tuùn ǎ é ɖé: Akpáxwé nǔwlanwlán e è mɔ ɖò vɔsakpe Atɛni tɔn lɛ ɖokpo jí é tɔn wɛ xógbe Glɛkigbe tɔn Agnôstoï Théôï ɔ nyí. Atɛninu lɛ nɔ gbá vodunxɔ gegě, bo nɔ lɛ́ mɛ vɔsakpe gegě dó ɖè xɛsi e ye ɖi nú vodun yetɔn lɛ é xlɛ́; ye tlɛ nɔ mɛ vɔsakpe lɛ nú vodun e bú dò lɛ é, ɖi Susu, Jlɛjininɔ, Hlɔnhlɔn, Mɛ Jí Ðuɖu Ðè, kpo Nǔblawu kpo. Vlafo ye ɖi xɛsi ɖɔ emi sixu ko wɔn vodun ɖé, bɔ é táa wá dɔn tó nú emi ɖó enɛ wu wutu ɔ, ye mɛ vɔsakpe ɖokpo “nú Mawu e è ma tuùn ǎ é ɖé.” Gbɔn vɔsakpe enɛ gblamɛ ɔ, togun ɔ yí gbè ɖɔ Mawu ɖé tíìn bɔ emi kún tuùn nǔ ɖebǔ dó wǔ tɔn ó. Kpo azɔ̌tuùntuùn kpo ɔ, Pɔlu gbɔn vɔsakpe enɛ e mɔ wɛ ye ɖè é sín yɛkan mɛ bo ɖekúnnu nú ye, lobo ɖɔ Mawu nǔgbo ɔ e wu ye ma ko tuùn nǔ ɖebǔ dó kaka jɛ gan enɛ mɛ ǎ é sín xó nú ye.
nwtsty sín tinmɛ ɖevo dó Mɛ 18:21 jí
Enyi Jehovah jló ɔ: Xógbe ɖé wɛ bo tɛɖɛ̌ jí ɖɔ enyi è ɖò nǔɖe wà wɛ alǒ ɖò tuto bló wɛ bo na bló nǔ ɖebǔ ɔ, è ɖó na nɔ sɔ́ jlǒ Mawu tɔn lɔ d’emɛ. Mɛsɛ́dó Pɔlu hɛn nǔgbododó enɛ dó ayi mɛ gbánwúngbánwún. (1Kɔ 4:19; 16:7; Eb 6:3) Ahwanvu Jaki lɔmɔ̌ dó wusyɛn lanmɛ nú nǔxatɔ́ tɔn lɛ ɖɔ ye ni nɔ ɖɔ: “Enyi é jló Aklunɔ ɔ, mǐ na nɔ gbɛ̀, bo na wà lě, bo na wà lě.” (Ja 4:15) Mǐ ɖó na nɔ zán xógbe enɛ lɛ vɔ̌tɔ́ kpowun ǎ; enyi mɛɖebǔ ɖɔ kpo ayi tɔn bǐ kpo ɖɔ “enyi Mawu jló ɔ” ɔ, é ɖó na tɛ́n kpɔ́n, bo wà nǔ sɔgbe xá jlǒ Jehovah tɔn. É byɔ ɖɔ è ni nɔ ɖò ɖiɖɔ dó jǐ wɛ hwebǐnu ǎ, loɔ, ayi mɛ wɛ è nɔ ɖɔ dó hwɛhwɛ.—Tinmɛ ɖevo lɛ dó Mɛ 21:14 jí; 1Ja 4:19; Ja 4:15 kpo Nud. C kpo.